وزیرِ اعظم جناب نریندر مودی 15 اگست 2026 کو دہلی کے لال قلعہ سے 80ویں یومِ آزادی کی تقریبات کی قیادت کریں گے۔ اس عظیم الشان تقریب میں قومی نغمے ’وندے ماترم‘ کی لازوال روایت کے 150 برس مکمل ہونے کی یاد منائی جائے گی، اور ترقی یافتہ بھارت 2047 کے سفر میں نوجوانوں کی قوت (یووا شکتی) کی توانائی، امنگوں اور فیصلہ کن کردار کو خراجِ تحسین پیش کیا جائے گا۔ یومِ آزادی کی تقریبات کے دوران لال قلعہ میں پہلی بار ’وندے ماترم‘ پیش کیا جائے گا۔

تقریب

لال قلعہ پہنچنے پر وزیرِ اعظم کا استقبال وزیرِ دفاع جناب راج ناتھ سنگھ، وزیرِ مملکت برائے دفاع جناب سنجے سیٹھ اور دفاعی سکریٹری جناب راجیش کمار سنگھ کریں گے۔ دفاعی سکریٹری، جنرل آفیسر کمانڈنگ (جی او سی)، دہلی ایریا لیفٹیننٹ جنرل راجیش سیٹھی کا وزیرِ اعظم سے تعارف کرائیں گے۔ اس کے بعد جی او سی، دہلی ایریا وزیرِ اعظم کو سلامی چبوترے تک لے جائیں گے، جہاں تینوں مسلح افواج اور دہلی پولیس کے مشترکہ دستے کی جانب سے جناب نریندر مودی کو عمومی سلامی پیش کی جائے گی۔ اس کے بعد وزیرِ اعظم گارڈ آف آنر کا معائنہ کریں گے۔

وزیرِ اعظم کے لیے گارڈ آف آنر کے دستے میں بری فوج، بحریہ، فضائیہ اور دہلی پولیس میں سے ہر ایک کا ایک افسر اور 24 اہلکار شامل ہوں گے۔ اس سال یومِ آزادی کی تقریبات کے لیے بھارتی بری فوج رابطہ کار فوج (Coordinating Service) کی ذمہ داری انجام دے رہی ہے۔

گارڈ آف آنر کی قیادت لیفٹیننٹ کرنل ارجن سنگھ کریں گے۔ وزیرِ اعظم کے گارڈ میں شامل بری فوج کے دستے کی قیادت میجر آدتیہ شرما، بحریہ کے دستے کی قیادت لیفٹیننٹ کمانڈر نیلم رانا، فضائیہ کے دستے کی قیادت اسکواڈرن لیڈر وپن کمار اور دہلی پولیس کے دستے کی قیادت ایڈیشنل ڈی سی پی جناب ونیت کمار کریں گے۔

گارڈ آف آنر کا معائنہ کرنے کے بعد وزیرِ اعظم لال قلعہ کی فصیل پر جائیں گے، جہاں وزیرِ دفاع جناب راج ناتھ سنگھ، وزیرِ مملکت برائے دفاع جناب سنجے سیٹھ، چیف آف ڈیفنس اسٹاف جنرل این ایس راجا سبرامنی، فضائیہ کے سربراہ ایئر چیف مارشل اے پی سنگھ، بحریہ کے سربراہ ایڈمرل کرشنا سوامی ناتھن اور بری فوج کے سربراہ جنرل دھیرج سیٹھ ان کا خیر مقدم کریں گے۔

اس کے بعد جی او سی، دہلی ایریا وزیرِ اعظم کو قومی پرچم لہرانے کے لیے فصیل پر قائم اسٹیج تک لے جائیں گے۔

کیپٹن سونیا سنگھ چوہان قومی پرچم لہرانے میں وزیرِ اعظم کی معاونت کریں گی۔ قومی پرچم لہرانے کی تقریب کو 1721 فیلڈ بیٹری (تقریباتی) کے بہادر توپچیوں کی جانب سے دی جانے والی 21 توپوں کی سلامی کے ساتھ ہم آہنگ کیا جائے گا۔

اس تقریباتی بیٹری میں مقامی طور پر تیار کردہ 105 ملی میٹر لائٹ فیلڈ گنز استعمال کی جائیں گی۔ بیٹری کی قیادت میجر پون سنگھ شیخاوت کریں گے، جبکہ گن پوزیشن آفیسر نائب صوبیدار (اسسٹنٹ انسٹرکٹر اِن گنری) انوتوش سرکار ہوں گے۔

قومی پرچم کے محافظ دستے میں بری فوج، بحریہ، فضائیہ اور دہلی پولیس میں سے ہر ایک کا ایک افسر اور 32 دیگر رینک کے اہلکار شامل ہوں گے۔ وزیرِ اعظم کی جانب سے قومی پرچم لہرانے کے موقع پر یہ دستہ راشٹریہ سلامی پیش کرے گا۔ اس تینوں مسلح افواج اور دہلی پولیس کے مشترکہ دستے کی قیادت میجر لوکیندر سنگھ شیخاوت کریں گے۔

قومی پرچم کے محافظ دستے میں شامل بری فوج کے دستے کی قیادت میجر وکاس یادو، بحریہ کے دستے کی قیادت لیفٹیننٹ کمانڈر ابھلاش، فضائیہ کے دستے کی قیادت اسکواڈرن لیڈر امیش جی کریں گے، جبکہ دہلی پولیس کے دستے کی قیادت ایڈیشنل ڈی سی پی جناب وکاس مینا کریں گے۔

قومی پرچم لہرانے کے بعد اسے راشٹریہ سلامی پیش کی جائے گی۔ اس موقع پر بری فوج کا بینڈ، جس میں ایک جونیئر کمیشنڈ افسر (جے سی او) اور 25 دیگر رینک کے اہلکار شامل ہوں گے، ’وندے ماترم‘ کی دھن بجائے گا، اور لال قلعہ میں موجود تمام افراد قومی نغمہ ’وندے ماترم‘ گائیں گے۔ اس کے بعد قومی ترانہ پیش کیا جائے گا۔ بینڈ کی قیادت صوبیدار ایشور سنگھ کریں گے۔

جوں ہی وزیرِ اعظم قومی پرچم لہرائیں گے، بھارتی فضائیہ کے دو ایم آئی-17 ہیلی کاپٹر تقریب کے مقام پر پھولوں کی پتیاں نچھاور کریں گے۔ ان میں سے ایک ہیلی کاپٹر قومی پرچم اور دوسرا ’وندے ماترم‘ کی علامتی تصویر والا پرچم لے کر پرواز کرے گا۔ ان ہیلی کاپٹروں کے کپتان ونگ کمانڈر رجت اور اسکواڈرن لیڈر انکت ورشنے ہوں گے۔

پھولوں کی پتیاں نچھاور کیے جانے کے بعد وزیرِ اعظم قوم سے خطاب کریں گے۔ ان کی تقریر کے اختتام پر نیشنل کیڈٹ کور (این سی سی) کے کیڈٹس اور ’مائی بھارت‘ کے رضاکار قومی نغمہ ’وندے ماترم‘ پیش کریں گے، جس کے بعد قومی ترانہ گایا جائے گا۔

یومِ آزادی کی تقریبات میں بری فوج، بحریہ اور فضائیہ سے تعلق رکھنے والے این سی سی کے 2,500 لڑکے اور لڑکی کیڈٹس اور ’مائی بھارت‘ کے رضاکار شریک ہوں گے۔ یہ کیڈٹس اور رضاکار فصیلِ لال قلعہ کے بالمقابل گیان پتھ پر بیٹھیں گے اور ’وندے ماترم‘ کی شکل تشکیل دیں گے۔

گیان پتھ پر ’ترقی یافتہ بھارت @2047‘ کے موضوع پر مبنی ویو کٹرز (منظر نما تنصیبات) بھی نصب کیے جائیں گے۔

خصوصی مہمان

اس سال لال قلعہ میں یومِ آزادی کی تقریبات کا مشاہدہ کرنے کے لیے معاشرے کے مختلف شعبوں سے تعلق رکھنے والے تقریباً 5,000 خصوصی مہمانوں کو مدعو کیا گیا ہے۔ ان میں درج ذیل افراد شامل ہیں:

• بین الاقوامی یومِ یوگا کے رضاکار
• پردھان منتری مدرا یوجنا کے تحت خواتین کاروباری افراد
• نمستے، پی ایم -اے جی اے وائی اور ایس ای ای ڈی منصوبوں کے مستفیدین
• مائی بھارت کے بہترین کارکردگی کا مظاہرہ کرنے والے رضاکار
• پردھان منتری آواس یوجنا (شہری) کے بہترین کارکردگی والے مستفیدین
• پردھان منتری سواندھی یوجنا کے تحت اسٹریٹ وینڈرز (سڑک کنارے کاروبار کرنے والے)
• سوچھ بھارت مشن کے تحت شہری صفائی کارکن
• دہلی میٹرو کے بہترین کارکردگی کا مظاہرہ کرنے والے کارکن
• کرتویہ پتھ اور سنٹرل وسٹا کے بہترین کارکردگی والے کارکن
• قومی اختراعی پروگراموں کے تحت نوجوان موجد
• مختلف شعبوں کے بہترین موجد اور سائنس دان
• دہلی میں بھارت ٹیکسی سے وابستہ سارتھی، کیب ڈرائیور اور ٹیکسی ڈرائیور
• پردھان منتری انٹرن شپ اسکیم کے تحت بہترین انٹرنز
• مختلف سرکاری منصوبوں کے تحت معاونت یافتہ بہترین کارکردگی والے اسٹارٹ اپس
• پردھان منتری کوشل وکاس یوجنا کے تحت تربیت یافتہ بہترین نوجوان
• اسٹارٹ اپ انڈیا سیڈ فنڈ کے تحت معاونت یافتہ بہترین کارکردگی والے اسٹارٹ اپس
• دہلی کے سرکاری اسپتالوں کے نرسنگ آرڈرلیز (وارڈ معاونین) اور دیگر عملہ
• پی ایم سوریہ گھر مفت بجلی یوجنا کے مستفیدین
• پردھان منتری وشوکرما یوجنا کے تحت دستکار
• پردھان منتری شرم یوگی ماندھن یوجنا کے بہترین کارکردگی والے مستفیدین
• پردھان منتری متسیہ کسان سمردھی سہ یوجنا کے تحت بہترین کارکردگی والے کسان
• دہلی حکومت کے مختلف کوئز، مقابلوں اور دیگر مسابقتی سرگرمیوں میں نمایاں کارکردگی کا مظاہرہ کرنے والے طلبہ۔

مختلف ریاستوں اور مرکز کے زیر انتظام علاقوں سے تعلق رکھنے والے 1,500 سے زائد افراد کو بھی روایتی ملبوسات میں ملبوس ہو کر اس عظیم الشان تقریب کا مشاہدہ کرنے کے لیے مدعو کیا گیا ہے۔

عوامی سہولیات

• کلوک روم کی سہولت: یومِ جمہوریہ کی تقریبات کے دوران کلوک روم کی سہولت کو زائرین نے بے حد سراہا تھا۔ عوام کی سہولت کے پیشِ نظر یومِ آزادی کی آئندہ تقریبات کے لیے چھ مقامات پر 25 کلوک روم قائم کیے گئے ہیں۔
• ہیلپ ڈیسک پر رضاکار: 200 رضاکار، جن میں 100 این سی سی اور 100 ’مائی بھارت‘ کے رضاکار شامل ہیں، پولیس اہلکاروں کے ساتھ مل کر زائرین کو ان کے مخصوص حصوں تک پہنچنے میں معاونت کریں گے۔ یہ رضاکار لال قلعہ کی جانب جانے والے راستے میں آسانی سے پہچانے جا سکیں گے۔
• وہیل چیئر کی سہولت: جن زائرین کو وہیل چیئر کی ضرورت ہوگی، ان کی مدد کے لیے این سی سی کے کیڈٹس میٹرو اسٹیشنوں اور پارکنگ مقامات پر موجود رہیں گے۔
• میٹرو خدمات: تقریب کے مقام تک لوگوں کی رسائی کو یقینی بنانے کے لیے 15 اگست کو صبح 4 بجے سے میٹرو خدمات شروع ہو جائیں گی۔ تمام مدعو مہمانوں کے لیے میٹرو سفر مفت ہوگا، اور ای دعوت ناموں کے ساتھ میٹرو کیو آر کوڈ بھی فراہم کیے جا رہے ہیں۔
• پریڈ گراؤنڈ میں پارکنگ کی سہولت: درست پارکنگ پاس یا مجاز لیبل رکھنے والے زائرین کے لیے پریڈ گراؤنڈ میں پارکنگ کی سہولت دستیاب ہوگی۔
• پیدل چلنے والوں کے لیے ریمپ کی سہولت: اوپری سبھاش مارگ سے زیریں سبھاش مارگ تک پیدل آمد و رفت کو آسان اور رواں بنانے کے لیے مزید مضبوط ریمپ اور سیڑھیاں نصب کی گئی ہیں۔
• گوگل اور میپلز نقشوں کا استعمال: مرکزی تقریب کے روز شہریوں کی سہولت کے لیے گوگل اور میپلز نقشوں پر ٹریفک پابندیوں کی معلومات دستیاب ہوں گی۔
• دعوت نامہ: اس سال کے دعوت نامے میں سیوا تیرتھ اور دھرم چکر کی عکاسی کی گئی ہے۔
• بارش سے بچاؤ کے پونچو: مرکزی تقریب کے روز موسم کی غیر یقینی صورتِ حال کے پیشِ نظر فصیلِ لال قلعہ پر موجود معزز شخصیات کے علاوہ مادھو داس پارک اور 15 اگست پارک میں موجود تمام مدعو مہمانوں کو بھی بارش سے بچاؤ کے پونچو فراہم کیے جائیں گے۔

نشست گاہوں کے نام

وی آئی پی ثقافت کے خاتمے اور آبی تحفظ کی اہمیت کو اجاگر کرنے کے مقصد سے یومِ جمہوریہ 2026 کی تقریبات میں نشست گاہوں کے نام دریاؤں کے نام پر رکھے گئے تھے۔ یومِ آزادی کی تقریبات کے لیے نشست گاہوں کے نام بھارت کی اہم جھیلوں کے نام پر رکھے گئے ہیں۔ ان میں بدکھل، بھیم تال، چندر تال، چلیکا، دلپت ساگر، ڈمنا، دودھ ساگر، ہاف لونگ، ہری کے، حسین ساگر، کنور، کانکریا، کولیرو، لوکتک، لونار، پینگونگ تسو، پلیکاٹ، پشکر، رابندر سروور، رام گڑھ تال، رودر ساگر، سکھیا ساگر، شانتی ساگر، ویمبناڈ اور ولر شامل ہیں۔

صفائی مہم

اس سال لال قلعہ میں تقریب کے اختتام کے بعد این سی سی کے کیڈٹس اور ’مائی بھارت‘ کے رضاکاروں کی شرکت سے ایک صفائی مہم منعقد کی جا رہی ہے۔ اس مہم کا مقصد تقریب کے فوراً بعد تماشائیوں کے منتشر ہونے کے بعد منظم انداز میں پلوگنگ (چلتے ہوئے کچرا جمع کرنے کی مہم) کو یقینی بنانا اور کچرے کو فوری طور پر ہٹانا ہے۔

نکاسیٔ آب کا انتظام

یومِ آزادی کی تقریب کے دوران ممکنہ بارش کے پیشِ نظر پانی کے جمع ہونے اور بہاؤ میں رکاوٹ کو روکنے کے لیے متعدد اقدامات کیے گئے ہیں۔ لال قلعہ اور اس کے اطراف کے علاقوں میں نکاسیٔ آب اور سیوریج کے نظام کی مکمل صفائی کی جا رہی ہے۔

مقابلے

یومِ آزادی سے قبل وزارتِ دفاع نے مائی گوو کے اشتراک سے مختلف کوئز اور مقابلوں کا انعقاد کیا۔ ان مقابلوں کی تفصیل درج ذیل ہے:

• ’ترقی یافتہ بھارت 2047 کی تعمیر میں مصنوعی ذہانت (اے آئی) کے کردار‘ کے موضوع پر مضمون نویسی کا مقابلہ۔
• ’1947 کا بھارت بمقابلہ 2047 کا بھارت‘ کے موضوع پر مصوری کا مقابلہ۔
• درج ذیل موضوعات پر آن لائن کوئز مقابلے:
  • آئینِ ہند: بنیادی حقوق، بنیادی فرائض، اہم دفعات اور آئین ساز شخصیات۔
  • بھارت کی تحریکِ آزادی میں خواتین کا کردار: رانی لکشمی بائی سے سروجنی نائیڈو اور اس کے بعد تک۔
  • جدید بھارت کے اہم سنگِ میل: تکنیکی ترقی اور خلائی ٹیکنالوجی میں کامیابیاں۔
  • جوہری ٹیکنالوجی کے میدان میں بھارت کی کامیابی کی داستان۔

ان مقابلوں کے تقریباً 600 فاتحین بھی یومِ آزادی کی تقریبات میں شریک ہوں گے۔

اس کے علاوہ دیگر وزارتوں، دہلی کی قومی دارالحکومت علاقائی حکومت (جی این سی ٹی ڈی) اور دہلی پولیس نے بھی درج ذیل آن لائن کوئز اور سرگرمیوں کا انعقاد کیا:

محکمۂ تعلیم، حکومتِ قومی دارالحکومت علاقہ دہلی

• مائی بھارت کولاج مقابلہ
• ہیروز کو سلام — دیواری نمائش کی سرگرمی
• ثقافتی امتزاج پر مبنی پروگرام اور مقابلے
• کوئز ریلے
• ری سائیکل شدہ ترنگا فن پارہ سرگرمی
• ترنگا سائیکلتھون
• ترنگا رن
• ترنگا واکاتھون
• ہر گھر ترنگا مہم

دہلی پولیس

• حقیقی حب الوطنی کے موضوع پر مباحثہ
• حب الوطنی پر مبنی گیت گانے کا مقابلہ
• مجاہدینِ آزادی پر مضمون نویسی اور کوئز مقابلہ
• قومی یکجہتی کے موضوع پر نعرہ نویسی اور تخلیقی تحریر کا مقابلہ
• آتم نربھر بھارت کے موضوع پر پوسٹر سازی اور مصوری کا مقابلہ
• قومی اتحاد پر اسٹریٹ پلے
• منشیات کے استعمال کے خلاف بیداری پروگرام
• خواتین کی حفاظت اور خود دفاعی تربیت کے پروگرام
• سائبر بیداری اور سائبر سلامتی پروگرام
• ’تنوع میں اتحاد‘ پر مبنی ثقافتی پروگرام

بینڈ کی پیشکشیں

شہریوں میں حب الوطنی کے جذبے کو فروغ دینے اور یومِ آزادی کی مناسبت سے ملک بھر کے 343 نمایاں مقامات پر مختلف بینڈز کی موسیقی پیش کی جا رہی ہے۔

ان پیشکشوں میں بری فوج، بحریہ، فضائیہ، بھارتی کوسٹ گارڈ، این سی سی، مرکزی ریزرو پولیس فورس (سی آر پی ایف)، ہندو۔تبتی سرحدی پولیس (آئی ٹی بی پی)، مرکزی صنعتی سلامتی فورس (سی آئی ایس ایف)، سشسترا سیما بل (ایس ایس بی)، بارڈر سیکورٹی فورس (بی ایس ایف)، انٹیگریٹڈ ڈیفنس اسٹاف (آئی ڈی ایس)، ریلوے پروٹیکشن فورس (آر پی ایف) اور آسام رائفلز کے بینڈ شامل ہیں۔

ان تمام بینڈ پروگراموں میں عوام کے لیے داخلہ مفت اور عام ہوگا۔

جزائر میں پرچم کشائی

انڈمان و نکوبار جزائر اور لکشدیپ میں قومی پرچم کی تقریبِ کشائی بھارتی بحریہ اور مقامی انتظامیہ کے اشتراک سے انجام دی جائے گی۔

******

ش ح۔ ش ا ر۔ ول

Uno-2043

(रिलीज़ आईडी: 2299206) आगंतुक पटल : 7