مرکزی وزیرِ داخلہ اور وزیرِ تعاون جناب امت شاہ نے آج کرناٹک کے ہبلی میں جے جی ایم ایم میڈیکل کالج اور کے ایل ای ہسپتال و طبی تحقیقی مرکز کے احاطے کا دورہ کیا۔

مرکزی وزیرِ داخلہ اور وزیرِ تعاون جناب امت شاہ نے سماجی رابطے کے پلیٹ فارم ایکس پر اپنی ایک تحریر میں کہا، ’’آج کرناٹک کے ہبلی میں جے جی ایم ایم میڈیکل کالج اور کے ایل ای ہسپتال و طبی تحقیقی مرکز کے احاطے کا دورہ کیا۔ کے ایل ای گزشتہ 110 برس سے زائد عرصے سے تعلیم اور صحت کی خدمات کے ذریعے ملک کی خدمت کر رہا ہے۔ 250 ایم بی بی ایس نشستوں اور 1,200 بستروں پر مشتمل یہ نئی سہولت، جن میں سے 300 بستر غریبوں کے لیے مختص ہیں، کرناٹک بھر میں عالمی معیار کی صحت کی خدمات کی توسیع کی جانب ایک نیا سنگِ میل ہے۔‘‘

تقریباً 50 ایکڑ اراضی پر تقریباً 700 کروڑ روپے کی لاگت سے تعمیر کیے گئے اس طبی کالج اور ہسپتال کے احاطے کا کل تعمیر شدہ رقبہ 20 لاکھ مربع فٹ ہے۔ ہسپتال میں ایک ہی چھت کے نیچے طبی خدمات کی ایک وسیع رینج فراہم کی جائے گی۔ یہاں عمومی طب، جراحی، ہڈیوں اور جوڑوں کے امراض، پھیپھڑوں کے امراض، زچگی و امراضِ نسواں، امراضِ چشم، کان ناک گلا، نفسیاتی امراض، دندان سازی اور طبیعی بحالی جیسی بنیادی خصوصی طبی سہولیات دستیاب ہوں گی۔اس کے علاوہ اس مرکز میں قلب کے امراض، اعصابی امراض، دماغ و اعصاب کی جراحی، معدہ و آنتوں کے امراض، امراضِ گردہ، اعضا کی پیوند کاری، امراضِ بول و تناسل، سرطان اور غدود کے امراض سمیت انتہائی خصوصی طبی خدمات بھی فراہم کی جائیں گی، جبکہ جدید تجربہ گاہیں بھی موجود ہوں گی۔

ہسپتال میں 24 گھنٹے تیز رفتار ہنگامی اور حادثاتی طبی نگہداشت، جدید ڈائیلاسس یونٹ، ڈیجیٹل ایکس رے، اعلیٰ معیار کی سی ٹی اسکیننگ اور الٹرا سونوگرافی جیسی جدید ترین طبی سہولیات بھی دستیاب ہوں گی۔

******

ش ح۔ ش ا ر۔ ول

Uno-3803