କ୍ଷମତା ବିକାଶ ଆୟୋଗ (ସିବିସି)ଙ୍କ ପକ୍ଷରୁ ‘ଜାତୀୟ ଅଗ୍ରଗତି ପାଇଁ ଅନୁକୂଳନଶୀଳ ବିକାଶ ଓ ମାନବୀୟ ଦକ୍ଷତା ସୁଦୃଢୀକରଣ (ସାଧନା) ଶୃଙ୍ଖଳା ୨୦୨୬ ଆୟୋଜନ କରାଯାଉଛି। ଏହା ମାଧ୍ୟମରେ ଦେଶବ୍ୟାପୀ ଆଞ୍ଚଳିକ ପରାମର୍ଶମୂଳକ କର୍ମଶାଳାମାନ ଆୟୋଜନ କରାଯାଉଛି। ମିଶନ୍ କର୍ମଯୋଗୀ ଅଧୀନରେ ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକୁ କ୍ଷମତା ବିକାଶ ପ୍ରତିଷ୍ଠାନ ଭାବେ ରୂପାନ୍ତରିତ କରିବା ଏହି ଶୃଙ୍ଖଳାର ମୁଖ୍ୟ ଉଦ୍ଦେଶ୍ୟ ଅଟେ। ୨୦୨୬ ଏପ୍ରିଲ ୨ରୁ ୮ ତାରିଖ ପର୍ଯ୍ୟନ୍ତ ପାଳିତ ସାଧନା ସପ୍ତାହ ୨୦୨୬ ଦେଶର ଅନ୍ୟତମ ବୃହତ୍ତମ ସହଯୋଗଭିତ୍ତିକ କ୍ଷମତା ବିକାଶ ପଦକ୍ଷେପ ଥିଲା। ପରାମର୍ଶ ଓ ଆଲୋଚନାର ଏହି ଭାବନାକୁ ଆହୁରି ଆଗକୁ ନେଇ ଏହି ଶୃଙ୍ଖଳା ମାଧ୍ୟମରେ ପ୍ରତିଷ୍ଠାନଗତ ସଂସ୍କାର ସମ୍ପର୍କିତ ଜାତୀୟ ଆଲୋଚନାକୁ ରାଜ୍ୟଗୁଡ଼ିକ ଓ ସେମାନଙ୍କ ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକ ପର୍ଯ୍ୟନ୍ତ ପହଞ୍ଚାଇବାର ପ୍ରୟାସ କରାଯାଉଛି। ଏହି ଶୃଙ୍ଖଳାର ପ୍ରଥମ କର୍ମଶାଳା ୨୦୨୬ ସେପ୍ଟେମ୍ବର ୨୯ ଓ ୩୦ ତାରିଖରେ ଆନ୍ଧ୍ରପ୍ରଦେଶର ବିଜୟୱାଡ଼ାଠାରେ ଅନୁଷ୍ଠିତ ହେବ।

ସାଧନା ସପ୍ତାହରୁ ସାଧନା ଶୃଙ୍ଖଳା ପର୍ଯ୍ୟନ୍ତ

ଭବିଷ୍ୟତ ପାଇଁ ପ୍ରସ୍ତୁତ, ଉତ୍ତରଦାୟୀ ଏବଂ ନାଗରିକକୈନ୍ଦ୍ରିକ ପ୍ରଶାସନିକ ସେବା ଗଠନରେ ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକ ହେଉଛନ୍ତି ମୂଳଦୁଆ। ଏହା ସହିତ ୨୦୪୭ ସୁଦ୍ଧା ବିକଶିତ ଭାରତର ସ୍ୱପ୍ନ ସାକାର କରିବାରେ ମଧ୍ୟ ଏହି ପ୍ରତିଷ୍ଠାନଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଗତ ଏକ ବର୍ଷ ମଧ୍ୟରେ ଆୟୋଗ ପକ୍ଷରୁ ବ୍ୟାପକ ପରାମର୍ଶମୂଳକ କାର୍ଯ୍ୟକ୍ରମ ଆୟୋଜନ କରାଯାଇଛି। ଏଥିରେ ଆଞ୍ଚଳିକ ଟାସ୍କ ଫୋର୍ସ ବୈଠକ, ସାଧନା ସପ୍ତାହ ଏବଂ ମେ ୨୦୨୬ରେ ଅନୁଷ୍ଠିତ ଜାତୀୟ ଶିଖର ସମ୍ମିଳନୀ ସାମିଲ ଥିଲା। ଏହି ପରାମର୍ଶ ପ୍ରକ୍ରିୟାରେ ପ୍ରଶିକ୍ଷଣ ପ୍ରତିଷ୍ଠାନ, ରାଜ୍ୟ ସରକାର ଏବଂ ଶିଳ୍ପ କ୍ଷେତ୍ରର ସହଯୋଗୀମାନେ ଏକ ସାଧାରଣ ମଞ୍ଚରେ ଏକାଠି ହୋଇଥିଲେ। ଆଲୋଚନାରୁ ଏହା ସ୍ପଷ୍ଟ ହୋଇଥିଲା ଯେ, ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକୁ କେବଳ ସ୍ୱତନ୍ତ୍ର ପ୍ରଶିକ୍ଷଣ ପ୍ରଦାନକାରୀ ପ୍ରତିଷ୍ଠାନର ସୀମାରେ ନରଖି ରଣନୈତିକ ଏବଂ ଦକ୍ଷତାଭିତ୍ତିକ କ୍ଷମତା ବିକାଶ ପ୍ରତିଷ୍ଠାନ ଭାବେ ବିକଶିତ କରିବା ପାଇଁ ଏକ ସମନ୍ୱିତ ଢାଞ୍ଚାର ଆବଶ୍ୟକତା ରହିଛି। ଏହି ପରିପ୍ରେକ୍ଷୀରେ ସାଧନା ଶୃଙ୍ଖଳା ଜାତୀୟ ସ୍ତରର ପରାମର୍ଶ ପ୍ରକ୍ରିୟାକୁ ଆଗକୁ ନେଇ ଆଞ୍ଚଳିକ ସ୍ତରରେ ଆଲୋଚନା, ସ୍ଥାନୀୟ ପରିପ୍ରେକ୍ଷୀକରଣ ଏବଂ କାର୍ଯ୍ୟାନ୍ବୟନ ଦିଗରେ ଏହାକୁ ବିସ୍ତାର କରିବ।

ପ୍ରଶିକ୍ଷଣ ପ୍ରତିଷ୍ଠାନର ରୂପାନ୍ତରଣ ପାଇଁ ଏକ ଢାଞ୍ଚା ଦିଗରେ

ଏହି ଆଞ୍ଚଳିକ କର୍ମଶାଳାଗୁଡ଼ିକର ଅଂଶ ଭାବେ ଆୟୋଗ ରାଜ୍ୟ ସରକାର, ପ୍ରଶିକ୍ଷଣ ପ୍ରତିଷ୍ଠାନ ଏବଂ ଅନ୍ୟାନ୍ୟ ଅଂଶୀଦାରଙ୍କ ସହ ଆଲୋଚନା କରି ‘ପ୍ରଶିକ୍ଷଣ ପ୍ରତିଷ୍ଠାନ ରୂପାନ୍ତରଣ ଫ୍ରେମଓ୍ବାର୍କ’  ବିକଶିତ କରୁଛନ୍ତି। ଦେଶର ବିଭିନ୍ନ ପ୍ରଶିକ୍ଷଣ ପ୍ରତିଷ୍ଠାନର ଭିନ୍ନ ଆବଶ୍ୟକତା ଓ ବାସ୍ତବତାକୁ ଏହି ଢାଞ୍ଚା ପ୍ରତିଫଳିତ କରିବ। ଆଲୋଚନାରେ ପ୍ରତିଷ୍ଠାନଗତ ଶାସନ ଓ ନେତୃତ୍ୱ, କାର୍ଯ୍ୟକ୍ଷମତା ଓ ସହଯୋଗ, ଶୈକ୍ଷିକ ଓ କ୍ଷମତା ବିକାଶ, ଏବଂ ଡିଜିଟାଲ୍ ଓ ଉଦୀୟମାନ ପ୍ରଯୁକ୍ତିର ସୁବ୍ୟବସ୍ଥିତ ଗ୍ରହଣ ଭଳି ପ୍ରମୁଖ କ୍ଷେତ୍ର ଉପରେ ଗୁରୁତ୍ୱ ଦିଆଯିବ। ଏହାର ଲକ୍ଷ୍ୟ ହେଉଛି ଏକ ସାଧାରଣ ଢାଞ୍ଚା ପ୍ରସ୍ତୁତ କରିବା, ଯାହାକି ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକର ରୂପାନ୍ତରଣ ପାଇଁ ଦିଗଦର୍ଶନ ଦେଇପାରିବ। ତେବେ ଏହା ବିଭିନ୍ନ ରାଜ୍ୟ ଓ ପ୍ରତିଷ୍ଠାନର ଅଭିଜ୍ଞତା, ପ୍ରାଥମିକତା ଏବଂ ସ୍ଥାନୀୟ ପରିପ୍ରେକ୍ଷୀକୁ ଆଧାର କରି ଗଢ଼ାଯିବ। ତେଣୁ, ଏହି ଢାଞ୍ଚାକୁ ରୂପାନ୍ତରଣ ପାଇଁ ସମସ୍ତଙ୍କ ମାଲିକାନାରେ ପ୍ରସ୍ତୁତ ଏକ ରୋଡମ୍ୟାପ୍ ଭାବେ ବିକଶିତ କରାଯିବ। ସାଧନା ଶୃଙ୍ଖଳା ଏହି ଆଲୋଚନାକୁ ଆଞ୍ଚଳିକ ସ୍ତରକୁ ନେବା, ଉଦୀୟମାନ ସୁପାରିସଗୁଡ଼ିକର ବୈଧତା ଯାଞ୍ଚ କରିବା ଏବଂ ସେଗୁଡ଼ିକୁ କାର୍ଯ୍ୟକାରୀ ପ୍ରାଥମିକତାରେ ପରିଣତ କରିବା ପାଇଁ ଏକ ମଞ୍ଚ ପ୍ରଦାନ କରିବ। ଏହି ରୂପାନ୍ତରଣର କାର୍ଯ୍ୟାନ୍ୱୟନ ୟୁନିଫାଏଡ୍ ନ୍ୟୁ-ଏଜ୍ ନ୍ୟାସନାଲ୍ ଟ୍ରେନିଂ ଇନିସିଏଟିଭ୍ସ (UNNATI) ପୋର୍ଟାଲ୍ ମାଧ୍ୟମରେ କରାଯିବ। ସାଧନା ସପ୍ତାହ ସମୟରେ ଆରମ୍ଭ ହୋଇଥିବା ଏହି ପୋର୍ଟାଲ୍‌କୁ ଢାଞ୍ଚାର ମୁଖ୍ୟ ଡିଜିଟାଲ୍ ସକ୍ଷମକାରୀ ଭାବେ ସାମିଲ କରାଯାଇଛି। ଦେଶର ୭୦୦ରୁ ଅଧିକ ପ୍ରଶିକ୍ଷଣ ପ୍ରତିଷ୍ଠାନକୁ ଏକକ ପ୍ଲାଟଫର୍ମରେ ଯୋଡ଼ି, UNNATI ଏହି ଢାଞ୍ଚାର ଲକ୍ଷ୍ୟଗୁଡ଼ିକୁ ବାସ୍ତବ ରୂପ ଦେବା ସହିତ ପ୍ରତିଷ୍ଠାନଗୁଡ଼ିକର ଦୃଶ୍ୟମାନତା ବୃଦ୍ଧି, ନିରବିଚ୍ଛିନ୍ନ ସହଯୋଗ ଏବଂ ସହଯୋଗ, ସହଭାଗୀକରଣ ଓ ସହ-ସୃଜନ ମାଧ୍ୟମରେ ତଥ୍ୟଭିତ୍ତିକ ନିରନ୍ତର ପ୍ରତିଷ୍ଠାନଗତ ଉନ୍ନତିକୁ ପ୍ରୋତ୍ସାହିତ କରିବ।

ବିଜୟୱାଡ଼ାରେ ପ୍ରଥମ ଆଞ୍ଚଳିକ କର୍ମଶାଳା

ବିଜୟୱାଡ଼ାରେ ଅନୁଷ୍ଠିତ ହେବାକୁ ଥିବା ପ୍ରଥମ ଆଞ୍ଚଳିକ କର୍ମଶାଳାରେ ଆନ୍ଧ୍ରପ୍ରଦେଶର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ଏନ୍‌. ଚନ୍ଦ୍ରବାବୁ ନାଇଡୁ ଯୋଗଦେବେ। କେନ୍ଦ୍ରୀୟ କାର୍ମିକ, ଜନଅଭିଯୋଗ ଓ ପେନ୍‌ସନ୍‌ ବିଭାଗର ମାନ୍ୟବର ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂହଙ୍କ ଗରିମାମୟ ଉପସ୍ଥିତିରେ ଏହି କର୍ମଶାଳା ଅନୁଷ୍ଠିତ ହେବ। ଏହି କର୍ମଶାଳାରେ ଓଡ଼ିଶା, ତେଲଙ୍ଗାନା, କର୍ଣ୍ଣାଟକ, ଆନ୍ଧ୍ରପ୍ରଦେଶ, ତାମିଲନାଡୁ, କେରଳ ଓ ପୁଡୁଚେରୀର ବରିଷ୍ଠ ଅଧିକାରୀମାନେ ଅଂଶଗ୍ରହଣ କରିବେ। ଏଥିସହ ଏହି ରାଜ୍ୟଗୁଡ଼ିକର ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକର ମୁଖ୍ୟ ଓ ପ୍ରଶିକ୍ଷକ, ଶିଳ୍ପ କ୍ଷେତ୍ରର ସହଯୋଗୀ, ବିଷୟ ବିଶେଷଜ୍ଞ ଏବଂ ଷ୍ଟାର୍ଟଅପ୍‌ ପ୍ରତିନିଧିମାନେ ମଧ୍ୟ ଯୋଗଦେବେ। ବିଜୟୱାଡ଼ାରେ କର୍ମଶାଳା ପରେ ସାଧନା ଶୃଙ୍ଖଳା ଦେଶର ଅନ୍ୟାନ୍ୟ ଅଞ୍ଚଳରେ ଆୟୋଜନ ହେବ ଏବଂ ରାଜ୍ୟ ସରକାର ଓ ପ୍ରଶିକ୍ଷଣ ପ୍ରତିଷ୍ଠାନଗୁଡ଼ିକ ସହ ଏହି ସହଯୋଗମୂଳକ ଆଲୋଚନାକୁ ଆଗକୁ ବଢ଼ାଇବ। ଏହି ପରାମର୍ଶ ପ୍ରକ୍ରିୟାରୁ ମିଳୁଥିବା ମତାମତ ଓ ଜ୍ଞାନ ‘ପ୍ରଶିକ୍ଷଣ ପ୍ରତିଷ୍ଠାନ ରୂପାନ୍ତରଣ ଢାଞ୍ଚା’ର ଚୂଡ଼ାନ୍ତ ରୂପ ପ୍ରସ୍ତୁତିରେ ସହାୟକ ହେବ। ଏହି ପଦକ୍ଷେପ ମାଧ୍ୟମରେ ଏକ ସଂଯୁକ୍ତ, ଦ୍ରୁତ ପ୍ରତିକ୍ରିୟାଶୀଳ ଓ ଭବିଷ୍ୟତ ପାଇଁ ପ୍ରସ୍ତୁତ କ୍ଷମତା ବିକାଶ ପରିବେଶ ଗଠନରେ ଯୋଗଦାନ କରାଯିବ। ଏଥିସହ ମିଶନ କର୍ମଯୋଗୀ ଅଧୀନରେ ସରକାରୀ କର୍ମଚାରୀମାନଙ୍କୁ ଆବଶ୍ୟକ ଦକ୍ଷତା ଓ କ୍ଷମତାରେ ସମୃଦ୍ଧ କରିବା ପ୍ରତି ରହିଥିବା ପ୍ରତିବଦ୍ଧତାକୁ ମଧ୍ୟ ଏହା ପୁନଃପ୍ରତିପାଦିତ କରିବ। ଏହା ବିକଶିତ ଭାରତ ୨୦୪୭ର ଲକ୍ଷ୍ୟପଥରେ ନାଗରିକମାନଙ୍କୁ ଉତ୍ତମ ସେବା ଓ ଫଳାଫଳ ପ୍ରଦାନ ପାଇଁ ସରକାରୀ କର୍ମଚାରୀମାନଙ୍କୁ ସକ୍ଷମ କରିବାରେ ସହାୟକ ହେବ।

TKM