ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು 'ವಿಕಸಿತ ಭಾರತ ಸಂಕಲ್ಪ ಅಭಿಯಾನಕ್ಕಾಗಿ ನಶಾ ಮುಕ್ತ ಯುವ'ಕ್ಕೆ ಚಾಲನೆ ನೀಡಿದರು. ರಾಷ್ಟ್ರವ್ಯಾಪಿ ಬೃಹತ್ ವಿಡಿಯೋ ಕಾನ್ಫರೆನ್ಸ್ ಉದ್ದೇಶಿಸಿ ಮಾತನಾಡಿದ ಪ್ರಧಾನಮಂತ್ರಿಯವರು, 28,000ಕ್ಕೂ ಹೆಚ್ಚು ಸ್ಥಳಗಳಿಂದ ಸಂಪರ್ಕ ಹೊಂದಿರುವ ಒಂದು ಕೋಟಿಗೂ ಹೆಚ್ಚು ಯುವ ನಾಗರಿಕರು ಸೇರಿದಂತೆ ವೈವಿಧ್ಯಮಯ ಸಭೆಗೆ  ಔಪಚಾರಿಕವಾಗಿ ಸ್ವಾಗತ ಕೋರಿದರು. ಈ ಕ್ಷಣದ ಸಾಮೂಹಿಕ ಮಹತ್ವವನ್ನು ಒತ್ತಿಹೇಳಿದ ಅವರು, ಸಭೆಯನ್ನು ಆಳವಾದ ರಾಷ್ಟ್ರೀಯ ಬದ್ಧತೆಯೆಂದು ಬಣ್ಣಿಸಿದರು. "ಇಂದು, ನಾವೆಲ್ಲ ದೇಶವಾಸಿಗಳು ಒಂದು ಮಹಾನ್ ಮತ್ತು ಪ್ರಮುಖ ನಿರ್ಣಯಕ್ಕಾಗಿ ಒಂದಾಗಿದ್ದೇವೆ" ಎಂದು ಶ್ರೀ ಮೋದಿ ಹೇಳಿದರು.

ಉಪಕ್ರಮದ ಸಮಗ್ರ ಸ್ವರೂಪವನ್ನು ಒತ್ತಿ ಹೇಳಿದ ಪ್ರಧಾನಮಂತ್ರಿಯವರು, ಈ ಅಭಿಯಾನವು ವೈಯಕ್ತಿಕ ಯೋಗಕ್ಷೇಮವನ್ನು ಮೀರಿ, ಏಕಕಾಲದಲ್ಲಿ ಕುಟುಂಬಗಳು, ಸಮಾಜ ಮತ್ತು ಇಡೀ ರಾಷ್ಟ್ರದ ವಿಶಾಲ ಹಿತಾಸಕ್ತಿಗಳನ್ನು ಪೂರೈಸುತ್ತದೆ ಎಂದು ವಿವರಿಸಿದರು. 'ವಿಕಸಿತ ಭಾರತ್ ಸಂಕಲ್ಪ ಅಭಿಯಾನಕ್ಕಾಗಿ ಮಾದಕ ವಸ್ತು ಮುಕ್ತ ಯುವ'ದ ಹಿಂದಿನ ಪ್ರಮುಖ ಉದ್ದೇಶವನ್ನು ವಿವರಿಸಿದ ಅವರು, ವಿಕಸಿತ ಭಾರತವನ್ನು ಸಾಧಿಸಲು ಮೂಲಭೂತವಾಗಿ ದೈಹಿಕವಾಗಿ ಆರೋಗ್ಯಕರ, ಮಾನಸಿಕವಾಗಿ ದೃಢವಾದ ಮತ್ತು ಹೆಚ್ಚು ಆತ್ಮವಿಶ್ವಾಸದ ಯುವ ಪೀಳಿಗೆಯ ಅಗತ್ಯವಿದೆ ಎಂದು ಒತ್ತಿ ಹೇಳಿದರು. "ಇಂದು, ರಾಷ್ಟ್ರವು ವಿಕಸಿತ ಭಾರತದ ಗುರಿಯನ್ನು ನಿಗದಿಪಡಿಸಿರುವುದರಿಂದ, ದೇಶದ ಯುವಜನರು ದೈಹಿಕವಾಗಿ ಮತ್ತು ಮಾನಸಿಕವಾಗಿ ಸದೃಢರಾಗಿರುವುದು, ಆತ್ಮವಿಶ್ವಾಸದಿಂದ ತುಂಬಿರುವುದು ಮತ್ತು ಮಾದಕ ದ್ರವ್ಯಗಳಂತಹ ವಿನಾಶಕಾರಿ ಅಭ್ಯಾಸಗಳಿಂದ ಶಾಶ್ವತವಾಗಿ ದೂರವಿರುವುದು ಅವಶ್ಯವಾಗಿದೆ" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ಅಭಿಯಾನದ ಮೂಲವನ್ನು ಪ್ರತಿಬಿಂಬಿಸಿದ ಪ್ರಧಾನಮಂತ್ರಿಯವರು, ಈ ಉಪಕ್ರಮವನ್ನು ಆರಂಭದಲ್ಲಿ ಹಿಂದಿನ ವರ್ಷ ಪವಿತ್ರ ಭೂಮಿಯಾದ ಕಾಶಿಯಿಂದ ಪ್ರಾಯೋಗಿಕ ಯೋಜನೆಯಾಗಿ ಪ್ರಾರಂಭಿಸಲಾಗಿದೆ ಎಂದರಲ್ಲದೆ ಆ ಬಗ್ಗೆ ತೀವ್ರ ತೃಪ್ತಿ ವ್ಯಕ್ತಪಡಿಸಿದರು. ವೈಜ್ಞಾನಿಕ ಸ್ಪಷ್ಟತೆ, ಆಧ್ಯಾತ್ಮಿಕ ಶಕ್ತಿ ಮತ್ತು ಆಳವಾದ ಸಾಂಸ್ಕೃತಿಕ ಸಮರ್ಪಣೆಯ ವಿಶಿಷ್ಟ ಮಿಶ್ರಣವನ್ನು ಎತ್ತಿ ತೋರಿಸಿದ ಅವರು, ಆಂದೋಲನವನ್ನು ಮುನ್ನಡೆಸುವ ಅದರ ಬೃಹತ್ ವಿಸ್ತರಣೆಯನ್ನು ಉಲ್ಲೇಖಿಸಿದರು. "ಕಾಶಿ ಘೋಷಣೆಯಡಿಯಲ್ಲಿ 125ಕ್ಕೂ ಹೆಚ್ಚು ಆಧ್ಯಾತ್ಮಿಕ ಸಂಸ್ಥೆಗಳು ಮತ್ತು ಹಲವಾರು ಎನ್ಜಿಒಗಳ ಬೆಂಬಲದೊಂದಿಗೆ, ಕಲ್ಯಾಣ-ಚಾಲಿತ ಕಲ್ಪನೆಯು ಈಗ ಯಶಸ್ವಿಯಾಗಿ ರಾಷ್ಟ್ರೀಯ ಯೋಜನೆಯಾಗಿ ಮಾರ್ಪಟ್ಟಿದೆ" ಎಂದು ಶ್ರೀ ಮೋದಿ ಹೇಳಿದರು.

ಪ್ರಧಾನಮಂತ್ರಿಯವರನ್ನು ಸ್ವಾಗತಿಸಿದ ಕೇಂದ್ರ ಯುವ ವ್ಯವಹಾರಗಳು ಮತ್ತು ಕ್ರೀಡೆ ಹಾಗೂ ಕಾರ್ಮಿಕ ಮತ್ತು ಉದ್ಯೋಗ ಸಚಿವರಾದ ಡಾ. ಮನ್ಸುಖ್ ಮಾಂಡವಿಯಾ ಅವರು, "ವಿಕಸಿತ ಭಾರತ ಸಂಕಲ್ಪ ಅಭಿಯಾನಕ್ಕಾಗಿ ನಶಾ ಮುಕ್ತ ಯುವ" ಆರಂಭವು ಪ್ರಧಾನಮಂತ್ರಿಯವರ ವಿಕಸಿತ ಭಾರತ @2047 ದೃಷ್ಟಿಕೋನವನ್ನು ಸಾಕಾರಗೊಳಿಸುವ ಪ್ರಯಾಣದಲ್ಲಿ ಮತ್ತೊಂದು ಮಹತ್ವದ ಮೈಲಿಗಲ್ಲಾಗಿದೆ ಎಂದು ಹೇಳಿದರು. ಪ್ರಧಾನಮಂತ್ರಿಯವರು ಭಾರತದ ಯುವಜನರನ್ನು ನಿರಂತರವಾಗಿ ರಾಷ್ಟ್ರ ನಿರ್ಮಾಣದ ಕೇಂದ್ರ ಭಾಗದಲ್ಲಿ ಇರಿಸಿದ್ದಾರೆ, ಅವರನ್ನು ಅಮೃತ ಕಾಲದ ಪ್ರೇರಕ ಶಕ್ತಿಯಾಗಿ ಕಲ್ಪಿಸಿದ್ದಾರೆ ಎಂದು ಅವರು ಹೇಳಿದರು. ಈ ದೃಷ್ಟಿಕೋನದಿಂದ ಮಾರ್ಗದರ್ಶಿಸಲ್ಪಟ್ಟ ಸರ್ಕಾರವು ಯುವಜನರಿಗೆ ಸ್ವಯಂಸೇವಕ, ನಾಯಕತ್ವ, ಮಾರ್ಗದರ್ಶನ ಮತ್ತು ರಾಷ್ಟ್ರೀಯ ಸೇವೆಯ ಅವಕಾಶಗಳನ್ನು ಒದಗಿಸಲು ಏಕ ಗವಾಕ್ಷಿ ವೇದಿಕೆಯಾಗಿ ಮೈ ಭಾರತ್ ಸ್ಥಾಪಿಸಿತು, ಇದು ದೇಶಾದ್ಯಂತ 2.23 ಕೋಟಿಗೂ ಹೆಚ್ಚು ಯುವಜನರನ್ನು ಸಂಪರ್ಕಿಸುತ್ತದೆ. ಮಾದಕ ದ್ರವ್ಯ ಮುಕ್ತ ಭಾರತಕ್ಕಾಗಿ ಕೆಂಪು ಕೋಟೆಯಿಂದ ಪ್ರಧಾನಮಂತ್ರಿಯವರು ನೀಡಿದ ಕರೆಯನ್ನು ಸ್ಮರಿಸಿದ ಡಾ.ಮಾಂಡವಿಯಾ, ಸುಸ್ಥಿರ ಯುವ ತೊಡಗಿಸಿಕೊಳ್ಳುವಿಕೆಯ ಮೂಲಕ ಮೈ ಭಾರತ್ ಈ ಧ್ಯೇಯವನ್ನು ಸಕ್ರಿಯವಾಗಿ ಮುನ್ನಡೆಸುತ್ತಿದೆ ಎಂದು ಹೇಳಿದರು.ಪ್ರಮುಖ ಆಧ್ಯಾತ್ಮಿಕ ಸಂಸ್ಥೆಗಳೊಂದಿಗೆ ಸಮಾಲೋಚನೆಗಳ ಮೂಲಕ ವಿಕಸನಗೊಂಡ 100 ವಾರಗಳ ಕ್ರಿಯಾ ಯೋಜನೆ ಮತ್ತು ಕಾಶಿ ಘೋಷಣೆಯು ಮಾದಕ ದ್ರವ್ಯ ಸೇವನೆಯ ವಿರುದ್ಧ ರಾಷ್ಟ್ರವ್ಯಾಪಿ ಜನಾಂದೋಲನಕ್ಕೆ ಅಡಿಪಾಯ ಹಾಕಿದೆ ಎಂದು ಅವರು ಒತ್ತಿ ಹೇಳಿದರು. ಅಭಿಯಾನದ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದ ಅವರು, ಪ್ರಧಾನಮಂತ್ರಿಯವರ ನಾಯಕತ್ವದಲ್ಲಿ ಜನರ ಭಾಗವಹಿಸುವಿಕೆಯು ಸ್ವಚ್ಛ ಭಾರತ, ಫಿಟ್ ಇಂಡಿಯಾ ಮತ್ತು ಇತರ ಹಲವಾರು ರಾಷ್ಟ್ರೀಯ ಆಂದೋಲನಗಳಂತಹ ಉಪಕ್ರಮಗಳನ್ನು ಸಾಮೂಹಿಕ ಯಶಸ್ಸಾಗಿ ಪರಿವರ್ತಿಸಿದಂತೆಯೇ, "ವಿಕಸಿತ ಭಾರತ ಸಂಕಲ್ಪ ಅಭಿಯಾನಕ್ಕಾಗಿ ನಶಾ ಮುಕ್ತ ಯುವ" ಕೂಡಾ ಅದೇ ರೀತಿ ಆರೋಗ್ಯಕರ, ಮಾದಕ ದ್ರವ್ಯ ಮುಕ್ತ ಮತ್ತು ಅಭಿವೃದ್ಧಿ ಹೊಂದಿದ ಭಾರತವನ್ನು ನಿರ್ಮಿಸಲು ಕೊಡುಗೆ ನೀಡಲು ಲಕ್ಷಾಂತರ ಯುವ ಭಾರತೀಯರನ್ನು ಪ್ರೇರೇಪಿಸುತ್ತದೆ ಎಂದು ಹೇಳಿದರು. ಕೇಂದ್ರ ಯುವಜನ ವ್ಯವಹಾರಗಳು ಮತ್ತು ಕ್ರೀಡಾ ಸಹಾಯಕ  ಸಚಿವೆ ಶ್ರೀಮತಿ ರಕ್ಷಾ ನಿಖಿಲ್ ಖಡ್ಸೆ, 26 ರಾಜ್ಯಗಳ ರಾಜ್ಯಪಾಲರು ಮತ್ತು 11 ರಾಜ್ಯಗಳ ಮುಖ್ಯಮಂತ್ರಿಗಳು ರಾಷ್ಟ್ರವ್ಯಾಪಿ ಆಂದೋಲನದಲ್ಲಿ ಭಾಗವಹಿಸಿದರು.

ಮಾದಕ ದ್ರವ್ಯ ವಿರೋಧಿ ಪ್ರತಿಜ್ಞೆ ಸ್ವೀಕರಿಸಿದ ಲಕ್ಷಾಂತರ ಯುವಜನರನ್ನು ಶ್ಲಾಘಿಸಿದ ಪ್ರಧಾನಮಂತ್ರಿಯವರು, ಶಾಲೆಗಳು, ಕಾಲೇಜುಗಳು ಮತ್ತು ಸಮುದಾಯಗಳಲ್ಲಿ ಮಾದಕ ದ್ರವ್ಯ ಮುಕ್ತ ಜೀವನದ ಸಂದೇಶವನ್ನು ಸಕ್ರಿಯವಾಗಿ ಪ್ರಸಾರ ಮಾಡುವಾಗ ವೈಯಕ್ತಿಕ ಸಂಯಮವನ್ನು ಕಾಪಾಡಿಕೊಳ್ಳುವ ಅವರ ಗಂಭೀರ ಬದ್ಧತೆಯನ್ನು ಶ್ಲಾಘಿಸಿದರು. ಅಭಿಯಾನದ ಮಹತ್ವಾಕಾಂಕ್ಷೆಯ 100 ವಾರಗಳ ಮಾರ್ಗಸೂಚಿಯನ್ನು ವಿವರಿಸುತ್ತಾ, ಅದು ಹೇಗೆ ಮುಂಬರುವ ಪ್ರತಿ ಭಾನುವಾರವು ಹೊಸ ಭಾಗವಹಿಸುವವರನ್ನು ನಿರಂತರವಾಗಿ ತೊಡಗಿಸಿಕೊಳ್ಳಲು ಕಲೆ, ಸಂಸ್ಕೃತಿ, ಕ್ರೀಡೆ ಮತ್ತು ಧ್ಯಾನವನ್ನು ಒಳಗೊಂಡ ಅದಕ್ಕೆಂದೇ  ಮೀಸಲಾದ ಚಟುವಟಿಕೆಗಳನ್ನು ಒಳಗೊಂಡಿರುತ್ತದೆ ಎಂಬುದನ್ನು ಅವರು ವಿವರಿಸಿದರು. "ಮುಂಬರುವ 100 ಭಾನುವಾರಗಳು ಸಂಪೂರ್ಣವಾಗಿ ಮಾದಕ ದ್ರವ್ಯ ಮುಕ್ತ ಭಾರತದ ದಿಕ್ಕಿನಲ್ಲಿ 100 ಬಲವಾದ ಹೆಜ್ಜೆಗಳಾಗಲಿವೆ" ಎಂದು ಶ್ರೀ ಮೋದಿ ದೃಢಪಡಿಸಿದರು.

ವಿದ್ಯಾರ್ಥಿಗಳು, ಎನ್ಎಸ್ಎಸ್ ಸದಸ್ಯರು ಮತ್ತು ಮೈ ಭಾರತ್ ಸ್ವಯಂಸೇವಕರ ಬೃಹತ್ ಆನ್ಲೈನ್ ಸಭೆಯನ್ನುದ್ದೇಶಿಸಿ ಮಾತನಾಡಿದ ಪ್ರಧಾನಮಂತ್ರಿಯವರು, ದೇಶದ ಯುವಜನರು ಪ್ರದರ್ಶಿಸಿದ ಆಳವಾದ ಜಾಗೃತಿ, ಸಂವೇದನಾಶೀಲತೆ ಮತ್ತು ಗಂಭೀರ ಸಮರ್ಪಣೆಯ ಬಗ್ಗೆ ಅಪಾರ ಹೆಮ್ಮೆ ವ್ಯಕ್ತಪಡಿಸಿದರು. ಯುವ ಜನಸಂಖ್ಯಾ ಬಾಹುಳ್ಯವನ್ನು (ಜನ ಸಂಖ್ಯಾಶಾಸ್ತ್ರವನ್ನು) ಭಾರತದ 'ಅಮೃತ್ ಪೀಳಿಗೆ' ಎಂದು ಬಿಂಬಿಸಿದ ಅವರು, ರಾಷ್ಟ್ರವನ್ನು ಅದರ 2047ರ ಅಭಿವೃದ್ಧಿ ಗುರಿಗಳತ್ತ ಮಾರ್ಗದರ್ಶನ ಮಾಡಲು ಅವರ ಶಕ್ತಿ, ಕಲ್ಪನೆ ಮತ್ತು ಪ್ರತಿಭೆ ಅತ್ಯಗತ್ಯ ಎಂದು ನೆನಪಿಸಿದರು. "ದೇಶದ ಅಂತಿಮ ಭವಿಷ್ಯಕ್ಕಾಗಿ ಮತ್ತು ನಿಮ್ಮ ಸ್ವಂತ ಜೀವನಕ್ಕಾಗಿ, ನಿಮ್ಮನ್ನು ವ್ಯಸನದಿಂದ ಮುಕ್ತವಾಗಿರಿಸಿಕೊಳ್ಳುವುದು ಸಂಪೂರ್ಣವಾಗಿ ಅತ್ಯಗತ್ಯ" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ನವೋದ್ಯಮಗಳು (ಸ್ಟಾರ್ಟ್ಅಪ್ಗಳು), ಕೃತಕ ಬುದ್ಧಿಮತ್ತೆ, ಕ್ರೀಡೆ ಮತ್ತು ಬಾಹ್ಯಾಕಾಶ ಪರಿಶೋಧನೆಯಲ್ಲಿ ಇಂದಿನ ಯುವಜನರ ಅದ್ಭುತ ಸಾಧನೆಗಳನ್ನು ಮಾದಕ ದ್ರವ್ಯ ಸೇವನೆಯ ವಿನಾಶಕಾರಿ ಪರಿಣಾಮಗಳೊಂದಿಗೆ ಹೋಲಿಸುತ್ತಾ, ವ್ಯಸನವು ಹೇಗೆ ಗಮನವನ್ನು ಹಳಿ ತಪ್ಪಿಸುತ್ತದೆ ಮತ್ತು ಕನಸುಗಳನ್ನು ನಾಶಪಡಿಸುತ್ತದೆ ಎಂಬುದರ ಬಗ್ಗೆ ಸ್ಪಷ್ಟ ಎಚ್ಚರಿಕೆ ನೀಡಿದರು. ಪೋಷಕರ ಕನಸುಗಳನ್ನು ನುಚ್ಚುನೂರು ಮಾಡುವುದರಿಂದ ಹಿಡಿದು ಹಿರಿಯರಿಗೆ ದೈನಂದಿನ ಸಂಕಟವನ್ನು ಉಂಟುಮಾಡುವವರೆಗೆ ಕುಟುಂಬಗಳಿಗೆ ಉಂಟಾಗುವ ಆಳವಾದ ಹಾನಿಯನ್ನು ವಿವರಿಸಿದ ಅವರು, ವ್ಯಾಪಕ ಸಾಮಾಜಿಕ ಹೊರೆಯ ಬಗ್ಗೆ ಒತ್ತಿ ಹೇಳಿದರು. "ಒಂದು ಕುಟುಂಬ ಅಥವಾ ಸಮಾಜದಲ್ಲಿ ಈ ವಿನಾಶ ಸಂಭವಿಸಿದಾಗ, ಇಡೀ ರಾಷ್ಟ್ರದ ಒಟ್ಟಾರೆ ಶಕ್ತಿಯೂ ಮೂಲಭೂತವಾಗಿ ದುರ್ಬಲಗೊಳ್ಳುತ್ತದೆ" ಎಂದು ಶ್ರೀ ಮೋದಿ ಹೇಳಿದರು.

ಮಾದಕ ದ್ರವ್ಯಗಳ ಮೋಸದ ಸ್ವರೂಪದ ಬಗ್ಗೆ ಯುವಜನರಿಗೆ ಎಚ್ಚರಿಕೆ ನೀಡಿದ ಪ್ರಧಾನಮಂತ್ರಿ, ಮಾದಕ ದ್ರವ್ಯಗಳು ಒದಗಿಸುವ ತಾತ್ಕಾಲಿಕ ಅಮಲಿನ ಪರಿಣಾಮವು ಅಂತಿಮವಾಗಿ ಅವರ ವೃತ್ತಿ ಮತ್ತು ಕುಟುಂಬ ಜೀವನವನ್ನು ಶಾಶ್ವತವಾಗಿ ಕುಸಿಯುವಂತೆ ಮಾಡುತ್ತದೆ ಎಂದು ಒತ್ತಿ ಹೇಳಿದರು. ಶ್ರೀ ಗುರು ಗ್ರಂಥ ಸಾಹಿಬ್ನ ನಿರ್ದಿಷ್ಟ ಬೋಧನೆಗಳನ್ನು ಒಳಗೊಂಡಂತೆ ಭಾರತೀಯ ಸಂಸ್ಕೃತಿ ಮತ್ತು ಆಧ್ಯಾತ್ಮಿಕ ನಾಯಕರ ಆಳವಾದ ಜ್ಞಾನವನ್ನು/ಅರಿವನ್ನು  ಉಲ್ಲೇಖಿಸಿದ ಅವರು, ಮನಸ್ಸನ್ನು ಬದಲಾಯಿಸುವ ಚಿತ್ತ ಚಾಂಚಲ್ಯದ ವಸ್ತುಗಳ ಐತಿಹಾಸಿಕ ಸಾಮಾಜಿಕ ತಿರಸ್ಕಾರವನ್ನು ಎತ್ತಿ ತೋರಿಸಿದರು. "ನಾವು ಯಾವುದೇ ಸಂದರ್ಭದಲ್ಲೂ ಮಾದಕ ದ್ರವ್ಯಕ್ಕೆ ಯಾವುದೇ ರೀತಿಯ ಸಾಮಾಜಿಕ ಸ್ವೀಕಾರವನ್ನು ನೀಡಬಾರದು" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ಮಾದಕ ದ್ರವ್ಯ ವ್ಯಸನದಿಂದ ಮುಕ್ತರಾಗಲು/ಚೇತರಿಕೆಗೆ ಲಭ್ಯವಿರುವ ಸಮಗ್ರ ಬೆಂಬಲ ವ್ಯವಸ್ಥೆಗಳನ್ನು ವಿವರಿಸಿದ ಪ್ರಧಾನಮಂತ್ರಿಯವರು, ವ್ಯಸನವನ್ನು ನಿವಾರಿಸುವಲ್ಲಿ ಸಾಮಾಜಿಕ ಸಹಕಾರ, ಯೋಗ, ಧ್ಯಾನ ಮತ್ತು ಆಧುನಿಕ ಪುನರ್ವಸತಿ ಕೇಂದ್ರಗಳ ಪರಿಣಾಮಕಾರಿತ್ವವನ್ನು ಎತ್ತಿ ತೋರಿಸಿದರು. ಸಾಮಾಜಿಕ ಪ್ರತಿಷ್ಠೆಗೆ ಸಂಬಂಧಿಸಿದ ತಪ್ಪುದಾರಿಗೆಳೆಯುವ ಕಳವಳಗಳಿಗಿಂತ ವೈದ್ಯಕೀಯ ಮಧ್ಯಪ್ರವೇಶಕ್ಕೆ/ಹಸ್ತಕ್ಷೇಪಕ್ಕೆ ಆದ್ಯತೆ ನೀಡುವಂತೆ ಕುಟುಂಬಗಳನ್ನು ಒತ್ತಾಯಿಸಿದ ಅವರು, ದುರ್ಬಲ ಮಕ್ಕಳು ಬಲೆಗೆ ಬೀಳುವುದನ್ನು ತಡೆಯಲು ಮುಕ್ತ ಕೌಟುಂಬಿಕ  ಸಂವಹನದ ಸಂಸ್ಕೃತಿಯನ್ನು ಪ್ರತಿಪಾದಿಸಿದರು. "ಯುವಜನರು ತಪ್ಪಾಗಿ ವ್ಯಸನಕ್ಕೆ ಒಳಗಾಗಿದ್ದರೆ, ಅವರ ಎಲ್ಲಾ ಮಾರ್ಗಗಳು ಶಾಶ್ವತವಾಗಿ ಮುಚ್ಚಲ್ಪಟ್ಟಿವೆ ಎಂದು ಅರ್ಥವಲ್ಲ" ಎಂದು ಶ್ರೀ ಮೋದಿ ದೃಢಪಡಿಸಿದರು.

ಶೈಕ್ಷಣಿಕ ವೃತ್ತಿಪರರಿಗೆ ನಿರ್ದಿಷ್ಟ ಮನವಿ ಮಾಡಿದ ಪ್ರಧಾನಮಂತ್ರಿಯವರು, ಕಾಲೇಜು ಮತ್ತು ವಿಶ್ವವಿದ್ಯಾಲಯದ ಪ್ರಾಧ್ಯಾಪಕರು ತಮ್ಮ ನಿಯಮಿತ ಪಠ್ಯಕ್ರಮದಲ್ಲಿ ಮಾದಕ ದ್ರವ್ಯಗಳ ಅಪಾಯಗಳ ಬಗ್ಗೆ ಚರ್ಚೆಗಳನ್ನು ಸಕ್ರಿಯವಾಗಿ ಸಂಯೋಜಿಸಬೇಕು ಮತ್ತು ತಮ್ಮ ಕ್ಯಾಂಪಸ್ ಗಳಲ್ಲಿ ಮಾದಕ ದ್ರವ್ಯ ವಿರೋಧಿ ಆಂದೋಲನಗಳನ್ನು ಪ್ರಾರಂಭಿಸಬೇಕು ಎಂದು ಆಗ್ರಹಿಸಿದರು. ವ್ಯಸನದಿಂದ ಚೇತರಿಸಿಕೊಳ್ಳುವವರತ್ತ ಗಮನ ಹರಿಸಿದ ಅವರು, ಈ ವ್ಯಕ್ತಿಗಳಿಗೆ ಸಾಮಾಜಿಕ ಗೌರವ ಮತ್ತು ಎರಡನೇ ಅವಕಾಶಗಳು ಲಭ್ಯವಾಗಬೇಕು ಎಂದು ಕರೆ ನೀಡಿದರಲ್ಲದೆ, ಅವರ ಗತಕಾಲಕ್ಕೆ ಸಂಬಂಧಿಸಿದ ಕಳಂಕವನ್ನು ಸಂಪೂರ್ಣವಾಗಿ ತಿರಸ್ಕರಿಸಬೇಕು ಎಂದರು. "ವ್ಯಸನದ ವಿರುದ್ಧ ಹೋರಾಡುವ ಯುವಜನರು ದುರ್ಬಲರಲ್ಲ; ಅವರು ನಿಜವಾದ ಯೋಧರು, ಅವರ ರೋಮಾಂಚಕ  ಧೈರ್ಯವೇ ಅವರ ನಿಜವಾದ ಗುರುತು" ಎಂದು ಶ್ರೀ ಮೋದಿ ಹೇಳಿದರು.

ತಮ್ಮ ಮಾತುಗಳನ್ನು ಮುಕ್ತಾಯಗೊಳಿಸುವಾಗ ಅವರು ಅಭೂತಪೂರ್ವ ರಾಷ್ಟ್ರವ್ಯಾಪಿ ದಾಳಿಗಳು, ಸಾವಿರಾರು ಕೋಟಿ ರೂ.ಗಳ ಬೃಹತ್ ವಶಪಡಿಸಿಕೊಳ್ಳುವಿಕೆ ಮತ್ತು ಮಾದಕವಸ್ತು ಮಾರಾಟಗಾರರು ಮತ್ತು ಕಳ್ಳಸಾಗಾಣಿಕೆದಾರರನ್ನು ಗುರಿಯಾಗಿಸಿಕೊಂಡು ಹೆಚ್ಚುತ್ತಿರುವ ಬಂಧನ ಪ್ರಮಾಣವನ್ನು ಉಲ್ಲೇಖಿಸಿದರು. ಈ ನಿರ್ಣಾಯಕ ಸಮರದಲ್ಲಿ ಸರ್ಕಾರವು ಯುವಜನರೊಂದಿಗೆ ದೃಢವಾಗಿ ನಿಲ್ಲುತ್ತದೆ ಎಂದು ಪ್ರಧಾನಮಂತ್ರಿ ಭರವಸೆ ನೀಡಿದರು. ಯುವ ಪೀಳಿಗೆಯ ಸ್ಥಿತಿಸ್ಥಾಪಕತ್ವದ ಬಗ್ಗೆ ಅಚಲವಾದ ನಂಬಿಕೆಯನ್ನು ವ್ಯಕ್ತಪಡಿಸಿದ ಅವರು, ರಾಷ್ಟ್ರೀಯ ಉಪಕ್ರಮವು ಅತ್ಯಂತ ಯಶಸ್ವಿ ಫಲಿತಾಂಶವನ್ನು ಒದಗಿಸುವುದೆಂದು  ಭವಿಷ್ಯ ನುಡಿದರು. "ನಮ್ಮ ಯುವಜನರು ವ್ಯಸನದಿಂದ ಮುಕ್ತರಾಗಿರುವ ಮೂಲಕ ತಮ್ಮ ಶಕ್ತಿಯನ್ನು ರಕ್ಷಿಸುತ್ತಾರೆ ಮತ್ತು ವಿಕಸಿತ ಭಾರತದ ನಿರ್ಣಯಗಳನ್ನು ಮುಂದೆ ಕೊಂಡೊಯ್ಯುತ್ತಾರೆ ಎಂಬ ವಿಶ್ವಾಸ ನನಗಿದೆ" ಎಂದು ಶ್ರೀ ಮೋದಿ ದೃಢವಾಗಿ ನುಡಿದರು.

*****