تجارت و صنعت کے مرکزی وزیر جناب پیوش گوئل، 24 سے 27 اگست 2026 تک جاپان کا دورہ کریں گے، جس کے دوران وہ ٹوکیو، ناگویا اور اوساکا جائیں گے۔ وہ جاپان جانے والے بھارت کے اب تک کے سب سے بڑے کاروباری وفد کی قیادت کر رہے ہیں، جو 200 سے زائد کاروباری نمائندوں پر مشتمل ہے اور مینوفیکچرنگ، سیمی کنڈکٹرز، ماحول دوست توانائی، اسٹیل، آٹوموٹو، مالیاتی خدمات، ہیلتھ کیئر اور اسٹارٹ اپس جیسے مختلف شعبوں کا احاطہ کرتا ہے۔ یہ دورہ اس عظیم عزم کی عکاسی کرتا ہے جو دونوں ممالک اپنی 'خصوصی اسٹریٹجک اور عالمی شراکت داری' کے لیے رکھتے ہیں، اور یہ ایک ایسے وقت میں ہو رہا ہے جب بھارت اور جاپان تجارتی اور سرمایہ کاری کے تعلقات کو نمایاں طور پر گہرا کرنے کے خواہاں ہیں۔

ٹوکیو میں، وزیر موصوف بڑے جاپانی کاروباری اداروں اور صنعتی گھرانوں کی اعلیٰ قیادت کے ساتھ ملاقاتوں کا اہتمام کریں گے جو طویل عرصے سے بھارت کی ترقی میں شراکت دار رہے ہیں، اور اس کے ساتھ ساتھ 'کیدانرین' (جاپان بزنس فیڈریشن) کے ساتھ ایک گول میز کانفرنس بھی ہوگی، جو کہ 1,500 سے زائد معروف جاپانی کمپنیوں کی نمائندگی کرنے والی سب سے بڑی تنظیم ہے۔ سیمی کنڈکٹرز، مصنوعی ذہانت، اسٹارٹ اپس، اور غیر ملکی ادارہ جاتی سرمایہ کاروں کے ساتھ روابط پر خصوصی سیشنز کی منصوبہ بندی کی گئی ہے، جو سرمایہ کاری اور جدت طرازی کی منزل کے طور پر بھارت کی بڑھتی ہوئی کشش کی عکاسی کرتے ہیں۔ وزیر موصوف اپنے ہم منصب، وزیر برائے معیشت، تجارت و صنعت جناب اکازاوا ریوسی کے ساتھ باہمی گفت و شنید بھی کریں گے، اور جاپانی حکومت و پارلیمنٹ کے سینئر ارکان سے ملاقاتوں کے علاوہ جاپان میں مقیم بھارتی برادری سے بات چیت کریں گے۔

وسطی جاپان کے صنعتی گڑھ، ناگویا میں وزیر موصوف 'چوکیرین' (سینٹرل جاپان اکنامک فیڈریشن) اور ناگویا چیمبر آف کامرس اینڈ انڈسٹری کے ساتھ ایک روڈ شو کی قیادت کریں گے، اور آئیچی پریفیکچر (صوبائی انتظامیہ) کی قیادت سمیت آٹوموٹو اور اسٹیل کے شعبوں کے بڑے مینوفیکچرنگ سرمایہ کاروں کے ساتھ بات چیت کریں گے۔

اس دورے کا اختتام اوساکا میں سرمایہ کاروں اور کاروباریوں کے روڈ شو کے ساتھ ہوگا، جس کے دوران الیکٹرانکس، صنعتی اور صارفین کے شعبوں کی معروف جاپانی کمپنیوں کے ساتھ ملاقاتیں کی جائیں گی، جن کا مقصد بھارت کی مینوفیکچرنگ، ماحول دوست توانائی اور صارفین کی منڈیوں میں موجود مواقع کو اجاگر کرنا ہے۔

جاپان تسلسل کے ساتھ سرمایہ کاری، ٹیکنالوجی اور صنعتی تعاون میں بھارت کے سب سے قابلِ اعتماد شراکت داروں میں شامل رہا ہے، جس میں جاپانی کاروباری اداروں نے بھارت کے آٹوموٹو، اسٹیل، الیکٹرانکس، مالیاتی خدمات اور انفراسٹرکچر کے منظر نامے میں ایک اہم کردار ادا کیا ہے۔ یہ دورہ، جس کے پیچھے تمام شعبوں سے تعلق رکھنے والے 200 سے زائد نمائندوں پر مشتمل ایک بے مثال کاروباری وفد موجود ہے، توقع ہے کہ دوطرفہ تجارت اور سرمایہ کاری کے تعلقات کو نئی رفتار دے گا، اور اعلیٰ تکنالوجی مینوفیکچرنگ اور آئندہ پیڑھی کی صنعتوں میں تعاون کی نئی راہیں کھولے گا— وہ شعبے جو بھارت کے 'آتم نربھر بھارت' اور 'وکست بھارت @2047' کے وژن کے لیے انتہائی مرکزی اہمیت کے حامل ہیں۔

**********

 (ش ح –ا ب ن)

U.No:2492