ਸਰਹੱਦ ਪਾਰ ਤਸਕਰੀ ਵਿਰੁੱਧ ਆਪਣੀ ਲਗਾਤਾਰ ਸਖ਼ਤ ਕਾਰਵਾਈ ਨੂੰ ਜਾਰੀ ਰੱਖਦਿਆਂ, ਡਾਇਰੈਕਟੋਰੇਟ ਆਫ਼ ਰੈਵੇਨਿਊ ਇੰਟੈਲੀਜੈਂਸ (ਡੀਆਰਆਈ) ਨੇ ਮਿਜ਼ੋਰਮ ਅਤੇ ਅਸਾਮ ਵਿੱਚ ਖੁਫੀਆ ਜਾਣਕਾਰੀ 'ਤੇ ਅਧਾਰਿਤ ਦੋ ਕਾਰਵਾਈਆਂ ਦੌਰਾਨ ਵਿਦੇਸ਼ੀ ਮੂਲ ਦੀ 1,25,680 ਕਿਲੋਗ੍ਰਾਮ ਸੁਪਾਰੀ ਅਤੇ 41,697 ਕਿਲੋਗ੍ਰਾਮ ਖਸਖਸ ਜ਼ਬਤ ਕੀਤੀ ਹੈ, ਜਿਨ੍ਹਾਂ ਦੀ ਕੁੱਲ ਕੀਮਤ ਲਗਭਗ 20.31 ਕਰੋੜ ਰੁਪਏ ਹੈ। ਤਸਕਰੀ ਕੀਤੀ ਗਈ ਖਸਖਸ ਦੀ ਢੋਆ-ਢੁਆਈ ਦੇ ਸਬੰਧ ਵਿੱਚ ਚਾਰ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।  

23-24 ਸਤੰਬਰ 2026 ਨੂੰ, ਮਿਜ਼ੋਰਮ ਵਿੱਚ ਖੁਫੀਆ ਜਾਣਕਾਰੀ 'ਤੇ ਅਧਾਰਿਤ ਇੱਕ ਵੱਡੇ ਆਪ੍ਰੇਸ਼ਨ ਦੌਰਾਨ, ਡੀਆਰਆਈ ਨੇ ਕਸਟਮਜ਼ ਚੰਫਾਈ (Champhai), 14ਵੀਂ ਬਟਾਲੀਅਨ ਅਸਾਮ ਰਾਈਫਲਜ਼ ਅਤੇ ਚੰਫਾਈ ਪੁਲਿਸ ਦੀ ਮਦਦ ਨਾਲ, ਭਾਰਤ-ਮਿਆਂਮਾਰ ਸਰਹੱਦ ਤੋਂ ਲਗਭਗ 20 ਕਿਲੋਮੀਟਰ ਦੂਰ ਚੰਫਾਈ ਜ਼ਿਲ੍ਹੇ ਦੇ ਰੁਆਂਟਲਾਂਗ ਪਿੰਡ ਅਤੇ ਇਸ ਦੇ ਆਲੇ-ਦੁਆਲੇ ਦੇ ਖੇਤਰ ਵਿੱਚ ਤਿੰਨ ਗੋਦਾਮਾਂ ਦੀ ਤਲਾਸ਼ੀ ਲਈ ਗਈ। ਇਹ ਸਾਰੀਆਂ ਥਾਵਾਂ ਬੰਦ ਅਤੇ ਬਿਨਾਂ ਕਿਸੇ ਦੇਖ-ਰੇਖ ਦੇ ਪਾਈਆਂ ਗਈਆਂ। ਤਲਾਸ਼ੀ ਦੌਰਾਨ ਲਗਭਗ 14 ਕਰੋੜ ਰੁਪਏ ਦੀ ਕੀਮਤ ਦੇ 1,25,680 ਕਿਲੋਗ੍ਰਾਮ ਸ਼ੱਕੀ ਵਿਦੇਸ਼ੀ ਮੂਲ ਦੀ ਸੁਪਾਰੀ (areca nuts) ਅਤੇ 3.81 ਕਰੋੜ ਰੁਪਏ ਦੀ ਕੀਮਤ ਦੇ 25,440 ਕਿਲੋਗ੍ਰਾਮ ਖਸਖਸ ਦੇ ਬੀਜ ਬਰਾਮਦ ਕੀਤੇ ਗਏ। ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਇਹ ਸਮਾਨ ਮਿਆਂਮਾਰ ਤੋਂ ਭਾਰਤ ਵਿੱਚ ਗੈਰ-ਕਾਨੂੰਨੀ ਢੰਗ ਨਾਲ (ਸਮੱਗਲਿੰਗ ਰਾਹੀਂ) ਲਿਆਂਦਾ ਗਿਆ ਸੀ। ਇਸ ਸਮਾਨ ਨੂੰ ਕਸਟਮਜ਼ ਐਕਟ, 1962 ਦੀਆਂ ਧਾਰਾਵਾਂ ਤਹਿਤ ਜ਼ਬਤ ਕਰ ਲਿਆ ਗਿਆ।

ਇਸ ਤੋਂ ਪਹਿਲਾਂ, 22.09.26 ਨੂੰ, ਮਿਜ਼ੋਰਮ ਸਰਹੱਦੀ ਖੇਤਰ ਤੋਂ ਅਸਾਮ ਵੱਲ ਵਿਦੇਸ਼ੀ ਮੂਲ ਦੇ ਖਸਖਸ ਦੀ ਢੋਆ-ਢੁਆਈ ਬਾਰੇ ਮਿਲੀ ਖਾਸ ਖੁਫੀਆ ਜਾਣਕਾਰੀ ਦੇ ਅਧਾਰ 'ਤੇ, ਡੀਆਰਆਈ ਦੇ ਅਧਿਕਾਰੀਆਂ ਨੇ 38 ਬਟਾਲੀਅਨ ਅਸਾਮ ਰਾਈਫਲਜ਼ ਦੀ ਮਦਦ ਨਾਲ ਸਿਲਚਰ ਦੇ ਲੈਲਾਪੁਰ ਨੇੜੇ ਦੋ ਟਰੱਕਾਂ ਨੂੰ ਰੋਕਿਆ। ਵਾਹਨਾਂ ਦੀ ਬਰੀਕੀ ਨਾਲ ਜਾਂਚ ਅਤੇ ਤਲਾਸ਼ੀ ਦੌਰਾਨ 290 ਐਚ.ਡੀ.ਪੀ.ਈ. ਬੋਰੀਆਂ ਬਰਾਮਦ ਹੋਈਆਂ, ਜਿਨ੍ਹਾਂ ਵਿੱਚ 16,257 ਕਿਲੋਗ੍ਰਾਮ ਵਿਦੇਸ਼ੀ ਮੂਲ ਦੀ ਖਸਖਸ ਸੀ। ਇਨ੍ਹਾਂ ਬੋਰੀਆਂ 'ਤੇ ਵਿਦੇਸ਼ੀ ਨਿਰਮਾਣ ਅਤੇ ਵਪਾਰ ਨੂੰ ਦਰਸਾਉਂਦੇ ਨਿਸ਼ਾਨ ਮੌਜੂਦ ਸਨ ਅਤੇ ਇਸ ਖੇਪ ਦੇ ਨਾਲ ਕੋਈ ਜਾਇਜ਼ ਖਰੀਦ ਦਸਤਾਵੇਜ਼ ਨਹੀਂ ਸਨ। ਲਗਭਗ 2.43 ਕਰੋੜ ਰੁਪਏ ਦੀ ਕੀਮਤ ਵਾਲੀ ਖਸਖਸ ਅਤੇ ਦੋਵੇਂ ਵਾਹਨਾਂ ਨੂੰ ਕਸਟਮਜ਼ ਐਕਟ, 1962 ਦੇ ਤਹਿਤ ਜ਼ਬਤ ਕਰ ਲਿਆ ਗਿਆ। ਇਸ ਢੋਆ-ਢੁਆਈ ਵਿੱਚ ਸ਼ਾਮਲ ਚਾਰ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ।

ਦੇਸ਼ ਦੇ ਉੱਤਰ-ਪੂਰਬੀ ਖੇਤਰ ਵਿੱਚ ਹਾਲ ਹੀ ਦੇ ਵਰ੍ਹਿਆਂ ਦੌਰਾਨ ਵਿਦੇਸ਼ੀ ਮੂਲ ਦੀ ਤਸਕਰੀ ਵਾਲੀ ਸੁਪਾਰੀ ਦੀ ਸਭ ਤੋਂ ਵੱਡੀ ਬਰਾਮਦਗੀ ਵਿੱਚੋਂ ਇੱਕ, ਸਰਹੱਦ ਪਾਰ ਤਸਕਰੀ ਨੂੰ ਰੋਕਣ ਲਈ ਡੀਆਰਆਈ ਦੇ ਯਤਨਾਂ ਵਿੱਚ ਇੱਕ ਮਹੱਤਵਪੂਰਨ ਉਪਲਬਧੀ ਹੈ।

ਖਸਖਸ ਨੂੰ ਵਿਦੇਸ਼ੀ ਵਪਾਰ ਨੀਤੀ (ਆਈਟੀਸੀ ਐੱਚਐੱਸ ਵਰਗੀਕਰਨ) ਦੇ ਤਹਿਤ ਇੱਕ "ਪਾਬੰਦੀਸ਼ੁਦਾ" ਵਸਤੂ ਵਜੋਂ ਸ਼੍ਰੇਣੀਬੱਧ ਕੀਤਾ ਗਿਆ ਹੈ, ਜਿਸ ਦੀ ਖਰੀਦ ਕੁਝ ਨਿਰਧਾਰਿਤ ਸ਼ਰਤਾਂ ਅਧੀਨ ਹੀ ਮਨਜ਼ੂਰ ਹੈ;ਜਿਸ ਵਿੱਚ ਨਿਰਧਾਰਿਤ ਦੇਸ਼ਾਂ ਤੋਂ ਖਰੀਦ ਅਤੇ ਨਾਰਕੋਟਿਕਸ ਕਮਿਸ਼ਨਰ, ਗਵਾਲੀਅਰ ਨਾਲ ਆਯਾਤ ਦੇ ਠੇਕੇ ਦੀ ਰਜਿਸਟ੍ਰੇਸ਼ਨ ਸ਼ਾਮਲ ਹੈ।

ਇਹ ਜ਼ਬਤੀਆਂ ਭਾਰਤ-ਮਿਆਂਮਾਰ ਦੀ ਸੰਵੇਦਨਸ਼ੀਲ ਸਰਹੱਦ ਰਾਹੀਂ ਚੱਲ ਰਹੇ ਤਸਕਰੀ ਦੇ ਨੈੱਟਵਰਕਾਂ ਨੂੰ ਰੋਕਣ ਅਤੇ ਪਾਬੰਦੀਸ਼ੁਦਾ ਤੇ ਵਿਦੇਸ਼ੀ ਮੂਲ ਦੀਆਂ ਖੇਤੀਬਾੜੀ ਵਸਤਾਂ ਦੇ ਦੇਸ਼ ਵਿੱਚ ਗੈਰ-ਕਾਨੂੰਨੀ ਪ੍ਰਵੇਸ਼ ਨੂੰ ਰੋਕਣ 'ਤੇ ਡੀਆਰਆਈ ਦੇ ਲਗਾਤਾਰ ਧਿਆਨ ਨੂੰ ਉਜਾਗਰ ਕਰਦੀਆਂ ਹਨ।

****

ਐੱਸਆਰ/ਕੇਐੱਮਐੱਨ/ਏਕੇ