ਪ੍ਰਿਥਵੀ ਵਿਗਿਆਨ ਮੰਤਰਾਲੇ ਦੇ ਕੇਂਦਰੀ ਮੰਤਰੀ (ਸੁਤੰਤਰ ਚਾਰਜ) ਡਾ. ਜਿਤੇਂਦਰ ਸਿੰਘ ਨੇ ਅੱਜ ਨਵੀਂ ਦਿੱਲੀ ਦੇ ਲੋਧੀ ਰੋਡ ਸਥਿਤ ਪ੍ਰਿਥਵੀ ਭਵਨ ਵਿਖੇ ਆਯੋਜਿਤ ਇੱਕ ਵਿਸ਼ੇਸ਼ ਸ਼ਲਾਘਾ ਅਤੇ ਪ੍ਰੋਤਸਾਹਨ ਮੀਟਿੰਗ ਵਿੱਚ 19ਵੇਂ ਅੰਤਰਰਾਸ਼ਟਰੀ ਪ੍ਰਿਥਵੀ ਵਿਗਿਆਨ ਓਲੰਪੀਆਡ (IESO) 2026 ਦੇ ਜੇਤੂਆਂ - ਪ੍ਰਤਿਭਾਸ਼ਾਲੀ 'ਟੀਮ ਇੰਡੀਆ ਸਕੂਲ ਦੇ ਬੱਚਿਆਂ’ ਦਾ ਸਨਮਾਨ ਕੀਤਾ ਅਤੇ ਉਨ੍ਹਾਂ ਨਾਲ ਗੱਲਬਾਤ ਕੀਤੀ।

ਇਸ ਅਸਧਾਰਣ ਪ੍ਰਾਪਤੀ ਦੀ ਸ਼ਲਾਘਾ ਕਰਦੇ ਹੋਏ, ਡਾ. ਜਿਤੇਂਦਰ ਸਿੰਘ ਨੇ ਇਨ੍ਹਾਂ ਨੌਜਵਾਨ ਪ੍ਰਾਪਤੀਆਂ 'ਤੇ ਬਹੁਤ ਮਾਣ ਪ੍ਰਗਟ ਕੀਤਾ ਅਤੇ ਜੇਤੂਆਂ, ਉਨ੍ਹਾਂ ਦੇ ਮਾਣਮੱਤੇ ਮਾਪਿਆਂ ਅਤੇ ਉਨ੍ਹਾਂ ਦੇ ਸਬੰਧਿਤ ਸਕੂਲਾਂ ਨੂੰ ਦੇਸ਼ ਲਈ ਵਿਸ਼ਵਵਿਆਪੀ ਸਨਮਾਨ ਦਿਵਾਉਣ ਲਈ ਵਧਾਈ ਦਿੱਤੀ। ਮੰਤਰਾਲੇ ਦੇ ਦ੍ਰਿਸ਼ਟੀਕੋਣ ਨੂੰ ਉਜਾਗਰ ਕਰਦੇ ਹੋਏ, ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਸਰਕਾਰ ਯੁਵਾ-ਕੇਂਦ੍ਰਿਤ ਆਊਟਰੀਚ ਪ੍ਰੋਗਰਾਮਾਂ ਰਾਹੀਂ ਨੌਜਵਾਨਾਂ ਨੂੰ ਸਸ਼ਕਤ ਬਣਾਉਣ, ਉਨ੍ਹਾਂ ਦੀ ਮੂਲ ਵਿਗਿਆਨਕ ਸੋਚ ਨੂੰ ਉਤਸ਼ਾਹਿਤ ਕਰਨ ਅਤੇ ਯੁਵਾ ਮਨਾਂ ਨੂੰ ਪ੍ਰਿਥਵੀ ਪ੍ਰਣਾਲੀ ਵਿਗਿਆਨ ਦੀ ਪੜਚੋਲ ਕਰਨ ਲਈ ਉਤਸ਼ਾਹਿਤ ਕਰਨ ਲਈ ਡੂੰਘਾਈ ਨਾਲ ਵਚਨਬੱਧ ਹੈ।

ਭਾਰਤੀ ਵਿਦਿਆਰਥੀ ਪ੍ਰਤੀਨਿਧੀਆਂ ਨੇ 20 ਤੋਂ 27 ਅਗਸਤ, 2026 ਤੱਕ ਇਟਲੀ ਦੇ ਤੁਰਿਨ ਵਿੱਚ ਅੰਤਰਰਾਸ਼ਟਰੀ ਭੂ-ਵਿਗਿਆਨ ਸੰਗਠਨ ਦੀ ਅਗਵਾਈ ਹੇਠ ਆਯੋਜਿਤ 19ਵੇਂ ਅੰਤਰਰਾਸ਼ਟਰੀ ਪ੍ਰਿਥਵੀ ਵਿਗਿਆਨ ਓਲੰਪੀਆਡ ਵਿੱਚ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ।

39 ਦੇਸ਼ਾਂ ਦੇ ਭਾਗੀਦਾਰਾਂ ਦੇ ਵਿਚਕਾਰ ਮੁਕਾਬਲਾ ਕਰਦੇ ਹੋਏ, ਟੀਮ ਇੰਡੀਆ ਨੇ ਲਿਖਤੀ ਅਤੇ ਪ੍ਰੈਕਟੀਕਲ ਪ੍ਰੀਖਿਆਵਾਂ, ਅੰਤਰਰਾਸ਼ਟਰੀ ਟੀਮ ਫੀਲਡ ਇਨਵੈਸਟੀਗੇਸ਼ਨ (ITFI) ਅਤੇ ਪ੍ਰਿਥਵੀ ਵਿਗਿਆਨ ਪ੍ਰੋਜੈਕਟ (ESP) ਦੀਆਂ ਸ਼੍ਰੇਣੀਆਂ ਵਿੱਚ ਕੁੱਲ ਨੌਂ ਮੈਡਲ- ਜਿਨ੍ਹਾਂ ਵਿੱਚ 3 ਗੋਲਡ, 2 ਸਿਲਵਰ ਅਤੇ 2 ਬਰੌਂਜ਼ ਸ਼ਾਮਲ ਹਨ-ਜਿੱਤ ਕੇ ਇੱਕ ਇਤਿਹਾਸਕ ਪ੍ਰਾਪਤੀ ਹਾਸਲ ਕੀਤੀ।

ਦੇਸ਼ ਦਾ ਨਾਮ ਰੌਸ਼ਨ ਕਰਨ ਵਾਲੇ ਸ਼ਾਨਦਾਰ ਮੈਡਲ ਜੇਤੂ ਇਸ ਪ੍ਰਕਾਰ ਹਨ:

ਸੌਮਿਕ ਮੰਡਲ (ਡੀਏਵੀ ਮਾਡਲ ਸਕੂਲ, ਦੁਰਗਾਪੁਰ, ਪੱਛਮ ਬੰਗਾਲ): 2 ਗੋਲਡ, 1 ਸਿਲਵਰ (39 ਦੇਸ਼ਾਂ ਵਿੱਚੋਂ ਸਮੁੱਚੀ ਗਲੋਬਲ ਰੈਂਕਿੰਗ ਵਿੱਚ ਤੀਜਾ ਸਥਾਨ ਪ੍ਰਾਪਤ ਕੀਤਾ)

ਆਰੋਨ ਮੈਤੀ (ਡੀਏਵੀ ਮਾਡਲ ਸਕੂਲ, ਆਈਆਈਟੀ-ਖੜਗਪੁਰ, ਪੱਛਮ ਬੰਗਾਲ): 1 ਗੋਲਡ, 1 ਬਰੌਂਜ਼

ਰਿਧੀ ਰੰਜਨ (ਗਿਆਨ ਅਸਥਾਲੀ ਇੰਟਰਨੈਸ਼ਨਲ ਸਕੂਲ, ਪਟਨਾ, ਬਿਹਾਰ): 1 ਗੋਲਡ, 1 ਸਿਲਵਰ

ਮੁਹੰਮਦ ਇਹਤੇਸ਼ਾਮ ਰਿਜ਼ਵੀ (ਬਿਹਾਰ, ਜਵਾਹਰ ਨਵੋਦਿਆ ਵਿਦਿਆਲਿਆ): 1 ਸਿਲਵਰ, 1 ਬਰੌਂਜ਼

ਪ੍ਰਿਥਵੀ ਵਿਗਿਆਨ ਮੰਤਰਾਲੇ (MoES) ਦੇ ਸਕੱਤਰ, ਡਾ. ਟੀ. ਸ੍ਰੀਨਿਵਾਸ ਕੁਮਾਰ ਨੇ ਵੀ ਦਲ ਦੇ ਸਨਮਾਨ ਵਿੱਚ ਹਿੱਸਾ ਲਿਆ ਅਤੇ ਮੁਕਾਬਲੇ ਦੇ ਇਤਿਹਾਸ ਵਿੱਚ ਭਾਰਤ ਦੇ ਸਰਬਉੱਚ ਮੈਡਲ ਪ੍ਰਾਪਤ ਕਰਨ ਲਈ ਵਿਦਿਆਰਥੀਆਂ ਅਤੇ ਸਲਾਹਕਾਰਾਂ ਦੀ ਸ਼ਲਾਘਾ ਕੀਤੀ।

ਵੱਕਾਰੀ ਓਲੰਪੀਆਡ ਵਿੱਚ ਹਿੱਸਾ ਲੈਣ ਤੋਂ ਪਹਿਲਾਂ ਸਖ਼ਤ ਰਾਸ਼ਟਰੀ ਚੋਣ ਅਤੇ ਸਿਖਲਾਈ ਪ੍ਰਕਿਰਿਆ ਨਾਲ ਅੰਤਰਰਾਸ਼ਟਰੀ ਜਿੱਤ ਤੱਕ ਦੀ ਇਹ ਯਾਤਰਾ ਢਾਂਚਾਗਤ ਰਾਸ਼ਟਰੀ ਸਮਰਥਨ ਨੂੰ ਦਰਸਾਉਂਦੀ ਹੈ।

ਪ੍ਰਿਥਵੀ ਵਿਗਿਆਨ ਮੰਤਰਾਲੇ (MoES) ਦੁਆਰਾ ਆਪਣੇ ਆਊਟਰੀਚ ਅਤੇ ਜਾਗਰੂਕਤਾ ਪ੍ਰੋਗਰਾਮ ਦੇ ਤਹਿਤ ਪੂਰੀ ਤਰ੍ਹਾਂ ਸਮਰਥਿਤ, ਪ੍ਰਿਥਵੀ ਵਿਗਿਆਨ ਓਲੰਪੀਆਡ ਦੀ ਸ਼ੁਰੂਆਤ ਇੱਕ ਆਲ-ਇੰਡੀਆ ਪੱਧਰ ਦੀ ਪ੍ਰੀਖਿਆ ਨਾਲ ਹੁੰਦੀ ਹੈ- ਜੋ ਕਿ ਜੀਓਲੌਜੀਕਲ ਸੋਸਾਇਟੀ ਆਫ਼ ਇੰਡੀਆ (GSI) ਦੁਆਰਾ ਸੁਵਿਧਾਜਨਕ ਕੀਤੀ ਗਈ ਹੈ- ਜਿਸ ਵਿੱਚ ਲਗਭਗ 17,800 ਵਿਦਿਆਰਥੀਆਂ ਨੇ ਦੇਸ਼ ਭਰ ਦੇ 500 ਕੇਂਦਰਾਂ ਵਿੱਚ ਹਿੱਸਾ ਲਿਆ।

ਚੋਟੀ ਦੇ 25 ਹੋਣਹਾਰ ਵਿਦਿਆਰਥੀਆਂ ਨੇ ਜੂਨ 2026 ਵਿੱਚ ਗੁਜਰਾਤ ਦੇ ਵਡੋਦਰਾ ਵਿੱਚ ਐੱਮ.ਐੱਸ. ਯੂਨੀਵਰਸਿਟੀ ਵਿਖੇ ਤਿੰਨ-ਹਫ਼ਤਿਆਂ ਦੇ ਡੂੰਘੇ ਸਿਖਲਾਈ ਕੈਂਪ ਵਿੱਚ ਹਿੱਸਾ ਲਿਆ; ਜਿਸ ਨੂੰ ਕੇਂਦਰੀ ਮੰਤਰੀ ਦੀ ਇੱਛਾ ਅਨੁਸਾਰ ਦੇਸ਼ ਦੇ ਵੱਖ-ਵੱਖ ਖੇਤਰਾਂ ਵਿੱਚ ਕੈਂਪ ਸਥਾਨਾਂ ਨੂੰ ਘੁੰਮਾਉਣ ਦੇ ਉਦੇਸ਼ ਨਾਲ ਆਯੋਜਿਤ ਕੀਤਾ ਗਿਆ ਸੀ।

ਅੰਤਰਰਾਸ਼ਟਰੀ ਪ੍ਰਿਥਵੀ ਵਿਗਿਆਨ ਓਲੰਪੀਆਡ ਜਿਹੀ ਪਹਿਲਕਦਮੀ ਦੇ ਨਾਲ-ਨਾਲ ਡੀਪ ਓਸ਼ਨ ਮਿਸ਼ਨ, ਮਿਸ਼ਨ ਮੌਸਮ ਅਤੇ ਪ੍ਰਿਥਵੀ (PRITHVI) ਵਰਗੇ ਪ੍ਰਮੁੱਖ ਰਾਸ਼ਟਰੀ ਮਿਸ਼ਨਾਂ ਰਾਹੀਂ, ਪ੍ਰਿਥਵੀ ਵਿਗਿਆਨ ਮੰਤਰਾਲਾ ਮਜ਼ਬੂਤ ​​ਜਨਤਕ ਵਿਗਿਆਨਕ ਜਾਗਰੂਕਤਾ ਦਾ ਨਿਰਮਾਣ ਕਰਦਾ ਹੈ ਅਤੇ ਭੂ-ਵਿਗਿਆਨੀਆਂ ਅਤੇ ਖੋਜਕਰਤਾਵਾਂ ਦੀ ਅਗਲੀ ਪੀੜ੍ਹੀ ਨੂੰ ਪ੍ਰੇਰਿਤ ਕਰਨਾ ਜਾਰੀ ਰੱਖਦਾ ਹੈ। 

ਕੇਂਦਰੀ ਮੰਤਰੀ ਡਾ. ਜਿਤੇਂਦਰ ਸਿੰਘ ਸ਼ੁੱਕਰਵਾਰ ਨੂੰ ਪ੍ਰਿਥਵੀ ਭਵਨ, ਨਵੀਂ ਦਿੱਲੀ ਵਿਖੇ 19ਵੇਂ ਅੰਤਰਰਾਸ਼ਟਰੀ ਪ੍ਰਿਥਵੀ ਵਿਗਿਆਨ ਓਲੰਪੀਆਡ (IESO) 2026 ਵਿੱਚ ਪ੍ਰਦਰਸ਼ਨ ਲਈ 'ਟੀਮ ਇੰਡੀਆ ਸਕੂਲ ਦੇ ਬੱਚਿਆਂ' ਦਾ ਸਨਮਾਨ ਕਰਦੇ ਹੋਏ।

****

ਐੱਨਕੇਆਰ/ਜੇਕੇਪੀ/ਏਕੇ