سائنس و ٹیکنالوجی اور ارضیاتی سائنس کے مرکزی وزیر مملکت (آزادانہ چارج) ڈاکٹر جتیندر سنگھ نے آج کہا کہ انڈین نیشنل سینٹر فار اوشین انفارمیشن سروسز (آئی این سی او آئی ایس) کی تازہ ترین تشخیص کے مطابق ال نینو کے حالات، جو مئی 2026 کے دوران پیدا ہوئے تھے، جون 2026 سے فروری 2027 تک برقرار رہنے کا امکان ہے، جبکہ اس کی پیش گوئی کے امکانات 70 سے 90 فیصد کے درمیان ہیں۔ یہ تشخیص آئی این سی او آئی ایس کے مقامی مصنوعی ذہانت اور مشین لرننگ (اے آئی/ایم ایل) پر مبنی ایل نینو سدرن آسکیلیشن (ای این ایس او) پیش گوئی کے نظام کے ساتھ ساتھ گلوبل اوشین ڈیٹا اسمیلیشن سسٹم پر مبنی ہے۔

ڈاکٹر جتیندر سنگھ نے وضاحت کی کہ اگرچہ ال نینو تاریخی طور پر ہندوستان کے بعض حصوں میں جنوب مغربی مانسون کی کمزور بارش سے وابستہ رہا ہے، تاہم یہ مانسون کا واحد تعین کنندہ نہیں ہے۔ ہندوستانی مانسون متعدد باہمی تعامل رکھنے والے موسمیاتی عوامل سے متاثر ہوتا ہے، جن میں بحرِ ہند ڈائپول (آئی او ڈی)، میڈن-جولین آسکیلیشن (ایم جے او) اور علاقائی سمندری و فضائی تعاملات شامل ہیں۔

انہوں نے کہا کہ اگرچہ موجودہ منظرنامہ ال نینو کے برقرار رہنے کی نشاندہی کرتا ہے، تاہم ہندوستانی مانسون پر اس کے حتمی اثرات کا انحصار متعلقہ سمندری و فضائی حالات کے ارتقا پر ہوگا، جن میں بحرِ ہند ڈائپول کی کیفیت اور مانسون کے موسم کے دوران ہواؤں کے غالب نمونے شامل ہیں۔ اسی لیے جدید پیش گوئی کے نظام کے ذریعے صورتحال پر مسلسل اور کڑی نظر رکھی جا رہی ہے۔

وزیر موصوف نے کہا کہ ال نینو کا ارتقا بحیرۂ عرب اور خلیجِ بنگال میں فضائی گردش کو متاثر کر سکتا ہے اور ان علاقوں میں مسلسل گرمی کے باعث سمندری گرمی کی لہروں (میرین ہیٹ ویوز) کے امکانات میں اضافہ ہو سکتا ہے۔ یہ تبدیلیاں سمندری اختلاط، غذائی اجزاء کی دستیابی اور حیاتیاتی پیداواریت کو متاثر کر سکتی ہیں، جس کے نتیجے میں مچھلیوں کی تقسیم اور ساحلی سمندری ماحولیاتی نظام پر بھی اثرات مرتب ہو سکتے ہیں۔ اسی طرح لہروں اور سویل کی کیفیت میں تغیرات نیویگیشن، آف شور سرگرمیوں اور ساحلی آپریشنز کو بھی متاثر کر سکتے ہیں۔

حکومت کی تیاریوں پر روشنی ڈالتے ہوئے ڈاکٹر جتیندر سنگھ نے کہا کہ آئی این سی او آئی ایس نے طوفانی مدوجزر، بلند لہروں، سویل سرج اور تیز سمندری لہروں کے لیے ہائی ریزولوشن پیش گوئی ماڈلز کے ذریعے اوشین اسٹیٹ فورکاسٹ اور سمندری کثیر خطراتی ابتدائی انتباہی خدمات کو مسلسل مضبوط بنایا ہے۔ پیش گوئی کی صلاحیت میں ایک وسیع سمندری مشاہداتی نیٹ ورک کے ذریعے مزید اضافہ کیا گیا ہے، جس میں سمندری گلائیڈرز، مورڈ بوائز، آرگو فلوٹس، ٹائیڈ گیجز اور جدید ڈیٹا اسمیلیشن سسٹم کے ساتھ مربوط سیٹلائٹ مشاہدات شامل ہیں۔

انہوں نے کہا کہ حکومت نے ساحلی برادریوں میں تیاری اور لچک کو بہتر بنانے کے لیے متعلقہ فریقوں کے تربیتی پروگراموں، فرضی مشقوں اور بیداری مہمات کے انعقاد کے ساتھ ساتھ چوبیس گھنٹے آپریشنل نگرانی، مختلف پلیٹ فارمز کے ذریعے مشاورتی اطلاعات کی ترسیل اور اثرات پر مبنی پیش گوئی کے نظام کو بھی مزید مضبوط بنایا ہے۔

ڈاکٹر جتیندر سنگھ نے مزید بتایا کہ گہرے سمندر کے مشن کے تحت رواں مالی سال کے دوران سمندری وسائل کی نقشہ سازی کے لیے 145.06 کروڑ روپے مختص کیے گئے ہیں۔ ہندوستان کے خصوصی اقتصادی زون (ای ای زیڈ) میں سمندری پہاڑوں کے حیاتیاتی تنوع کے سروے کو وسعت دی جا رہی ہے، جبکہ ہائیڈرو تھرمل وینٹس، معدنیات سے مالا مال علاقوں اور سمندری وسائل کی تلاش کے لیے جدید خود مختار زیرِ آب گاڑیاں اور دور سے چلنے والی گاڑیاں تعینات کی جا رہی ہیں۔

وزیر موصوف نے کہا کہ تمل ناڈو سمیت تمام ساحلی ریاستوں کے لیے آئی این سی او آئی ایس دس روز پہلے تک لہروں، ہواؤں، سویل، سمندری دھاروں اور سمندر کی سطح کے درجۂ حرارت کے بارے میں اوشین اسٹیٹ فورکاسٹ خدمات فراہم کرتا ہے۔ آفات سے نمٹنے کی تیاری اور سمندری تحفظ کے لیے ریاستی حکام کو بلند لہروں، سویل سرج اور تیز سمندری دھاروں سے متعلق ایڈوائزریز باقاعدگی سے جاری کی جاتی ہیں۔ مرکز نے ساحلی لچک اور کمیونٹی کی تیاری کو مستحکم بنانے کے لیے ریاستی حکومتوں کے تعاون سے ٹائیڈ گیج اسٹیشنز، کوسٹل ویو رائڈر بوائز اور سونامی سے نمٹنے کے تیاری پروگرام بھی قائم کیے ہیں۔

ڈاکٹر جتیندر سنگھ نے اس عزم کا اعادہ کیا کہ حکومت آب و ہوا اور سمندر سے متعلق پیش گوئیوں کی درستگی میں مزید بہتری کے لیے مقامی پیش گوئی کی ٹیکنالوجیز، جدید سمندری مشاہداتی نظام اور سائنسی بنیادوں پر فیصلہ سازی کے نظام میں سرمایہ کاری جاری رکھے ہوئے ہے، تاکہ حکومتوں، ساحلی برادریوں، ماہی گیروں اور دیگر متعلقہ فریقوں کو بروقت اور مؤثر مشورے فراہم کیے جا سکیں۔

***

UR-1413

(ش ح۔اس ک  )