উপ-রাস্ত্রপতিগী লোইশঙ
উপ-রাস্ত্রপতি শ্রী সি. পি. রাধাকৃষ্ণননা মোইরোংদা লৈবা আই.এন.এ. ম্যুজিয়ম অমসুং সাইনিক স্কুল ইম্ফালদা চৎখ্রে
অৱাং-নোংপোক অসি ভারতকী মরু ওইবা অমসুং ফজরবা শরুক অমনি; মাগী মীয়ামগী হোৎনবা কনবা মতৌ অমসুং শরুক তম্লিবা অসি শীংথানিংঙাইনি: উপ-রাস্ত্রপতি
এক ভারত, শ্রেস্থ ভারতকী ৱাখল্লোনবু মপাঙ্গল কনখৎহন্নবা সাইনিক স্কুলশিংনা অখন্নবা থৌদাং লৌরি: উপ-রাস্ত্রপতি
ভিক্সিৎ ভারতকীদমক শরুক তম্নবা নুমিৎ খুদিংগী অদোমগী থৌদাং পাংথোকপীয়ু: সাইনিক স্কুল ইম্ফালগী কেদেৎশিংদা উপ-রাস্ত্রপতিনা
উপ-রাস্ত্রপতিনা কেদেৎশিংদা তেক্নোলোজীগী ওইবা এৱেরনেস অমসুং এদাপ্তেবিলিতীগা লোয়ননা লাইবক নুংশিবা অমসুং অপুনবগী শক্তমগী মতম চুপ্পগী ওইবা ভেল্যুশিং পুনশিন্নবা হায়খ্রে
থাগৎখিবা:
08 SEP 2026 4:30PM by PIB Imphal
উপ-রাস্ত্রপতি শ্রী সি. পি. রাধাকৃষ্ণন্না ঙসি মনিপুরগী মোইরাংদা লৈবা আই.এন.এ. ম্যুজিয়মদা চৎতুনা ইন্দিয়ন নেস্নেল আর্মী (আই.এন.এ.) গী থৌনা অমসুং কত্থোকখিবা অদুবু ইকায় খুম্নবা উৎখ্রে। মহাক্না আই.এন.এ.না ভারতকী মেনলেন্দদা অহানবা ওইনা ভারতকী মচু অহুমগী ফিরাল চীংখৎখিবা পুৱারী ওইরবা মফম অদুদা চৎখি অমসুং আই.এন.এ. ৱার ম্যুজিয়ম গেল্লরী কোইনা চৎতুনা য়েংখি। মহাক্না নেতাজী সুভাস চন্দ্র বোসকী মফমদা হৈকৎ-লৈকৎ তমখি।
মতুং তারকপদা উপ-রাস্ত্রপতিনা সাইনিক স্কুল, ইম্ফলদা চৎখি, মফম অদুদা মহাক্না ৱার মেমোরিএলদা হৈকৎ-লৈকৎ তমখি অমসুং কেদেৎশিংনা মহাক্কী মফমদা গার্দ ওফ ওনর পীখি।
মহাক্কী মোইরোং খোঙচৎকী মতাংদা মহৈলোইশঙ অদুদা ৱা ঙাংলদুনা উপ-রাস্ত্রপতিনা ভারতকী নীংতম লানফমদা আই.এন.এ.গী পুৱারী ওইরবা থৌদাং অদু নীংশিংখি। মহাক্না হায়খি মদুদি তামিল নাদুগী মীওই কয়া য়াওনা লৈবাক শিনবা থুংবদগী নীংতম লান্মী কয়ানা আই.এন.এ.দা য়াওখি অমসুং লৈবাক অসিগীদমক থৱায়না পোন্থা পীখি।
মহাক্না নেতাজী সুভাস চন্দ্র বোসনা ভারতকী মচু অহুমগী ফিরাল চীংখৎখিবা মফম অন্দমান অমসুং নিকোবর ইথৎশিংদা চৎখিবা মহাক্কী খোঙচৎ অদুসু নীংশিংখি। মহাক্না হায়খি মদুদি পুৱারী ওইরবা মফমশিং অসিনা ভারতকী নীংতম লান্মীশিংগী থৌনা, লৈবাক নুংশিবা অমসুং কত্থোকপশিংবু নহা ওইরিবা মীরোলশিংদা নীংশিংহল্লি।
ইন্সতিত্যুসন অমগী অশেংবা লিগেসী অসি মাগী বিলদিংশিং নৎত্রগা রেকোর্দশিংদা নত্তনা মাগী মহৈরোইশিং অমসুং এলুমনিশিংগী মওং-মতৌদসু উৎলি হায়না উপ-রাস্ত্রপতিনা ফোংদোকখি। মহাক্না কেদেৎশিংদা দিসিপ্লিন, থৌনা অমসুং লুচিংবা ওইবগী মগুন অসি হেন্না মপাঙ্গল কনখৎহন্নবা হায়খি।
“অদোম্না তেলেন্ত লৈবা ওইরবসু, দিসিপ্লিনগা লোয়ননা অদোম্না ঙান্থোইবা ঙমগনি”, শ্রী সি. পি. রাধাকৃষ্ণননা হায়খি মদুদি দিসিপ্লিন অসিনা এক্সিলেন্সকী য়ুম্ফম ওইরি। থৌনা লৈবগী মতাংদা মহাক্না হায়খি মদুদি তশেংবা থৌনাগী ৱাহন্থোক্তি কনাগুম্বা অমনা মরম চাদনা অশোক-অপন নংলকপা মতমদা অতোপ্পগীদমক লেপকদবনি। লুচিংবগী মতাংদা, মহাক্না অকনবা ৱাফম থমখি মদুদি অশেংবা লুচিংবা অমনা থৌদাং লৌই, খুদম অমা ওইহল্লি, অতোপ্পশিংনা হায়বা তাই অমসুং অচুম্বা ৱারেপ লৌবগী ইথিল লৈ।
নেস্নেল ইন্তিগ্রেসনগী মরুওইবা পল্লদুনা শ্রী সি. পি. রাধাকৃষ্ণননা হায়খি মদুদি ভারতকী লোল, চৎনবী অমসুং লমদমশিংগী মখল-মখা কয়া অসি লৈবাক অসিগী মান্নবা শক্তম্না অমত্তা ওইনা পুনশিল্লি। মহাক্না হায়খি মদুদি তোঙান তোঙানবা থাক্কী মহৈরোইশিংনা পুন্না তম্নবা, ত্রেনিং পীনবা, চানবা অমসুং শান্ননবা হোৎনবদা, সাইনিক স্কুলশিংনা এক ভারত, শ্রেস্থ ভারতকী ৱাখল্লোনবু মপাঙ্গল কনখৎহনবদা অখন্নবা থৌদাং লৌরি।
তেক্নোলোজিগী ওইবা অহোংবা য়াম্না থুনা লাকপগী মতাংদা পল্লদুনা মহাক্না কেদেৎশিংদা দিসিপ্লিন, ইন্তিগ্রিতী অমসুং পেত্রিওতিজমগী মতম চুপ্পগী ওইবা মগুনশিং ঙাক্না চৎনবা অমসুং এদাপ্তেবল, ইন্নোবেতিব অমসুং তেক্নোলোজীগী মতাংদা খঙনবা হায়খি। নহা ওইরিবা মীরোলশিংদা অনৌবা খুদোংচাবশিং পীরিবা লমশিং ওইনা মহাক্না আর্তিফিসিএল ইন্তেলিজেন্স, স্পেস তেক্নোলোজী, বাইওতেক্নোলোজী, সাইবর সেক্যুরিতী অমসুং রোবোতিক্স অসি পনখি।
কেদেৎশিংগা ৱারী শানবদা উপ-রাস্ত্রপতিনা অৱাং-নোংপোক লমদম অসি ভারতকী মরু ওইবা অমসুং ফজরবা শরুক অমনি হায়না ফোংদোকখি অমসুং মফম অসিগী মীয়ামগী থবক কন্না শুবা অমসুং থৌদাংবু থাগৎপা ফোংদোকখি। মহাক্না মহৈরোইশিংবু অহোংবা লাকপদা মখোয় মশাবু হোংদোকহন্দুনা অফবা ওইহন্নবা পুক্নিং থৌগৎখি। মালেম অসিদা অহোংবা লাকপা অসি খক্তা লেংদ্রবা থৌওংনি হায়না মহাক্না ফোংদোকখি।
অন্দমান অমসুং নিকোবর ইথৎশিংদা লৈবা সেলুলর জেলদা চৎলুবগী মতাংদা হংলকপা ৱাহং অমগী পাউখুম পীরদুনা শ্রী সি. পি. রাধাকৃষ্ণন্না মহৈরোইশিংদা ভারতকী নীংতম লান্মীশিংনা থেংনখিবা অৱাবা কয়া অদু খঙনবগীদমক পুৱারী ওইরবা মফম অদুদা চৎনবা পুক্নিং থৌগৎখি। অসিগুম্বা খোঙচৎ অসিনা লৈবাক নুংশিবা পোকহল্লি অমসুং অনৌবা মীরোলশিংদা নীংতম লানগী মতমদা কত্থোকখিবা থৌনা অদু নীংশিংহল্লি হায়না মহাক্না হায়খি।
চাউখৎলবা ভারত অমা শেমগৎপদা মহৈরোইশিংগী থৌদাং অদুগী মতাংদা উপ-রাস্ত্রপতিনা হায়খি মদুদি মহৈরোই খুদিংমক্না মখোয়গী মথৌ অদু মপুং ফানা পাংথোক্তুনা শরুক য়াবা ঙম্মী। মহাক্না অকনবা ৱাফম থমখি মদুদি নুমিৎ খুদিংগী খ্বাইদগী ফবা থবকশিং পাংথোকপনা ভিক্সিৎ ভারত অসি ফংবদা পুন্না মতেং পাংগনি।
মনিপুরগী রাজ্যপাল শ্রী অজয় কুমার ভল্লা, মুখ্য মন্ত্রী শ্রী ৱাই. খেমচান্দ সিংহ, ঙাকশেল মন্ত্রালয়গী এদিস্নেল সেক্রেতরী শ্রীমতী. দিপ্তী মোহিল চৌলা, মেজর জেনরেল শুভাঙ্কর বাসু, ভি.এস.এম., ইন্সপেক্তিং ওফিসর, সাইনিক স্কুলস সোসাইতী, ঙাকশেল মন্ত্রালয়, ব্রিগেদিয়র অমিত চেতর্জী অমসুং সাইনিক স্কুল ইম্ফালগী প্রিন্সিপল, কর্নেল এ. রাজীব, অতৈ দিগ্নিতিজশিংনা উপ-রাস্ত্রপতিগা লোয়ননা চৎখি।
*****
(রিলিজ আই.দি.: 2308177)
ভিজিতর কাউন্তর : 6