حکومت  ہند کی ہنرمندی کی ترقی اور کاروباری سرگرمیوں کی وزارت ( ایم ایس ڈی ای ) نے   ’خواتین کے لیے پائیدار روزگار کے مواقع پیدا کرنا ‘  کے موضوع پر ’ اسکل منتھن‘ کے افتتاحی اجلاس کا انعقاد کیا۔ ورچوئل طور پر   منعقد ہونے والی اس گفتگو میں  ، اتر پردیش کے میرٹھ اور بجنور اور آندھرا پردیش کے این ٹی آر ضلع کی اختراعی پہلوں کو اجاگر کیا گیا۔ ان اقدامات سے ظاہر ہوتا ہے کہ ضلعی انتظامیہ ہنرمندی کی تربیت، کاروبار، مالی معاونت، ٹیکنالوجی اور مارکیٹ تک رسائی کو یکجا کرکے خواتین کے لیے پائیدار روزگار کے مواقع پیدا کر سکتی ہے۔ ’ اسکل منتھن‘ ضلع کی سطح پر شروع کیے گئے جدید اور مؤثر اقدامات کو پیش کرنے کے لیے معلومات کے تبادلے کا ایک پلیٹ فارم ہوگا۔

اس پہل کے بارے میں بات کرتے ہوئے  ، حکومت  ہند میں ہنرمندی کی ترقی اور کاروباری سرگرمیوں کے وزیر مملکت (آزادانہ چارج) اور تعلیم کے وزیر مملکت جناب جینت چودھری نے کہا کہ ’’  ضلعی انتظامیہ ترقی، اصلاحات اور تبدیلی کے حقیقی انجن ہیں۔ ضلع کی قیادت میں منصوبہ بندی کے ذریعے ہم اس بات کو یقینی بنا رہے ہیں کہ ہنرمندی کی ترقی کے اقدامات مقامی ضروریات کے مطابق ہوں اور صنعت، خاص طور پر ایم ایس ایم ایز کی ضروریات سے ہم آہنگ ہوں۔ ضلعی ہنرمندی کی ترقی کے منصوبوں کی مدد سے ہنرمندی کا ایجنڈا ضلعی انتظامیہ کی ترجیحات میں شامل ہے، جس سے نوجوانوں اور مقامی معیشتوں کے لیے زیادہ مؤثر، ضرورت پر مبنی اور بہتر نتائج حاصل ہو رہے ہیں۔ ‘‘

ایم ایس ڈی ای  کی سکریٹری محترمہ دیباشری مکھرجی نے کہا کہ  ’’ بھارت کی ہنرمندی کی ترقی کی خواہشات اسی وقت پوری ہو سکتی ہیں  ، جب ہنرمندی کی ترقی مقامی حالات کے مطابق ہو۔ ضلع کی ضروریات اور روزگار کے مواقع سے ہم آہنگ مقامی سطح کی ہنرمندی کی تربیت ضروری ہے، تاکہ تیزی سے بدلتی ہوئی معیشت میں ہمارے نوجوانوں کو متعلقہ ہنر فراہم کیے جا سکیں اور انہیں باعزت اور بامعنی روزگار کے مواقع سے جوڑا جا سکے۔ ‘‘

اتر پردیش کے بجنور کی ضلع کلکٹر و ضلع مجسٹریٹ محترمہ جسجیت کور، آندھرا پردیش کے این ٹی آر ضلع کے ڈاکٹر جی  لکشمی شا اور اتر پردیش کے میرٹھ کے ڈاکٹر وجے کمار سنگھ نے ہنرمندی کی تربیت، کاروباری سرگرمیوں اور مارکیٹ سے منسلک کرکے خواتین کو معاشی طور پر بااختیار بنانے کے جدید طریقے پیش کیے۔ میرٹھ نے خواتین پر مرکوز مینوفیکچرنگ ماڈل پیش کیا، جس کے تحت بیڈمنٹن ریکیٹ اور شٹل کاک تیار کرنے کے لیے عملی تربیت اور روزگار فراہم کیا جاتا ہے۔ بجنور نے ’ وِدور پریرنا سودیشی‘ کو اجاگر کیا، جو ضلع بھر میں ایک ایسا پلیٹ فارم ہے  ، جو برانڈنگ، مارکیٹ تک رسائی اور کاروباری معاونت کے ذریعے دیہی خواتین کاروباریوں کو بااختیار بناتا ہے۔ این ٹی آر ضلع کے ’ رائز ‘  نے ایک ایسا ون اسٹاپ نظام پیش کیا، جس میں ہنرمندی کی تربیت، قرض حاصل کرنے میں سہولت، رہنمائی، روزگار سے جوڑنے اور کاروباری معاونت کی سہولیات شامل ہیں۔ اس سے ظاہر ہوتا ہے کہ مقامی اداروں کو ایک دوسرے کے ساتھ جوڑ کر خواتین کی زیرِ قیادت کاروباری اداروں کے لیے پائیدار مواقع پیدا کیے جا سکتے ہیں۔

اس اجلاس میں ایم ایس ڈی ای  نے ضلعی انتظامیہ کے ساتھ تعاون کو مزید مضبوط بنانے اور کامیاب مقامی سطح کے ماڈلز کو دستاویزی شکل دینے، ان کا اشتراک کرنے اور ملک بھر میں انہیں اپنانے کے لیے قومی پلیٹ فارم بنانے کے عزم کا اعادہ کیا۔ ’ اسکل منتھن‘ کے ذریعے ضلعی سطح پر ہونے والی جدت طرازی خواتین کی معاشی شمولیت، خود کفیل برادریوں اور وکست بھارت@2047 کے ویژن کو آگے بڑھانے میں اہم کردار ادا کرے گی۔

 

 

..................................................... ...................................................

) ش ح –   ا ع خ     -  ع ا )

U.No. 3225

(ریلیز آئی ڈی: 2308435) وزیٹر کاؤنٹر : 3