প্ৰধানমন্ত্ৰী শ্ৰী নৰেন্দ্ৰ মোদীৰ 'সহকাৰ চে সমৃদ্ধি' দৃষ্টিভংগীক আগুৱাই লৈ গৈ, কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে ২০২৬ চনৰ ৮ আগষ্টত মুম্বাইৰ ফ'ৰ্টস্থিত শাৰদা সদনত নেচনেল আৰ্বান কো-অপাৰেটিভ ফাইনেঞ্চ এণ্ড ডেভেলপমেণ্ট কৰ্পৰেচন লিমিটেড — এনইউচিএফডিচিৰ (NUCFDC) নতুন কাৰ্যালয় উদ্বোধন কৰিব। এই উপলক্ষে শ্ৰী অমিত শ্বাহে মহাৰাষ্ট্ৰৰ ৰাজ্যিক নগৰীয়া সমবায় বেংক ফেডাৰেচন আৰু জিলা সংস্থাসমূহৰ প্ৰতিনিধিসকলৰ সৈতেও মত বিনিময় কৰিব।

ইয়াৰ পিছত, কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে বিএছই (BSE) ইণ্টাৰনেচনেল কনভেনচন চেণ্টাৰত অনুষ্ঠিত হ'বলগীয়া 'সহকাৰ নৱ-ক্ৰান্তি' কাৰ্যসূচীত মুখ্য অতিথি হিচাপে অংশগ্ৰহণ কৰিব। এই কাৰ্যসূচীত মহাৰাষ্ট্ৰৰ মুখ্যমন্ত্ৰী শ্ৰী দেৱেন্দ্ৰ ফাড়নৱীশো উপস্থিত থাকিব।

এই কাৰ্যসূচীৰ সময়ত, এনইউচিএফডিচি (NUCFDC) আৰু ৰাষ্ট্ৰীয় ফৰেনছিক বিজ্ঞান বিশ্ববিদ্যালয়ৰ (NFSU) মাজত এখন বুজাবুজিৰ চুক্তি বিনিময় কৰা হ'ব। এই সহযোগিতাই নগৰীয়া সমবায় বেংকিং খণ্ডত চাইবাৰ সুৰক্ষা, প্ৰযুক্তিগত সক্ষমতা আৰু প্ৰাতিষ্ঠানিক ক্ষমতা শক্তিশালী কৰাত এক গুৰুত্বপূৰ্ণ ভূমিকা পালন কৰিব।

নগৰীয়া সমবায় বেংকসমূহৰ চাইবাৰ সুৰক্ষা শক্তিশালী কৰাৰ উদ্দেশ্যে কেন্দ্ৰীয় গৃহ আৰু সমবায় মন্ত্ৰীয়ে এটা ছিকিউৰিটি অপাৰেচনছ চেণ্টাৰ বা এছঅ'চি মুকলি কৰিব। দেশজোৰা সেৱা বাণ্ডলৰ অধীনত কোৰ বেংকিং সেৱা আৰু আনুষংগিক সেৱাসমূহো মুকলি কৰা হ'ব। এই পদক্ষেপসমূহৰ উদ্দেশ্য হৈছে নগৰীয়া সমবায় বেংকসমূহক এক আধুনিক, সুৰক্ষিত আৰু অংশীদাৰী ডিজিটেল বেংকিং আন্তঃগাঁথনি প্ৰদান কৰা। এই কাৰ্যসূচীত 'সহকাৰ চিবিএছ'ৰ সৈতে সফলতাৰে সংযুক্ত হোৱা প্ৰথম ছখন নগৰীয়া সমবায় বেংকৰ প্ৰতিনিধিসকলকো সম্বৰ্ধনা জনোৱা হ'ব।

এই উপলক্ষে, কেন্দ্ৰীয় গৃহ আৰু সমবায় মন্ত্ৰীয়ে ভাৰতীয় ৰিজাৰ্ভ বেংকৰ প্ৰাক্তন উপ-মহাপ্ৰবন্ধক শ্ৰী জি. পি. মিস্ত্ৰীৰ দ্বাৰা ৰচিত ‘অপাৰেচনেল ৰিস্ক মেনেজমেণ্ট – এ প্ৰেক্টিকেল গাইড টু আৰ্বান কো-অপাৰেটিভ বেংকছ’ (Operational Risk Management – A Practical Guide to Urban Co-operative Banks) শীৰ্ষক গ্ৰন্থখনো উন্মোচন কৰিব। গ্ৰন্থখনে নগৰীয়া সমবায় বেংকসমূহক পৰিচালনাগত বিপদাশংকাৰ চিনাক্তকৰণ, মূল্যায়ন আৰু কাৰ্যকৰী ব্যৱস্থাপনা সন্দৰ্ভত ব্যৱহাৰিক মাৰ্গদৰ্শন প্ৰদান কৰে।

নগৰীয়া সমবায় বেংকসমূহৰ বাবে এক ছত্ৰ সংগঠন হিচাপে ২০২৪ চনৰ ২ মাৰ্চত এনইউচিএফডিচি মুকলি কৰা হৈছিল। ইয়াৰ উদ্দেশ্য হৈছে এই বেংকসমূহক অংশীদাৰী প্ৰযুক্তি প্লেটফৰ্ম, কোৰ বেংকিং সেৱা, চাইবাৰ সুৰক্ষাৰ সমাধান, সক্ষমতা বিকাশ আৰু পৰিচালনাগত সমৰ্থন প্ৰদান কৰা। অংশীদাৰী সেৱাসমূহৰ জৰিয়তে, বিশেষকৈ ক্ষুদ্ৰ আৰু মজলীয়া নগৰীয়া সমবায় বেংকসমূহে আধুনিক বেংকিং প্ৰযুক্তি গ্ৰহণৰ ব্যয় হ্ৰাস কৰিবলৈ, গ্ৰাহকসকলক উন্নত সেৱা আগবঢ়াবলৈ আৰু ব্যক্তিগত তথা বাণিজ্যিক বেংকসমূহৰ সৈতে ফলপ্ৰসূভাৱে প্ৰতিযোগিতাত অৱতীৰ্ণ হ'বলৈ সক্ষম হ'ব।

****

AK/RD