وزیرِ اعظم جناب نریندر مودی نے ملک بھر میں 45 مقامات پر منعقد کیے گئے 20ویں روزگار میلے میں ویڈیو کانفرنسنگ کے ذریعے شرکت کی اور 51,000 سے زائد نو بھرتی شدہ نوجوانوں میں تقرری نامے تقسیم کیے۔

وزیرِ مملکت برائے اطلاعات و نشریات اور پارلیمانی امور، ڈاکٹر ایل۔ مروگن نے چنئی کے ڈی۔ جی۔ ویشنو کالج میں منعقدہ روزگار میلے میں شرکت کی۔ انہوں نے مرکزی حکومت کی مختلف وزارتوں، محکموں اور تنظیموں کے لیے منتخب کیے گئے 285 نو بھرتی شدہ امیدواروں میں تقرری نامے تقسیم کیے اور ان نوجوانوں کے لیے نیک خواہشات کا اظہار کیا جو محکمہ انکم ٹیکس، ایمپلائز اسٹیٹ انشورنس کارپوریشن، ایئرپورٹس اتھارٹی آف انڈیا، وزارتِ دفاع، محکمہ ڈاک، جواہر لال انسٹی ٹیوٹ آف پوسٹ گریجویٹ میڈیکل ایجوکیشن اینڈ ریسرچ اور جنوبی ریلوے سمیت اہم اداروں میں اپنی خدمات کا آغاز کر رہے ہیں۔

تقریب سے خطاب کرتے ہوئے مرکزی وزیر ڈاکٹر ایل۔ مروگن نے کہا کہ سرکاری ملازمت میں شامل ہونے والے نو بھرتی شدہ نوجوان 2047 تک ترقی یافتہ بھارت کے خواب کو شرمندۂ تعبیر کرنے میں اہم کردار ادا کریں گے۔ انہوں نے نو تقرر شدہ نوجوانوں پر زور دیا کہ وہ اپنی ذمہ داریوں کو محض روزگار حاصل کرنے کے طور پر نہ دیکھیں، بلکہ اسے ملک کی خدمت کرنے اور اس کی ہمہ گیر ترقی میں اپنا کردار ادا کرنے کا ایک موقع سمجھیں۔

انہوں نے کہا کہ تقرری نامہ محض تقرری کا حکم نہیں بلکہ ملک کی خدمت کرنے کا ایک موقع ہے۔ انہوں نے کہا کہ سرکاری ملازمین شہریوں کے ساتھ رابطے کے دوران حکومت کے نمائندوں اور حکومت کے چہرے کے طور پر اپنے فرائض انجام دیتے ہیں۔ انہوں نے اس بات پر زور دیا کہ دیانت داری، جواب دہی، ہمدردی اور عوام کے ساتھ انسانی ہمدردی پر مبنی رویہ سرکاری خدمت کا لازمی حصہ ہونا چاہیے۔

مرکزی وزیر نے حکومت کی مختلف اہم پہلوں، جن میں میک اِن انڈیا، اسٹارٹ اَپ انڈیا، اسٹینڈ اَپ انڈیا اور مدرا قرض اسکیم شامل ہیں، کو اجاگر کرتے ہوئے کہا کہ ان اقدامات نے نوجوانوں کو روزگار تلاش کرنے والوں کے ساتھ ساتھ روزگار فراہم کرنے والے بننے کے قابل بنایا ہے۔ انہوں نے بتایا کہ حکومت کی جانب سے کیے گئے مختلف اقدامات کے نتیجے میں بے روزگاری کی شرح 6 فیصد سے گھٹ کر 3.2 فیصد رہ گئی ہے۔

مرکزی وزیر ڈاکٹر ایل۔ مروگن نے بتایا کہ ملک میں اسٹارٹ اَپس کی تعداد، جو 2014 میں تقریباً 400 تھی، بڑھ کر 2.5 لاکھ سے زیادہ ہو گئی ہے۔ انہوں نے کہا کہ اسٹارٹ اَپ کے بانیوں کی ایک بڑی تعداد 30 سال سے کم عمر نوجوانوں پر مشتمل ہے۔

انہوں نے مسلسل سیکھنے، نئی ٹیکنالوجی اپنانے اور پیشہ ورانہ مہارتوں کو باقاعدگی سے بہتر بنانے کی اہمیت پر بھی زور دیا۔ انہوں نے کہا کہ خلائی ٹیکنالوجی اور جوہری توانائی جیسے جدید اور ابھرتے ہوئے شعبوں میں نوجوانوں کے لیے مواقع بڑھ رہے ہیں۔ انہوں نے مختلف شعبوں، بشمول خلائی شعبہ، دفاع، تعلیم، حکمرانی اور عوامی انتظامیہ میں خواتین کی بڑھتی ہوئی شرکت کو بھی اجاگر کیا۔

مرکزی وزیر نے مزید کہا کہ اب تک روزگار میلوں کے ذریعے 12.75 لاکھ سے زیادہ تقرری نامے تقسیم کیے جا چکے ہیں، جو نوجوانوں کے لیے روزگار کے مواقع پیدا کرنے پر حکومت کی خصوصی توجہ کی عکاسی کرتا ہے۔

بعد ازاں ذرائع ابلاغ سے خطاب کرتے ہوئے مرکزی وزیر ڈاکٹر ایل۔ مروگن نے کہا کہ تمل ناڈو کے نوودیا اسکول محروم اور معاشی طور پر کمزور طلبہ کو معیاری تعلیم تک رسائی فراہم کریں گے، مادری زبان میں ابتدائی تعلیم کو سہولت دیں گے اور طلبہ کو مختلف ہندوستانی زبانیں سیکھنے کے مواقع فراہم کریں گے۔

اس موقع پر جناب سنیل باجپائی، پرنسپل چیف کمشنر برائے انکم ٹیکس، تمل ناڈو و پڈوچیری کے علاوہ دیگر اعلیٰ افسران، نو تقرر شدہ امیدوار اور ان کے اہلِ خانہ بھی موجود تھے۔

******

ش ح۔ ش ا ر۔ ول

Uno-3802

(ریلیز آئی ڈی: 2312640) وزیٹر کاؤنٹر : 9