മുൻ തെലങ്കാന ഗവർണറും പുതുച്ചേരി മുൻ ലഫ്റ്റനൻ്റ്  ഗവർണറുമായ ഡോ. തമിഴിസൈ സൗന്ദരരാജൻ രചിച്ച "എ സെഞ്ച്വറി ഓഫ് സർവീസ് – ദി ആർ.എസ്.എസ്. ഇൻ 100 ആക്ട്സ് ഓഫ് സേവ" എന്ന പുസ്തകം ഉപരാഷ്ട്രപതി സി.പി. രാധാകൃഷ്ണൻ ഇന്ന് ന്യൂഡൽഹിയിലെ ഉപരാഷ്ട്രപതി ഭവനിൽ പ്രകാശനം ചെയ്തു.

ആർ.എസ്.എസിൻ്റെ ഒരു നൂറ്റാണ്ട് നീണ്ട സേവനങ്ങളെയും സാമൂഹിക ഉത്തരവാദിത്തത്തെയും രാഷ്ട്രനിർമ്മാണത്തിനുള്ള സംഭാവനകളെയും കുറിച്ച്  ഈ പുസ്തകത്തിൽ വ്യക്തമായി പ്രതിപാദിച്ചിട്ടുണ്ടെന്ന് ചടങ്ങിനെ അഭിസംബോധന ചെയ്തുകൊണ്ട് ഉപരാഷ്ട്രപതി പറഞ്ഞു

"ഇന്നത്തെ വാർത്തയാണ് നാളത്തെ ചരിത്രം" എന്ന് ചൂണ്ടിക്കാട്ടിയ ശ്രീ സി.പി. രാധാകൃഷ്ണൻ, ഇത്തരം നല്ല പ്രവർത്തനങ്ങൾ രേഖപ്പെടുത്തിവെക്കേണ്ടതിൻ്റെ പ്രാധാന്യത്തെക്കുറിച്ച് ഊന്നിപ്പറഞ്ഞു. അല്ലാത്തപക്ഷം അവ ജനങ്ങളുടെ ഓർമ്മയിൽ നിന്ന് മാഞ്ഞുപോകാൻ സാധ്യതയുണ്ടെന്നും അദ്ദേഹം പറഞ്ഞു. സേവാ മനോഭാവം എങ്ങനെയാണ് നിരന്തരമായ സാമൂഹിക സേവനമായി മാറിയതെന്ന് പുസ്തകം വ്യക്തമായി പകർത്തിയിട്ടുണ്ടെന്നും അദ്ദേഹം വ്യക്തമാക്കി.

"സേവയാണ് ധർമ്മം; അതൊരു കടമയാണ്" എന്ന അടിസ്ഥാന ആദർശത്തെക്കുറിച്ച് സംസാരിച്ച ഉപരാഷ്ട്രപതി, ആർ.എസ്.എസിൻ്റെ സേവന പ്രവർത്തനങ്ങൾ തൊഴിലാളികളും സ്ത്രീകളും കുട്ടികളും ഉൾപ്പെടെ ദരിദ്രരിലേക്കും പാർശ്വവൽക്കരിക്കപ്പെട്ടവരിലേക്കും സമൂഹത്തിലെ വിവിധ വിഭാഗങ്ങളിലേക്കും എത്തിച്ചേർന്നിട്ടുണ്ടെന്ന് ചൂണ്ടിക്കാട്ടി. കോവിഡ് മഹാമാരിയുടെ കാലത്ത് ആഹാരവും മരുന്നുകളും മറ്റ് അവശ്യ സഹായങ്ങളും എത്തിക്കുന്നതിൽ ആർ.എസ്.എസ്. പ്രവർത്തകർ വഹിച്ച പങ്കും അദ്ദേഹം അനുസ്മരിച്ചു.

പുസ്തകത്തിലെ "സ്വഭാവ രൂപീകരണത്തിലൂടെ രാഷ്ട്രനിർമ്മാണം" എന്ന ആശയം പരാമർശിച്ചുകൊണ്ട്, രാജ്യസ്നേഹം, അച്ചടക്കം, സാമൂഹിക ഉത്തരവാദിത്തം, ദേശീയ ഐക്യം എന്നിവ രാഷ്ട്രനിർമ്മാണത്തിന് അനിവാര്യമാണെന്ന് ഉപരാഷ്ട്രപതി പറഞ്ഞു.

ഈ പുസ്തകം ആർ.എസ്.എസിൻ്റെ ഒരു നൂറ്റാണ്ട് നീണ്ട സേവനങ്ങളുടെ ചരിത്രരേഖ മാത്രമല്ലെന്നും, മറിച്ച് വരുംതലമുറകൾക്ക് ഇന്ത്യയുടെ സേവാ പാരമ്പര്യവും സംസ്കാരവും ദേശീയബോധവും പ്രതിഫലിപ്പിക്കുന്ന ഒരു സുപ്രധാന രേഖ കൂടിയായിരിക്കുമെന്നും അദ്ദേഹം അഭിപ്രായപ്പെട്ടു.

ചരിത്രം രേഖപ്പെടുത്തുന്ന ഇത്തരം കൂടുതൽ ഉദ്യമങ്ങൾ ഇനിയും ഉണ്ടാകുമെന്ന പ്രത്യാശ പ്രകടിപ്പിച്ച ഉപരാഷ്ട്രപതി, ഡോ. തമിഴിസൈ സൗന്ദരരാജനെയും പുസ്തകത്തിൻ്റെ  പ്രസിദ്ധീകരണവുമായി  ബന്ധപ്പെട്ട എല്ലാവരെയും അഭിനന്ദിച്ചു.

കേന്ദ്ര വാർത്താവിതരണ പ്രക്ഷേപണ, പാർലമെൻ്ററി കാര്യ സഹമന്ത്രി ഡോ. എൽ. മുരുകൻ, പുതുച്ചേരി ആഭ്യന്തര മന്ത്രി ശ്രീ എ. നമശ്ശിവായം, ഗ്രന്ഥകർത്താവ് ഡോ. തമിഴിസൈ സൗന്ദരരാജൻ എന്നിവരും ചടങ്ങിൽ സന്നിഹിതരായിരുന്നു.

****