അബുദാബിയിൽ നടന്ന 15-ാമത് യുഎൻ കോൺഗ്രസിനിടെ, കേന്ദ്ര നിയമ-നീതി സഹമന്ത്രി (സ്വതന്ത്ര ചുമതല) ശ്രീ അർജുൻ റാം മേഘ്‌വാൾ യുഎഇ നിയമമന്ത്രി അബ്ദുള്ള സുൽത്താൻ ബിൻ അവാദ് അൽ നുഐമിയുമായി കൂടിക്കാഴ്ച നടത്തി. സാങ്കേതികവിദ്യയിൽ അധിഷ്ഠിതമായ ഇന്ത്യയുടെ നീതിന്യായ വ്യവസ്ഥ, പുതിയ ക്രിമിനൽ നിയമങ്ങൾ, ആഗോള നിയമ സഹകരണം എന്നിവ ഈ കൂടിക്കാഴ്ചയിൽ ഉയർത്തിക്കാട്ടി.

"ഡിജിറ്റൽ യുഗത്തിൽ കുറ്റകൃത്യങ്ങൾ തടയൽ, ക്രിമിനൽ നീതി, നിയമവാഴ്ച എന്നിവ ത്വരിതപ്പെടുത്തൽ: ജനങ്ങളെയും ഭൂമിയെയും സംരക്ഷിക്കുകയും സുസ്ഥിര വികസനത്തിനായുള്ള 2030-ലെ അജണ്ട കൈവരിക്കുകയും ചെയ്യുക" എന്ന പ്രമേയത്തിൽ അബുദാബിയിൽ നടന്ന കുറ്റകൃത്യങ്ങൾ തടയുന്നതിനും ക്രിമിനൽ നീതിക്കുമായുള്ള 15-ാമത് യുണൈറ്റഡ് നേഷൻസ് കോൺഗ്രസിൽ (യുഎൻ കോൺഗ്രസ്), ആധുനികവും പൗരകേന്ദ്രീകൃതവും സാങ്കേതികവിദ്യാധിഷ്ഠിതവും ആഗോളതലത്തിൽ ബന്ധിപ്പിക്കപ്പെട്ടതുമായ നീതിന്യായ വ്യവസ്ഥ കെട്ടിപ്പടുക്കുന്നതിനുള്ള ഇന്ത്യയുടെ ശ്രമങ്ങൾ അവതരിപ്പിച്ചു.

ഇന്ത്യയുടെ പുതിയ ക്രിമിനൽ നിയമങ്ങളായ ഭാരതീയ ന്യായ സംഹിത, ഭാരതീയ നാഗരിക് സുരക്ഷാ സംഹിത, ഭാരതീയ സാക്ഷ്യ അധിനിയം എന്നിവയെക്കുറിച്ച് യുഎൻ കോൺഗ്രസിനെ അഭിസംബോധന ചെയ്തുകൊണ്ട് ശ്രീ അർജുൻ റാം മേഘ്‌വാൾ സംസാരിച്ചു. ഈ നിയമങ്ങൾ സാങ്കേതികവിദ്യയ്ക്ക് നൽകുന്ന പ്രാധാന്യം, വേഗത്തിൽ നീതി ലഭ്യമാക്കുന്നതിനുള്ള നടപടികൾ, ഫോറൻസിക് അന്വേഷണത്തിന് നൽകുന്ന ഊന്നൽ, ഡിജിറ്റൽ സാങ്കേതികവിദ്യയ്ക്ക് മുൻഗണന നൽകുന്ന നടപടിക്രമങ്ങൾ എന്നിവയെക്കുറിച്ചും അദ്ദേഹം വിശദീകരിച്ചു. ഇന്ത്യൻ സൈബർ ക്രൈം കോർഡിനേഷൻ സെൻ്റർ (I4C), നാഷണൽ സൈബർ ക്രൈം റിപ്പോർട്ടിംഗ് പോർട്ടൽ എന്നിവയിലൂടെ സൈബർ കുറ്റകൃത്യങ്ങൾക്കെതിരെ ഇന്ത്യ സ്വീകരിച്ച  ഡിജിറ്റൽ നടപടികളെക്കുറിച്ചും അദ്ദേഹം എടുത്തുപറഞ്ഞു. ഇതിലൂടെ പരാതികൾ വേഗത്തിൽ റിപ്പോർട്ട് ചെയ്യാനും തട്ടിപ്പുകൾ തടയാനും മ്യൂൾ അക്കൗണ്ടുകൾ മരവിപ്പിക്കാനും സാധിക്കുന്നു.

ഭീകരവാദത്തിനെതിരായ ഇന്ത്യയുടെ വിട്ടുവീഴ്ചയില്ലാത്ത നിലപാട് ശ്രീ മേഘ്‌വാൾ ആവർത്തിച്ചു. ഭീകരവാദം, മയക്കുമരുന്ന് കടത്ത്, അതിർത്തി കടന്നുള്ള വന്യജീവി കുറ്റകൃത്യങ്ങൾ, അനധികൃത മരംമുറി, വിഷമാലിന്യം അനധികൃതമായി തള്ളൽ, മറ്റ് സംഘടിത-പരിസ്ഥിതി കുറ്റകൃത്യങ്ങൾ എന്നിവയ്‌ക്കെതിരെ ആഗോള സഹകരണം അനിവാര്യമാണെന്നും അദ്ദേഹം ഊന്നിപ്പറഞ്ഞു.

പ്രത്യേകിച്ച് അന്താരാഷ്ട്ര ആർബിട്രേഷൻ,  ബദൽ തർക്കപരിഹാര സംവിധാനങ്ങൾ എന്നിവയിൽ  ഇന്ത്യയും യുഎഇയും തമ്മിൽ വളർന്നുവരുന്ന നിയമപരമായ സഹകരണവും കൂടിക്കാഴ്ചയിൽ ചർച്ചയായി. ഇന്ത്യ ഇൻ്റർനാഷണൽ ആർബിട്രേഷൻ സെൻ്ററും (IIAC) ദുബായ് ഇൻ്റർനാഷണൽ ആർബിട്രേഷൻ സെൻ്ററും (DIAC) തമ്മിലുള്ള സഹകരണം വിജ്ഞാന കൈമാറ്റം, പ്രൊഫഷണൽ പരിശീലനം, സംയുക്ത പരിപാടികൾ, ഗവേഷണം, ഡിജിറ്റൽ തർക്കപരിഹാര സംവിധാനങ്ങൾ എന്നിവയെ കൂടുതൽ ശക്തിപ്പെടുത്തുന്നു. 80 ബില്യൺ യുഎഇ ദിർഹത്തിലധികം (ഏകദേശം 21.8 ബില്യൺ യുഎസ് ഡോളർ) മൂല്യമുള്ള 5,000-ത്തോളം കേസുകളാണ് ദുബായ് ഇൻ്റർനാഷണൽ ആർബിട്രേഷൻ സെൻ്റർ (DIAC) കൈകാര്യം ചെയ്യുന്നത്.

സന്ദർശന വേളയിൽ ശ്രീ മേഘ്‌വാൾ, മയക്കുമരുന്നിനും സംഘടിത കുറ്റകൃത്യങ്ങൾക്കുമെതിരായ സഹകരണത്തെക്കുറിച്ചും ശക്തമായ നിയമ-നീതിന്യായ പങ്കാളിത്തത്തെക്കുറിച്ചും ചർച്ച ചെയ്യുന്നതിനായി യുഎൻഒഡിസി എക്സിക്യൂട്ടീവ് ഡയറക്ടർ മോണിക്ക ജുമയുമായും കൂടിക്കാഴ്ച നടത്തി.

നിയമം, നീതി, സദ്ഭരണം എന്നിവയിലെ സഹകരണത്തോടൊപ്പം വ്യാപാരം, നിക്ഷേപം, ഊർജ്ജം, സാങ്കേതികവിദ്യ, പ്രതിരോധം, വിദ്യാഭ്യാസം, ജനങ്ങൾ തമ്മിലുള്ള ബന്ധം എന്നിവയിലുടനീളം വ്യാപിച്ചുകിടക്കുന്ന ഇന്ത്യ-യുഎഇ സമഗ്ര തന്ത്രപരമായ പങ്കാളിത്തം കൂടുതൽ ആഴത്തിലാകുന്നതിൻ്റെ  പ്രതിഫലനമാണ് ഈ മുന്നേറ്റങ്ങൾ.

15-ാമത് യുഎൻ കോൺഗ്രസിലെ ഇന്ത്യയുടെ പങ്കാളിത്തം, അതിവേഗം മാറിക്കൊണ്ടിരിക്കുന്ന ഡിജിറ്റൽ ലോകത്തിന് അനുയോജ്യമായ ഒരു നീതിന്യായ സംവിധാനം നിർമ്മിച്ചുകൊണ്ട് ആധുനിക നിയമങ്ങൾ, ഡിജിറ്റൽ നവീകരണം, ശക്തമായ സ്ഥാപനങ്ങൾ, ഫലപ്രദമായ നിയമനിർവ്വഹണം, അർത്ഥവത്തായ അന്താരാഷ്ട്ര സഹകരണം എന്നിവയോടുള്ള രാജ്യത്തിൻ്റെ പ്രതിബദ്ധതയെ അടിവരയിടുന്നു.

ഫലപ്രദമായ നീതിനിർവ്വഹണത്തിന് ഇന്ന് നിയമങ്ങൾ മാത്രമല്ല വേണ്ടത്; അതിന് സാങ്കേതികവിദ്യയും പ്രാവീണ്യമുള്ള സ്ഥാപനങ്ങളും ആഗോള കൂട്ടായ്മയും നീതിയോടുള്ള അചഞ്ചലമായ പ്രതിബദ്ധതയും ആവശ്യമാണ്.

*****