২০৪৭ ফাওবদা ভিক্সিৎ ভারত অমা শেমগৎনবা মরুওইবা অমা ওইনা ২০২৬কী নীংতম্বা নুমিৎকী থৌরমদা প্রধান মন্ত্রী শ্রী নরেন্দ্র মোদীনা লৈবাক মীয়ামদা ৱা ঙাংবদা পনখিবা শক্তিগী ঈচেল তরেৎকী মনুংদা 'রক্ষা শক্তি'সু অমনি। ২০২৬কী ওগস্ত ১৫দা দিল্লীগী লাল কিলাগী লানবনদগী প্রধান মন্ত্রীনা ঙাকশেলগী লমদা আত্মনির্ভর ভারতকী তঙাইফদবা অদুদা অকনবা ৱাফম থমখি অমসুং ভারত অসি নেক্স- জেনরেসনগী ঙাকশেলগী তেক্নোলোজীশিংগী মালেমগী সপ্লাইয়র অমা ওইনা থোরক্নবা হায়খি।

“ঙাকশেলগী লমদা মশা মরোমদোম লেপচবা ঙম্বা নত্তনা অতোপ্পা পাম্বৈ অমত্তা লৈতে। মালেমগী লৈবাকশিংনা মশাগী কান্নবশিং খনবা হেনগৎলকপা মতমদা, ভারত অসি মালেমগী কৈথেল অমা ওইদুনা লৈবা য়ারোই। ঐখোয়না দ্রোনশিং অমসুং কাউন্তর দ্রোন সিস্তেমশিং শেমগৎকদবনি, অমসুং হাইপরসোনিক দিফেন্স তেক্নোলোজীশিংদা লুচিংবা ওইগদবনি,” হায়না প্রধান মন্ত্রীনা ফোংদোকখি।

আত্মানির্ভর ভারতকী মঙলানবু মপুং ফাহন্নবগীদমক সরকারগী ৱারেপ অদু নৌহৌননা ফোংদোক্লদুনা, শ্রী নরেন্দ্র মোদীনা লৈবাক অসিনা অতোপ্পা লৈবাকশিংদা মখা পোল্লগা হিংবা তৌরোই হায়না ফোংদোকখি। “মালেম অসিদা মমল হন্থবা অমসুং হেন্না থুনা ফংবা য়াবা পোৎলম কয়া লৈরম্বা য়াই। অদুবু মখোয়দা থাজবা থমবনা ঐখোয়গী ইশাগী তৌবা ঙম্বশিং শেমদে, ঐখোয়গী তৌবা ঙম্বশিংগী মপাঙ্গলসু চাংয়েং তৌদে।. মরম অদুনা, ঐখোয়না ঐখোয়গী ইশাগী কেপাসিতী মপাঙ্গল কনখৎহনগদবনি অমসুং ঐখোয়গী ইশাগী অপাম্বা ঙাকশেনগদবনি। মরম অসিনা ঐখোয়না 'আত্মনির্ভর ভারত'কী অচেৎপা ৱারেপ অমগা লোয়ননা মাংলোমদা চংশিল্লি। মেক ইন ইন্দিয়া, স্বদেশী, ভোকেল ফোর লোকেল অসিনচিংবা খোংথাংশিং অসিগা ভারত মচাশিংগী পুক্নিংবু শম্নহল্লি,” হায়না মহাক্না হায়খি।

প্রধান মন্ত্রীনা হায়খি সাইবর সেক্যুরিতী অসি লৈবাক অমসুং মালেমগী কান্ননবগীদমক লৈবাক অসিনা নহারোলশিংগী তৌবা ঙম্বশিং শীজিন্নবা ঙম্বা ঙাকশেলগী লম অমনি।

শ্রী নরেন্দ্র মোদীনা হৌজিক ওইরক্লিবা অহোংবা মতম অসিদা দিফেন্স ফোর্সশিংগী মপাঙ্গল হেনগৎহন্দুনা লৈবাক অসিগী ঙাকশেলগী খুৎলাইশিংদা মীৎয়েং চংবা মথৌ তাবগী মতাংদা পনখি। “ঙসিদি লানগী মওং অসি হোংলক্লি। কনফ্লিক্ত অসি ঙমখৈদা য়ুম্ফম ওইগনি হায়বগী থাজবা লৈতে। হৌজিক্কী মতমগী লানগী পান্দমদি রিফাইনরীশিং, বেঙ্কিং সেক্তরশিং, নৎত্রগা দেতা সেন্তরশিং অসিনি। মসি ইনফ্রাস্ত্রকচর অমসুং ফেক্টরীশিং মাং-তাকহনগদবা লানগী অনৌবা মওং অমনি। ঐখোয়না চহি খরগী মমাংদা 'মিসন সুদর্শন চক্র'গী মতাংদা লাউথোকখি, অমসুং মসিগী থবক অসি খোঙজেল য়াংনা পায়খৎলি,” হায়না মহাক্না ফোংদোকখি।

হৌখিবা চহি ১২দা দিফেন্স সেক্তরদা ওইরকখিবা অহোংবা অদু পল্লদুনা প্রধান মন্ত্রীনা হায়খি মদুদি দিফেন্স প্রদক্সন অসি চাউরাক্না শরুক মরি হেনগৎখ্রে। মহাক্না মখা তাখি মদুদি দিফেন্স এক্সপোর্ত অসি চাউরাক্না শরুক ৫০ হেনগৎখ্রে লোয়ননা ভারতকী খুৎলাইশিং লৈবাক ১০০ রোমদা য়ৌরে। মহাক্না হায়খি, “শীংনবশিং অসি ঙমখৈগী মনুংদা ওইরবসু নৎত্রগা ঙমখৈগী ৱাংমদা ওইরবসু, ভারতনা ফিভম খুদিংমক্কীদমক শেম-শারি… মালেমগী থাক্তা ভারতকী মীংচৎ তপ্না তপ্না হেনগৎলক্লি”।

শ্রী নরেন্দ্র মোদীনা অকনবা ৱাফম থমখি মদুদি সেক্যুর ভারত অমা শেমগৎপা অসি নাগরিক খুদিংমক্কী থৌদাংনি। হৌগৎলক্লিবা খুদোংথীবশিং অসি থেংননবা শেম-শাবা হেনগৎহন্নবা মহাক্না হায়খি। “ঐখোয়গী লৈবাক অসিদা হৌখিবা চহি চাগী লানগী মতুং ইন্না শেমগৎলকখিবা সিভিল দিফেন্স সিস্তেমশিং অসি মতমগা চুনদ্রে। লাক্কদৌরিবা নুমিৎ খরনি অসিদা, ঐখোয়না সিবিল দিফেন্সকী অচৌবা নেৎৱার্ক অমা শেম্লগনি। ঐখোয়না মখোয়বু মোদর্ন সিস্তেমশিংগী মতাংদা খঙহনগনি। ঐখোয়না হৌজিক মতমগী অৱাবা মায়োক্ননবা সিভিল দিফেন্সকী অচৌবা ভোলুন্তরী ফোর্স অমা শেম্লগনি,” হায়না মহাক্না ফোংদোকখি।

প্রধান মন্ত্রীনা দিফেন্স ফোর্সেস য়াওনা লৈবাক শেমগৎপদা নারী শক্তিগী থৌদাং হেনগৎলক্লিবা অদুসু পনখি। “এন.দি.এ.দগী গ্রেজুএৎ তৌবা ঐখোয়গী ইচানুপীশিংনা লৈবাক অসিগী লান্মীশিংবু চাউরবা থাজবা অমসুং ওথোরিতীগা লোয়ননা লুচিংবা ঙম্বগী মতিক অদু উৎলি,” হায়না মহাক্না ফোংদোকখি।

******