ہندوستان کے نائب صدرجمہوریہ ، جناب سی پی رادھا کرشنن نے آج کونور، نیلگیری میں ’یوپاسی‘ (یونائیٹڈ پلانٹرز ایسوسی ایشن آف سدرن انڈیا) ٹی ریسرچ فاؤنڈیشن کی صد سالہ کانفرنس کا افتتاح کیا۔ اس موقع پر انہوں نے عالمی منڈیوں میں ہندوستانی چائے کو مزید مسابقتی بنانے کے لیے تحقیق میں اضافے، جدید کاری، برانڈنگ اور ویلیو ایڈیشن (قدر میں اضافے) پر زور دیا۔

جناب سی پی رادھا کرشنن نے 'اوپاسی ٹی ریسرچ فاؤنڈیشن' کو چائے کی صنعت، کاشتکاروں اور کارکنوں کی خدمت کے 100 سال مکمل کرنے پر مبارکباد پیش کی اور چائے کے شعبے میں تحقیق اور ترقی کے لیے فاؤنڈیشن کی صدی پر محیط خدمات کو سراہا۔

انہوں نے کہا کہ بھارت دنیا میں چائے پیدا کرنے اور استعمال کرنے والے بڑے ممالک میں شامل ہے اور اس بات پر زور دیا کہ چائے کی کاشت کے ساتھ ساتھ اس کی موثر پروسیسنگ اور تیاری پر بھی توجہ دی جائے۔

نائب صدر نے چائے کے شعبے میں تحقیق کو وسعت دینے کا مطالبہ کیا، خاص طور پر ان شعبوں میں جو لاگت کی تاثیر، معیار اور پیداواری صلاحیت کو بہتر بنا سکیں۔ انہوں نے کاشتکاروں کو معیار برقرار رکھنے اور مارکیٹ کی بدلتی ہوئی ضروریات سے ہم آہنگ ہونے کے بارے میں تربیت دینے کی ضرورت پر بھی زور دیا، کیونکہ عالمی سطح پر چائے کی مارکیٹ میں مسابقت بڑھ رہی ہے۔

چائے پیدا کرنے والے دیگر ممالک کی جانب سے ملنے والے مقابلے کا ذکر کرتے ہوئے، جناب سی پی رادھا کرشنن نے کہا کہ بھارت کو اس بات کا جائزہ لینے کی ضرورت ہے کہ اپنی چائے کی مارکیٹنگ کو کس طرح زیادہ مؤثر بنایا جائے، آمدنی میں اضافہ کیا جائے اور مسلسل تحقیق اور جدت طرازی کے ذریعے باغات کے شعبے کو درپیش چیلنجوں سے نمٹا جائے۔

انہوں نے متعلقہ فریقین پر زور دیا کہ وہ چائے کی صنعت کی ضروریات کا منظم جائزہ لیں اور ٹھوس پروجیکٹ تجاویز تیار کرنے کے لیے مرکزی اور ریاستی حکومتوں کے ساتھ مل کر کام کریں۔ انہوں نے تحقیق کے لیے پیشہ ور افراد کی شناخت کرنے، چائے کی فیکٹریوں کو جدید بنانے اور ضروری تجدید و مرمت کرنے کی ضرورت پر بھی زور دیا تاکہ اس بات کو یقینی بنایا جا سکے کہ بھارتی چائے کی پیداوار عالمی معیار کے مطابق ہو۔

نائب صدر نے چائے کے پیداواری اداروں اور برآمد کنندگان سے کہا کہ وہ صرف بڑی مقدار میں چائے (بلک ٹی) فروخت کرنے سے آگے بڑھیں اور مضبوط بھارتی برانڈز تیار کریں۔ مختلف ممالک کے اپنے دوروں کے تجربے کا حوالہ دیتے ہوئے، انہوں نے بین الاقوامی منڈیوں میں کئی ممالک کے چائے کے مختلف برانڈز دیکھنے کا ذکر کیا اور بھارتی چائے کے برانڈز کی زیادہ سے زیادہ نمائش اور موجودگی کی ضرورت پر زور دیا۔

انہوں نے تجویز دی کہ متعلقہ فریقین متحد ہو کر مضبوط برانڈز کے تحت بھارتی چائے کی مارکیٹنگ کریں، جس سے مارکیٹ میں پوزیشننگ کے ساتھ ساتھ آمدنی اور قیمتوں کو بہتر بنانے میں مدد مل سکتی ہے۔

جناب سی پی رادھا کرشنن نے 'اوپاسی' سے یہ بھی کہا کہ وہ اپنے صد سالہ جشن کے سال کو ایک دیرپا ادارہ جاتی سنگ میل قائم کرنے کے لیے استعمال کرے؛ اس کے لیے چائے کی تحقیق کے نیٹ ورک کو مزید مقامات تک پھیلایا جائے اور تحقیقی مراکز کو جدید سہولیات سے آراستہ کیا جائے۔ انہوں نے کہا کہ ابھرتے ہوئے چیلنجوں اور مواقع سے نمٹنے کے لیے تحقیق کا عمل مسلسل ارتقا پذیر ہونا چاہیے۔

باغات میں کام کرنے والے کارکنوں کے اہم کردار کو اجاگر کرتے ہوئے، نائب صدر نے ان کی فلاح و بہبود پر زیادہ توجہ دینے کا مطالبہ کیا۔ انہوں نے اس بات پر زور دیا کہ باغات کے کارکنوں کی فلاح و بہبود صنعت کی ترقی اور پائیداری کا لازمی حصہ ہونی چاہیے۔ انہوں نے کہا، "صنعت کی فلاح اور کارکنوں کی فلاح ساتھ ساتھ چلنی چاہیے۔" نائب صدر نے چائے میں 'ویلیو ایڈیشن' (قدر میں اضافے) کی اہمیت پر زور دیا اور متعلقہ اہم فریقین (اسٹیک ہولڈرز) سے اپیل کی کہ وہ نئی مصنوعات، طریقہ کار اور مارکیٹ کے مواقع کی نشاندہی کرنے کے لیے مل کر کام کریں۔

انہوں نے اس بات کی نشاندہی کی کہ بھارت کو یہ فائدہ حاصل ہے کہ وہ چائے پیدا کرنے اور اس کا استعمال کرنے والا ایک بڑا ملک ہے، اور انہوں نے صنعت پر زور دیا کہ وہ اپنی وسیع ملکی مارکیٹ سے زیادہ سے زیادہ فائدہ اٹھائے۔ نائب صدر نے کہا کہ موجودہ ماحول متعلقہ فریقین کو چائے کے شعبے کو مضبوط بنانے کے لیے حکومت کے ساتھ مل کر کام کرنے کا موقع فراہم کرتا ہے۔

اس صد سالہ کانفرنس میں چائے اور باغبانی (پلانٹیشن) کے شعبے سے وابستہ افرادجن میں کاشتکار، محققین، صنعت کے نمائندے اور دیگر معززین شامل تھے—کو اکٹھا کیا گیا تاکہ چائے کی تحقیق اور باغبانی کی صنعت کے مستقبل پر غور و خوض کیا جا سکے۔

اس موقع پر، نائب صدر جمہوریہ نے ’جنوبی بھارت میں چائے پر تحقیق‘نامی  ایک مجموعہ بھی جاری کیا، جس میں جنوبی بھارت میں چائے پر تحقیق کی شاندار میراث اور خدمات کا احاطہ کیا گیا ہے۔

اس تقریب میں تمل ناڈو کے گورنر جناب راجیندر وشوناتھ آرلیکر، ادھاگامنڈلم کے ایم ایل اے جناب بھوجاراجن، ٹی بورڈ آف انڈیا کے ڈپٹی چیئرمین جناب سی مروگن، یوپاسی کے صدر جناب اجوئے تھپیاہ کے علاوہ دیگر معززین، کاشتکار، زرعی سائنسدان اور صنعت کے نمائندے موجود تھے۔

*****

ش ح ۔ ال ۔ ع ر

UR-3877