লৈবাক অসিদা লাইফষ্টোক ইন্সুরেন্সগী থবকশিংদা দিজিতেলগী অওনবা পুরকপদা মরুওইবা খুমাঙচাউশিনবা অমা ওইনা, সেপ্তেম্বর ২৮,২০২৬ দা ন্যু দিল্লিদা এনিমেল হসবেন্দরি অমসুং দাইরিয়িং দিপার্তমেন্ত, ভারত সরকারনা লাইফষ্টোক ইন্সুরেন্স পোর্তেল হৌদোক্কনি।

লাইফষ্টোক ইন্সুরেন্স পোর্তেল অসি ভারত সরকারগী ফিসরিজ, এনিমেল হসবেন্দরি অমসুং দাইরিয়িং অমসুং পঞ্চয়তি রাজগী য়ুনিয়ন মিনিষ্টর শ্রী রজিব রঞ্জন সিংহ এলাইজ লালান সিংহনা হৌদোক্কনি।

পোর্তেল অসিনা শা-ষনগী ইন্সুরেন্সকী অমতা ওইবা, পুনশিনবা দিজিতেলগী মফম অমা পীগনি, দিপার্তমেন্তগী লাইফষ্টোক ইন্সুরেন্স স্কিমগী মখাদা শা-ষনশিংগী ইন্সুরেন্স য়াওবা, ক্লেম তৌবা, য়েংশিনবা অমসুং পাউ পীবা নুংঙাইহনগনি। পাক-শন্না শীজিন্ননবা অমসুং লাইনা শীজিন্নবা য়ানবা, লাইফষ্টোক ইন্সুরেন্স পোর্তেলনা হিন্দী অমসুং ইংলিসকা লোয়ননা লোল ১১ দা দিজিতেল ইন্সুরেন্সকী খুদোংচাবশিং পীগনি, শা-ষন লোইবা লৌমীশিংনা মখোয়না খঙবা লোলশিংদা ই-পাউ লৌবা ফংহনগনি।

শা-ষনগী লাইফ ইন্সুরেন্সকী থবকশিং অরোনবা লৈহন্দনবা, ফজনা পাংথোক্নবা, লাইনা য়াওবা য়ানবা অমসুং তেক্নোলোজি শীজিন্ননবা থবক অসিনা পান্দম থম্লি অমসুং মসিনা শা-ষন লোইবা লৌমীশিং অমাং-অতা থোকপদগী ঙাকথোকপা হেনগৎহনগনি অমসুং মখোয়গী হিংনবগী লম্বীশিংদা মতেং পাংগনি।

পোর্তেল অসিনা পুন্না থবক তৌমিন্নবা, খুদক্ত য়েংশিনবা অমসুং শা-ষনগী ইন্সুরেন্স থৌরমশিং দেতাদা য়ুম্ফম ওইদুনা য়েংশিনবা অমসুং লৈবাক শীনবা থুংনা খুদোংচাবা ফংহনবদা মতেং পাংগনি।

শা-ষনগী ইন্সুরেন্স লাইহন্নবা, ইন্সতিতুৎশিংগী থবকশিং ফগৎনবা অমসুং খুদিংমক কোনশিন্নবা, শা-ষন লোইবা লৌমীশিংদা তেক্নোলোজিগী থবকশিং ফংহন্নবা মাইকৈদা থাংজিনবা মরুওইবা খোঙথাং অমা পোর্তেল হৌদোকপা অসিনা তাক্লে।

*****