స్వదేశీ పరిజ్ఞానంతో అభివృద్ధి చేసిన ఎక్స్‌ట్రీమ్ వెదర్ గ్రేడ్ (ఎక్స్‌డబ్ల్యూజీ) డీజిలును సైనిక దళాల ప్రధానాధికారి (సీవోఏఎస్) జనరల్ ధీరజ్ సేథ్ ఈ రోజు న్యూఢిల్లీలో ఆవిష్కరించారు. భారత ఆర్మీ, చమురు మార్కెటింగ్ సంస్థలు సంయుక్తంగా తయారు చేసిన ఈ ప్రత్యేక ఇంధనం.. కఠినమైన వాతావరణ పరిస్థితుల్లో రక్షణ, రవాణా వాహనాల గమనాన్ని, భద్రతను, కార్యాచరణ సామర్థ్యాన్ని మెరుగుపరుస్తుంది. అత్యంత ఎత్తయిన ప్రాంతాలు, అత్యంత శీతల ప్రాంతాల్లో ఈ టెక్నాలజీకి విస్తృతమైన పౌర ప్రయోజనాలున్నాయి. అలాగే ఆత్మనిర్భర భారత్ దిశగా సాధించిన ముఖ్యమైన విజయాన్ని సూచిస్తుంది.

అత్యల్ప ఉష్ణోగ్రతల వద్ద సాధారణ డీజిలు చిక్కగా మారి, ఇంధన ఫిల్టర్లను మూసుకుపోయేలా చేస్తుంది. ఫలితంగా అధిక ఎత్తుల్లో, మంచు ప్రాంతాల్లో వాహనాల పనితీరు ప్రభావితమవుతుంది. ఈ సవాలును ఎక్స్‌డబ్ల్యూజీ డీజిల్ అధిగమిస్తుంది. మైనస్ 42 డిగ్రీల సెల్సియస్ లాంటి అత్యల్ప ఉష్ణోగ్రతల వద్ద సైతం ఇది ప్రభావవంతంగా పనిచేస్తుంది. బీఎస్-VI ప్రమాణాలు, ఐఎస్ 1460:2025 ప్రత్యేకతలకు అనుగుణంగా ఉండటంతో.. సైన్యంలో ఇప్పటికే వినియోగిస్తున్న పాత వాహనాల్లో సైతం దీనిని ఉపయోగించవచ్చు. దీనికోసం ఎలాంటి ఇంజిన్ మార్పులు లేదా రీ-హోమోలోగేషన్ అవసరం లేదు.

ఈ సందర్భంగా సీవోఏఎస్ ప్రసంగించారు. అత్యంత కఠినమైన వాతావరణ పరిస్థితుల్లో రవాణా, కార్యాచరణ సన్నద్ధత, మిషన్ విశ్వసనీయతను మెరుగుపరిచే విప్లవాత్మక స్వదేశీ ఆవిష్కరణగా ఎక్స్‌డబ్ల్యూజీ డీజిలును వర్ణించారు. తీవ్రమైన చలికాలాల్లో వాహనాలు పనిచేయడానికి గతంలో అనుసరించిన పద్ధతులను ఈ ఇంధనం తొలగిస్తుందన్నారు. తద్వారా సిబ్బంది భద్రత, మనోధైర్యం మెరుగుతుందని వెల్లడించారు. ఏడాది వ్యవధిలోనే పరిష్కారాన్ని అభివృద్ధి చేసిన భారత ఆర్మీ బృందం, చమురు మార్కెటింగ్ సంస్థలను సీవోఏఎస్ అభినందించారు. అలాగే ఈ భాగస్వామ్యం... వైవిధ్యమైన కార్యాచరణ అవసరాల కోసం ప్రత్యేకమైన ఇంధనాలను రూపొందిస్తుందనే విశ్వాసాన్ని వ్యక్తం చేశారు.

సైనికపరమైన అవసరాలకు మాత్రమే కాకుండా... కఠినమైన వాతావరణ పరిస్థితుల్లో పనిచేసే వాహనాలు, పరికరాల విశ్వసనీయతను, భద్రతను మెరుగుపరిచి అత్యంత ఎత్తయిన, అత్యల్ప ఉష్ణోగ్రతలున్న ప్రదేశాల్లో నివసించే పౌరులకు కూడా ఈ సాంకేతిక పరిజ్ఞానం ప్రయోజనాన్ని చేకూరుస్తుంది.

***