প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা ফ্রান্সকী পেরিস্তা পাংথোকপা ইন্তর্নেস্নেল স্পেস সম্মিত্তা ৱা ঙাঙখ্রে
স্পেসনা পীবা ঙম্বা কান্নবা অসি মপান নাইদে অমসুং ঐখোয়গী থৌদাং অসি অপুনবনি: পি.এম.
ঐখোয়গী অপাম্বা, মায়োক্নবা মতমদা তেংবাংনবা অমসুং অতেনবা মতমগী মহুত্তা অশাংবা মতমগী ওইনা কান্নবা ফংবগী সস্তেনেবিলিতী অমসুং এক্সক্লুজনগী মথক্তা ওইবা ইনক্লুজন অসি ময়েক শেংগদবনি: পি.এম.
ঐখোয়না মালেমগী আইন, ৱারী শাবা অমসুং হীরম কয়াদা তেংবাংনবদা য়ুম্ফম ওইবা শাফবা, অচেৎপা, শান্তি লৈবা অমসুং সস্তেনেবল ওইবা স্পেস দোমেনবু শৌগৎলি: পি.এম.
খোঙচৎ অসিগী ময়োলদা লেপ্লিবা আই.এস.আর.ও.না মখোয়গী মীথোই মীহেনবা অমসুং শেল য়াম্না চঙদবা মিসনগীদমক্তা মালেম্না শকখঙলি : পি.এম.
মীওইবা খুন্নাই অমসুং লাক্কদৌরিবা চারোন শুরোনশীংগীদমক্তা ঐখোয়না পুন্না থিজিনমিন্নগনি, পুন্না ইনোভেৎ তৌমিন্নগনি অমসুং স্পেসপু পুন্না ঙাকথোকমিন্নগনি হায়বা ময়েক শেংবা পাউজেল অসি পেরিস্তা পাংথোক্লিবা স্পেস সম্মিৎ অসিনা ময়েক শেংনা পীবা ওইরসনু
থাগৎখিবা:
10 SEP 2026 3:51PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা ফ্রান্সকী পেরিস্তা পাংথোকপা ইন্তর্নেস্নেল স্পেস সমিৎতা ৱা ঙাংখ্রে। প্রধান মন্ত্রীনা মতম চানা খোঙথাং অমা লৌখৎপগীদমক অমসুং নুংশিজরবা মীথুংলেন অমা পীনবগীদমক রাস্ত্রপতি ইমানুয়েল মেক্রোনবু থাগৎপা ফোংদোকখি। মহাক্না মসিগী মরুওইবা থৌরম অসিদা শরুক য়াবদা নুংঙাইবা ফোংদোকখি। “অহানবা ইন্তরনেস্নেল স্পেস সমিত অসিদা শরুক য়াবা ফংবদা ঐহাক নুংঙাইবা ফাওই" হায়না শ্রী মোদীনা ফোংদোকখি।
কোস্মোসনা মীওইবা খুন্নাইবু মতম চুপ্পগী ওইনা পুক্নিং চিংশিন্দুনা লাকপগী মতাংদা পল্লদুনা প্রধান মন্ত্রীনা হায়খি মদুদি স্পেসনা চহি চা কয়াগী মমাংদগী মীওইবগী ৱাখল্লোনবু পুক্নিং থৌগৎলি। মহাক্না ফোংদোকখি মদুদি মসিগী ঙমখৈ অসিনা হৌজিক্তি ক্লাইমেৎ অমসুং মহৈ-মরোংদগী হৌরগা সমুদ্র অমসুং কম্ম্যুনিতীশিংদা, পৃথীবিগী নোংমগী পুন্সিদা মশক তাক্লি। শ্রী মোদীনা হায়খি, "স্পেসকী কান্নবা অসি মপান নাইদে, অমসুং ঐখোয়গী থৌদাং অসি অপুনবা অমনি।"
কোস্মিক এনভাইরনমেন্তকী হেনগৎলক্লিবা কমপ্লেক্সিতিগী মতাংদা পল্লদুনা প্রধান মন্ত্রীনা হায়খি মদুদি ওর্বিৎশিং অসি হেন্না কুংশিল্লক্লি, তেক্নোলোজীশিং অসি হেন্না শক্তি লৈরক্লি, অমসুং এক্তরশিং অসি হেন্না মশিং য়ামশিল্লক্লি। মহাক্না হায়খি মদুদি মালেমগী ওইবা পার্তনরশিপশিংনা অতেনবা মতমগী কান্নবশিংগী মথক্তা অশাংবা মতমগী সস্তেনেবিলিতীদা অহেনবা মীৎয়েং থমগদবনি। ঐখোয়গী অপাম্বা, মায়োক্নবা মতমদা তেংবাংনবা অমসুং অতেনবা মতমগী মহুত্তা অশাংবা মতমগী ওইনা কান্নবা ফংবগী সস্তেনেবিলিতী অমসুং এক্সক্লুজনগী মথক্তা ওইবা ইনক্লুজন অসি ময়েক শেংগদবনি হায়না শ্রী মোদীনা হায়খি।
ভারতকী ফিলোসোফিকেল ৱর্ল্দ ভিয়ুবু মপান থংবা স্পেসকা শম্নহন্দুনা, প্রধান মন্ত্রীনা হায়খি মদুদি লৈবাক অসিগী এপ্রোচ অসি ভাসুধৈব কুতুম্বকম, হায়বদি মালেম অমা, ইমুং অমা, তুংলমচৎ অমা হায়বা ৱাখল্লোন অসিদা মপুং ফানা য়ুম্ফম ওই। মহাক্না হায়খি মদুদি অমত্তা ওইহনগদবা ৱাখল্লোন অসিনা ঐখোয়গী গ্রহ অসিগী ৱাংমদা চৎতুনা ঙাক-শেলগী লম অমা লৈহন্নবা হোৎনগদবনি। শ্রী মোদীনা হায়খি, "ইন্তর্নেস্নেল লো, দাইলোগ অমসুং মল্তিলেতরেল কোওপরেসনদা য়ুম্ফম ওইবা, সেফ, সেক্যুর, শান্তি লৈবা অমসুং সস্তেনেবল স্পেস দোমেন অমা ঐখোয়না শৌগৎলি।"
ত্রান্সপরেন্ত রিসর্চকী মরুওইবা অদু পল্লদুনা প্রধান মন্ত্রীনা হায়খি মদুদি ভারতকী কোস্মিক জর্নী অসিনা য়ুনিভর্সেল ৱেলফেয়রগী ফিলোসোফী অদু মপুং ফানা উৎলি। মালেমগী চাউখৎ-থৌরাংগীদমক্তা ইথিক ওইবা মওংদা পাউ ফাওনবা অসি য়াম্না মরু ওই হায়না মহাক্না ফোংদোকখি। শ্রী মোদীনা হায়খি, "সাইন্তিফিক দেতানা মীয়ামগী কান্নবা ফংহনগদবনি।"
লৈবাক অসিগী এরোস্পেস এন্তরপ্রাইজেসকী শিংথানীংঙাই ওইরবা ত্রেজেক্তরী অদু য়েংলদুনা প্রধান মন্ত্রীনা সেতেলাইত তেক্নোলোজীনা ৱেদর ফোর্কাস্তিং, দিজাস্তর মেনেজমেন্ত অমসুং নেভিগেসনগীদমক পীরিবা প্রেক্তিকেল ওইবা কান্নবশিং অদু পনখি। এদভান্স কেপাসিতীশিং অসিনা লৌমীশিং অমসুং ঙামীশিং য়াওনা গ্রাসরুৎ কম্ম্যুনিতীশিংদা হকথেংননা মতেং পাংলি হায়না মহাক্না ফোংদোকখি। শ্রী মোদীনা হায়খি, "মসিগী খোঙচৎ অসিগী ময়াইদা লৈরিবা আই.এস.আর.ও.না মখোয়গী অফবা অমসুং মমল হোংবা মিসনশিংগীদমক মালেমগী থাক্তা ইকায় খুম্নবা ফংলে।"
লঞ্চ সর্ভিসশিংদা ভারতনা পুন্না থবক তৌমিন্নদুনা মালেমগী থাক্তা পায়খৎলিবা থবকশিংগী মতাংদা পল্লদুনা, প্রধান মন্ত্রীনা লৈবাক অসিগী রোকেৎশিংদা লৈবাক ৩৪দগী পেললোদ ৪৩০ হেন্না মায় পাক্না থাগৎখ্রে হায়না ফোংদোকখি। মহাক্না অসিগুম্বা কোওপরেতিব সাইন্তিফিক ইন্দেভর কয়ানা মালেমদা পাক চাউনা পীবা কান্নবা অদুদা মরুওইবা পীখি। শ্রী মোদীনা হায়খি, " আই.এস.আর.ও.গী তেক্নোলোজীশিং অমসুং পার্তনরশিপশিংনা ভারত খক্তা নত্তনা মালেম পুম্বদা মতেং পাংলি।"
ইনস্তিত্যুস্নেলগী মায় পাকপগী মরম অসি লৈবাক অসিগী থৱায় য়াওবা হ্যুমেন কেপিতেলনি হায়না পল্লদুনা প্রধান মন্ত্রীনা ভারতকী সাইন্তিস্ত, ইঞ্জিনীয়র অমসুং তেক্নিকশিংগী মীরোল কয়াগী থৌনা অমসুং কন্না হোৎনবগীদমক ইকাই খুম্নবা উৎখি। মহাক্না মখোয়গী অৱাবা লৈতনা হোৎনবনা স্পেসফায়রিং লৈবাকশিংগী মরক্তা চাউথোকচনীংঙাই ওইবা মফম অমা লৈহনখিবগীদমক থাগৎপা ফোংদোকখি। শ্রী মোদীনা হায়খি, "মখোয়না নুমিৎ অমসুং নুমিদাং চুপ্পা থবক তৌদুনা, মিসন অমমম, মাই পাকপা অমমমদা, আই.এস.আর.ও.গী মালেমগী মমিং লৈহনখি।"
প্লানেতরী সাইন্সকী মরুওইবা মাইলস্তোনশিং নীংশিংলদুনা, প্রধান মন্ত্রীনা হায়খি মদুদি অদিত্য-এল.১না হৌজিক্তি নুমিৎকী মরমদা খঙদোক্লি, অদুগা ভারতকী এস্ত্রোনোত অমনা মমাং চহিদা ইন্তর্নেস্নেল স্পেস স্তেসনদা চৎখি। মালেমগী ওইনা অনৌবা মীকোক থোংবা অমা ওইহল্লকখিবা পুৱারী ওইরবা থাদা য়ৌরকপগী থৌদোক অদু মহাক্না চাউথোকচবা পোক্না নীংশিংখি। শ্রী মোদীনা হায়খি, "চন্দ্রয়ান-৩না ভারতপু থাগী খা থংবা পোলগী মনাক্তা লেন্দ তৌখিবা অহানবা লৈবাক ওইহনখি।"
নেস্নেল রোদমেপকীদমক্তা চাউখৎনবা পান্দম থম্লিবা প্রধান মন্ত্রীনা ২০৩৫ ফাওবদা লমদমসিগী ওইবা স্পেস স্তেসন অমা লিংখৎনবা অমসুং ২০৪০ ফাওবদা থাদা এস্ত্রোনাউত অমা থাগৎনবা থৌরাং তৌরি হায়না ফোঙদোকখি। মহাক্না হায়খি মদুদি অশাংবা মতমগী ওইবা হোৎনরিবশিং অসি অমত্তা ঙাইরবা, মপুং ওইবা পান্দম অমগী মখা পোল্লি। শ্রী মোদীনা হায়খি, "মসিগী থবকশিং অসিদা ঐখোয়গী লমজিং-লমতাক্লিবা ৱাখল্লোন অসি ময়েক শেংই: মখোয়গী কান্নবশিং অসি মীওইবা খুন্নাই পুম্বদা য়ৌহনগদবনি।"
দোমেস্তিক কম্মর্সিএল ইকোসিস্তেমগী খোঙজেল য়াংনা চাউখৎলকপগী মতাংদা পল্লদুনা প্রধান মন্ত্রীনা হায়খি মদুদি ভারতকী প্রাইবেৎ স্পেস সেক্তর অসি ইন্সতিত্যুস্নেল এজেন্সীশিংগা লোয়ননা চাউনা চাউখৎলক্লি। হৌগৎলক্লিবা স্তার্ত-অপশিং অমসুং লিংখৎলবা ওর্গনাইজেসনশিংগী মরক্তা পুন্না থবক তৌমিন্নবগী থৌওং অসি মহাক্না খঙখি। শ্রী মোদীনা হায়খি, "এন্তরপ্রাইজকী ইনর্জী অসি আই.এস.আর.ও.গী এক্সিলেন্সতা য়াওরি।"
মতম শাংনা লৈরক্লবা নাকল অনিগী মরীশিংবু থাগৎলদুনা, প্রধান মন্ত্রীনা ফ্রান্সনা ইং ১৯৬০গী মতমদগী ভারতকী স্পেস প্রোগ্রাম হৌরকপদগী থাজবা য়াবা পার্তনর অমা ওইদুনা লাক্লি হায়না নিংশিংখি। মহাক্না অকনবা ৱাফম থমখি মদুদি হৌজিক পায়খৎলিবা জোইন্ত ইনিসিএতিবশিংনা অৱাংবা থাক্কী রিসর্চকা খুন্নাইগী কান্নবশিংগা মায় পাক্না পুনশিন্নরি। শ্রী মোদীনা হায়খি, "ঙসিদি, ঐখোয়গী কোওপরেসন অসি সাইন্তিফিক এক্সিলেন্সপু হ্যুমেন পোপসিনগা পুনশিন্দুনা, পৃথীবিগী ওবজর্বেসন অমসুং এদভান্স তেক্নোলোজীশিং য়াওরি।"
ইন্তর্নেস্নেল স্তেকহোল্দরশিংদা থাগৎপা ফোঙদোক্লদুনা প্রধান মন্ত্রীনা মালেমগী কম্ম্যুনিতীদা লাক্কদৌরিবা এক্সপ্লোরেতরী মিসনশিংদা শরুক য়ানবা হায়খি। মহাক্না মালেম শীনবা থুংনা লৈরিবা পার্তনরশিংবু কোস্মিক দিস্কভরীগী মথংগী ৱেবকী পাইওনিয়র ওইবদা খুৎশম্ননবা তরাম্না ওকখি। শ্রী মোদীনা হায়খি, "ঐখোয়না ফ্রান্স অমসুং মালেমদা ভারতকী মথংগী স্পেস ফ্রন্তিয়রদা কো-ত্রাভেলর ওইনবা হায়জরি।"
ভিদিওগী খুত্থাংদা মহাক্কী ৱারোল লোইশিল্লদুনা, প্রধান মন্ত্রীনা সমিৎ অসিদা শরুক য়ারিবা ইকাই খুম্নরবা মীওই পুম্নমক্তা মহাক্কী য়াইফ পাউজেল পীখি। মহাক্না মালেমগী কম্ম্যুনিতীদা কোলাবোরেতিব এক্সপ্লোরেসন অমসুং ইন্নোবেসনগী থোংদা সেলেসিএল এনভাইরনমেন্ত ঙাক্নবা হায়খি। শ্রী মোদীনা হায়খি, "পেরিস্তা পাংথোক্কদৌরিবা স্পেস সমিৎ অসিনা ময়েক শেংনা পাউজেল অমা পীবীয়ু: ঐখোয় পুন্না থিজিনবা, পুন্না ইনোভেৎ তৌবা অমসুং স্পেসপু পুন্না ঙাক-শেনবা, মীওইবা খুন্নাই পুম্নমক্কীদমক অমসুং তুংগী চারোন-শুরোনগীদমক হোৎনগনি।"
***
(রিলিজ আই.দি.: 2309076)
ভিজিতর কাউন্তর : 4
রিলিজ অসি মসিদা পাবীয়ু:
English
,
Urdu
,
Marathi
,
हिन्दी
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam