نائب صدر  جمہوریہ  اور انڈین کونسل آف ورلڈ افیئرز (آئی سی ڈبلیو اے) کے صدر جناب سی پی رادھا کرشنن نے آج نئی دہلی کے سپرو ہاؤس میں قومی اہمیت کے حامل  ادارے کے طور پر آئی سی ڈبلیو اے کے  25 سال مکمل ہونے کی تقریبات سے خطاب کیا ۔  انہوں نے کہا کہ سلور جوبلی، شکریہ ادا کرنے اور غور و فکر کرنے کا ایک موقع ہے ۔  انہوں نے کونسل کے ممتاز اور مالا مال  ورثے میں تعاون کرنے والے بانیوں ، سابق رہنماؤں ، ڈائریکٹر جنرل ، اسکالرز ، سفارت کاروں ، محققین اور عملے کے افراد کو خراج تحسین پیش کیا ۔

نائب صدر جمہوریہ نے وزیر خارجہ اور آئی سی ڈبلیو اے کے نائب صدر ڈاکٹر ایس جے شنکر ، خارجہ سکریٹری جناب وکرم مسری اور وزارت خارجہ کی پوری ٹیم کو برکس سربراہ اجلاس کی کامیاب میزبانی پر مبارکباد دی ۔  انہوں نے کہا کہ تنازعات اور تضادات سے پریشان دنیا میں نئی دہلی کے قائدین کے اعلامیے کو متفقہ طور پر اپنانا ایک اہم کامیابی ہے ۔

انہوں نے اس بات پر زور دیا کہ سفارت کاری کا پہلا مقصد ملکوں کے درمیان اچھے تعلقات استوار کرنا ہے ۔  انہوں نے کہا کہ انسانی ترقی اور عالمی امن ساتھ ساتھ چلنا چاہیے اور یہ تبھی ممکن ہے، جب ممالک ایک دوسرے کے خدشات کو سمجھیں اور باہمی فائدے کے لیے کام کریں ۔

وزیر اعظم جناب نریندر مودی کی قیادت میں ہندوستان کے بڑھتے ہوئے عالمی رول  پر روشنی ڈالتے ہوئے نائب صدر جمہوریہ  نے کہا کہ ہندوستان، عالمی سطح پر  امن ، ترقی اور خوشحالی کے لیے ایک مضبوط آواز کے طور پر ابھرا ہے ۔  انہوں نے وسودھیو کٹمبکم ، دنیا ایک کنبہ ہے ، پر روشنی ڈالی اور کووڈ بحران کے دوران ویکسین میتری ، ہندوستان کی آفات سے نمٹنے کی کوششوں ، ایل آئی ایف ای اور بین الاقوامی شمسی اتحاد اور عالمی حیاتیاتی ایندھن اتحاد جیسے عالمی اقدامات کو عملی طور پر مذکورہ  فلسفے کی مثالوں کے طور پر پیش کیا ۔

نائب صدر جمہوریہ نے یو پی آئی اور ڈیجیٹل سرکاری بنیادی ڈھانچے میں ہندوستان کی کامیابیوں کو اجاگر کرتے ہوئے کہا کہ "شفاف ادائیگی کا نظام، شفاف حکمرانی کی طرف لے جاتا ہے"۔   انہوں نے کہا کہ ہندوستان آئی ٹی ای سی اور تعلیمی تعاون کے ذریعے عالمی خطہ جنوب کے ساتھ اپنی تکنیکی اور ادارہ جاتی صلاحیتوں کا اشتراک کر رہا ہے ، جس میں ہندوستان سے باہر زنزیبار میں پہلا آئی آئی ٹی کیمپس بھی شامل ہے ۔  ہندوستان کے بین الاقوامی شراکت داروں کے بڑھتے ہوئے یقین  اور اعتماد کا ذکر کرتے ہوئے انہوں نے کہا کہ "ہندوستان عالمی سطح پر والمی خطہ جنوب کی قیادت کرنے کے لیے ابھر رہا ہے"۔

جناب سی پی رادھا کرشنن نے کہا کہ بدلتے ہوئے عالمی منظر نامے نے آئی سی ڈبلیو اے کے رول کو اور بھی اہم بنا دیا ہے ۔  انہوں نے کونسل کے لیے چار ترجیحات: ہندوستان کے پڑوسی  پہلے ، ایکٹ ایسٹ ، گلوبل ساؤتھ اور بھارت - بحرالکاہل کی ترجیحات پر تحقیق کو مضبوط کرنا ؛ سائبر سیکورٹی ، خلائی ، اہم ٹیکنالوجیز اور عالمی سپلائی چین پر کام کو بڑھانا ؛ یونیورسٹیوں اور نوجوان اسکالرز کے ساتھ مشغولیت کو وسعت دینا ؛ اور تسلیم شدہ  ہندوستانی نقطہ نظر کے ساتھ عالمی امور پر علم کا قابل اعتماد ذخیرہ بننے کا خاکہ پیش کیا۔

نائب صدر جمہوریہ نے کہا کہ آئی سی ڈبلیو اے کو وکست بھارت 2047  @ کے لیے خود کو فکری اور ادارہ جاتی طور پر تیار کرنا چاہیے اور بین الاقوامی امور کے مطالعہ کے لیے دنیا کے باوقار علمی  مراکز میں سے ایک بننے کے لیے کام کرنا چاہیے ۔  انہوں نے اس اعتماد کا اظہار کیا کہ کونسل اپنی گولڈن جوبلی تک ہندوستان اور پرامن عالمی نظام کے لیے اور بھی زیادہ تعاون کرے گی ۔

نائب صدر جمہوریہ  نے آئی سی ڈبلیو اے کے ارتقاء اور  سفر  کو اجاگر کرنے والی  ایک تصویری نمائش کا بھی دورہ کیا اور کونسل میں ان کے تعاون کے اعتراف میں سابق ڈائریکٹر جنرل کو یادگاری نشانات بھی عطا کیے ۔

...................

) ش ح –مع-ق ر)

U.No. 3569