কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে আজ পানাজীত মুখ্যমন্ত্ৰী ড° প্ৰমোদ সাৱন্তৰ সৈতে গোৱা ৰাজ্য সংক্ৰান্তীয় বিষয়সমূহৰ ওপৰত এক পৰ্যালোচনা বৈঠকত অধ্যক্ষতা কৰে। বৈঠকত কেন্দ্ৰীয় গৃহ সচিব, চোৰাংচোৱা ব্যুৰ’ৰ সঞ্চালক আৰু গৃহ মন্ত্ৰালয়, গোৱা চৰকাৰ, ভাৰতীয় উপকূলৰক্ষী বাহিনী আৰু অন্যান্য সংশ্লিষ্ট সংগঠনৰ জ্যেষ্ঠ বিষয়াসকল উপস্থিত থাকে।

বৈঠকত গোৱাৰ মুখ্যমন্ত্ৰী, মুখ্য সচিব আৰু আৰক্ষী সঞ্চালকপ্ৰধানে কেন্দ্ৰীয় গৃহমন্ত্ৰী শ্ৰী অমিত শ্বাহক ৰাজ্যখনৰ আইন-শৃংখলা সংক্ৰান্তীয় গুৰুত্বপূৰ্ণ বিষয়সমূহৰ বিষয়ে অৱগত কৰে। বৈঠকত তিনিখন নতুন ন্যায় সংহিতাৰ ৰূপায়ণ, এনডিপিএছ সংক্ৰান্তীয় বিষয়, উপকূলীয় নিৰাপত্তা, পলাতক অপৰাধীৰ বিষয়, দুৰ্যোগ ব্যৱস্থাপনা, আৰক্ষীৰ আধুনিকীকৰণ, শত্ৰু সম্পত্তিৰ প্ৰশাসন আৰু অবৈধ প্ৰব্ৰজনকাৰী (বিশেষকৈ অপৰাধ আৰু নিচাজাতীয় দ্ৰৱ্যৰ অপৰাধত জড়িত) সকলক বহিষ্কাৰ কৰাৰ লগতে অন্যান্য গুৰুত্বপূৰ্ণ বিষয়সমূহ আলোচনা কৰা হয়।

কেন্দ্ৰীয় গৃহমন্ত্ৰী শ্ৰী অমিত শ্বাহে ৰাজ্যখনত আইন-শৃংখলা আৰু উপকূলীয় নিৰাপত্তা বজাই ৰখাৰ বাবে কেইবাটাও মূল পদক্ষেপ গ্ৰহণ কৰাত গোৱা চৰকাৰ আৰু ৰাজ্যিক আৰক্ষীৰ প্ৰচেষ্টাক প্ৰশংসা কৰে। তেওঁ কয় যে এই প্ৰচেষ্টাসমূহে গোৱাক 'নিচামুক্ত' কৰাত আৰু চাইবাৰ অপৰাধ সফলতাৰে প্ৰতিহত কৰাত অৰিহণা যোগাইছে। শ্ৰী শ্বাহে ৰাজ্য চৰকাৰ আৰু সকলো অংশীদাৰক উদীয়মান নিৰাপত্তা প্ৰত্যাহ্বানসমূহৰ এক সামগ্ৰিক নিৰাপত্তা মূল্যাংকন কৰিবলৈ আহ্বান জনায়। তেওঁ কয় যে গুৰুত্বপূৰ্ণ প্ৰৱণতা আৰু আৰ্হি, বিভিন্ন ধৰণৰ অপৰাধৰ আন্তঃসম্পৰ্ক, অপৰাধীৰ আন্তঃৰাজ্যিক চলাচল আৰু উপকূলীয় নিৰাপত্তাৰ নিৰন্তৰ নিৰীক্ষণ নিশ্চিত কৰাৰ প্ৰয়োজন আছে। শ্ৰী শ্বাহে কয় যে গৃহ মন্ত্ৰালয় আৰু ৰাজ্য চৰকাৰে গ্ৰহণ কৰা সকলো পদক্ষেপে গোৱাক দেশৰ ভিতৰতে আইন-শৃংখলাৰ ক্ষেত্ৰত শীৰ্ষ ৰাজ্য কৰি তোলাটো নিশ্চিত কৰা উচিত।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে ২০৪৭ চনৰ ভিতৰত 'বিকশিত ভাৰত'ৰ লক্ষ্য প্ৰাপ্তিৰ বাবে সৰু ৰাজ্যসমূহে যাতে প্ৰশাসনিক বিষয়, ক্ষমতা বিকাশ আৰু উন্নয়নমূলক বিষয়ত সম্পূৰ্ণ সমৰ্থন আৰু পেছাদাৰী সাহায্য লাভ কৰে, তাৰ বাবে মোদী চৰকাৰ প্ৰতিশ্ৰুতিবদ্ধ।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে গোৱাৰ দেশৰ ভিতৰতে এক আৰ্হি ৰাজ্য হৈ পৰাৰ সম্পূৰ্ণ সম্ভাৱনা আছে আৰু এই সুন্দৰ ৰাজ্যখনে নিৰাপত্তা আৰু বিকাশৰ সকলো লক্ষ্য প্ৰাপ্তিৰে “ভাৰত মাতাৰ কপালৰ ফোঁট” হৈ পৰিব।

গোৱা চৰকাৰৰ বিষয়াসকলে কেন্দ্ৰীয় গৃহমন্ত্ৰীক জনায় যে ৰাজ্যখনত হিংসাত্মক অপৰাধৰ হাৰ হ্ৰাস পোৱা দেখা গৈছে। অৱশ্যে চাইবাৰ অপৰাধ, নিচাজাতীয় দ্ৰৱ্য সংক্ৰান্তীয় অপৰাধ আৰু বিদেশী নাগৰিক সংক্ৰান্তীয় নিয়ম উলংঘনৰ বিৰুদ্ধে কঠোৰ ব্যৱস্থা গ্ৰহণৰ প্ৰয়োজন আছে। গোৱাৰ আৰক্ষী সঞ্চালকপ্ৰধানে জনায় যে উপকূলীয় নিৰাপত্তা, চাইবাৰ অপৰাধ আৰু নিচাজাতীয় দ্ৰৱ্যৰ বিষয়ত গোৱা চৰকাৰে ব্যাপকভাৱে পদক্ষেপ গ্ৰহণ কৰিছে। ডিজিপিয়ে লগতে জনায় যে তিনিখন নতুন ন্যায় সংহিতা আৰু আইচিজেএছৰ কাৰ্যকৰী ৰূপায়ণৰ পিছত ৰাজ্যখনত অপৰাধ প্ৰমাণৰ হাৰ ২২%ৰ পৰা ৫৩%লৈ বৃদ্ধি পাইছে। বহু ক্ষেত্ৰত আদালতসমূহে এতিয়া ৬ৰ পৰা ৮ মাহৰ ভিতৰত অপৰাধমূলক গোচৰসমূহ নিষ্পত্তি কৰিবলৈ সক্ষম হৈছে।

মুখ্যমন্ত্ৰী সাৱন্তে নিশ্চিতি দিয়ে যে ৰাজ্য চৰকাৰে কেন্দ্ৰীয় গৃহমন্ত্ৰীৰ নিৰ্দেশনাত আৰু কেন্দ্ৰীয় চৰকাৰৰ সৈতে ঘনিষ্ঠ সমন্বয়ৰে গোৱাক সকলো দিশতে এক আৰ্হি ৰাজ্য কৰি তোলাৰ বাবে কাম কৰিব।

*****

RK / RR / PR / PS/DB