કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલ G20 વેપાર મંત્રીઓની બેઠકમાં હાજરી આપવા માટે યુનાઇટેડ સ્ટેટ્સ ઓફ અમેરિકાના મિલવૉકી ખાતે પહોંચ્યા હતા. તેમના આગમન પર શિકાગો ખાતેના ભારતીય કન્સ્યુલેટ જનરલના કન્સુલ જનરલ ડૉ. એમ. આનંદ પ્રકાશ દ્વારા તેમનું સ્વાગત કરવામાં આવ્યું હતું.

શ્રી પીયૂષ ગોયલે નેશનલ એસોસિએશન ઓફ મેન્યુફેક્ચરર્સ (NAM) દ્વારા આયોજિત બિઝનેસ રાઉન્ડટેબલમાં યુનાઇટેડ સ્ટેટ્સ (યુ.એસ.) ની અગ્રણી ઉત્પાદન અને ટેકનોલોજી કંપનીઓના CEO અને વરિષ્ઠ અધિકારીઓ સાથે વાર્તાલાપ કર્યો હતો. NAM અમેરિકાની અગ્રણી ઉત્પાદન કંપનીઓના નોંધપાત્ર હિસ્સાનું પ્રતિનિધિત્વ કરે છે, જે અમેરિકાના આશરે 3 ટ્રિલિયન ડૉલરના મેન્યુફેક્ચરિંગ GDPમાં નોંધપાત્ર યોગદાન આપે છે.

વાર્તાલાપ દરમિયાન, શ્રી પીયૂષ ગોયલે રેખાંકિત કર્યું કે ભારત-અમેરિકા આર્થિક સંબંધો પરંપરાગત વેપાર સંબંધોથી આગળ વધી રહ્યા છે અને બંને દેશોમાં રોકાણ, ઉત્પાદન, ટેકનોલોજી, નવીનતા, સ્થિતિસ્થાપક પુરવઠા શૃંખલા અને ઉચ્ચ-મૂલ્ય ક્ષમતાઓના નિર્માણને વધુને વધુ આવરી લે છે.

CEO અને વરિષ્ઠ અધિકારીઓએ ભારતમાં ઉભરી રહેલી તકો અને દેશમાં ભાગીદારી વિસ્તારવા અંગે તેમની કંપનીઓના દ્રષ્ટિકોણ રજૂ કર્યા હતા. શ્રી પીયૂષ ગોયલે જણાવ્યું હતું કે ભારત સરકાર ભારતમાં કંપનીઓની કામગીરી, વિસ્તરણ અને રોકાણોમાં સુવિધા પૂરી પાડવા માટે તૈયાર છે.

શ્રી પીયૂષ ગોયલે રોકવેલ ઓટોમેશનના વૈશ્વિક મુખ્યાલય ખાતે બિઝનેસ રાઉન્ડટેબલ (BRT) અને NAM દ્વારા આયોજિત રિસેપ્શનમાં પણ હાજરી આપી હતી. તેમણે અન્ય G20 દેશોના વેપાર મંત્રીઓ અને અમેરિકન કંપનીઓના વરિષ્ઠ બિઝનેસ લીડર્સ સાથે વાર્તાલાપ કર્યો હતો.

SM/BS/JD