“ઓપરેશન સિંદૂરે આપણા સશસ્ત્ર દળોની અપ્રતિમ વીરતા પ્રદર્શિત કરી, જેણે વૈશ્વિક સંદેશ આપ્યો કે ભારત આપણી મહિલાઓ દ્વારા ધારણ કરાયેલા સિંદૂરનું રક્ષણ કરવાની સાથે પોતાના નાગરિકોની સુરક્ષા સુનિશ્ચિત કરવા માટે કોઈપણ હદ સુધી જશે,” તેમ સંરક્ષણ મંત્રી શ્રી રાજનાથ સિંહે 09 ઓગસ્ટ 2026 ના રોજ દિલ્હી કેન્ટની બેઝ હોસ્પિટલ ખાતે 'સિંદૂર મહારક્તદાન યાત્રા' રક્તદાન કેમ્પને સંબોધિત કરતી વખતે જણાવ્યું હતું. સરંક્ષણ મંત્રીએ પાકિસ્તાન સ્થિત આતંકવાદીઓ અને તેમના આકાઓનો સફાયો કરવા અને ભારત પર ખરાબ નજર નાખવાની હિંમત કરનારાઓને ગંભીર પરિણામોનો સામનો કરવો પડે તે સુનિશ્ચિત કરવા બદલ ભારતીય સશસ્ત્ર દળોની પ્રશંસા કરી હતી.

સિંદૂર મહારક્તદાન યાત્રા સાથે સમાનતા દર્શાવતા, શ્રી રાજનાથ સિંહે ભારપૂર્વક જણાવ્યું હતું કે જ્યારે ઓપ સિંદૂરે શૌર્યનું પ્રદર્શન કર્યું હતું, ત્યારે આ મહા રક્તદાન કેમ્પ કરુણાનું પ્રતિનિધિત્વ કરે છે. મહારાષ્ટ્રના લગભગ 1,000 કુસ્તીબાજો અને એથ્લેટ્સે આ કેમ્પમાં ભાગ લઈને રક્તદાન કર્યું હતું, જે સશસ્ત્ર દળો પ્રત્યે નિઃસ્વાર્થ સેવા અને એકતાની ભાવના દર્શાવે છે.

રક્તદાતાઓનો આભાર વ્યક્ત કરતા, સંરક્ષણ મંત્રીએ વિશ્વાસ વ્યક્ત કર્યો હતો કે આજે દાનમાં મળેલું લોહી ભવિષ્યમાં જરૂરિયાતમંદ સૈનિકો અને તેમના પરિવારો માટે એક વિશ્વસનીય અનામત તરીકે કામ કરશે. તેમણે રક્તદાનને 'જીવનદાન' અને 'મહાદાન' તરીકે વર્ણવ્યું હતું, અને ભારપૂર્વક જણાવ્યું હતું કે વિજ્ઞાન અને દવામાં નોંધપાત્ર પ્રગતિ છતાં, માનવ રક્તનો કોઈ કૃત્રિમ વિકલ્પ હજુ સુધી વિકસાવી શકાયો નથી. તેમણે કહ્યું કે લોહી માત્ર માનવ શરીર દ્વારા જ ઉત્પન્ન થઈ શકતું હોવાથી અને એક વ્યક્તિ દ્વારા બીજી વ્યક્તિને દાન કરી શકાતું હોવાથી, રક્તદાન એ દાનના સૌથી શ્રેષ્ઠ સ્વરૂપોમાંથી એક છે.

શ્રી રાજનાથ સિંહે રેખાંકિત કર્યું હતું કે દરેક રક્તદાતા અને રક્ત મેળવનાર, પોતાની રીતે રાષ્ટ્રની સેવા કરી રહ્યા છે. તેમણે લોકોને, ખાસ કરીને યુવાનોને, રક્તદાનને એક સંસ્કૃતિ બનાવવા આહ્વાન કર્યું હતું. તેમણે કહ્યું, “જ્યારે આપણે 2047માં આપણી આઝાદીના 100 વર્ષ ઉજવીએ, ત્યારે આપણો ઉદ્દેશ્ય માત્ર વિકસિત અર્થતંત્ર પૂરતો સીમિત ન હોવો જોઈએ; આપણે એક એવા કરુણાસભર સમાજની પણ કલ્પના કરવી જોઈએ જ્યાં લોકો સ્વસ્થ અને સુરક્ષિત હોય, અને જરૂરિયાતના સમયે લોહી જેવા કિંમતી સંસાધનો સહેલાઈથી ઉપલબ્ધ હોય.”

યુવાનોને ફિટનેસને પ્રાથમિકતા આપવા હાકલ કરતા, રક્ષા મંત્રીએ ભારપૂર્વક જણાવ્યું હતું કે સ્વસ્થ અને ફિટ વ્યક્તિ સમાજ માટે મોટી સંપત્તિ બની જાય છે અને રક્તદાન જેવા ઉમદા કાર્યો કરવા માટે વધુ સારી રીતે સજ્જ હોય છે. તેમણે જણાવ્યું હતું કે ખેલો ઇન્ડિયા અને ફિટ ઇન્ડિયા જેવી પહેલો દ્વારા, પ્રધાનમંત્રી શ્રી નરેન્દ્ર મોદીના નેતૃત્વ હેઠળની સરકાર, નાગરિકોને, ખાસ કરીને યુવાનોને, ફિટનેસને જીવનશૈલી તરીકે અપનાવવા પ્રોત્સાહિત કરી રહી છે.

મહારાષ્ટ્રની શૌર્ય અને કરુણાની સમૃદ્ધ પરંપરા પર પ્રકાશ પાડતા, શ્રી રાજનાથ સિંહે જણાવ્યું હતું કે છત્રપતિ શિવાજી મહારાજનો વારસો પેઢીઓને પ્રેરણા આપતો રહે છે. તેમણે ભારપૂર્વક જણાવ્યું હતું કે શારીરિક શક્તિનો સાચો હેતુ અન્યોનું રક્ષણ કરવાનો અને રાષ્ટ્રનું રક્ષણ કરવાનો છે. તેમણે ઉમેર્યું હતું કે છત્રપતિ શિવાજી મહારાજની ભૂમિના રમતવીરો અને કુસ્તીબાજોના આ યોગદાનને રાષ્ટ્ર માટેની શ્રેષ્ઠ સેવા તરીકે યાદ રાખવામાં આવશે.

આ કાર્યક્રમમાં મહારાષ્ટ્રના નાયબ મુખ્યમંત્રી શ્રી એકનાથ શિંદે; આયુષ મંત્રાલયના રાજ્ય મંત્રી (સ્વતંત્ર પ્રભારી) શ્રી પ્રતાપ રાવ જાદવ; મહારાષ્ટ્ર સરકારના ઉદ્યોગ મંત્રી શ્રી ઉદય રવિન્દ્ર સાવંત; સંસદ સભ્ય ડૉ. શ્રીકાંત લતા એકનાથ શિંદે; સેનાધ્યક્ષ જનરલ ધીરજ સેઠ; ડીજી આર્મ્ડ ફોર્સીસ મેડિકલ સર્વિસીસ (AFMS) સર્જન વાઇસ એડમિરલ આરતી સરીન; એડજુટન્ટ જનરલ લેફ્ટનન્ટ જનરલ વીપીએસ કૌશિક; કમાન્ડન્ટ, બેઝ હોસ્પિટલ, દિલ્હી કેન્ટ મેજર જનરલ વિશાલ ચૌધરી અને અન્ય વરિષ્ઠ સૈન્ય અને નાગરિક મહાનુભાવો ઉપસ્થિત રહ્યા હતા.

AFMS માટે, પર્યાપ્ત રક્ત અનામત જાળવવું એ વિશેષ મહત્વ ધરાવે છે કારણ કે મિલિટરી હોસ્પિટલો નિયમિત આરોગ્યસંભાળ આવશ્યકતાઓની સાથે સાથે ઓપરેશનલ, ટ્રોમા અને ઈમરજન્સી કટોકટીની જરૂરિયાતોને પૂરી કરે છે. લગભગ 500 સ્વૈચ્છિક રક્તદાતાઓની ભાગીદારીએ 'સેવા પરમો ધર્મ' ની ભાવનાને પુનઃપુષ્ટ કરી અને નિયમિત સ્વૈચ્છિક રક્તદાન દ્વારા જીવ બચાવવામાં દરેક પાત્ર નાગરિક જે ભૂમિકા ભજવી શકે છે તેને રેખાંકિત કરી.

SM/BS/JD