ભારતના રાષ્ટ્રપતિ શ્રીમતી દ્રૌપદી મુર્મુએ આજે શાળાના વિદ્યાર્થીઓને રક્ષાબંધનના મૂળ મૂલ્યો, એટલે કે પ્રેમ, સંભાળ અને રક્ષણનો વિસ્તાર પર્યાવરણ સુધી કરવા આહ્વાન કર્યું હતું. તેમણે ઉમેર્યું હતું કે આ તહેવાર પ્રેમના એવા બંધનનું પ્રતીક છે જે પરિવારના સભ્યો, મિત્રો અને વૃક્ષો સહિત કોઈપણ સાથે શેર કરી શકાય છે. તેઓ રાષ્ટ્રપતિ ભવન ખાતે દેશભરની શાળાઓના વિદ્યાર્થીઓ સાથે રક્ષાબંધનની ઉજવણી કરી રહ્યા હતા.

પર્યાવરણની બગડતી સંતુલન સ્થિતિ અંગે ચિંતા વ્યક્ત કરતા, રાષ્ટ્રપતિએ વિદ્યાર્થીઓને અસ્તિત્વ માટે જરૂરી સંતુલન જાળવવા માટે છોડ અને વૃક્ષોને રાખડી બાંધવા જણાવ્યું હતું. વિદ્યાર્થીઓ દેશનું ભવિષ્ય છે તેના પર ભાર મૂકતા તેમણે કહ્યું હતું કે વૃક્ષો વાવવાનો અને તેનો ઉછેર કરવાનો સંકલ્પ આજીવન પ્રતિબદ્ધતા બનવો જોઈએ.

89 વિદ્યાર્થીઓ અને 32 શિક્ષકો સહિત 122 સહભાગીઓએ આ વિશેષ ઉજવણીમાં ભાગ લીધો હતો. 17 રાજ્યો, એક કેન્દ્રશાસિત પ્રદેશ, કેન્દ્રીય વિદ્યાલય સંગઠન (KVS) અને નવોદય વિદ્યાલય સમિતિ (NVS) માંથી પસંદ કરાયેલા પ્રતિનિધિઓમાં 13 દિવ્યાંગ બાળકો (CwSN) નો પણ સમાવેશ થતો હતો.

રાષ્ટ્રીય રાજધાનીની તેમની મુલાકાતના ભાગરૂપે, વિદ્યાર્થીઓએ 27 ઓગસ્ટ, 2026ના રોજ પ્રધાનમંત્રી સંગ્રહાલયની મુલાકાત લીધી હતી. આજે રાષ્ટ્રપતિ ભવન ખાતેના કાર્યક્રમ બાદ, વિદ્યાર્થીઓએ રાષ્ટ્રપતિ ભવન અને અમૃત ઉદ્યાનની ગાઇડેડ ટૂરમાં પણ ભાગ લીધો હતો. તેઓ પ્રદર્શનમાં મૂકાયેલા પવિત્ર બુદ્ધ અવશેષો જોવા માટે રાયપિથોરા કલ્ચરલ કોમ્પ્લેક્સ ખાતે હાલમાં યોજાઈ રહેલી "ધ લાઈટ એન્ડ ધ લોટસ: રિલિક્સ ઓફ ધ અવેકન્ડ વન" પ્રદર્શનની પણ મુલાકાત લેશે. તેઓ 29 ઓગસ્ટ, 2026 ના રોજ તેમની શૈક્ષણિક મુલાકાતના ભાગરૂપે રાષ્ટ્રીય વિજ્ઞાન કેન્દ્ર (નેશનલ સાયન્સ સેન્ટર), નેશનલ વોર મેમોરિયલ અને ઇન્ડિયા ગેટની પણ મુલાકાત લેશે.

SM/BS/JD