ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಂಪುಟ ಸಭೆಯು ₹23,731 ಕೋಟಿ ಒಟ್ಟು ವೆಚ್ಚದೊಂದಿಗೆ 'ರಾಷ್ಟ್ರೀಯ ವೃತ್ತಾಕಾರದ ಜೈವಿಕ ಇಂಧನ ಯೋಜನೆ'ಯಾದ 'ಗೋಬರ್ ಧನ್' (GOBARdhan) ಗೆ ಅನುಮೋದನೆ ನೀಡಿದೆ.

ಗೋಬರ್ ಧನ್ ಯೋಜನೆಯು ಭಾರತದ ಸ್ವಚ್ಛ ಇಂಧನದ ಪಯಣದಲ್ಲಿ ಒಂದು ಪ್ರಮುಖ ಮೈಲಿಗಲ್ಲಾಗಿದೆ. ಇದು ದೇಶದ ಹೇರಳವಾದ ಕೃಷಿ ತ್ಯಾಜ್ಯ, ಸಗಣಿ, ಪ್ರೆಸ್ ಮುಡ್, ಪುರಸಭೆಯ ಜೈವಿಕ ತ್ಯಾಜ್ಯ ಮತ್ತು ಇತರ ಜೈವಿಕ ರಾಶಿ ಸಂಪನ್ಮೂಲಗಳನ್ನು ಸ್ವಚ್ಛ ಇಂಧನ, ಸಾವಯವ ಗೊಬ್ಬರ, ಗ್ರಾಮೀಣ ಆದಾಯ ಮತ್ತು ರಾಷ್ಟ್ರೀಯ ಆರ್ಥಿಕ ಮೌಲ್ಯವಾಗಿ ಪರಿವರ್ತಿಸುತ್ತದೆ.

ಈ ಯೋಜನೆಯನ್ನು 2026-27 ರ ಹಣಕಾಸು ವರ್ಷದಿಂದ 2035-36 ರ ಹಣಕಾಸು ವರ್ಷದವರೆಗೆ ಅನುಷ್ಠಾನಗೊಳಿಸಲಾಗುವುದು ಮತ್ತು ಇದು ಸಂಕುಚಿತ ಜೈವಿಕ ಅನಿಲವನ್ನು ಭಾರತದ ಭವಿಷ್ಯದ ಇಂಧನ ಮಿಶ್ರಣದ ಪ್ರಮುಖ ಸ್ತಂಭವಾಗಿ ಸ್ಥಾಪಿಸಲಿದೆ.

ಖಚಿತ ಬೇಡಿಕೆ, ಲಾಭದಾಯಕ ಮತ್ತು ಸ್ಥಿರ ಬೆಲೆ, ಬಂಡವಾಳ ನೆರವು, ಪೈಪ್‌ಲೈನ್ ಮೂಲಸೌಕರ್ಯ, ಸಾಲದ ಬೆಂಬಲ ಮತ್ತು ತಂತ್ರಜ್ಞಾನ ಅಭಿವೃದ್ಧಿಯ ಮೂಲಕ, ಗೋಬರ್ ಧನ್ ಯೋಜನೆಯು ಭಾರತದ ಸಿಬಿಜಿ ವಲಯವನ್ನು ರಾಷ್ಟ್ರೀಯ ಮಟ್ಟಕ್ಕೆ ಕೊಂಡೊಯ್ಯಲು ಅಗತ್ಯವಿರುವ ಬಲವಾದ ಮತ್ತು ನಿರೀಕ್ಷಿತ ಚೌಕಟ್ಟನ್ನು ಒದಗಿಸುತ್ತದೆ.

ಈ ಯೋಜನೆಯು ದೇಶೀಯ ಸಂಕುಚಿತ ಜೈವಿಕ ಅನಿಲ ಉತ್ಪಾದನೆಯನ್ನು ಸುಮಾರು ಹತ್ತು ಪಟ್ಟು ಹೆಚ್ಚಿಸುವ, ಬೃಹತ್ ಪ್ರಮಾಣದ ಖಾಸಗಿ ಹೂಡಿಕೆಯನ್ನು ಸಜ್ಜುಗೊಳಿಸುವ ಮತ್ತು ದೇಶಾದ್ಯಂತ ಚಟುವಟಿಕೆಯಿಂದ ಕೂಡಿದ ವೃತ್ತಾಕಾರದ ಜೈವಿಕ ಆರ್ಥಿಕತೆಯನ್ನು (circular bioeconomy) ಸೃಷ್ಟಿಸುವ ಗುರಿಯನ್ನು ಹೊಂದಿದೆ.

ಇದು ಸರ್ಕಾರದ ಸ್ಪಷ್ಟ ದೃಷ್ಟಿಕೋನವನ್ನು ಪ್ರತಿಬಿಂಬಿಸುತ್ತದೆ:

ಭಾರತದ ತ್ಯಾಜ್ಯವೇ ಭಾರತದ ಬೆಳವಣಿಗೆಗೆ ಇಂಧನವಾಗಲಿದೆ. 
ಭಾರತದ ಹಳ್ಳಿಗಳು ಸ್ವಚ್ಛ ಇಂಧನ ಉತ್ಪಾದನೆಯ ಕೇಂದ್ರಗಳಾಗಲಿವೆ. 
ಭಾರತದ ರೈತರು ದೇಶದ ಇಂಧನ ಭದ್ರತೆಯ ಪಾಲುದಾರರಾಗಲಿದ್ದಾರೆ.

ಬಲವಾದ ಅಡಿಪಾಯದಿಂದ ರಾಷ್ಟ್ರೀಯ ಮಟ್ಟದವರೆಗೆ:

ಕಳೆದ ಕೆಲವು ವರ್ಷಗಳಲ್ಲಿ, ಭಾರತ ಸರ್ಕಾರವು 'ಕೈಗೆಟುಕುವ ಸಾರಿಗೆಗಾಗಿ ಸುಸ್ಥಿರ ಪರ್ಯಾಯ' ಉಪಕ್ರಮ, ಸಾವಯವ ಗೊಬ್ಬರಕ್ಕಾಗಿ ಮಾರುಕಟ್ಟೆ ಅಭಿವೃದ್ಧಿ ನೆರವು ಯೋಜನೆ, ಬಯೋಮಾಸ್ ಅಗ್ರಿಗೇಶನ್ ಮೆಷಿನರಿ ಯೋಜನೆ, ಪೈಪ್‌ಲೈನ್ ಮೂಲಸೌಕರ್ಯ ಅಭಿವೃದ್ಧಿ ಯೋಜನೆ ಮತ್ತು ರಾಷ್ಟ್ರೀಯ ಜೈವಿಕ ಇಂಧನ ಕಾರ್ಯಕ್ರಮದಡಿ ಸಿಬಿಜಿ ಘಟಕಗಳಿಗೆ ನೀಡಲಾಗುವ ಕೇಂದ್ರ ಹಣಕಾಸು ನೆರವಿನ ಮೂಲಕ ಸಿಬಿಜಿ ವಲಯದ ತಡಿಪಾಯವನ್ನು ವ್ಯವಸ್ಥಿತವಾಗಿ ನಿರ್ಮಿಸಿದೆ.

ಈ ಎಲ್ಲಾ ಉಪಕ್ರಮಗಳು ಸೇರಿ 200 ಕ್ಕೂ ಹೆಚ್ಚು ಸಿಬಿಜಿ ಘಟಕಗಳ ಚಾಲನೆಗೆ ಕಾರಣವಾಗಿವೆ, ಉತ್ಪಾದನೆ ಮತ್ತು ಖರೀದಿ ವ್ಯವಸ್ಥೆಗಳನ್ನು ಸ್ಥಾಪಿಸಿವೆ, ಸಾವಯವ ಗೊಬ್ಬರ ಮೌಲ್ಯ ಸರಪಳಿಯನ್ನು ಬಲಪಡಿಸಿವೆ ಮತ್ತು ವಿವಿಧ ಕಚ್ಚಾವಸ್ತುಗಳು ಹಾಗೂ ಪ್ರದೇಶಗಳಾದ್ಯಂತ ಸಿಬಿಜಿಯ ಸಾಮರ್ಥ್ಯವನ್ನು ಪ್ರದರ್ಶಿಸಿವೆ.

ಗೋಬರ್ ಧನ್ ಈಗ ಈ ಪ್ರಗತಿಯನ್ನು, ಮುಂದಿನ ಹಂತಕ್ಕೆ ಕೊಂಡೊಯ್ಯುತ್ತದೆ. ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ ಆಡಳಿತಕ್ಕೊಳಪಟ್ಟ ಈ ಯೋಜನೆಯು ಇಡೀ ಸಿಬಿಜಿ ಮೌಲ್ಯ ಸರಪಳಿಯಾದ್ಯಂತ ಒಂದು ಏಕೀಕೃತ ವೇದಿಕೆಯನ್ನು ಸೃಷ್ಟಿಸುತ್ತದೆ. ಇದು ಹೂಡಿಕೆದಾರರು, ಸಾಲದಾತರು ಮತ್ತು ಅಭಿವೃದ್ಧಿದಾರರಿಗೆ ವೇಗದ ಅನುಷ್ಠಾನ, ಬಲವಾದ ಯೋಜನಾ ಆರ್ಥಿಕತೆ ಮತ್ತು ಹೆಚ್ಚಿನ ನಿಶ್ಚಿತತೆಯನ್ನು ಒದಗಿಸುತ್ತದೆ.

ಭಾರತಕ್ಕೆ ಒಂದು ಕಾರ್ಯತಂತ್ರದ ಅವಕಾಶ:

ಸಾರಿಗೆ, ಗೃಹಬಳಕೆ, ಕೈಗಾರಿಕೆ ಮತ್ತು ವಾಣಿಜ್ಯ ವಲಯಗಳಾದ್ಯಂತ ಭಾರತದ ನೈಸರ್ಗಿಕ ಅನಿಲದ ಬೇಡಿಕೆಯು ವಿಸ್ತರಿಸುತ್ತಿದೆ. ದೇಶೀಯ ನವೀಕರಿಸಬಹುದಾದ ಉತ್ಪಾದನೆಯ ಮೂಲಕ ಸಿಬಿಜಿ ಈ ಬೆಳೆಯುತ್ತಿರುವ ಬೇಡಿಕೆಯ ಗಮನಾರ್ಹ ಪಾಲನ್ನು ಪೂರೈಸಬಲ್ಲದು, ಇಂಧನ ಸ್ಥಿತಿಸ್ಥಾಪಕತ್ವವನ್ನು ಬಲಪಡಿಸುತ್ತದೆ ಮತ್ತು ಆಮದು ಮಾಡಿಕೊಳ್ಳುವ ಪಳೆಯುಳಿಕೆ ಇಂಧನಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ.

ಸಿಬಿಜಿಯು ರಸಾಯನಿಕವಾಗಿ ನೈಸರ್ಗಿಕ ಅನಿಲಕ್ಕೆ ಸಮಾನವಾಗಿದೆ ಮತ್ತು ಇದನ್ನು ಜಾರಿಯಲ್ಲಿರುವ ಅನಿಲ ವ್ಯವಸ್ಥೆಗೆ ಮನಬಂದಂತೆ ಸಂಯೋಜಿಸಬಹುದು. ಆದ್ದರಿಂದ ಇದು ನವೀಕರಿಸಬಹುದಾದ ಇಂಧನದ ಪ್ರಯೋಜನಗಳನ್ನು ಭಾರತದ ವಿಸ್ತರಿಸುತ್ತಿರುವ ಅನಿಲ ಮೂಲಸೌಕರ್ಯದ ವ್ಯಾಪ್ತಿ ಮತ್ತು ಉಪಯುಕ್ತತೆಯೊಂದಿಗೆ ಸಂಯೋಜಿಸುತ್ತದೆ.

ಪ್ರತಿಯೊಂದು ಸಿಬಿಜಿ ಘಟಕವು ಕೃಷಿ ತ್ಯಾಜ್ಯ, ಸಗಣಿ ಮತ್ತು ಇತರ ಜೈವಿಕ ಸಂಪನ್ಮೂಲಗಳ ಸುತ್ತ ಸ್ಥಳೀಯ ವೃತ್ತಾಕಾರದ ಆರ್ಥಿಕತೆಯನ್ನು ಸೃಷ್ಟಿಸುತ್ತದೆ. ಇದು ಸ್ವಚ್ಛ ತ್ಯಾಜ್ಯ ನಿರ್ವಹಣೆ ಮತ್ತು ಕಡಿಮೆ ಹಸಿರುಮನೆ ಅನಿಲ ಹೊರಸೂಸುವಿಕೆಯನ್ನು ಬೆಂಬಲಿಸುವ ಜೊತೆಗೆ ಕಚ್ಚಾವಸ್ತು ಪೂರೈಕೆ, ಸಾರಿಗೆ, ಘಟಕಗಳ ಕಾರ್ಯಾಚರಣೆ ಮತ್ತು ಸಾವಯವ ಗೊಬ್ಬರ ಉತ್ಪಾದನೆಯಲ್ಲಿ ಅವಕಾಶಗಳನ್ನು ಸೃಷ್ಟಿಸುತ್ತದೆ.

ಗೋಬರ್ ಧನ್ ಅಡಿಯಲ್ಲಿ ಆರು ಪ್ರಗತಿಯ ಇಂಜಿನ್‌ಗಳು

ಅಂಶ 1: ಖಚಿತ ಸಿಬಿಜಿ (CBG) ಖರೀದಿ

ಉತ್ಪಾದಕರಿಗೆ ವಿಶ್ವಾಸಾರ್ಹ ಮತ್ತು ನಿರೀಕ್ಷಿತ ಮಾರುಕಟ್ಟೆಯನ್ನು ಒದಗಿಸಲು ಗೋಬರ್ಧನ್ ಯೋಜನೆಯು 'ವಿಶೇಷ ಸಿಬಿಜಿ ಖರೀದಿ ಭರವಸೆ' ಚೌಕಟ್ಟನ್ನು ಸ್ಥಾಪಿಸುತ್ತದೆ. ಸಿಟಿ ಗ್ಯಾಸ್ ಡಿಸ್ಟ್ರಿಬ್ಯೂಷನ್ (CGD) ಸಂಸ್ಥೆಗಳ ಮೂಲಕ ಖರೀದಿ ಮಾಡುವುದು ಸಿಎನ್‌ಜಿ (ಸಾರಿಗೆ) ಮತ್ತು ಪಿಎನ್‌ಜಿ (ಗೃಹಬಳಕೆ) ವಿಭಾಗಗಳಲ್ಲಿ 2026-27 ರ ಹಣಕಾಸು ವರ್ಷದಲ್ಲಿ ಶೇ. 3, 2027-28 ರ ಹಣಕಾಸು ವರ್ಷದಲ್ಲಿ ಶೇ. 4 ಮತ್ತು 2028-29 ರ ಹಣಕಾಸು ವರ್ಷದಿಂದ ಶೇ. 5 ರಷ್ಟು ಅಧಿಸೂಚಿತ ಸಿಬಿಜಿ ಕಡ್ಡಾಯ ಮಿಶ್ರಣದ ಪಥವನ್ನು ಸಾಧಿಸಲು ಬೆಂಬಲ ನೀಡುತ್ತದೆ.

ಈ ಚೌಕಟ್ಟು ಮಿಶ್ರಣದ ಕಡ್ಡಾಯತೆಯನ್ನು ಉದ್ಯಮಕ್ಕೆ ಸ್ಪಷ್ಟ, ದೀರ್ಘಕಾಲೀನ ಬೇಡಿಕೆಯ ಸಂಕೇತವಾಗಿ ಪರಿವರ್ತಿಸುತ್ತದೆ. ಸಿಜಿಡಿ (CGD) ಜಾಲಗಳಾದ್ಯಂತ ಸತತ ಅನುಷ್ಠಾನವು ಯೋಜನೆಯ ಬ್ಯಾಂಕಿಂಗ್ ಅರ್ಹತೆಯನ್ನು ಸುಧಾರಿಸುತ್ತದೆ, ಸಾಮರ್ಥ್ಯದ ಬಳಕೆ ಹೆಚ್ಚಿಸುತ್ತದೆ ಮತ್ತು ದೀರ್ಘಕಾಲೀನ ಖಾಸಗಿ ಹೂಡಿಕೆಯನ್ನು ಪ್ರೋತ್ಸಾಹಿಸುತ್ತದೆ.

ಅಂಶ 2: ಸ್ಥಿರ ಸಿಬಿಜಿ (CBG) ಬೆಲೆ ನಿಗದಿ ಚೌಕಟ್ಟು

ಗೋಬರ್ ಧನ್ ಯೋಜನೆಯು ಸರ್ಕಾರಿ ಬೆಂಬಲಿತ ಬೆಲೆ ನಿಗದಿ ಚೌಕಟ್ಟಿನ ಮೂಲಕ ಬೆಂಬಲಿತವಾದ ಪ್ರತಿ ಮೆಟ್ರಿಕ್ ಮಿಲಿಯನ್ ಬ್ರಿಟಿಷ್ ಥರ್ಮಲ್ ಯೂನಿಟ್‌ಗೆ (MMBTU) ₹2,110 ರ ಸ್ಥಿರವಾದ ಆಡಳಿತಾತ್ಮಕ ಸಿಬಿಜಿ ಬೆಲೆಯನ್ನು ಪರಿಚಯಿಸುತ್ತದೆ. ಈ ಚೌಕಟ್ಟು ಸರ್ಕಾರದ ಬೆಂಬಲ ಮತ್ತು ಮಾರುಕಟ್ಟೆ ಆಧಾರಿತ ವೆಚ್ಚ-ಹಂಚಿಕೆ ವ್ಯವಸ್ಥೆಯ ಸಂಯೋಜನೆಯ ಮೂಲಕ ಗ್ರಾಹಕರ ಕೈಗೆಟುಕುವ ದರವನ್ನು ರಕ್ಷಿಸುವ ಜೊತೆಗೆ ದೀರ್ಘಕಾಲೀನ ಆದಾಯದ ಸ್ಪಷ್ಟತೆಯನ್ನು ಒದಗಿಸುತ್ತದೆ.

ಕನಿಷ್ಠ ಹತ್ತು ವರ್ಷಗಳ ಕಾಲಾವಧಿಯೊಂದಿಗೆ, ಈ ಬೆಲೆ ನಿಗದಿ ಚೌಕಟ್ಟು ಉತ್ಪಾದಕರಿಗೆ ಸುಸ್ಥಿರ ಆದಾಯದ ನಿಶ್ಚಿತತೆ, ವಾಣಿಜ್ಯಿಕವಾಗಿ ಆಕರ್ಷಕವಾದ ಲಾಭಗಳು ಮತ್ತು ಹೂಡಿಕೆ ಹಾಗೂ ಸಾಮರ್ಥ್ಯ ವಿಸ್ತರಣೆಗೆ ಬಲವಾದ ವ್ಯವಹಾರ ಅವಕಾಶವನ್ನು ಒದಗಿಸುತ್ತದೆ.

ಅಂಶ 3: ಬಂಡವಾಳ ನೆರವು

ಅರ್ಹ ಗ್ರೀನ್‌ಫೀಲ್ಡ್ ಸಿಬಿಜಿ (CBG) ಯೋಜನೆಗಳು ಅನುಸ್ಥಾಪಿತ ಸಿಬಿಜಿ ಸಾಮರ್ಥ್ಯದ ಪ್ರತಿ ದಿನದ ಟನ್‌ಗೆ (TPD) ₹2 ಕೋಟಿವರೆಗಿನ ಬಂಡವಾಳ ನೆರವನ್ನು ಪಡೆಯಲಿವೆ.

ಈ ಬೆಂಬಲವು ಮುಖ್ಯ ಪ್ಲಾಂಟ್ ಯಂತ್ರೋಪಕರಣಗಳನ್ನು ಹೊರತುಪಡಿಸಿ ಕಚ್ಚಾವಸ್ತುಗಳ ಸಂಗ್ರಹಣೆ, ಸಾವಯವ ಗೊಬ್ಬರ ಸಂಸ್ಕರಣೆ ಮತ್ತು ಮೌಲ್ಯವರ್ಧನೆಗೆ ಅಗತ್ಯವಾದ ಪ್ರಮುಖ ಮೌಲ್ಯ-ಸರಪಳಿ ಆಸ್ತಿಗಳಿಗೂ ವಿಸ್ತರಿಸುತ್ತದೆ. ತಮ್ಮ ಉತ್ಪಾದನಾ ಸಾಮರ್ಥ್ಯವನ್ನು ವಿಸ್ತರಿಸುವ ಬ್ರೌನ್‌ಫೀಲ್ಡ್ ಯೋಜನೆಗಳು ಸಹ ಈ ನೆರವಿಗೆ ಅರ್ಹವಾಗಿರುತ್ತವೆ.

ಈ ಅಂಶವು ಆರಂಭಿಕ ಬಂಡವಾಳದ ಹೊರೆಯನ್ನು ಕಡಿಮೆ ಮಾಡುತ್ತದೆ, ಹಣಕಾಸಿನ ಪ್ರಕ್ರಿಯೆಗಳನ್ನು ತ್ವರಿತಗೊಳಿಸುತ್ತದೆ ಮತ್ತು ಖಾಸಗಿ ಅಭಿವೃದ್ಧಿದಾರರು, ಎಂಎಸ್‌ಎಂಇಗಳು (MSMEs), ಸಹಕಾರ ಸಂಘಗಳು ಮತ್ತು ಗ್ರಾಮೀಣ ಉದ್ಯಮಿಗಳ ಭಾಗವಹಿಸುವಿಕೆಯನ್ನು ವಿಸ್ತರಿಸುತ್ತದೆ.

ಅಂಶ 4: ಪೈಪ್‌ಲೈನ್ ಮೂಲಸೌಕರ್ಯ ಅಭಿವೃದ್ಧಿ

ಈ ಯೋಜನೆಯು ಸಿಬಿಜಿ ಘಟಕಗಳನ್ನು ಟ್ರಂಕ್ ಪೈಪ್‌ಲೈನ್‌ಗಳು ಮತ್ತು ಸಿಟಿ ಗ್ಯಾಸ್ ಡಿಸ್ಟ್ರಿಬ್ಯೂಷನ್ (CGD) ಜಾಲಗಳೊಂದಿಗೆ ಸಂಪರ್ಕಿಸುವ ಕ್ಲಸ್ಟರ್-ಆಧಾರಿತ ಮತ್ತು ಸ್ವತಂತ್ರ ಪೈಪ್‌ಲೈನ್ ಮೂಲಸೌಕರ್ಯ ಎರಡನ್ನೂ ಬೆಂಬಲಿಸುತ್ತದೆ. ಹೆಚ್ಚಿನ ಪೈಪ್‌ಲೈನ್ ಸಂಪರ್ಕವು ಸಾಗಣೆ ವೆಚ್ಚವನ್ನು ಕಡಿಮೆ ಮಾಡುತ್ತದೆ, ವಿಶ್ವಾಸಾರ್ಹತೆಯನ್ನು ಸುಧಾರಿಸುತ್ತದೆ, ಮಾರುಕಟ್ಟೆ ವ್ಯಾಪ್ತಿಯನ್ನು ವಿಸ್ತರಿಸುತ್ತದೆ ಮತ್ತು ದೇಶೀಯವಾಗಿ ಉತ್ಪಾದಿಸಲ್ಪಟ್ಟ ಸಿಬಿಸಿಯ ಹೆಚ್ಚಿನ ಬಳಕೆಯನ್ನು ಸಕ್ತಗೊಳಿಸುತ್ತದೆ.

ಅಂಶ 5: ಸಾಲ ಭರವಸೆ ಬೆಂಬಲ

ವಿಶೇಷ ಸಾಲ ಭರವಸೆ ವ್ಯವಸ್ಥೆಯು ಸಾಲದಾತರ ವಿಶ್ವಾಸವನ್ನು ಬಲಪಡಿಸುತ್ತದೆ ಮತ್ತು ಅರ್ಹ ಎಂಎಸ್‌ಎಂಇ ಆಧಾರಿತ ಸಿಬಿಜಿ ಯೋಜನೆಗಳಿಗೆ ಸಾಂಸ್ಥಿಕ ಸಾಲದ ಹರಿವನ್ನು ವಿಸ್ತರಿಸುತ್ತದೆ.

ಸಾಲದ ಅಪಾಯದ ಒಂದು ಭಾಗವನ್ನು ಹಂಚಿಕೊಳ್ಳುವ ಮೂಲಕ, ಈ ವ್ಯವಸ್ಥೆಯು ಕೈಗೆಟುಕುವ ದರದ ಹಣಕಾಸಿನ ಲಭ್ಯತೆಯನ್ನು ಸುಧಾರಿಸುತ್ತದೆ, ಅಡಮಾನದ ಅಗತ್ಯತೆಗಳನ್ನು ಕಡಿಮೆ ಮಾಡುತ್ತದೆ ಮತ್ತು ವೇಗದ ಯೋಜನಾ ಅಭಿವೃದ್ಧಿಗೆ ಬೆಂಬಲ ನೀಡುತ್ತದೆ.

ಇದು ಎಂಎಸ್‌ಎಂಇಗಳು, ಮಹಿಳಾ ಉದ್ಯಮಿಗಳು ಮತ್ತು ಹೊಸ ಅಭಿವೃದ್ಧಿದಾರರ ಭಾಗವಹಿಸುವಿಕೆಯನ್ನು ವಿಸ್ತರಿಸುತ್ತದೆ, ಇದು ವಿಶಾಲವಾದ, ಸ್ಪರ್ಧಾತ್ಮಕ ಮತ್ತು ಉದ್ಯಮಶೀಲ ಸಿಬಿಜಿ ಉದ್ಯಮವನ್ನು ನಿರ್ಮಿಸಲು ಸಹಾಯ ಮಾಡುತ್ತದೆ.

ಅಂಶ 6: ಸಿಬಿಜಿ ಇಕೋಸಿಸ್ಟಮ್ ಚಾಲೆಂಜ್ ಫಂಡ್

ಜಿಲ್ಲಾ ಮಟ್ಟದ ಅನುಷ್ಠಾನವನ್ನು ವೇಗಗೊಳಿಸಲು ಮತ್ತು ಸಿಬಿಜಿ ಪರಿಸರ ವ್ಯವಸ್ಥೆಯಾದ್ಯಂತ ಸ್ಥಳೀಯ ಮೌಲ್ಯ ಸರಪಳಿಗಳನ್ನು ಬಲಪಡಿಸಲು ಗೋಬರ್ ಧನ್ ಯೋಜನೆಯು 'ವಿಶೇಷ ಸಿಬಿಜಿ ಇಕೋಸಿಸ್ಟಮ್ ಚಾಲೆಂಜ್ ಫಂಡ್' ಅನ್ನು ಸ್ಥಾಪಿಸುತ್ತದೆ.

ಈ ನಿಧಿಯು, ಕಚ್ಚಾವಸ್ತು ಸಂಪನ್ಮೂಲ ಮೌಲ್ಯಮಾಪನ ಮತ್ತು ಮ್ಯಾಪಿಂಗ್, ಕಚ್ಚಾವಸ್ತು ಸಂಗ್ರಹಣೆ ಮೂಲಸೌಕರ್ಯ, ಜಿಲ್ಲಾ ಮಟ್ಟದ ಸಿಬಿಜಿ ಅಭಿವೃದ್ಧಿ ಯೋಜನೆ, ತಂತ್ರಜ್ಞಾನ ಅಳವಡಿಕೆ, ಪ್ರಕ್ರಿಯೆ ಸುಧಾರಣೆ, ಸಾವಯವ ಗೊಬ್ಬರದ ಮೌಲ್ಯವರ್ಧನೆ, ಸಾಮರ್ಥ್ಯ ವರ್ಧನೆ ಮತ್ತು ಪಾಲುದಾರರ ಜಾಗೃತಿಗೆ ಬೆಂಬಲ ನೀಡುತ್ತದೆ.

ಪ್ರಭಾವ:

• ಇತ್ತೀಚಿನ ವರ್ಷಗಳಲ್ಲಿ ಸೃಷ್ಟಿಸಲಾದ, ಬಲವಾದ ವಲಯದ ಅಡಿಪಾಯವನ್ನು ದೇಶವ್ಯಾಪಿ ಸಿಬಿಜಿ ವಿಸ್ತರಣೆಯಾಗಿ ಪರಿವರ್ತಿಸಲು, ಗೋಬರ್ ಧನ್ ಯೋಜನೆಯನ್ನು ವಿನ್ಯಾಸಗೊಳಿಸಲಾಗಿದೆ. ಈ ಯೋಜನೆಯಿಂದ ಕೆಳಗಿನವುಗಳನ್ನು ನಿರೀಕ್ಷಿಸಲಾಗಿದೆ:
• ದೇಶೀಯ ಸಿಬಿಜಿ ಉತ್ಪಾದನೆಯಲ್ಲಿ ಸುಮಾರು ಹತ್ತು ಪಟ್ಟು ಬೆಳವಣಿಗೆ, ಭಾರತದ ಸ್ವಚ್ಛ ಅನಿಲ ಆರ್ಥಿಕತೆಯ ಹೊಸ ಸ್ತಂಭವನ್ನು ಸೃಷ್ಟಿಸುತ್ತದೆ. 
• ನವೀಕರಿಸಬಹುದಾದ ಅನಿಲ ಇಂಧನದ ಹೆಚ್ಚಿನ ದೇಶೀಯ ಉತ್ಪಾದನೆ ಮತ್ತು ಆಮದು ಮಾಡಿಕೊಳ್ಳುವ ಪಳೆಯುಳಿಕೆ ಇಂಧನಗಳ ಮೇಲಿನ ಕಡಿಮೆ ಅವಲಂಬನೆಯ ಮೂಲಕ ಹೆಚ್ಚಿನ ಇಂಧನ ಭದ್ರತೆ. 
• ಬಲವಾದ ಯೋಜನಾ ಸಾಮರ್ಥ್ಯ, ಸ್ಥಿರ ಬೆಲೆ ಮತ್ತು ಸಾಂಸ್ಥಿಕ ಹಣಕಾಸಿನ ಸುಧಾರಿತ ಲಭ್ಯತೆಯಿಂದ ಬೆಂಬಲಿತವಾದ ಖಾಸಗಿ ಹೂಡಿಕೆಯ ಹೊಸ ಅಲೆ. 
• ರೈತರು, ಕಚ್ಚಾವಸ್ತು ಸಂಗ್ರಹಕಾರರು, ಸಹಕಾರ ಸಂಘಗಳು ಮತ್ತು ಗ್ರಾಮೀಣ ಉದ್ಯಮಿಗಳಿಗೆ ಹೊಸ ಆದಾಯದ ಅವಕಾಶಗಳ ಮೂಲಕ ಬಲವಾದ ಗ್ರಾಮೀಣ ಜೀವನೋಪಾಯ. 
• ಕೃಷಿ ತ್ಯಾಜ್ಯ, ಸಗಣಿ, ಪುರಸಭೆಯ ಜೈವಿಕ ತ್ಯಾಜ್ಯ ಮತ್ತು ಇತರ ಜೈವಿಕ ರಾಶಿ ಸಂಪನ್ಮೂಲಗಳ ಉತ್ಪಾದಕ ಬಳಕೆಯ ಮೂಲಕ ವೈಜ್ಞಾನಿಕ ತ್ಯಾಜ್ಯ ನಿರ್ವಹಣೆ. 
• ಪಳೆಯುಳಿಕೆ ಇಂಧನಗಳ ಬದಲಿ ಬಳಕೆ ಮತ್ತು ಜೈವಿಕ ತ್ಯಾಜ್ಯದ ಉತ್ಪಾದಕ ಬಳಕೆಯ ಮೂಲಕ ಹಸಿರುಮನೆ ಅನಿಲ ಹೊರಸೂಸುವಿಕೆ ಇಳಿಕೆ. 
• ಎಫ್‌ಒಎಂ (FOM) ಮತ್ತು ಎಲ್‌ಎಫ್‌ಒಎಂ (LFOM) ಗಳ ಹೆಚ್ಚಿನ ಉತ್ಪಾದನೆ, ಮೌಲ್ಯವರ್ಧನೆ ಮತ್ತು ಬಳಕೆಯ ಮೂಲಕ ಬೃಹತ್ ಸಾವಯವ ಗೊಬ್ಬರ ಆರ್ಥಿಕತೆ. 
• ಒಂದು ರಾಷ್ಟ್ರೀಯ ಚೌಕಟ್ಟು, ಡಿಜಿಟಲ್ ಆಡಳಿತ ಮತ್ತು ಸರಳೀಕೃತ ಸಾಂಸ್ಥಿಕ ವ್ಯವಸ್ಥೆಗಳ ಮೂಲಕ ವೇಗವಾದ ಮತ್ತು ಸುಲಭವಾದ ಯೋಜನಾ ಅನುಷ್ಠಾನ.

ಗೋಬರ್ ಧನ್ ಯೋಜನೆಯು ಭಾರತದ ಹೇರಳವಾದ ಜೈವಿಕ ಸಂಪನ್ಮೂಲಗಳನ್ನು ಸ್ವಚ್ಛ ಇಂಧನ, ಗ್ರಾಮೀಣ ಸಮೃದ್ಧಿ ಮತ್ತು ಆರ್ಥಿಕ ಮೌಲ್ಯವಾಗಿ ಪರಿವರ್ತಿಸುವಲ್ಲಿ ನಿರ್ಣಾಯಕ ಹೆಜ್ಜೆಯಾಗಿದೆ. ಖಚಿತ ಬೇಡಿಕೆ, ಸ್ಥಿರ ಬೆಲೆ, ಬಂಡವಾಳ ನೆರವು, ಪೈಪ್‌ಲೈನ್ ಸಂಪರ್ಕ, ಸಾಲದ ಬೆಂಬಲ ಮತ್ತು ಪರಿಸರ ವ್ಯವಸ್ಥೆಯ ಅಭಿವೃದ್ಧಿಯನ್ನು ಒಂದೇ ರಾಷ್ಟ್ರೀಯ ಚೌಕಟ್ಟಿನಡಿ ತರುವ ಮೂಲಕ, ಈ ಯೋಜನೆಯು ಸಿಬಿಜಿ (CBG) ಬೃಹತ್ ಪ್ರಮಾಣದಲ್ಲಿ ಬೆಳೆಯಲು ಅಗತ್ಯ ವಾತಾವರಣವನ್ನು ಸೃಷ್ಟಿಸುತ್ತದೆ.

ಈಗಾಗಲೇ ಸಾಧಿಸಿರುವ ಪ್ರಗತಿಯನ್ನು ಆಧರಿಸಿ, ಗೋಬರ್ಧನ್ ಯೋಜನೆಯು ಭಾರತದ ಸಿಬಿಜಿ ಪಯಣವನ್ನು ಬಲವಾದ ಅಡಿಪಾಯದಿಂದ ರಾಷ್ಟ್ರೀಯ ಮಟ್ಟದ ಸ್ವಚ್ಛ ಇಂಧನ ಉದ್ಯಮವಾಗಿ ಕೊಂಡೊಯ್ಯಲಿದೆ. ಇದು ಇಂಧನ ಭದ್ರತೆ, ರೈತರು ಮತ್ತು ಗ್ರಾಮೀಣ ಉದ್ಯಮಗಳು, ತ್ಯಾಜ್ಯದಿಂದ ಸಂಪತ್ತು, ಆತ್ಮನಿರ್ಭರ ಭಾರತ ಮತ್ತು ವಿಕಸಿತ ಭಾರತದ ದೃಷ್ಟಿಕೋನಕ್ಕೆ ಸರ್ಕಾರದ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

*****