રેલ કોચ ફેક્ટરી, કપૂરથલા, 12 ઓગસ્ટ 2026ના રોજ બાંગ્લાદેશ રેલવે માટે 19 એલએચબી (LHB) બ્રોડ ગેજ પેસેન્જર કોચ ધરાવતા પ્રથમ રેકને બહાર પાડવાની (રોલ આઉટ) સાથે વધુ એક નોંધપાત્ર માઇલસ્ટોન હાસલ કરવા માટે તૈયાર છે.

પ્રથમ રેકમાં 03 એસી સ્લીપર કાર, 03 એસી ચેર કાર, 11 નોન-એસી ચેર કાર અને 02 પાવર કારનો સમાવેશ થાય છે. આ કોચમાં કેટલીક વિશિષ્ટ ડિઝાઇન સુવિધાઓ અને ફેરફારો ઉમેરવામાં આવ્યા છે, જેમાંથી ઘણા એલએચબી-ટાઇપના કોચમાં પ્રથમ વખત વિકસાવવામાં આવ્યા છે.

બાંગ્લાદેશ રેલવેની ઓપરેશનલ અને મુસાફરોની જરૂરિયાતોને પૂરી કરવા માટે આ કોચને ખાસ કસ્ટમાઇઝ કરવામાં આવ્યા છે. બેઠક વ્યવસ્થામાં સ્ટેનલેસ સ્ટીલ આર્મરેસ્ટ્સ અને સ્ટેનલેસ સ્ટીલ ફૂટરેસ્ટ્સ સાથે ખાસ ડિઝાઇન કરેલી રેકલાઇનિંગ ખુરશીઓ સામેલ છે, જે મુસાફરોની સુવિધામાં વધારો કરવા માટે બહુવિધ રેકલાઇનિંગ પોઝિશન્સ પૂરી પાડે છે. કોચ મુસાફરો માટેની સંખ્યાબંધ સુવિધાઓથી સજ્જ છે, જેમાં એસી કોચમાં પંખા, એકીકૃત સીસીટીવી (CCTV) સર્વેલન્સ સિસ્ટમ, પેસેન્જર અલાર્મ સિસ્ટમ, આંશિક રીતે ખોલી શકાય તેવી બારીઓ, બેબી કેર રૂમ અને પ્રાર્થના ખંડ (Prayer Room) નો સમાવેશ થાય છે. ચોક્કસ ઓપરેટિંગ પરિસ્થિતિઓને ધ્યાનમાં રાખીને, પીક ટ્રાફિક સમયગાળા દરમિયાન છત પર મુસાફરી કરતા મુસાફરોથી થતા વધારાના લોડિંગને સહન કરવા માટે છતની રચનાને મજબૂત કરવામાં આવી છે.

એક મુખ્ય તકનીકી સુવિધા એ યુરોપિયન સ્ટાન્ડર્ડ EN 15227 ને અનુરૂપ ક્રેશવર્ધી (crashworthy) ડિઝાઇન જોગવાઈઓનો સમાવેશ છે. આના માટે ટક્કર દરમિયાન સુરક્ષાના પ્રદર્શન (collision performance) અને મુસાફરોની સુરક્ષામાં વધારો કરવા માટે કાર બોડી શેલના વ્યાપક પુનઃડિઝાઇનિંગની જરૂર હતી. ભારતીય રેલવેના કોચમાં ઉપયોગમાં લેવાતી પરંપરાગત 750 V સિસ્ટમની સામે, આ કોચની ઇલેક્ટ્રિકલ સિસ્ટમ પણ 415 V ઓપરેશન માટે ખાસ ડિઝાઇન કરવામાં આવી છે.

આરસીએફ (RCF) અને બાંગ્લાદેશ રેલવે વચ્ચેનું જોડાણ 2015-16 દરમિયાન 120 LHB બ્રોડ ગેજ પેસેન્જર કોચના સફળ પુરવઠા સાથે શરૂ થયું હતું. આ સફળ ભાગીદારીના આધારે, બાંગ્લાદેશ રેલવેએ રાઇટ્સ (RITES) મારફતે 2024 માં આરસીએફને સાત પ્રકારોમાં 200 બ્રોડ ગેજ પેસેન્જર કોચના નિર્માણ અને પુરવઠા માટે ફરી એકવાર પ્રતિષ્ઠિત ઓર્ડર આપ્યો હતો.

SM/IJ/JD