কেন্দ্রগী লৌউ-শিংউ অমসুং লৌমীশিংগী য়াইফ-থৌরাং অমসুং রুরেল দিবেলপমেন্ত মন্ত্রী, শ্রী শিবরাজ সিংহ চৌহাননা লৈবাক শিনবা থুংনা লৈরিবা এগ্রিকলচরগী মহৈরোইশিংগীদমক্তা স্কোলরশিপ অমসুং ফেলোশিপ ফন্দশিং আই.সি.এ.আর.-আই.এ.আর.আই., পুসাদা লৈবা নেস্নেল স্কোলরশিপ পোর্তেল (এন.এস.পি.)গী খুত্থাংদা রিলিজ তৌখ্রে। মসিগী খোঙথাং অসিগী মখাদা মহৈরোয় ৬০০০ হেনবদা দাইরেক্ত বেনিফিৎ ত্রান্সফর (দি.বি.তি.) গী খুত্থাংদা লুপা করোর ২১.৩৫ রোম হকথেংননা পীখি। অনৌবা খোঙথাং অসি হৌদোকপগা লোয়ননা, এগ্রিকলচরগী মহৈরোয়শিংনা হৌজিক্তি মখোয়গী স্কোলরশিপকী শেনফমশিং দরকার লৈতবা খুদোংচাদবা নৎত্রগা অয়েৎপা লৈতনা থা খুদিংগী দি.বি.তি.গী খুত্থাংদা ফংলগনি। ইনিসিএতিব অসিনা স্কোলরশিপ পীবগী থৌওংবু হেন্না মওং চুমহনবদা অমসুং মহৈরোয়শিংনা মতম চানা অমসুং খুদোংচাদবা লৈতনা শেলগী মতেং ফংহনবদা পান্দম থম্লি।

থৌরম অদুদা কেন্দ্রগী লৌউ-শিংউ মন্ত্রী শ্রী শিবরাজ সিংহ চৌহাননা হায়খি মদুদি স্কোলরশিপ অসি শেলগী মতেং খক্তা নত্তে, মসি এগ্রিকলচর এজুকেসনবু হেন্না মপাঙ্গল কনখৎহনবা, হেন্না প্রেক্তিকেল ওইহনবা অমসুং খুদোংচাবগা হেন্না মরী লৈনবা পাম্বৈ অমসুনি। মহাক্না হায়খি মদুদি হৌজিক লৈরিবা দি.বি.তি. সিস্তেমনা মহৈরোইশিংদা মতম চানা তেংবাং পীরগনি অমসুং ত্রেদিস্নেল দিলেগী প্রোব্লেম অসি মুত্থৎলগনি। মহৈরোইশিংদা ৱা ঙাংলদুনা শ্রী শিবরাজ সিংহ চৌহাননা অকনবা ৱাফম থমখি মদুদি এগ্রিকলচর এজুকেসনদা প্রেক্তিকেল ত্রেনিং অসি য়াম্না মরু ওই, মরমদি ক্লাস রুমদা য়ুম্ফম ওইবা লর্নিং খক্তনা অফবা লৌমী, সাইন্তিস্ত নত্ত্রগা লৌউ-শিংউগী ওন্ত্রপ্রিন্যুওরশিং পুথোকপা ঙম্লোই। মহৈরোয়শিংনা ক্লাসরুমগী ৱাংমদা প্রেক্তিকেল এক্সপরিয়েন্স ফংনবগী অমসুং লৌউ-শিংউগী অশেংবা ফিভম খঙনবগী খুদোংচাবা মথৌ তাই হায়না মহাক্না অকনবা ৱাফম থমখি। মহাক্না মহৈরোয়শিংদা এজুকেসন অমসুং ত্রেনিং সিস্তেম অসি লেপ্পা লৈতনা মপাঙ্গল কনখৎহন্নবগীদমক্তা মখোয়গী ৱাখল্লোন অমসুং খোঙথাংশিং শেয়র তৌনবসু আপিল তৌখি। মহাক্না হায়খি মদুদি এগ্রিকলচর এজুকেসনগী পান্দমদি লৌশিং পীনবতা নত্তনা নহাশিংবু লৌউ-শিংউগী সেক্তরদা মতিক চাবা মতেং পাংনবা মথৌ তাবা প্রাক্তিকেল স্কিল, থাজবা অমসুং লৌশিং খঙবা ঙমহনগনি।

শ্রী চৌহাননা হায়খি মদুদি প্রধান মন্ত্রী শ্রী নরেন্দ্র মোদীগী লুচিংবা অমসুং লমজিং মখাদা সরকারনা লৌউ-শিংউগী সেক্তরদা ফুদ সেক্যুরিতী, ন্যুত্রিসন অমসুং লৌমীশিংগী ইনকম সেক্যুরিতীদা অখন্নবা মীৎয়েং থম্লি। আই.সি.এ.আর. (ইন্দিয়ন কাউন্সিল ওফ এগ্রিকলচরেল রিসর্চ) গী সাইন্তিস্তশিংগী থৌদাংবু থাগৎপা ফোংদোক্লদুনা মহাক্না হায়খি মদুদি মখোয়গী রিসর্চকা লোয়ননা লৌমীশিংগী কন্না হোৎনবনা লৈবাক অসিগী ফুদ রিজর্ব মপাঙ্গল কনখৎহল্লে অমসুং ভারতকী লৌউ-শিংউদা চাউনা মতেং পাংলি। মহাক্না নহাশিংবু মখোয়গী কেরিয়র শেমগৎপগা লোয়ননা হেন্না চাউবা পান্দমশিং থম্নবা অমসুং লৈবাক অসিগীদমক করিগুম্বা মগুন লৈবা থবক অমা তৌনবা পুক্নিং থৌগৎখি। কেন্দ্রগী মন্ত্রী শ্রী চৌহাননা হায়খি মদুদি লৌউ-শিংউগী মহৈরোয়শিংনা মখোয় মশাবু থবক থিবদা য়ুম্ফম ওইরোইদবনি, অদুবু মখোয়না ইন্নোবেসন, স্তার্ত-অপ অমসুং রিসর্চতা মকোক থোংবা থৌদাং লৌগদবনি। মহাক্না নহা ওইরিবা মীরোলশিংবু লৌউ-শিংউবু খুদোংচাবা কয়া পীরিবা লম অমা ওইনা য়েংনবা অমসুং থোরক্লিবা শীংনবশিং অসিগী অনৌবা পাম্বৈ পুথোকপদা মতেং পাংনবা পুক্নিং থৌগৎখি। সেক্তর অসিদা সাইন্তিফিক এদভান্স, ওন্ত্রপ্রিন্যুওরশিপ অমসুং ইন্নোবেসনগী লমদা নহা ওইরিবা এগ্রিকলচরেল প্রোফেস্নেলশিং অমসুং মহৈরোয়শিংগী মরুওইবা অদু মহাক্না ফোংদোকখি।

শ্রী শিবরাজ সিংহ চৌহাননা হায়খি মদুদি এন.এস.পি.-দি.বি.তি. সিস্তেমনা স্কোলরশপ দিস্ত্রিব্যুসন অসি হেন্না ত্রান্সপরেন্ত, থুবা অমসুং অপনবা লৈতবা ওইহল্লগনি। সিস্তেম অসিনা মহৈরোয়শিংনা মতম চানা শেলগী তেংবাং ফংহনগনি, মসিনা মহৈরোয়শিংবু স্কোলরশিপ ফন্দশিং থাদোকপগা মরী লৈননা চীংনবা লৈতনা মখোয়গী মহৈ তম্বদা হেন্না পুক্নিং চংবা ঙমহনগনি। কেন্দ্রগী মন্ত্রীনা মহৈরোয়শিংবু একাদমিক লৌশিং খক্তদা নত্তনা প্রেক্তিকেল কেপাসিতীশিং অমসুং লৌউ-শিংউগী হোংলক্লিবা মথৌ তাবশিং খঙবা ঙম্নবা এজুকেসন সিস্তেম অমা শেমগৎপগী তঙাইফদবা অদুদা অকনবা ৱাফম থমখি।

শ্রী চৌহাননা লৈবাক শিনবা থুংনা লৈরিবা আই.সি.এ.আর. ইন্সতিত্যুসনশিংদা লৈরিবা লৌউ-শিংউগী মহৈরোয়শিংদা 'হরিয়ালি অমাভস্যা'গী থৌরমদা পাম্বী থাবগী থবক পায়খৎনবা আপিল তৌখি। মহাক্না হায়খি মদুদি গ্রীন ইনিসিএতিবশিং অসি লৌউ-শিংউ অমসুং অকোয়বগী ফিভম অনিমক্কী মায়কৈদা পুন্না লৌরিবা থৌদাংশিংগী শরুক অমনি অমসুং মহাক্না মহৈরোয়শিংদা প্লান্তেসনগী থবকশিংদা থৌনা লৈনা শরুক য়াবা অমসুং অকোয়বগী ফিভমগী মায়কৈদা এৱেরনেস অমসুং থৌদাং মপাঙ্গল কনখৎহনবদা মতেং পাংনবা পুক্নিং থৌগৎখি।

কেন্দ্রগী লৌউ-শিংউ অমসুং লৌমীশিংগী য়াইফ-থৌরাংগী রাজ্য মন্ত্রী শ্রী ভগিরথ চৌধরী, আই.সি.এ.আর.গী দাইরেক্তর জেনরেল দোক্তর. এম.এল. জেৎ, আই.সি.এ.আর.গী সেক্রেতরী শ্রী জ্ঞানেন্দ্র ত্রিপাথী, দিপুতি দাইরেক্তর জেনরেল দোক্তর. য়শপাল সিংহ মালিক অমসুং আই.এ.আর.আই.গী দাইরেক্তর দা. সি. শ্রীনিভাস রাওসু থৌরম অদুদা শরুক য়াখি। আই.সি.এ.আর. অমসুং আই.এ.আর.আই.গী মকোক থোংবা ওফিসিএলশিং, সাইন্তিস্তশিং অমসুং মহৈরোয়শিংনা থৌরম অদুদা মশিং য়াম্লবা মীওই কয়া শরুক য়াখি, অদুগা মহৈরোয় লিশিং কয়াসু প্রোগ্রাম অসিদা ওনলাইন ওইনা শরুক য়াখি।

***