பிரதமர்: நீங்கள் இதுவரை அதிகம் அறிமுகமாகாத ஒரு புதிய துறையில் துணிச்சலுடன் காலடி எடுத்து வைத்துள்ளீர்கள். இதில் மிகவும் முக்கியமான விஷயம் என்னவென்றால், அரசாங்கம் அளித்த வாக்குறுதியை நீங்கள் நம்பியுள்ளீர்கள். நாம் எந்த முடிவுகளை எடுத்தாலும், அதில் தொடர்ந்து நிலைத்திருக்க வேண்டும் என்பதே எப்போதும் எனது நிலையான கருத்தாக இருந்து வருகிறது. அந்த முடிவுகளை மீண்டும் மீண்டும் மாற்றிக்கொண்டே இருக்கக்கூடாது. அப்போதுதான், புதிதாக ஏதாவது முயற்சி செய்து ஆபத்தை எதிர்கொள்ள விரும்புபவர்களுக்கு ஒரு நம்பிக்கை ஏற்படும். அதாவது, “சரி, ஏதாவது தவறு நடந்தால் அது என்னுடைய தவறாக இருக்கலாம். ஆனால், என்னை யாரும் கைவிட்டுவிட மாட்டார்கள்” என்ற நம்பிக்கை அவர்களுக்கு இருக்க வேண்டும். அத்தகைய நம்பிக்கையை உருவாக்குவதுதான் எங்களுடைய முயற்சியாக இருந்தது.

தலைமைச் செயல் அதிகாரி: நாங்கள்தான் இந்தியாவின் முதல் விண்வெளித் தொழில்நுட்பத் துறையைச் சேர்ந்த பத்து லட்சம் கோடி ரூபாய் மதிப்பைக் கடந்த தொடக்க நிறுவனமாக உருவெடுத்துள்ளோம். ஜூலை 18ஆம் தேதி, இந்தியாவின் முதல் தனியார் ராக்கெட்டை வெற்றிகரமாக விண்ணில் செலுத்தி, அதன் மூலம் செயற்கைக்கோள்களை விண்ணில் நிலைநிறுத்தியுள்ளோம். இது வெறும் தொடக்கம்தான். பொதுவாக, இதை எங்கள் நிறுவனத்திற்கு ஒரு பயிற்சிப் பயணம் போன்றதுதான் என்று நாங்கள் கூறுகிறோம். இது ஆரம்பம் மட்டுமே. அடுத்த ஆண்டு நடுப்பகுதிக்குள், ஒவ்வொரு மாதமும் விண்ணில் ஒரு ராக்கெட்டை ஏவுதலை மேற்கொள்ளும் அளவுக்கு நாங்கள் வளர்ந்திருப்போம். மேலும், இந்தத் துறையைத் தனியார் நிறுவனங்களுக்கு திறந்துவிட்டதற்காக உங்களுக்கு நன்றி, ஐயா. ஏற்கனவே மூன்று தொழிற்சாலைகள் கட்டி முடிக்கப்பட்டுள்ளன. ஒவ்வொரு மாதமும் ஒரு ராக்கெட்டைத் தயாரித்து விண்ணில் செலுத்தும் திறனை நாங்கள் ஏற்கனவே பெற்றுவிட்டோம். இதுவும் வெறும் தொடக்கம்தான். எங்களுடைய எதிர்கால இலக்கு, ஒவ்வொரு வாரமும் விண்ணில் ஒரு ராக்கெட்டை ஏவுதலை மேற்கொள்வதும், ஒரு நாளில் பல  செயற்கைகோள்களை ஏவுவதுதான்.

தலைமைச் செயல் அதிகாரி: உலகின் மிக நவீனமான ராக்கெட் இயந்திரங்களுக்கு இணையான ஒரு இயந்திரத்தை நாங்கள் உருவாக்கியுள்ளோம். ஐயா, அதை நாங்கள் தயாரித்துவிட்டோம். தற்போது அதன் சோதனை நடைபெற்று வருகிறது.

பிரதமர்: முதலீட்டாளர்களுக்கு இதில் நம்பிக்கை இருக்கிறதா?

தலைமைச் செயல் அதிகாரி: ஐயா, ஸ்கைரூட் நிறுவனத்தின் முதல் ஏவுதலுக்கு  பிறகு, முதலீட்டாளர்களின் நம்பிக்கை மேலும் அதிகரித்துள்ளது.

பிரதமர்: நல்லது. அந்தப் பாதை உங்களுக்கு உதவியாக இருக்கிறதா?

தலைமைச் செயல் அதிகாரி: மிகவும் உதவியாக இருக்கிறது.

பிரதமர்: இப்போது உலகம் முழுவதும் இந்தியாவின் புத்தொழில் நிறுவனங்களைத் தேடிப் பார்க்கத் தொடங்கியிருக்கும். “இதற்குப் பின்னால் இருப்பவர்கள் யார்?” என்று அவர்கள் ஆச்சரியப்படுவார்கள். ஏனென்றால், ஒரு புதிய சாதனை நிகழும்போது, உடனடியாக அனைவருடைய கவனமும் அந்தப் பக்கம்தான் திரும்பும்.

தலைமைச் செயல் அதிகாரி: விண்வெளித் துறை தனியார் நிறுவனங்களுக்குத் திறந்துவிடப்பட்ட பிறகு, மிகவும் நல்ல மாற்றத்தை நாங்கள் பார்த்து வருகிறோம் என்று நினைக்கிறேன். அமெரிக்கா மற்றும் ஐரோப்பாவில் இருக்கும் நமது இந்தியர்கள், மீண்டும் இந்தியாவுக்குத் திரும்பி எங்களுடன் இணைந்து பணியாற்ற விரும்புகிறார்கள்.

பிரதமர்: நாம் பலரை ஒன்றிணைக்க வேண்டும். மெஹ்தா அவர்கள் கூறியதைப் போல, வெளிநாடுகளுக்குச் சென்றிருந்த பலரும் இப்போது இந்தியாவுக்குத் திரும்பி வருகின்றனர். உலகம் முழுவதும் உள்ள மக்கள், தங்கள் வாழ்க்கையை உருவாக்கிக் கொள்ள விரும்பினால், இந்தியாவுக்கு வர வேண்டும்; ஏதாவது ஒரு இந்திய புத்தொழில் நிறுவனத்தில் இணைய வேண்டும்; ஏதாவது ஒரு இந்திய விண்வெளி நிறுவனத்தில் பணியாற்ற வேண்டும் என்ற எண்ணம் ஏற்படும் அளவுக்கு நாம் ஒரு நல்ல சூழலை உருவாக்க வேண்டும் என்று நான் நம்புகிறேன். உலகின் பல்வேறு பகுதிகளில் இருக்கும் திறமையாளர்கள் அனைவரையும் ஒரு காந்தம் போல இந்தியாவை நோக்கி ஈர்க்கும் வலிமை நம்மிடம் உள்ளது. உங்களைப் போன்றவர்களின் முயற்சியால் அந்தத் திறமைகளை இந்தியாவுக்கு ஈர்க்க முடியும். அது நமக்கு மிகப்பெரிய பலமாக மாறும் என்று நான் உறுதியாக நம்புகிறேன்.

தலைமைச் செயல் அதிகாரி: அடுத்த 18 மாதங்களுக்குள், உலகளாவிய விண்வெளி தரைக் கட்டுப்பாட்டு நிலையங்களின் கட்டமைப்பை உருவாக்க வேண்டும் என்பதுதான் எங்களுடைய இலக்கு.

தலைமைச் செயல் அதிகாரி: செயற்கைக்கோள்கள் விண்வெளியில் ஓரிடத்திலிருந்து மற்றொரு இடத்திற்குச் செல்வதற்குப் பயன்படுத்தும் இயந்திரங்களை நாங்கள் தயாரிக்கிறோம். இவை 5 ஆண்டுகள் முதல் 15 ஆண்டுகள் வரை செயல்படும் வகையில் உருவாக்கப்படுகின்றன.

உலக அளவில் எங்களுடைய தயாரிப்புகளுக்கு நல்ல வரவேற்பு கிடைத் துள்ளது. ஐயா, இதிலும் உங்களுடைய முயற்சி மிகவும் முக்கியமானதாக இருந்துள்ளது. ஏனென்றால், தற்போது இந்திய நிறுவனங்கள் தங்களுடைய தயாரிப்புகளை வெளிநாடுகளுக்கு ஏற்றுமதி செய்வதற்கு அரசின் ஆதரவைப் பெறுகின்றன.

பிரதமர்: செலவைக் கருத்தில் கொண்டால், நாம் மிகவும் போட்டித்திறன் கொண்டவர்களாக இருக்கிறோம். திறமையைப் பொறுத்தவரை, நம்மிடம் எந்தக் குறையும் இல்லை. அதேபோல், நம்முடைய மக்களின் ஆபத்தை ஏற்றுக்கொண்டு புதிய முயற்சிகளில் ஈடுபடும் திறனும் எப்போதுமே அதிகமாகவே உள்ளது. இதன் காரணமாக, உலக விண்வெளித் துறையில் நாம் மிகக் குறுகிய காலத்திலேயே நமக்கான இடத்தை உருவாக்கிக் கொள்ள முடியும்.

தலைமைச் செயல் அதிகாரி: இந்தத் தானியங்கி விண்கலம் விண்வெளிக்குச் சென்று, செயலிழந்த செயற்கைக்கோளை நேரடியாகப் பிடித்து, அதை அதன் சுற்றுப்பாதையிலிருந்து அகற்றும்.

தலைமைச் செயல் அதிகாரி: விண்வெளியில் எரிபொருள் நிரப்பும் நிலையத்தை அமைக்க வேண்டும் என்ற தொலைநோக்குப் பார்வையுடன், விண்வெளியில் விண்கலங்களை ஒன்றுடன் ஒன்று இணைக்கும் தொழில்நுட்பம் மற்றும் எரிபொருள் நிரப்பும் தொழில்நுட்பத்தில் பணியாற்றும் முதல் இந்திய நிறுவனம் நாங்கள்தான்.

தலைமைச் செயல் அதிகாரி: என் பெயர் அந்தரிக்ஷ். எனது இணை நிறுவனர் மோனிகாவும் இங்கு இருக்கிறார். ஐயா, நாங்கள்தான் இந்தியாவின் முதல் விண்வெளி மருந்துத் தயாரிப்பு தொடக்க நிறுவனம். விண்வெளிக்குச் சென்று அங்கேயே மருந்துகளைத் தயாரித்து, பின்னர் அவற்றை மீண்டும் பூமிக்குக் கொண்டு வரக்கூடிய செயற்கைக்கோள்களை நாங்கள் உருவாக்கி வருகிறோம்.

பிரதமர்: உங்கள் பெயர் அந்தரிக்ஷ் என்று சொல்கிறீர்கள். உங்கள் குடும்பத்தினர் ஏற்கனவே இந்தத் துறையில் இருந்தார்களா?

தலைமைச் செயல் அதிகாரி: இல்லை, ஐயா. என் அம்மாதான் எனக்கு இந்தப் பெயரை வைத்தார்.

தலைமைச் செயல் அதிகாரி: ஒரே ஒரு விண்ணேவுதலுக்குப் பிறகு, கடந்த ஒரு மாதத்தில் மட்டும் எங்களுக்கு எட்டு விண்ணேவுதல் ஒப்பந்தங்கள் கிடைத்துள்ளன.

பிரதமர்: நல்லது, நல்லது.

தலைமைச் செயல் அதிகாரி: அவற்றில் பெரும்பாலானவை சர்வதேச ஒப்பந்தங்கள்.

தலைமைச் செயல் அதிகாரி: ஐயா, தற்போது இந்தப் புதிய முயற்சியை ஒரு லட்சம் விவசாயிகளுடன் தொடங்குவதற்குத் திட்டமிட்டுள்ளோம்.

தலைமைச் செயல் அதிகாரி: ஐயா, இது உங்களுக்காக. ஒரு நினைவாக இருக்கட்டும்.

பிரதமர்: அருமை.

தலைமைச் செயல் அதிகாரி: தனியார் துறைக்காக நீங்கள் திறந்துவிட்ட இந்த வாய்ப்பின் மூலம், தற்போது தனியார் நிறுவனங்களின் செயற்கைக்கோள்கள் விண்வெளியில் இருந்து இந்தியாவின் அழகை உலகுக்குக் காட்டி வருகின்றன.

(Release ID: 2302434)

***

AD/VK/PD