ബഹുമാന്യ വ്യക്തിത്വങ്ങള‍േ,

ബ്രിക്സ് ബിസിനസ് സമൂഹത്തിലെ നേതാക്കളേ,

പുതുസംരംഭകരേ, സുഹൃത്തുക്കളേ,

നമസ്കാരം!

ബ്രിക്സ് ബിസിനസ് ഫോറത്തിലേക്ക് നിങ്ങളേവർക്കും ഹൃദ്യമായ സ്വാഗതം.

ഈ വർഷം നമ്മൾ ബ്രിക്സിന്റെ 20-ാം വാർഷികം ആഘോഷിക്കുകയാണ്. 2006-ൽ ഈ കൂട്ടായ്മ ആരംഭിച്ചപ്പോൾ വെറും നാല് രാജ്യങ്ങൾ മാത്രമാണ് ഉണ്ടായിരുന്നത്. എന്നാൽ ഇന്ന് ബ്രിക്സും അതിന്റെ പങ്കാളിത്ത രാജ്യങ്ങളും ഉൾപ്പെടെ 21 രാജ്യങ്ങളുടെ ഒരു വലിയ കുടുംബമായി നമ്മൾ മാറിയിരിക്കുന്നു.

ഇന്ന് ലോക ജനസംഖ്യയുടെ 50 ശതമാനത്തെയും ആഗോള മൊത്ത ആഭ്യന്തര ഉൽപ്പാദനത്തിന്റെ (GDP) 40 ശതമാനത്തെയും ആഗോള വ്യാപാരത്തിന്റെ 25 ശതമാനത്തിലധികത്തെയും ബ്രിക്സ് രാജ്യങ്ങൾ പ്രതിനിധീകരിക്കുന്നു. അതുമാത്രമല്ല, ഈ വർഷങ്ങളിൽ ആഗോള ജി.ഡി.പി ഏകദേശം 2.5 മടങ്ങ് വളർന്നപ്പോൾ, ബ്രിക്സ് രാജ്യങ്ങളുടെ മൊത്തത്തിലുള്ള ജി.ഡി.പി വളർച്ച ഏകദേശം 4.5 മടങ്ങാണ്. അതായത്, ലോക സമ്പദ്‌വ്യവസ്ഥയുടെ വളർച്ചാ നിരക്കിന്റെ ഇരട്ടി വേഗതയിലാണ് ബ്രിക്സിന്റെ സാമ്പത്തിക ശേഷി വളർന്നത്.

ആഗോള നവീനാശയങ്ങളുടെയും പരിഹാരങ്ങളുടെയും സുപ്രധാന കേന്ദ്രങ്ങളായി ബ്രിക്സ് രാജ്യങ്ങൾ ഉയർന്നുവരികയാണ്. ഗ്രാമീണ തലത്തിലുള്ള സംരംഭങ്ങൾ മുതൽ അത്യാധുനിക സാങ്കേതികവിദ്യകൾ വരെയുള്ള നവീനാശയങ്ങളുടെ പുതിയ സാധ്യതകൾ നമ്മുടെ രാജ്യങ്ങളിലുടനീളം രൂപപ്പെടുന്നുണ്ട്. ബ്രിക്സിന്റെ വളരുന്ന വലുപ്പവും വേഗതയും ശുഭാപ്തിവിശ്വാസവും നമുക്കിടയിൽ വ്യക്തമായി ദൃശ്യമാണ്. ഇന്ത്യയിൽ നടക്കുന്ന ഈ ഫോറം, ചരിത്രത്തിലെ ഏറ്റവും വലിയ ബ്രിക്സ് ബിസിനസ് ഫോറമാണ്.

സുഹൃത്തുക്കളേ,

ഇന്ത്യയുടെ ബ്രിക്സ് അധ്യക്ഷതയുടെ പ്രമേയം "അതിജീവനശേഷി, നവീനാശയം, സഹകരണം, സുസ്ഥിരത എന്നിവയ്ക്കായുള്ള നിർമ്മിതി"  എന്നതാണ്.

കഴിഞ്ഞ പന്ത്രണ്ട് വർഷങ്ങളായി ഇന്ത്യ തങ്ങളുടെ സാമ്പത്തിക-വ്യാപാര നയങ്ങളുടെ അടിസ്ഥാന തത്ത്വമായി ഈ മന്ത്രത്തെ മാറ്റിയിരിക്കുന്നു. അതിജീവനശേഷിയുടെ  കാര്യത്തിൽ, ഊർജ്ജം മുതൽ സാങ്കേതികവിദ്യ വരെ, തങ്ങളുടെ വിതരണ ശൃംഖലകളെ ഇന്ത്യ കൂടുതൽ വൈവിധ്യപൂർണ്ണവും വിശ്വസനീയവുമാക്കിയിട്ടുണ്ട്. ഈ അതിജീവനശേഷിയാണ്, ആഗോള അനിശ്ചിതത്വങ്ങൾക്കിടയിലും വളർച്ചയിലും സ്ഥിരതയിലും ലോകത്തിന് ആത്മവിശ്വാസം നൽകാൻ ഇന്ത്യയെ പ്രാപ്തമാക്കിയത്.

നമ്മൾ റോഡുകൾ, റെയിൽവേകൾ, തുറമുഖങ്ങൾ, വിമാനത്താവളങ്ങൾ എന്നിവ വേഗത്തിൽ വികസിപ്പിച്ചുകൊണ്ടിരിക്കുകയാണ്. അതോടൊപ്പം തന്നെ കപ്പൽ നിർമ്മാണം, സെമിക്കണ്ടക്ടറുകൾ, ക്വാണ്ടം സാങ്കേതികവിദ്യ, നിർണായക ധാതുക്കൾ, ബയോടെക്നോളജി തുടങ്ങിയ തന്ത്രപ്രധാന മേഖലകളിൽ നമ്മൾ പുതിയ ശേഷികൾ കൈവരിക്കുകയും ചെയ്യുന്നു. ഈ മേഖലകളിൽ, ആഗോള ബിസിനസ്സുകൾക്കുള്ള പുതിയ അവസരങ്ങളുടെ ഒരു കേന്ദ്രമായി ഇന്ത്യ ഉയർന്നുവരികയാണ്. അതിനാൽ ഇന്ത്യയിൽ നിർമ്മിക്കൂ, ഇന്ത്യയ്ക്കൊപ്പം നവീകരിക്കൂ, ലോകത്തിനായി വിപുലീകരിക്കൂ.

സുഹൃത്തുക്കളേ,

ഇന്ന് ഇന്ത്യ ഒരു സ്റ്റാർട്ടപ്പ് വിപ്ലവത്തിന് സാക്ഷ്യം വഹിക്കുകയാണ്. രണ്ടരലക്ഷത്തിലധികം  സ്റ്റാർട്ടപ്പുകളും 120-ലധികം യൂണികോണുകളുമുള്ള ഇന്ത്യ, ആഗോള പരിഹാരങ്ങളുടെ ഒരു കേന്ദ്രമായി ഉയർന്നുവരികയാണ്. 'ബ്രിക്സ് ഭാരത് ഇന്നൊവേറ്റ്സ് എക്സ്പോ'യിൽ  നിങ്ങൾക്ക് ഇതിന്റെ ഒരു നേർകാഴ്ച ലഭിക്കും.

നമ്മുടെ സ്റ്റാർട്ടപ്പുകൾ കൃത്രിമബുദ്ധി (AI) വഴി വിദ്യാഭ്യാസ രംഗത്തും ആരോഗ്യ സംരക്ഷണ രംഗത്തും വിപ്ലവകരമായ മാറ്റങ്ങൾ വരുത്തുന്നു; ഗ്രീൻ ഹൈഡ്രജൻ, ബാറ്ററികൾ എന്നിവയിൽ പ്രവർത്തിക്കുന്നു; പ്രതിരോധ, ബഹിരാകാശ മേഖലകളിൽ പുതിയ മുന്നേറ്റങ്ങൾ നടത്തുന്നു. ഇനി, ബ്രിക്സ് വഴിയും ഈ ലോകോത്തര നവീകരണങ്ങളെ നമ്മൾ ആഗോള വിപണികളിലേക്ക് എത്തിക്കേണ്ടതുണ്ട്.

സുഹൃത്തുക്കളേ,

ഇന്ത്യയുടെ നവീനാശയ കഥയുടെ മറ്റൊരു സവിശേഷതയാണ് 'ജനസംഖ്യാപരമായ അളവിലുള്ള നവീനാശയം'. ഇന്ത്യയുടെ യൂണിഫൈഡ് പേയ്‌മെന്റ് ഇന്റർഫേസ് (UPI) സാമ്പത്തിക ഉൾക്കൊള്ളലിനും പൊതുസമൂഹത്തിനിടയിൽ അത്രയും വലിയ അളവിലുള്ള ഡിജിറ്റൽ ഇടപാടുകൾക്കും പുതിയ വേഗത നൽകിയിട്ടുണ്ട്.

ഇന്ന് ലോകത്തിലെ തത്സമയ  പേയ്‌മെന്റുകളുടെ 50 ശതമാനവും ഈ സാങ്കേതികവിദ്യയുടെ കരുത്തിലാണ് പ്രവർത്തിക്കുന്നത്. ഈ ഡിജിറ്റൽ അടിത്തറയിൽ പുതിയ പരിഹാരങ്ങൾ കെട്ടിപ്പടുക്കുന്നതിനായി, വ്യവസായ മേഖലയ്ക്കും സ്റ്റാർട്ടപ്പുകൾക്കുമായി നമ്മൾ ഒരു തുറന്ന പരിസ്ഥിതി  ഒരുക്കിയിട്ടുണ്ട്. ഇന്ത്യയുടെ ഈ ലോകോത്തര ഡിജിറ്റൽ മാതൃക നിരവധി രാജ്യങ്ങൾ സ്വീകരിക്കുന്നതിൽ നമുക്ക് അഭിമാനമുണ്ട്. ബ്രിക്സ് രാജ്യങ്ങളിൽ നിന്നുള്ള നവീകരണ വിദഗ്ദ്ധർക്കും ഈ അനുഭവം പ്രയോജനപ്പെടുത്തി സ്വന്തം രാജ്യങ്ങൾക്കായി പുതിയ പരിഹാരങ്ങൾ വികസിപ്പിക്കാവുന്നതാണ്.

സുഹൃത്തുക്കളേ,

ഇന്ന് ലോകമെമ്പാടും വ്യാപാര തടസ്സങ്ങൾ വർദ്ധിച്ചുവരുമ്പോൾ, ഇന്ത്യ സാമ്പത്തിക ബന്ധങ്ങൾ നിർമ്മിക്കുകയാണ്. 2014 മുതൽ ലോകത്തിലെ 40-ഓളം രാജ്യങ്ങളുമായി നമ്മൾ സ്വതന്ത്ര വ്യാപാര കരാറുകളിൽ ഒപ്പുവെച്ചിട്ടുണ്ട്. ബ്രിക്സിനുള്ളിലും നമ്മുടെ സമീപനം ഇതുതന്നെയാണ്—ബിസിനസ്സുകൾക്കുള്ള തടസ്സങ്ങൾ കുറയ്ക്കുക, അവസരങ്ങൾ വികസിപ്പിക്കുക.

അതുകൊണ്ടാണ് നമ്മുടെ അധ്യക്ഷതയ്ക്ക് കീഴിൽ കൃഷി, ആരോഗ്യ സംരക്ഷണം, വൈദഗ്ധ്യ വികസനം, സ്മാർട്ട് ഗ്രിഡുകൾ തുടങ്ങിയ മേഖലകളിൽ നമ്മൾ പുതിയ സഹകരണ ശൃംഖലകൾ സ്ഥാപിച്ചിട്ടുള്ളത്. സ്റ്റാർട്ടപ്പുകളെയും ചെറുകിട ഇടത്തരം സംരംഭങ്ങളെയും (SMEs) വിപണികളുമായും സാമ്പത്തിക സഹായങ്ങളുമായും ബന്ധിപ്പിക്കുന്നതിന് 'ബ്രിക്സ് ഇൻക്യുബേറ്റർ നെറ്റ്‌വർക്ക്', 'ബ്രിക്സ് എം.എസ്.എം.ഇ പോർട്ടൽ', 'ബ്രിക്സ് സ്റ്റാർട്ടപ്പ് ഇന്നൊവേഷൻ ഫണ്ട്'  തുടങ്ങിയ പദ്ധതികൾക്ക് നമ്മൾ തുടക്കം കുറിച്ചിട്ടുണ്ട്.

നിങ്ങൾക്കെല്ലാവർക്കും ഈ സഹകരണ സംവിധാനങ്ങളിൽ നിന്ന് പ്രയോജനം നേടാനും നമ്മുടെ രാജ്യങ്ങൾക്കിടയിലുള്ള നിക്ഷേപങ്ങളുടെയും കഴിവുകളുടെയും കൈമാറ്റം കൂടുതൽ വർദ്ധിപ്പിക്കാനും സാധിക്കും.

സുഹൃത്തുക്കളേ,

സമുദ്ര പാതകൾ സുരക്ഷിതമായിരിക്കുകയും വ്യാപാര പാതകൾ തടസ്സമില്ലാതെ തുടരുകയും നാവികർ സുരക്ഷിതരായിരിക്കുകയും ചെയ്യുമ്പോൾ മാത്രമേ ആഗോള വ്യാപാരത്തിന് മുന്നോട്ട് പോകാനാകൂ. അതുകൊണ്ടാണ് നാവിഗേഷൻ സ്വാതന്ത്ര്യത്തിനും  നാവികരുടെ സുരക്ഷയ്ക്കും വേണ്ടി ഇന്ത്യ ഉറച്ചു നിലകൊള്ളുന്നത്.

'ബ്രിക്സ് വുമൺസ് ബിസിനസ് അലയൻസ്'  നമ്മുടെ കാഴ്ചപ്പാടിന്റെ വളരെ പ്രധാനപ്പെട്ട ഒരു ഭാഗമാണ്. വനിതാ സംരംഭകർ നമ്മുടെ വളർച്ചയുടെ കഥയ്ക്ക് നേതൃത്വം നൽകണമെന്ന് നമ്മൾ ആഗ്രഹിക്കുന്നു. ഇന്ത്യയിൽ നടന്ന ഈ കൂട്ടായ്മയുടെ യോഗത്തിൽ 200-ഓളം വനിതാ വ്യവസായ നേതാക്കൾ പങ്കെടുത്തു എന്നതിൽ നമുക്ക് ഏറെ സന്തോഷമുണ്ട്.

സുഹൃത്തുക്കളേ,

ബ്രിക്സ് അതിന്റെ മൂന്നാം പതിറ്റാണ്ടിലേക്ക് കടക്കുമ്പോൾ, ബ്രിക്സ് ബിസിനസ് കൗൺസിലിനോട് ചില കാര്യങ്ങൾ പരിഗണിക്കാൻ ഞാൻ അഭ്യർത്ഥിക്കുകയാണ്... ബ്രിക്സ് രാജ്യങ്ങൾക്കിടയിലുള്ള ഏറ്റവും പ്രധാനപ്പെട്ട 10 വ്യാപാര തടസ്സങ്ങൾ നീക്കുന്നതിനെക്കുറിച്ച് നിങ്ങൾക്ക് ഒരു റിപ്പോർട്ട് തയ്യാറാക്കാമോ? മറ്റ് ബ്രിക്സ് വിപണികളിലേക്ക് വളരുന്നതിനായി ഓരോ വർഷവും 100 ബ്രിക്സ് സ്റ്റാർട്ടപ്പുകളെ പിന്തുണയ്ക്കാൻ നമുക്ക് സാധിക്കുമോ? നമ്മുടെ ബിസിനസ്സുകൾക്കിടയിൽ 1,000 പുതിയ പങ്കാളിത്തങ്ങൾ വികസിപ്പിച്ചെടുക്കാൻ നമുക്ക് കഴിയുമോ? ഈ മൂന്ന് ലക്ഷ്യങ്ങളുടെ അടിസ്ഥാനത്തിൽ ഓരോ വർഷവും നമ്മുടെ പുരോഗതി നമ്മൾ വിലയിരുത്തണം.

ബ്രിക്സിന്റെ ലക്ഷ്യങ്ങളെ നമുക്ക് പ്രവർത്തനങ്ങളാക്കി മാറ്റാം; നമ്മുടെ കൂട്ടായ ശക്തിയെ ആഗോള പരിഹാരങ്ങളാക്കി മാറ്റാം. ബ്രിക്സ് മുന്നേറട്ടെ, അത് ലോകത്തെയും മുന്നോട്ട് നയിക്കാൻ സഹായിക്കട്ടെ.

നിങ്ങൾക്കെല്ലാവർക്കും വളരെ നന്ദി.

***

SK