ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે ચેન્નાઈ નજીક ચેંગલપટ્ટુના કાટ્ટનકુલથુર ખાતે એસ.આર.એમ. ઇન્સ્ટિટ્યૂટ ઓફ સાયન્સ એન્ડ ટેકનોલોજી (SRMIST) ના 22મા પદવીદાન સમારંભને સંબોધિત કર્યો હતો અને પદવી મેળવનાર વિદ્યાર્થીઓને 'રાષ્ટ્ર પ્રથમ - Nation First' ના સિદ્ધાંતથી માર્ગદર્શિત થઈને પોતાના જ્ઞાન, કૌશલ્ય અને ઇનોવેશનનો ઉપયોગ રાષ્ટ્ર નિર્માણ માટે કરવા આહ્વાન કર્યું હતું.

પદવી મેળવનાર વિદ્યાર્થીઓને સંબોધતા ઉપરાષ્ટ્રપતિએ કહ્યું કે પદવીદાન સમારંભ એ માત્ર ડિગ્રીઓ એનાયત કરવા કરતાં ઘણું વધારે છે. તે વર્ષોની ખંત, શિસ્ત અને શિક્ષણની ઉજવણી કરે છે અને સાથે જ જવાબદારી અને સેવાની આજીવન યાત્રાની શરૂઆત દર્શાવે છે.

શ્રી સી. પી. રાધાકૃષ્ણને એક એવું શૈક્ષણિક ઇકોસિસ્ટમ બનાવવા બદલ SRMIST ની પ્રશંસા કરી જે આંતરશાખાકીય શિક્ષણ (interdisciplinary learning), સર્જનાત્મકતા, ઉદ્યોગસાહસિકતા અને વિવેચનાત્મક વિચારસરણીને પ્રોત્સાહન આપે છે. તેમણે આર્ટિફિશિયલ ઇન્ટેલિજન્સ, ક્વોન્ટમ ટેકનોલોજી, સેમિકન્ડક્ટર સંશોધન, રોબોટિક્સ, બાયોટેકનોલોજી અને સતત વિકાસ (sustainable development) પર સંસ્થાના વધતા ધ્યાન નોંધ્યું હતું અને કહ્યું હતું કે આ ક્ષેત્રો ભવિષ્યની અર્થવ્યવસ્થાઓ અને સમાજોને આકાર આપશે.

ઉપરાષ્ટ્રપતિએ સંશોધનને વ્યવહારિક ઉકેલોમાં રૂપાંતરિત કરવા પર SRMIST ના ભાર મૂકવાની પ્રશંસા કરી જે જીવન સુધારે છે, ઉદ્યોગોને મજબૂત બનાવે છે અને સતત વિકાસમાં યોગદાન આપે છે. તેમણે કહ્યું કે સંશોધન ત્યારે જ તેનો સર્વોચ્ચ હેતુ હાંસલ કરે છે જ્યારે તે સમાજની સેવા કરે છે.

ઉપરાષ્ટ્રપતિએ જણાવ્યું હતું કે સંશોધન ત્યારે જ ખરેખર પ્રશંસનીય બને છે જ્યારે તે યોગ્ય પરિણામો આપે છે, સમાજ પર અર્થપૂર્ણ અસર ઊભી કરે છે અને લોકો માટે વ્યવહારિક લાભોમાં પરિણમે છે.

કોવિડ-19 મહામારી સામે ભારત પ્રતિભાવને યાદ કરતા ઉપરાષ્ટ્રપતિએ કહ્યું કે પ્રધાનમંત્રી શ્રી નરેન્દ્ર મોદીના નેતૃત્વ હેઠળ ભારતે 100 થી વધુ દેશોને કોવિડ-19 રસીઓ પૂરી પાડી હતી. તેમણે કહ્યું કે ભારતે આ માનવતાવાદી સહાયનું વ્યાપારીકરણ કરવાનો પ્રયાસ કર્યો નથી. કેન્યાના સ્પીકર સાથેની તાજેતરની વાર્તાલાપને યાદ કરતા, જેમણે ભારતની રસી સહાય બદલ આભાર વ્યક્ત કર્યો હતો, તેમણે કહ્યું કે ઘણા પશ્ચિમી દેશોએ ગરીબ રાષ્ટ્રોને આવી સહાય પૂરી પાડી ન હતી. તેમણે ઉમેર્યું હતું કે ભારતના પ્રયાસોએ માનવતાનું રક્ષણ કરવામાં મદદ કરી અને પુનરોચ્ચાર કર્યો કે ભારત શાંતિ, વિકાસ અને માનવતાના કલ્યાણ માટે ઊભું છે.

ઉપરાષ્ટ્રપતિએ કહ્યું કે પ્રધાનમંત્રીએ તેમને કહ્યું હતું કે AIIMS દેશભરમાં ઉપલબ્ધ થવી જોઈએ, જેથી તબીબી સુવિધાઓ અને તબીબી શિક્ષણ દેશભરના લોકો સુધી પહોંચી શકે.

ઉપરાષ્ટ્રપતિએ 2014થી દેશમાં ઉચ્ચ શિક્ષણના વિસ્તાર પર પ્રકાશ પાડ્યો હતો. તેમણે કહ્યું કે આ સમયગાળા દરમિયાન 16 IIITs, 8 સેન્ટ્રલ યુનિવર્સિટીઓ, 8 IIMs, 7 IITs, 2 IISERs, 1 NIT અને 12 AIIMS ની સ્થાપના કરવામાં આવી છે. ભારતમાં આજે 1,425 થી વધુ યુનિવર્સિટીઓ, 54,000 કોલેજો અને 16,850 સ્ટેન્ડઅલોન સંસ્થાઓ છે, તેમ તેમણે જણાવ્યું હતું.

શ્રી સી. પી. રાધાકૃષ્ણને ઉચ્ચ શિક્ષણમાં મહિલાઓના નોંધણીમાં થયેલા નોંધપાત્ર વધારા પર પ્રકાશ પાડ્યો હતો, જે 2014-15 માં 1.57 કરોડથી વધીને 2023-24 માં 2.24 કરોડ થયો છે, એટલે કે 42.2 ટકાનો વધારો થયો છે. તેમણે કહ્યું કે પદવીદાન સમારંભોમાં ડિગ્રીઓ અને ચંદ્રકો મેળવનારી મહિલાઓની વધતી સંખ્યા એ એક આવકારદાયક બાબત છે.

શ્રી સી. પી. રાધાકૃષ્ણને જણાવ્યું હતું કે પદવીધારો વિકસિત ભારત @2047 તરફની ભારતની યાત્રાના એક નિર્ણાયક તબક્કામાં પ્રવેશ કરી રહ્યા છે. તેમણે કહ્યું કે વિકસિત, નવીન, સમાવેશી અને આત્મનિર્ભર ભારતનું વિઝન દરેક યુવાન ભારતીયને રાષ્ટ્ર નિર્માણમાં યોગદાન આપવા આહ્વાન કરે છે.

ઉપરાષ્ટ્રપતિએ કહ્યું કે ભારતની સૌથી મોટી શક્તિ તેના લોકો છે, ખાસ કરીને તેના યુવાનો. પદવી મેળવનાર વિદ્યાર્થીઓ સાથે પોતાનો સંદેશ શેર કરતા તેમણે કહ્યું: "માત્ર ભવિષ્ય માટે પોતાને તૈયાર ન કરો; ભવિષ્યને આકાર આપવા માટે પોતાને તૈયાર કરો."

તેમણે વિદ્યાર્થીઓને ડ્રગ્સ અને તમામ પ્રકારના નશાથી દૂર રહેવા વિનંતી કરી, અને તેમને "વિચલન પર શિસ્ત, પ્રલોભન પર હેતુ અને સરળ શોર્ટકટ્સ પર ઉત્કૃષ્ટતા" પસંદ કરવા આહ્વાન કર્યું.

ઉપરાષ્ટ્રપતિએ કહ્યું કે તમિલનાડુની તાજેતરની ઘટના જેમાં ડ્રગ્સના વેપાર વિશે માહિતી શેર કરવા બદલ એક વિદ્યાર્થીની હત્યા કરવામાં આવી હતી તે અત્યંત પીડાજનક હતી. તેમણે કહ્યું કે તેમને લાગ્યું કે જાણે તેમણે પોતાના પરિવારના જ કોઈ સભ્યને ગુમાવ્યા હોય.

પદવીધારોને 'રાષ્ટ્ર પ્રથમ - Nation First' ને તેમનો માર્ગદર્શક સિદ્ધાંત બનાવવા આહ્વાન કરતા ઉપરાષ્ટ્રપતિએ કહ્યું કે તેમનું જ્ઞાન, ઇનોવેશન અને સખત મહેનત ભારતના વિકાસ, સુરક્ષા અને સમૃદ્ધિમાં યોગદાન આપવી જોઈએ. તેમણે બંધારણીય મૂલ્યોને જાળવી રાખવા, વિવિધતાનો આદર કરવા, રાષ્ટ્રીય એકતાને મજબૂત કરવા અને સંકુચિત સ્વાર્થ કરતા બૃહદ રાષ્ટ્રીય હિતને ઉપરી રાખવા વિનંતી કરી હતી.

પોતાના સંબોધનના સમાપનમાં, ઉપરાષ્ટ્રપતિએ પદવીધારોને જ્ઞાન, કર્તવ્ય, કરુણા અને સેવાના કાલાતીત ભારતીય મૂલ્યોને પોતાની સાથે રાખવા વિનંતી કરી હતી.

આ પ્રસંગે, ઉપરાષ્ટ્રપતિએ મહીન્દ્રા એન્ડ મહીન્દ્રા લિમિટેડના ઓટોમોટિવ બિઝનેસના પ્રમુખ શ્રી આર. વેલુસામીને માનદ ડિગ્રી પ્રમાણપત્ર એનાયત કર્યું હતું, અને પદવીધારોને મેડલ, રેન્ક અને ડિગ્રીઓ એનાયત કરી હતી. તેમણે પદવીધારો અને વિદ્યાર્થીઓને 'ડ્રગ્સને ના કહો (Say No to Drugs)' ની પ્રતિજ્ઞા પણ લેવડાવી હતી.

તમિલનાડુ અને કેરળના રાજ્યપાલ શ્રી રાજેન્દ્ર વિશ્વનાથ આર્લેકર; એસઆરએમઆઈએસટીના ચાન્સેલર ડૉ. ટી. આર. પારીવેંધર; પ્રો-ચાન્સેલર (વહીવટ) ડૉ. રવિ પચામુથુ; પ્રો-ચાન્સેલર (શૈક્ષણિક) ડૉ. પી. સત્યનારાયણન; વાઇસ-ચાન્સેલર ડૉ. સી. મુથમિઝચેલ્વન; અને અન્ય મહાનુભાવો આ પ્રસંગે ઉપસ્થિત રહ્યા હતા.

SM/JY/GP/JT