ഗുവാഹത്തി സർവകലാശാലയിൽ 110 കോടി രൂപയുടെ അടിസ്ഥാന സൗകര്യ വികസന പദ്ധതികൾക്ക് ഇന്ത്യൻ ഉപരാഷ്ട്രപതി ശ്രീ സി. പി. രാധാകൃഷ്ണൻ ഇന്ന് തറക്കല്ലിട്ടു. പുതിയ മൾട്ടി ഡിസിപ്ലിനറി അക്കാദമിക് കെട്ടിടം, ആൺകുട്ടികൾക്കും അന്താരാഷ്ട്ര വിദ്യാർത്ഥികൾക്കുമുള്ള ഒരു പുതിയ ഹോസ്റ്റൽ, ഓഡിറ്റോറിയം, ലൈബ്രറി എന്നിവയുമായി ബന്ധപ്പെട്ട പ്രവർത്തനങ്ങൾ എന്നിവ ഇതിൽ ഉൾപ്പെടുന്നു.

ഭാരതരത്ന ഗോപിനാഥ് ബോർദലോയ് ഉൾപ്പെടെയുള്ള പ്രമുഖ നേതാക്കളുടെ നേതൃത്വത്തിൽ നടന്ന സുസ്ഥിരമായ പൊതു പ്രസ്ഥാനത്തെ തുടർന്ന്, വടക്കുകിഴക്കൻ ഇന്ത്യയിലെ ആദ്യത്തെ സർവകലാശാലയായി 1948 ജനുവരി 26 ന് സ്ഥാപിതമായ ഗുവാഹത്തി സർവകലാശാലയുടെ ചരിത്രപരമായ പ്രാധാന്യം ശ്രീ സി. പി. രാധാകൃഷ്ണൻ സമ്മേളനത്തെ അഭിസംബോധന ചെയ്തു സംസാരിക്കവേ വ്യക്തമാക്കി. NAAC A+ അംഗീകാരവും NIRF 2025 ൽ സംസ്ഥാന പൊതു സർവകലാശാലകളിൽ 9-ാം റാങ്കും നേടിയ ഈ സർവകലാശാല മേഖലയിലെ ഒരു മുൻനിര സ്ഥാപനമായി വളർന്നിട്ടുണ്ടെന്ന് അദ്ദേഹം ചൂണ്ടിക്കാട്ടി.

ഇന്ത്യയുടെ ഭാഷാ പൈതൃകം സംരക്ഷിക്കാനുള്ള സർവകലാശാലയുടെ ശ്രമങ്ങളെ അഭിനന്ദിച്ച അദ്ദേഹം, ഭാഷ ഒരു നാഗരികതയുടെ ഓർമ്മയും ജ്ഞാനവും സ്വത്വവും വഹിക്കുന്നുണ്ടെന്ന് പറഞ്ഞു. അസമീസ്, തമിഴ് സാഹിത്യകൃതികൾ പരസ്പരം വിവർത്തനം ചെയ്യുന്നതിനെ അദ്ദേഹം സ്വാഗതം ചെയ്യുകയും അസമിനും തമിഴ്നാടിനും ഇടയിൽ കൂടുതൽ അക്കാദമിക്, സാഹിത്യ കൈമാറ്റങ്ങൾ പ്രോത്സാഹിപ്പിക്കുകയും ചെയ്തു. ഇന്ത്യയുടെ ഭാഷാ വൈവിധ്യം അതിന്റെ സാംസ്കാരിക ഐക്യത്താൽ സമ്പന്നമാണെന്നും അ​ദ്ദേഹം നിരീക്ഷിച്ചു.

ബ്രഹ്മപുത്ര നദീതടത്തിലെ ഗവേഷണം, വംശനാശഭീഷണി നേരിടുന്ന ഭാഷകൾ, ബഹുഭാഷ, സ്ത്രീ പഠനം, പരിസ്ഥിതി സുസ്ഥിരത, ഇന്ത്യൻ വിജ്ഞാന സംവിധാനങ്ങൾ എന്നിവയെക്കുറിച്ചുള്ള സർവകലാശാലയുടെ ഗവേഷണത്തെ ശ്രീ സി. പി. രാധാകൃഷ്ണൻ അഭിനന്ദിച്ചു. ബ്രഹ്മപുത്രയെ പാരിസ്ഥിതിക, സാമ്പത്തിക, നാഗരിക ശക്തിയായി വിശേഷിപ്പിച്ച അദ്ദേഹം, പ്രാദേശിക, ദേശീയ വെല്ലുവിളികളെ അഭിസംബോധന ചെയ്യുന്ന ഗവേഷണത്തിന്റെ പ്രാധാന്യം ഊന്നിപ്പറഞ്ഞു.

2014 മുതൽ ഇന്ത്യയുടെ ഉന്നത വിദ്യാഭ്യാസ ആവാസവ്യവസ്ഥയുടെ വികാസം എടുത്തുകാണിച്ച ശ്രീ സി. പി. രാധാകൃഷ്ണൻ, രാജ്യത്തുടനീളം വിദ്യാഭ്യാസ അവസരങ്ങൾ വികസിപ്പിക്കുന്നതിൽ പ്രധാനമന്ത്രി ശ്രീ നരേന്ദ്ര മോദിയുടെ ദീർഘവീക്ഷണമുള്ള നേതൃത്വത്തെ പ്രശംസിച്ചു. പുതിയ ഐഐടികൾ, ഐഐഎമ്മുകൾ, ഐഐഐടികൾ, കേന്ദ്ര സർവകലാശാലകൾ, എയിംസ്, മറ്റ് സ്ഥാപനങ്ങൾ എന്നിവ സ്ഥാപിച്ചതും അദ്ദേഹം ചൂണ്ടിക്കാട്ടി. ഉന്നത വിദ്യാഭ്യാസത്തിൽ സ്ത്രീകളുടെ പ്രവേശനം 42.2 ശതമാനം വർദ്ധിച്ചു, 2014-15 ലെ 1.57 കോടിയിൽ നിന്ന് 2023-24 ൽ 2.24 കോടിയായി. സ്ത്രീകളുടെ വർദ്ധിച്ചുവരുന്ന പങ്കാളിത്തവും അക്കാദമിക നേട്ടങ്ങളും ശാക്തീകരണത്തിന്റെ ഒരു പ്രധാന സൂചകമാണെന്ന് അദ്ദേഹം വിശേഷിപ്പിച്ചു.

മുഖ്യമന്ത്രി ഡോ. ഹിമന്ത ബിശ്വ ശർമ്മയുടെ നേതൃത്വത്തിൽ അസമിന്റെ വികസന പാതയെ, പ്രത്യേകിച്ച് അടിസ്ഥാന സൗകര്യങ്ങൾ, കണക്റ്റിവിറ്റി, വിദ്യാഭ്യാസം, നിക്ഷേപം, തൊഴിൽ എന്നീ മേഖലകളിൽ, അദ്ദേഹം അഭിനന്ദിച്ചു. സംസ്ഥാനത്തിന്റെ മെച്ചപ്പെട്ട വിദ്യാഭ്യാസ പ്രകടനം, ഗുവാഹത്തിയിലെ ഐഐഎമ്മിലെ ആദ്യ എംബിഎ ബാച്ചിന്റെ ആരംഭം, 2021 മുതൽ 1.64 ലക്ഷത്തിലധികം മെറിറ്റ് അധിഷ്ഠിത ​ഗവൺമെന്റ് നിയമനങ്ങൾ എന്നിവ അദ്ദേഹം എടുത്തുപറഞ്ഞു.

വികസിത് ഭാരത് @2047-ലേക്ക് സംഭാവന നൽകാൻ വിദ്യാർത്ഥികളോടും പണ്ഡിതന്മാരോടും ആഹ്വാനം ചെയ്ത ശ്രീ സി. പി. രാധാകൃഷ്ണൻ, ധൈര്യത്തോടെ സ്വപ്നം കാണാനും, സമൂഹ വെല്ലുവിളികളെ അഭിസംബോധന ചെയ്ത് ഗവേഷണം നടത്താനും, സാങ്കേതികവിദ്യ മനുഷ്യരാശിയെ സേവിക്കുന്നുവെന്ന് ഉറപ്പാക്കാനും, നവീകരണത്തെ സമഗ്ര വികസനത്തിനുള്ള ഒരു മാർഗമാക്കാനും ആവശ്യപ്പെട്ടു. സ്വാമി വിവേകാനന്ദനെ ഉദ്ധരിച്ച്, "ഉണരൂ, എഴുന്നേൽക്കൂ, നിങ്ങളുടെ ലക്ഷ്യത്തിലെത്തുന്നതു വരെ വിശ്രമിക്കരുത് " എന്ന് അദ്ദേഹം യുവാക്കളോട് ആഹ്വാനം ചെയ്തു.

ഈ അവസരത്തിൽ, ശ്രീ സി. പി. രാധാകൃഷ്ണൻ അങ്കുരൻ ദത്തയും നാനി ഗോപാൽ മഹന്തയും എഡിറ്റ് ചെയ്ത ഭൂപെൻ ഹസാരിക: ഹണ്ട്രഡ് ഇയേഴ്‌സ് ഓഫ് എ വാണ്ടറിംഗ് സോങ്‌സും ചന്ദ്രകാന്ത അഭിധാന്റെ അഞ്ചാമത് പരിഷ്കരിച്ചതും വിപുലീകരിച്ചതുമായ പതിപ്പും പുറത്തിറക്കി.

അസമിന്റെ സമ്പന്നമായ സാംസ്കാരിക പൈതൃകം പ്രദർശിപ്പിച്ചുകൊണ്ട് ​ഗുവാഹത്തി സർവകലാശാല വിദ്യാർത്ഥികൾ അവതരിപ്പിച്ച സാംസ്കാരിക പരിപാടിക്കും ഉപരാഷ്ട്രപതി സാക്ഷ്യം വഹിച്ചു. യുവാക്കളോട് ലഹരിവസ്തുക്കളുടെ ദുരുപയോഗത്തിൽ നിന്ന് വിട്ടുനിൽക്കാനും സ്വയം അച്ചടക്കം പാലിക്കാനും സമയം വിവേകപൂർവ്വം കൈകാര്യം ചെയ്യാനും അമിതമായ സോഷ്യൽ മീഡിയ ഉപയോഗം പരിമിതപ്പെടുത്താനും ആഹ്വാനം ചെയ്തുകൊണ്ട്,  "മയക്കുമരുന്ന് വേണ്ട" എന്ന പ്രതിജ്ഞ എടുപ്പിക്കുന്നതിൽ വിദ്യാർഥികൾക്കും മറ്റ് പങ്കാളികൾക്കും അദ്ദേഹം നേതൃത്വം നൽകി.

പരിപാടിയിൽ അസം ഗവർണർ ശ്രീ ലക്ഷ്മൺ പ്രസാദ് ആചാര്യ, മുഖ്യമന്ത്രി ഡോ. ഹിമന്ത ബിശ്വ ശർമ്മ, വിദ്യാഭ്യാസ മന്ത്രി ഡോ. റനോജ് പെഗു, ചീഫ് സെക്രട്ടറി ഡോ. രവി കോട്ട, ഗുവാഹത്തി സർവകലാശാല വൈസ് ചാൻസലർ ശ്രീ നാനി ഗോപാൽ മഹന്ത, രജിസ്ട്രാർ പ്രൊഫ. ഉത്പൽ ശർമ്മ, ഫാക്കൽറ്റി അംഗങ്ങൾ, വിദ്യാർത്ഥികൾ, മറ്റ് വിശിഷ്ട വ്യക്തികൾ എന്നിവർ പങ്കെടുത്തു.

***

SK