ભારત સરકારના 'ડિજિટલ ઈન્ડિયા' વિઝન અને નાગરિકો માટે 'ઈઝ ઓફ લિવિંગ' (સરળ જીવનશૈલી) વધારવાની કટિબદ્ધતાને અનુરૂપ, નેશનલ હાઈવે ઓથોરિટી ઓફ ઈન્ડિયા (NHAI) એ દેશભરના 121 ટોલ પ્લાઝા પર ઓનલાઈન ફાસ્ટેગ 'લોકલ પાસ' સુવિધાનો વિસ્તાર કર્યો છે. ઓનલાઈન લોકલ પાસ પાત્ર વાહનચાલકોને 'રાજમાર્ગયાત્રા' મોબાઈલ એપ દ્વારા ઓનલાઈન માસિક લોકલ પાસ સબ્સ્ક્રાઇબ કરવાની સુવિધા આપે છે, જેનાથી ટોલ પ્લાઝા પર રૂબરૂ જવાની અને દસ્તાવેજો સબમિટ કરવાની જરૂરિયાત દૂર થાય છે. આ પહેલનો મુખ્ય ઉદ્દેશ્ય ટેકનોલોજીનો ઉપયોગ કરીને ટોલિંગ કામગીરીની પારદર્શિતા અને કાર્યક્ષમતા વધારીને નેશનલ હાઈવે પરની મુસાફરીને વધુ સીમલેસ અને નાગરિક-કેન્દ્રિત બનાવવાનો છે.

પ્રથમ ડિજિટલ લોકલ પાસ સુવિધા જુલાઈ 2026 માં દિલ્હીમાં અર્બન એક્સ્ટેન્શન રોડ-II (UER-II) પર મુંડકા-બક્કરવાલા ટોલ પ્લાઝા ખાતે શરૂ કરવામાં આવી હતી. આ સફળ અમલીકરણ બાદ, હવે આ સુવિધા દેશભરના 120 થી વધુ ટોલ પ્લાઝા સુધી વિસ્તરણ કરવામાં આવી છે. આવનારા મહિનાઓમાં આ સુવિધા દેશના વધુ ટોલ પ્લાઝા પર લાગુ કરવામાં આવશે.

કોણ અરજી કરી શકે છે:

ડિજિટલ લોકલ પાસ માળખા હેઠળ, પાત્ર ટોલ પ્લાઝાના 20 કિમીની ત્રિજ્યામાં રહેતા રહેવાસીઓ 'રાજમાર્ગયાત્રા' મોબાઈલ એપ દ્વારા લોકલ પાસ માટે અરજી કરી શકે છે. આ પાસ પાત્ર વાહનચાલકોને લાગુ જોગવાઈઓ મુજબ તે મહિના દરમિયાન સંબંધિત ટોલ પ્લાઝા પરથી અમર્યાદિત મુસાફરી કરવાની મંજૂરી આપે છે. અગાઉ, લોકલ પાસ મેળવવા ઇચ્છતા વાહનચાલકોએ સંબંધિત ટોલ પ્લાઝાની રૂબરૂ મુલાકાત લેવી પડતી હતી અને 20 કિમીની રેન્જમાં પોતાના રહેણાંક સરનામાની સાબિતી અને અન્ય પાત્રતાની જરૂરિયાતો પૂરી કરવા દસ્તાવેજો જમા કરાવવા પડતા હતા. નેશનલ હાઈવે વપરાશકર્તાઓ https://rajmargyatra.nhai.gov.in/buy-fastag-local-pass પર જઈને પાત્ર ટોલ પ્લાઝાની યાદી ચકાસી શકે છે.

ડિજિટલ લોકલ પાસ પાછળની ટેકનોલોજી:

ડિજિટલ લોકલ પાસ સુવિધા વાહનચાલકના રહેણાંક સરનામા, વાહનની વિગતો અને લિંક કરેલ ફાસ્ટેગ જેવી સંબંધિત માહિતી મેળવવા અને ચકાસવા માટે ડિજિલોકર (DigiLocker) અને વાહન (VAHAN) સહિત સરકારી ડિજિટલ પ્લેટફોર્મ સાથે સંકલન સાધે છે. અરજદારનું નોંધાયેલું સરનામું પાત્ર ટોલ પ્લાઝાના નિર્ધારિત 20 કિમીની ત્રિજ્યામાં આવે છે કે નહીં તે નક્કી કરવા માટે જીઆઈએસ (GIS) આધારિત વેરિફિકેશનનો ઉપયોગ કરવામાં આવે છે.

ચકાસાયેલ ડિજિટલ ડેટા અને GIS-આધારિત માન્યતાનું એકીકરણ મેન્યુઅલ દસ્તાવેજીકરણ અને ભૌતિક ચકાસણીની જરૂરિયાતને દૂર કરે છે, જ્યારે પાત્રતા નક્કી કરવામાં વધુ સુસંગતતા, પારદર્શિતા અને ચોકસાઈ સુનિશ્ચિત કરે છે. લોકલ પાસના ડિજિટાઇઝેશન સાથે, NHAI એ દેશભરમાં ટેકનોલોજી-સક્ષમ નેશનલ હાઈવે નેટવર્ક બનાવવાનું લક્ષ્ય વધુ આગળ ધપાવ્યું છે.

SM/DK/JD