جنگلات کے شعبے میں تعاون سے متعلق بھارت-جاپان مشترکہ ورکنگ گروپ (جے ڈبلیو جی) کا ساتواں اجلاس 8 ستمبر 2026 کو بنگلورو میں منعقد ہوا۔بھارتی وفد کی قیادت حکومتِ ہند کی وزارتِ ماحولیات، جنگلات اور موسمیاتی تبدیلی ( ایم او ای ایف سی سی) کے ایڈیشنل ڈائریکٹر جنرل (جنگلات) جناب رمیش کمار پانڈے نے کی، جبکہ جاپانی وفد کی قیادت حکومتِ جاپان کی وزارتِ زراعت، جنگلات و ماہی پروری کے تحت محکمۂ جنگلات کے ڈپٹی ڈائریکٹر جنرل جناب شیمیزو کوٹارو نے کی۔

اجلاس میں تعاون کے تین اہم شعبوں پر تبادلہ خیال کیا گیا ۔ ٹری آؤٹ سائیڈ فاریسٹ (ٹی او ایف) کے تحت دونوں فریقوں نے جنگلات سے باہر درختوں کے وسائل کی تشخیص ، انتظام اور جینیاتی بہتری پر تجربات شیئر کیے ۔ جینیاتی وسائل کے تحفظ ، درختوں کی افزائش ، پودے لگانے کے بہتر مواد اور جرمپلازم کے تحفظ پر توجہ مرکوز کرتے ہوئے جنگلاتی جینیات پر تبادلہ خیال کیا گیا ۔ فاریسٹ اسٹیک کے تحت ، دونوں فریقوں نے جنگلات کی انوینٹری ، فاریسٹ اسٹاک اسسمنٹ اور جیو اسپیشل اور نگرانی کی ٹیکنالوجیز پر تبادلہ خیال کیا ۔

دونوں فریقوں نے 2015 میں طے پانے والے مفاہمتی تعاون ( ایم او سی) کے تحت 2027–2031 کے روڈ میپ کی توثیق کی اور جنگلات، حیاتیاتی تنوع کے تحفظ، تحقیق اور صلاحیت سازی میں اضافے کے شعبوں میں تعاون اور باہمی تعلقات کو مزید گہرا کرنے کے اپنے عزم کا اعادہ کیا۔اجلاس کا اختتام ساتویں مشترکہ ورکنگ گروپ ( جے ڈبلیو جی)کے اجلاس کی کارروائی  پر دستخط کے ساتھ ہوا۔

پروگرام کے ایک حصے کے طور پر دونوں وفود نے انسٹی ٹیوٹ آف وُڈ سائنس اینڈ ٹیکنالوجی، بنگلورو کا دورہ کیا اور محکمۂ جنگلات، کرناٹک کے افسران کے ساتھ تبادلۂ خیال کیا۔اس کے علاوہ، دونوں وفود 9 ستمبر کو میسورو میں صندل کی زرعی جنگلاتی کاشت  کے فارمز، صندل کے ایک ڈپو اور پروسیسنگ یونٹ کا دورہ کریں گے، جبکہ 10 ستمبر کو ناگراہولے ٹائیگر ریزرو کا دورہ کیا جائے گا۔ان فیلڈ وزٹس کے ذریعے نجی فارمز میں صندل کی کاشت اور جنگلی حیات کے تحفظ کے طریقۂ کار سے متعلق تجربات اور معلومات کے تبادلے کا موقع فراہم ہوگا۔

*************

ش ح ۔ ض ر۔ ر ب

U. No.3162