মালেমগী সেকুরিতি অমসুং চাউখৎ-থৌরাংগী খুদোংচাদবশিং কোকহন্নবা মালেমগী থাক্ত ৱারি শান্নবা, অমনা অমদগী তম্নবা অমসুং মতেং পাংন্নবা ঙসি উপ-রাষ্ট্রপতি শ্রী সি.পি রাধাকৃষ্ণন্না তকশিনখ্রে।

উপ-রাষ্ট্রপতি ভবন্দা ইন্তরনেসনেল ষ্ট্রেতেজিক ইনগেঞ্জমেন্ত প্রোগ্রাম (ইন-ষ্টেপ) কী মরিশুবা ইদিসন্দা ৱা ঙাংবদা, উপ-রাষ্ট্রপতিনা মালেমগী দেলিগেদ ৩৮ অমসুং ভারতকী মীহুৎশিং, মরুওইনা গ্লোবেল সাউথকী লৈবাকশিং য়াওনা, মরুপ-মপাং ওইবা আমসুং ৱাখল মান্নবা লৈবাকশিংগী শীনফম কয়াগী মীওইশিং অমসুং লুচিংবশিং তরাম্না ওকখি।

শ্রী সি.পি রাধাকৃষ্ণন্না হায়খি মদুদি ৱারি শান্নবা, অমনা অমদগী তম্নবা অমসুং মরুওইবা থবক পায়খৎনবা লেংদ্রবা মফম অমা শেমগৎনবা ভারতনা জি-২০গী থৌবু ওইবা মনুংদা থাজবা পীখিবা অদুগী মমি ইন-ষ্টেপতা তারে। ঙসিগী মালেমগী অমগা অমগা শম্নবা মওং অসিনা লৈবাক অসিনা খুদোংচাদবশিং নাইতোম ওইনা মায়োক্নবা খুদোংথিবা হেনগৎলক্লে।

শ্রী সি.পি রাধাকৃষ্ণন্না হায়খি মদুদি মালেমগী হৌজিক ওইরিবা ফিবম অসি য়াংনা হোংলক্লি অমসুং তেক্নোলোজি, সাইবরস্পেস, এ.আই, ইনর্জি সেকুরিতি, ইকোনোমিক রিসিলিয়েন্স, মেরিতাইম সেকুরিতি, ক্লাইমেত চেঞ্জ অমসুং সপ্লাই চেনশিংগা মরী লৈনবা খুদোংচাদবশিং হেনগৎলক্লি। মালেমগী চাউখৎ-থৌরাংশিং অমসুং চুনবা থবকশিং শেম্নবা মরুওইবা মীৎয়েং, মতম শাংনা চৎনবা য়াবা থবকশিং শেমগৎনবা খুদোংচাবা অমা ইন-ষ্টেপনা পীরি।

শ্রী সি.পি রাধাকৃষ্ণন্না হায়খি মদুদি মালেমগী ওইনা খনসি, থবক ফজনা পাংথোকসি অমসুং পুন্না থবক তৌমিন্নসি। চপ মান্ননা মায়োক্নরিবা খুদোংচাবশিং অসি মতেং পাংনবা, পুন্না থবক তৌমিন্নবা অমসুং অপুনবা থবকশিংগী খুৎথাংদা কোকহনবা ঙমগনি।

উপ-রাষ্ট্রপতিনা হায়খি মদুদি মালেমগী লৈবাকশিং ৱারি শানবদা গ্লোবেল সাউথকী মরুওইবা লৈরি, লমদম অসিনা মখল কয়া থেংনরিবা অমসুং চাউখৎ-থৌরাংগী মরুওইবশিং অসিনা খাংবা কনবা, চাউখৎপা, সেকুরিতি, লৈবাক ঙাকপা অমসুং মতেং পাংনবগী মমল য়াম্লবা পারা কয়া তাকপীরি। অমনা অমবু ইকায়খুম্নবা, মান্নবা দরকার ওইবশিং, মনিংতম্বা অমসুং লৈবাক অমগী চাউখৎপা অমসুং মরুওইবশিং থাগৎপনা লমজিং ওইদুনা ভারতনা গ্লোবেল সাউথকা লোয়ননা থবক তৌমিন্নবনি।

উপ-রাষ্ট্রপতিনা হায়খি মদুদি শেঞ্জা-থুমজা অসি গ্লোবেল সাউথকী লৈবাকশিংগী অচৌবা খুদোংচাবা অমা ওইরি অমসুং মসি মুৎথৎনবা পুন্না থবক তৌমিন্নগদবনি। থাক খুদিংমক্ত শেঞ্জা-থুমজা লৈতবা লৈঙাক অমা লৈহন্নবা মাইকৈদা শরুক য়ারিবশিংনা থবক তৌগদবনি, মীয়ামগী থবক তৌবদা পুকচেল শেংবা অমসুং অরোন-অথুপ লৈতবা অসি য়াম্না মরুওই।

উপ-রাষ্ট্রপতিনা হায়খি মদুদি কোবিদ-১৯ লাইচৎ মনুংদা ভেক্সিন মাইত্রিগী খুৎথাংদা গ্লোবেল সাউথকী লৈবাকশিংদা ভারতনা মতেং পাংখি। মীওইবা খুন্নাইগী য়াইফনবা সাইন্স অমসুং তেক্নোলোজিগী চাউখৎপশিং শীজিন্নগদবনি। মীওইবা খুন্নাইগী অফবা থবকশিং পাংথোক্নবা লৌশিং অমসুং অনৌবা থবকশিং শরুক য়ামিন্নগদবনি, ‘বসুধাইব কুতুম্বকম’ মালেম অমা, ইমুং অমা, তুংলমচৎ অমা হায়বা ভারতকী ৱাখল্লোন লৈরি।

মহাক্না হায়খি মদুদি শক্নাইরবা মীওইশিং পুনশিনবগীদমক নেসনেল সেকুরিতি কাউন্সিল, এক্সতর্নেল এফেয়ার্স মিনিষ্ট্রি অমসুং দিফেন্স মিনিষ্ট্রি থাগৎপা ফোঙদোকচরি অমসুং মখোয়গী থবকশিংনা হেন্না মপাঙ্গল কনবা শীনফমশিংগী মরীশিং শেমগৎপদা মতেং পাংগনি অমসুং শরুক য়ারিবা লৈবাকশিংগী মনুংদা মরুওইবা হিরমশিংদা ৱাখল তাবা হেনগৎহনগনি।

ইন্তরনেসনেল ষ্ট্রেতেজিক ইনগেঞ্জমেন্ত প্রোগ্রাম (ইন-ষ্টেপ) কী মরিশুবা ইদিসন্দা শ্রী লঙ্কা, সিচিলিস, মোঙ্গোলিয়া, নেপাল, মাউরিসিয়স, মালদিবস, ওমান, গিনিয়া, চিলি, অর্জেন্তিনা, ফিলিপ্পিন্স, থাইলেন্দ, অর্মেনিয়া, কির্গিজষ্টান, কাতর, ম্যান্মার, উজবেকিস্তান অমসুং ব্রাজিল য়াওনা লৈবাক ২২ গী মালেমগী মীহুৎ ২৫ য়াওনা, অপুনবা মীহুৎ ৩৮ শরুক য়ারি।

চয়োল অনিগী ইন্তরনেসনেল ষ্ট্রেতেজিক ইনগেঞ্জমেন্ত প্রোগ্রাম (ইন-ষ্টেপ) কী থৌরম অসি নেসনেল দিফেন্স কোলেজগা খুৎশম্নদুনা, নেসনেল সেকুরিতি কাউন্সিল, এক্সতর্নেল এফেয়ার্স মিনিষ্ট্রি অমসুং দিফেন্স মিনিষ্ট্রিনা শীনবনি। লাল্লোং, সেকুরতি অমসুং চাউখৎ-থৌরাংগী ৱাফমশিংদা ৱাখল্লোনশিং পীথোক-পীশিন তৌন্নবা অমসুং ইন্সতিতুৎশিং অমসুং শীনফম কয়াগী মীওইশিং মরী লৈনবা হেনগৎনবা মফম অমা মসিনা পীরে। মমাঙগী ইদিসনশিং মার্চ ২০২৪, ওক্তোবর ২০২৪ অমসুং ওক্তোবর-নবেম্বর ২০২৫ দা পাংথোকখ্রে।

*****