مرکزی وزیر تعلیم جناب پرہلاد جوشی نے آج نئی دہلی میں فرانس کے اعلیٰ تعلیم،تحقیق اور خلائی امور کے وزیر ، جناب فلپ بپٹسٹ کے ساتھ دو طرفہ ملاقات کی۔ دونوں وزرا نے تعلیم، تحقیق، اختراع، تعلیمی تبادلے اور ادارہ جاتی شراکت داری کے شعبوں میں ہندوستان اور فرانس کے درمیان تعاون کو مزید مضبوط بنانے کے طریقوں پر تبادلہ خیال کیا۔

فرانسیسی وزیر اور ان کے وفد کا خیرمقدم کرتے ہوئے جناب پرہلاد جوشی نے ہندوستان اور فرانس کے درمیان دیرینہ شراکت داری کو اجاگر کیا اور کہا کہ تعلیم کے شعبے میں تعاون دونوں ممالک کے باہمی تعلقات کا ایک اہم ستون ہے۔ انہوں نے کہا کہ ہندوستان-فرانس اختراعی سال 2026 تعلیم، تحقیق اور اختراع کے شعبوں میں دونوں ممالک کے تعاون کو مزید مضبوط کرنے کا بروقت موقع فراہم کرتا ہے۔

ملاقات کے دوران دونوں فریق نے اعلیٰ تعلیم کے شعبے میں تعاون کے امکانات پر تفصیلی تبادلہ خیال کیا۔ اس میں اداروں کے درمیان روابط کو مزید مضبوط بنانا، طلبا، اساتذہ اور محققین کے تبادلے کو فروغ دینا اور مشترکہ تعلیمی پروگراموں اور تبادلوں کے مواقع کو وسیع کرنا شامل ہے۔ دونوں فریق نے حیاتیاتی علوم، سماجی علوم اور علوم انسانی کے شعبوں میں بھی زیادہ تعاون کے امکانات کا جائزہ لیا، جس میں اداروں کے درمیان باہمی رابطے، مشترکہ تعلیمی سرگرمیوں اور تحقیق پر خصوصی توجہ دی گئی۔

دونوں وزرا نے ہندوستان اور فرانس کے درمیان علمی شراکت داری کو مزید فروغ دینے کے طریقوں پر اپنے خیالات کا تبادلہ کیا اور موجودہ ادارہ جاتی تعاون کو مزید مستحکم کرنے کے ساتھ ساتھ مشترکہ تعلیمی اور تحقیقی اقدامات کے لیے نئے مواقع پیدا کرنے کے امکانات پر بھی تبادلہ خیال کیا۔

فرانس کے اعلیٰ تعلیمی اداروں کو ہندوستان میں اپنے برانچ کیمپس قائم کرنے کے امکانات تلاش کرنے کی دعوت دی گئی، جن میں گجرات کی گفٹ سٹی کے علاوہ وہ مقامات بھی شامل ہیں جہاں فرانسیسی کمپنیاں موجود ہیں اور انہیں تکنیکی افرادی قوت کی ضرورت ہے۔

عوامی سطح پر باہمی روابط کی اہمیت کو تسلیم کرتے ہوئے دونوں فریق نے زبان سیکھنے اور اساتذہ کی تعلیم کو مضبوط بنانے، تعلیمی مہارتوں کے تبادلے اور ٹیکنالوجی کی مدد سے تعلیم کو فروغ دینے کے امکانات کا جائزہ لیا۔ بات چیت کے دوران ہندوستان اور فرانس کے درمیان تعلیمی اسناد کی باہمی منظوری سے متعلق معاہدے (ایم آر کیو) میں جاری نظرثانی، ڈیجیٹل تعلیم کے شعبے میں تجربات اور بہترین طریقوں کے تبادلے اور معیاری تعلیم تک رسائی کو وسیع کرنے کے لیے ٹیکنالوجی سے فائدہ اٹھانے کے امور پر بھی تبادلہ خیال کیا گیا۔

ملاقات کے اختتام پر دونوں فریق نے اعلیٰ تعلیم، اختراع، زبان کی تعلیم اور ڈیجیٹل لرننگ کے شعبوں میں ہندوستان اور فرانس کے درمیان تعاون کو مزید گہرا کرنے کے اپنے عزم کا اعادہ کیا۔

****

ش ح۔ ع ح۔ ج

UNO- 4271