امورِ داخلہ  کے مرکزی وزیر مملکت  جناب بندی سنجے کمار نے حیدر آباد کے ابراہیم پٹنم میں  سشستر  سیما بل (ایس ایس بی) کے کیمپس میں نو تعمیر شدہ 48 ٹائپ - III  علیحدہ  فیملی  رہائش گاہوں کا افتتاح کیا۔ اس موقع پر ایس ایس بی کے ڈائریکٹر جنرل جناب سنجے سنگھل، وزارتِ داخلہ کے سینئر افسران، دستے کے اہلکار اور ان کے اہلِ خانہ موجود تھے۔

مرکزی مسلح پولیس دستوں (سی اے پی ایف) کے اہلکاروں کے لیے رہائشی سہولیات کو بہتر بنانا اور رہائشی اطمینان کے تناسب میں اضافہ کرنا  ، مودی حکومت کی ترجیحات میں شامل ہے۔ ایس ایس بی میں  ، اب تک 10,029 رہائشی  اکائیوں کی تعمیر مکمل ہو چکی ہے، جب کہ مزید 1,273  اکائیوں کی تعمیر کا کام   ، اس وقت جاری ہے۔

اپنے خطاب میں  ، امورِ داخلہ  کے وزیر مملکت نے کہا کہ یہ رہائشی مکانات محض عمارتیں نہیں بلکہ ایس ایس بی کے اہلکاروں اور ان کے  کنبوں کی فلاح و بہبود کے لیے  ، حکومتِ ہند کے عزم کی علامت ہیں، جو ملک کی خدمت اور سلامتی کے لیے ہمیشہ وقف رہتے ہیں۔ انہوں نے زور دے کر کہا کہ ایک محفوظ اور مطمئن خاندان پُر اعتماد اور پُر عزم جوان کے لیے سب سے بڑی طاقت کا ذریعہ ہوتا ہے۔

جناب بندی سنجے کمار نے کہا کہ وزیر اعظم جناب نریندر مودی کی قیادت اور مرکزی وزیر داخلہ جناب امت شاہ کی رہنمائی میں وزارتِ داخلہ  ، مرکزی مسلح پولیس دستوں کی آپریشنل صلاحیتوں، جدید کاری، بنیادی ڈھانچے اور اہلکاروں کی فلاح و بہبود کو مسلسل مضبوط بنانے کے لیے پُرعزم ہے۔

امورِ داخلہ  کے مرکزی وزیر مملکت نے  51 بہادر سپاہیوں کو خراجِ عقیدت پیش کیا، جنہوں نے ملک کی خدمت میں اپنی جانوں کا عظیم ترین نذرانہ پیش کیا اور ان کے اہلِ خانہ کے تئیں اپنے احترام کا اظہار کیا۔ وزارتِ داخلہ کی رہنمائی میں مسلح سرحدی دستہ  ( ایس ایس بی ) کھلی بین الاقوامی سرحدوں کی مؤثر حفاظت، داخلی سلامتی، آفات سے نمٹنے اور سرحدی علاقوں میں عوامی شراکت داری کو مضبوط بنانے کے لیے مسلسل کام کر رہا ہے۔

مسلح سرحدی دستہ  ( ایس ایس بی ) کو  ، بھارت-نیپال اور بھارت-بھوٹان کے درمیان تقریباً 2,450 کلومیٹر طویل کھلی بین الاقوامی سرحدوں کی حفاظت کی اہم ذمہ داری سونپی گئی ہے۔ سلامتی، چوکس نگرانی اور حساسیت کے درمیان توازن برقرار رکھتے ہوئے، ایس ایس بی منشیات، اسلحے کی اسمگلنگ، انسانی اسمگلنگ، غیر قانونی نقل مکانی، جعلی کرنسی، جنگلی حیات سے متعلق جرائم اور منظم جرائم کی دیگر شکلوں کے خلاف مؤثر کارروائی جاری رکھے ہوئے ہے۔ سال 26-2025 ء   کے دوران، ایس ایس بی نے انسانی اسمگلنگ کے 661 متاثرین کو بچایا اور غیر قانونی سرگرمیوں میں ملوث 6,324 افراد کو گرفتار کیا۔

سلامتی کے بدلتے ہوئے ماحول کے پیش نظر، ایس ایس بی ٹیکنالوجی سے لیس، انٹیلی جنس پر مبنی اور مشن پر مرکوز سرحدی  بندوبست کو مسلسل مضبوط بنا رہا ہے۔ آپریشنل کارکردگی کو بہتر بنانے کے لیے ڈرونز، سی سی ٹی وی نظام، تھرمل امیجرز، نائٹ ویژن آلات، جی پی ایس پر مبنی گشت، محفوظ ڈیجیٹل مواصلاتی نظام اور جی آئی ایس پر مبنی منصوبہ بندی جیسی جدید ٹیکنالوجیز کا استعمال کیا جا رہا ہے۔

سرحدی سلامتی کے علاوہ، ایس ایس بی داخلی سلامتی، شورش مخالف کارروائیوں، انتخابات کے دوران  ڈیوٹی، نظم  و نسق برقرار رکھنے اور آفات سے نمٹنے میں بھی اہم کردار ادا کرتا ہے۔ اس دستے کے پاس 18 مخصوص امدادی اور بچاؤ ٹیمیں ہیں، جو قدرتی آفات اور دیگر ہنگامی حالات کے دوران فوری کارروائی، تلاش و بچاؤ کی کارروائیوں اور انسانی امداد کے لیے ہمیشہ تیار رہتی ہیں۔

سرحدی علاقوں میں ’’ دل  و دماغ جیتنے ‘‘ کے جذبے کے تحت، ایس ایس بی طبی کیمپوں، ہنرمندی کی ترقی کے اقدامات، کھیلوں کی سرگرمیوں، خواتین کو با اختیار بنانے کے پروگراموں، بیداری مہمات اور روزگار پر مبنی اقدامات کے ذریعے مقامی برادریوں کے ساتھ اعتماد اور شراکت داری کو مضبوط بنا رہا ہے۔ شہد کی مکھیوں کی پرورش جیسے اقدامات بھی مقامی نو جوانوں اور دیہی برادریوں کو خود  کفیل بننے اور روز گار کے مواقع سے جوڑنے میں مدد کر رہے ہیں۔

. ...................................................

) ش ح – م م       -  ع ا )

U.No. 2231