ਕੇਂਦਰੀ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰੀ, ਸ਼੍ਰੀ ਜਗਤ ਪ੍ਰਕਾਸ਼ ਨੱਡਾ ਨੇ ਅੱਜ ਆਉਣ ਵਾਲੀ NEET UG ਕਾਊਂਸਲਿੰਗ 2026 ਦੀਆਂ ਤਿਆਰੀਆਂ ਦੀ ਸਮੀਖਿਆ ਕੀਤੀ। ਉਨ੍ਹਾਂ ਨੇ ਦੇਸ਼ ਭਰ ਵਿੱਚ ਅੰਡਰਗ੍ਰੈਜੁਏਟ ਮੈਡੀਕਲ ਕੋਰਸਾਂ ਲਈ ਦਾਖਲੇ ਦੀ ਪ੍ਰਕਿਰਿਆ ਨੂੰ ਪਾਰਦਰਸ਼ੀ, ਯੋਗਤਾ-ਅਧਾਰਿਤ, ਤਕਨਾਲੋਜੀ-ਯੋਗ ਅਤੇ ਵਿਦਿਆਰਥੀ-ਅਨੁਕੂਲ ਬਣਾਉਣ ਲਈ ਸਰਕਾਰ ਦੀ ਵਚਨਬੱਧਤਾ ਨੂੰ ਦੁਹਰਾਇਆ। ਇਸ ਸਮੀਖਿਆ ਵਿੱਚ ਮੈਡੀਕਲ ਕਾਊਂਸਲਿੰਗ ਕਮੇਟੀ (MCC) ਅਤੇ ਡਾਇਰੈਕਟੋਰੇਟ ਜਨਰਲ ਆਫ ਹੈਲਥ ਸਰਵਿਸਿਸ (DGHS) ਦੇ ਦਾਇਰੇ ਵਿੱਚ ਆਉਣ ਵਾਲੇ ਆਲ ਇੰਡੀਆ ਕੋਟਾ (AIQ) ਅਤੇ ਹੋਰ ਸੀਟਾਂ ਲਈ ਕਾਊਂਸਲਿੰਗ ਦੀਆਂ ਤਿਆਰੀਆਂ ਦਾ ਮੁਲਾਂਕਣ ਕੀਤਾ ਗਿਆ।

ਸਮੀਖਿਆ ਦੌਰਾਨ, ਕੇਂਦਰੀ ਮੰਤਰੀ ਨੇ ਮੈਡੀਕਲ ਕਾਊਂਸਲਿੰਗ ਕਮੇਟੀ (ਐੱਮਸੀਸੀ), ਡਾਇਰੈਕਟੋਰੇਟ ਜਨਰਲ ਆਫ ਹੈਲਥ ਸਰਵਿਸਿਸ (ਡੀਜੀਐੱਚਐੱਸ) ਅਤੇ ਸਲਾਹ-ਮਸ਼ਵਰੇ ਦੀ ਪ੍ਰਕਿਰਿਆ ਵਿੱਚ ਸ਼ਾਮਲ ਹੋਰ ਹਿੱਸੇਦਾਰਾਂ ਦੀਆਂ ਤਿਆਰੀਆਂ ਦਾ ਮੁਲਾਂਕਣ ਕੀਤਾ। ਉਨ੍ਹਾਂ ਨੇ ਕਾਊਂਸਲਿੰਗ ਪ੍ਰੋਗਰਾਮ, ਆਈਟੀ ਬੁਨਿਆਦੀ ਢਾਂਚੇ, ਸਾਈਬਰ ਸੁਰੱਖਿਆ ਦੀ ਤਿਆਰੀਆਂ, ਸ਼ਿਕਾਇਤ ਨਿਵਾਰਣ ਵਿਧੀ, ਉਮੀਦਵਾਰਾਂ ਦੀ ਸਹੂਲਤ ਦੇ ਉਪਾਵਾਂ ਅਤੇ ਭਾਗੀਦਾਰ ਸੰਸਥਾਵਾਂ ਨਾਲ ਤਾਲਮੇਲ ਦੀ ਸਮੀਖਿਆ ਕੀਤੀ।

ਸ਼੍ਰੀ ਨੱਡਾ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਕਾਊਂਸਲਿੰਗ ਦੀ ਪ੍ਰਕਿਰਿਆ ਪਾਰਦਰਸ਼ੀ, ਨਿਰਪੱਖ ਅਤੇ ਯੋਗਤਾ-ਅਧਾਰਿਤ ਹੋਣੀ ਚਾਹੀਦੀ ਹੈ, ਨਾਲ ਹੀ ਇਹ ਯਕੀਨੀ ਬਣਾਇਆ ਜਾਣਾ ਚਾਹੀਦਾ ਹੈ ਕਿ ਵਿਦਿਆਰਥੀਆਂ ਨੂੰ ਕੋਈ ਪਰੇਸ਼ਾਨੀ ਨਾ ਹੋਵੇ।  ਉਨ੍ਹਾਂ ਨੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤਾ ਕਿ ਉਹ ਮਜ਼ਬੂਤ ਤਕਨੀਕੀ ਸਹਾਇਤਾ ਬਣਾਈ ਰੱਖਣ, ਸ਼ਿਕਾਇਤਾਂ ਦੇ ਤੁਰੰਤ ਨਿਪਟਾਰੇ ਨੂੰ ਯਕੀਨੀ ਬਣਾਉਣ ਅਤੇ ਦਾਖਲਾ ਪ੍ਰਕਿਰਿਆ ਦੌਰਾਨ ਕਾਊਂਸਲਿੰਗ ਪੋਰਟਲ ਨੂੰ ਸੁਚਾਰੂ ਸੰਚਾਲਨ ਨੂੰ ਸਰਲ ਬਣਾਉਣ। ਉਨ੍ਹਾਂ ਨੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤਾ ਕਿ ਉਮੀਦਵਾਰਾਂ ਦੀਆਂ ਚਿੰਤਾਵਾਂ ਨੂੰ ਦੂਰ ਕਰਨ ਲਈ ਹਰ ਸੰਭਵ ਸਰਗਰਮ ਕਦਮ ਚੁੱਕੇ ਜਾਣ।

ਕੇਂਦਰੀ ਮੰਤਰੀ ਨੂੰ ਦੱਸਿਆ ਗਿਆ ਕਿ NEET UG ਕਾਊਂਸਲਿੰਗ 2026 ਵਿੱਚ ਪਾਰਦਰਸ਼ਿਤਾ ਵਧਾਉਣ, ਪਹੁੰਚ ਵਿੱਚ ਸੁਧਾਰ ਕਰਨ ਅਤੇ ਦਾਖਲੇ ਦੀ ਪ੍ਰਕਿਰਿਆ ਨੂੰ ਸਰਲ ਬਣਾਉਣ ਦੇ ਉਦੇਸ਼ ਨਾਲ ਕਈ ਪ੍ਰਮੁੱਖ ਤਕਨਾਲੋਜੀ-ਅਧਾਰਿਤ ਅਤੇ ਵਿਦਿਆਰਥੀ-ਕੇਂਦ੍ਰਿਤ ਸੁਧਾਰ ਪੇਸ਼ ਕੀਤੇ ਗਏ ਹਨ।

ਪ੍ਰਮੁੱਖ ਸੁਧਾਰਾਂ ਵਿੱਚੋਂ ਇੱਕ ਹੈ ਇੱਕ ਵਾਰ ਨਿਜੀ ਤੌਰ ‘ਤੇ ਰਿਪੋਰਟਿੰਗ ਦੀ ਵਿਵਸਥਾ ਨੂੰ ਲਾਗੂ ਕਰਨਾ, ਜਿਸ ਨਾਲ ਉਮੀਦਵਾਰਾਂ ਨੂੰ ਵਾਰ-ਵਾਰ ਆਉਣ-ਜਾਣ ਦੀ ਜ਼ਰੂਰਤ ਵਿੱਚ ਕਾਫ਼ੀ ਕਮੀ ਆਵੇਗੀ। ਸੀਟ ਅਲਾਟਮੈਂਟ ਤੋਂ ਬਾਅਦ, ਉਮੀਦਵਾਰ ਔਨਲਾਈਨ ਮੋਡ ਰਾਹੀਂ ਆਪਣੀ ਸਹਿਮਤੀ ਦਰਜ ਕਰਵਾ ਸਕਣਗੇ, ਜਿਸ ਲਈ ਉਹ ਫ੍ਰੀਜ਼ ਜਾਂ ਫਲੋਟ ਵਿਕਲਪ ਚੁਣ ਸਕਦੇ ਹਨ।

ਜੋ ਉਮੀਦਵਾਰ ਫ੍ਰੀਜ਼ ਵਿਕਲਪ ਦੀ ਚੋਣ ਕਰਦੇ ਹਨ, ਉਨ੍ਹਾਂ ਨੂੰ ਤੈਅ ਸਮੇਂ-ਸੀਮਾ ਅੰਦਰ ਆਪਣੇ ਅਲਾਟ ਕੀਤੇ ਸੰਸਥਾਨ ਵਿੱਚ ਜਾ ਕੇ ਦਾਖਲੇ ਸਬੰਧੀ ਪ੍ਰਕਿਰਿਆ ਪੂਰੀ ਕਰਨੀ ਹੋਵੇਗੀ। ਇਸ ਵਿੱਚ ਮੂਲ ਦਸਤਾਵੇਜ਼ਾਂ ਦੀ ਤਸਦੀਕ ਅਤੇ ਦਾਖਲਾ ਫੀਸ ਦਾ ਭੁਗਤਾਨ ਸ਼ਾਮਲ ਹੈ। 

ਜਿਹੜੇ ਉਮੀਦਵਾਰ ਅਪਗ੍ਰੇਡੇਸ਼ਨ ਲਈ ਬਾਅਦ ਦੇ ਰਾਊਂਡ ਵਿੱਚ ਹਿੱਸਾ ਲੈਣ ਲਈ ਫਲੋਟ ਵਿਕਲਪ ਦੀ ਚੋਣ ਕਰਦੇ ਹਨ, ਉਹ ਨਿਰਧਾਰਿਤ ਸਮੇਂ ਸੀਮਾ ਦੇ ਅੰਦਰ ਔਨਲਾਈਨ ਮੋਡ ਰਾਹੀਂ ਦਸਤਾਵੇਜ਼ ਤਸਦੀਕ ਸਮੇਤ ਦਾਖਲੇ ਸਬੰਧੀ ਪ੍ਰਕਿਰਿਆਵਾਂ ਨੂੰ ਪੂਰਾ ਕਰ ਸਕਣਗੇ। ਇਸ ਮਿਆਦ  ਦੌਰਾਨ, ਉਨ੍ਹਾਂ ਨੂੰ ਅਲਾਟ ਕੀਤੇ ਗਏ ਸੰਸਥਾਨ ਵਿੱਚ ਫਿਜੀਕਲੀ ਮੌਜੂਦ ਹੋਣ, ਅਸਲ ਦਸਤਾਵੇਜ਼ ਜਮ੍ਹਾਂ ਕਰਨ ਜਾਂ ਦਾਖਲਾ ਫੀਸ ਦਾ ਭੁਗਤਾਨ ਕਰਨ ਦੀ ਜ਼ਰੂਰਤ ਨਹੀਂ ਹੋਵੇਗੀ। ਬਾਅਦ ਦੇ ਕਾਊਂਸਲਿੰਗ ਰਾਊਂਡ ਵਿੱਚ ਹਿੱਸਾ ਲੈਣ ਦੌਰਾਨ ਉਨ੍ਹਾਂ ਦੀ ਪ੍ਰੋਵਿਜ਼ਨਲ ਐਡਮਿਸ਼ਨ ਵੈਧ ਰਹੇਗਾ।

ਤੀਜੇ ਪੜਾਅ ਦੀ ਕਾਊਂਸਲਿੰਗ ਤੱਕ ਅਪਗ੍ਰੇਡੇਸ਼ਨ ਦੀ ਸਹੂਲਤ ਉਪਲਬਧ ਰਹੇਗੀ। ਤੀਜੇ ਪੜਾਅ ਦੀ ਕਾਊਂਸਲਿੰਗ ਦੇ ਪੂਰਾ ਹੋਣ ਤੋਂ ਬਾਅਦ, ਜਿਨ੍ਹਾਂ ਉਮੀਦਵਾਰਾਂ ਨੂੰ ਸੀਟਾਂ ਅਲਾਟ ਕੀਤੀਆਂ ਗਈਆਂ ਹਨ, ਉਨ੍ਹਾਂ ਨੂੰ ਅਸਲ ਦਸਤਾਵੇਜ਼ਾਂ ਦੀ ਤਸਦੀਕ, ਦਾਖਲਾ ਫੀਸ ਦੇ ਭੁਗਤਾਨ ਅਤੇ ਸੰਸਥਾਗਤ ਰਸਮੀ ਕਾਰਵਾਈਆਂ ਨੂੰ ਪੂਰਾ ਕਰਨ ਲਈ ਆਪਣੇ-ਆਪਣੇ ਅਦਾਰਿਆਂ ਵਿੱਚ ਵਿਅਕਤੀਗਤ ਤੌਰ 'ਤੇ ਹਾਜ਼ਰ ਹੋਣਾ ਪਵੇਗਾ।

ਸੋਧਿਆ ਹੋਇਆ ਫ੍ਰੇਮਵਰਕ ਇਹ ਯਕੀਨੀ ਬਣਾਉਂਦਾ ਹੈ ਕਿ ਫਿਜੀਕਲ ਰਿਪੋਰਟਿੰਗ, ਅਸਲ ਦਸਤਾਵੇਜ਼ਾਂ ਦੀ ਤਸਦੀਕ ਅਤੇ ਦਾਖਲਾ ਫੀਸਾਂ ਦਾ ਭੁਗਤਾਨ ਸਿਰਫ਼ ਇੱਕ ਵਾਰ ਹੀ ਕਰਨਾ ਪਵੇ; ਇਸ ਨਾਲ ਗੈਰ ਜ਼ਰੂਰੀ ਯਾਤਰਾ ਘਟਦੀ ਹੈ, ਦਾਖਲੇ ਦੀ ਪ੍ਰਕਿਰਿਆ ਸਰਲ ਹੁੰਦੀ ਹੈ ਅਤੇ ਵਿਦਿਆਰਥੀਆਂ ਨੂੰ ਵਧੇਰੇ ਸਹੂਲਤ ਮਿਲਦੀ ਹੈ।

ਇਸ ਸਾਲ ਸ਼ੁਰੂ ਕੀਤਾ ਗਿਆ ਇੱਕ ਹੋਰ ਮਹੱਤਵਪੂਰਨ ਸੁਧਾਰ ਔਨਲਾਈਨ ਅਸਤੀਫੇ ਦੀ ਸਹੂਲਤ ਹੈ। ਜੋ ਉਮੀਦਵਾਰ ਆਪਣੀ ਅਲਾਟ ਕੀਤੀ ਗਈ ਸੀਟ ਤੋਂ ਅਸਤੀਫਾ ਦੇਣਾ ਚਾਹੁੰਦੇ ਹਨ (ਅਤੇ ਜਿੱਥੇ ਲਾਗੂ ਕਾਊਂਸਲਿੰਗ ਨਿਯਮਾਂ ਅਤੇ ਸਮਾਂ-ਸੀਮਾਵਾਂ ਦੇ ਤਹਿਤ ਇਸ ਦੀ ਮਨਜ਼ੂਰੀ ਹੈ), ਉਹ ਹੁਣ MCC ਕਾਊਂਸਲਿੰਗ ਪੋਰਟਲ ਰਾਹੀਂ ਆਪਣਾ ਅਸਤੀਫਾ ਜਮ੍ਹਾਂ ਕਰ ਸਕਣਗੇ। ਇਸ ਦੇ ਲਈ, ਉਹਨਾਂ ਨੂੰ ਅਲਾਟ ਕੀਤੇ ਗਏ ਇੰਸਟੀਟਿਊਟ ਵਿੱਚ ਵਿਅਕਤੀਗਤ ਤੌਰ 'ਤੇ ਜਾਣ ਦੀ ਜ਼ਰੂਰਤ ਨਹੀਂ ਹੋਵੇਗੀ, ਬਸ਼ਰਤੇ ਇਨਫੋਰਮੇਸ਼ਨ ਬੁਲੇਟਿਨ ਵਿੱਚ ਕੁਝ ਹੋਰ ਨਾ ਕਿਹਾ ਗਿਆ ਹੋਵੇ ਜਾਂ MCC ਨੇ ਕੋਈ ਵੱਖਰੀ ਜਾਣਕਾਰੀ ਨਾ ਦਿੱਤੀ ਹੋਵੇ।

ਇਸ ਸਮੀਖਿਆ ਵਿੱਚ ਪਾਰਦਰਸ਼ਿਤਾ ਅਤੇ ਕੰਮਕਾਜ ਦੀ ਸਮਰੱਥਾ ਨੂੰ ਬਿਹਤਰ ਬਣਾਉਣ ਲਈ ਕਈ ਉਪਾਵਾਂ ‘ਤੇ ਵੀ ਜ਼ੋਰ ਦਿੱਤਾ ਗਿਆ।

ਇਨ੍ਹਾਂ ਵਿੱਚ ਨੈਸ਼ਨਲ ਟੈਸਟਿੰਗ ਏਜੰਸੀ (NTA) ਤੋਂ ਮਿਲਣ ਵਾਲਾ ਪਹਿਲਾਂ ਤੋਂ ਭਰਿਆ ਹੋਇਆ ਉਮੀਦਵਾਰ ਦਾ ਡੇਟਾ, ਔਨਲਾਈਨ ਦਸਤਾਵੇਜ਼ ਤਸਦੀਕ, ਨੈਸ਼ਨਲ ਮੈਡੀਕਲ ਕਮਿਸ਼ਨ (ਐੱਨਐੱਮਸੀ) ਦੁਆਰਾ ਸੀਟ ਮੈਟ੍ਰਿਕਸ ਦੀ ਤਸਦੀਕ ਅਤੇ ਹਿੱਸਾ ਲੈਣ ਵਾਲੀਆਂ ਸੰਸਥਾਵਾਂ ਦੁਆਰਾ ਤਸਦੀਕ ਸ਼ਾਮਲ ਹਨ।

ਬੈਂਚਮਾਰਕ ਦਿਵਯਾਂਗਜਨਾਂ (PwBD) ਲਈ ਪਹੁੰਚਯੋਗਤਾ ਵਿੱਚ ਸੁਧਾਰ 'ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਗਿਆ ਹੈ। ਮੁਲਾਂਕਣ ਵਿੱਚ ਵਧੇਰੇ ਅਸਾਨੀ, ਪਾਰਦਰਸ਼ਿਤਾ ਅਤੇ ਇਕਸਾਰਤਾ ਲਿਆਉਣ ਲਈ, ਦੇਸ਼ ਭਰ ਵਿੱਚ ਮਨੋਨੀਤ ਮੁਲਾਂਕਣ ਕੇਂਦਰਾਂ ਦੀ ਗਿਣਤੀ 16 ਤੋਂ ਵਧਾ ਕੇ 61 ਕਰ ਦਿੱਤੀ ਗਈ ਹੈ।

27 ਜੁਲਾਈ, 2026 ਦੇ ਨੈਸ਼ਨਲ ਮੈਡੀਕਲ ਕਮਿਸ਼ਨ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ, ਮਨੋਨੀਤ ਮੈਡੀਕਲ ਬੋਰਡ ਦੁਆਰਾ ਜਾਰੀ ਕੀਤੇ ਗਏ ਸਰਟੀਫਿਕੇਟ ਨੂੰ ਹੁਣ "ਯੋਗਤਾ ਸਰਟੀਫਿਕੇਟ" ਕਿਹਾ ਜਾਵੇਗਾ। ਇਹ ਨਾਮ ਦਰਸਾਉਂਦਾ ਹੈ ਕਿ ਇਸ ਦਾ ਉਦੇਸ਼ ਕਾਰਜਸ਼ੀਲ ਮੁਲਾਂਕਣ ਦੇ ਅਧਾਰ 'ਤੇ MBBS ਕੋਰਸ ਵਿੱਚ ਦਾਖਲੇ ਲਈ ਉਮੀਦਵਾਰ ਦੀ ਯੋਗਤਾ ਨਿਰਧਾਰਿਤ ਕਰਨਾ ਹੈ। ਸੰਸ਼ੋਧਿਤ ਦਿਸ਼ਾ-ਨਿਰਦੇਸ਼ ਦਿਵਯਾਂਗ ਉਮੀਦਵਾਰਾਂ ਦੇ ਮੁਲਾਂਕਣ ਲਈ ਇੱਕ ਪਾਰਦਰਸ਼ੀ, ਇਕਸਾਰ, ਸਬੂਤ-ਅਧਾਰਿਤ ਅਤੇ ਯੋਗਤਾ-ਕੇਂਦ੍ਰਿਤ ਢਾਂਚਾ ਤਿਆਰ ਕਰਦੇ ਹਨ, ਨਾਲ ਹੀ ਸਮਾਨ ਮੌਕੇ, ਅਕਾਦਮਿਕ ਮਿਆਰਾਂ, ਪੇਸ਼ੇਵਰ ਯੋਗਤਾ ਅਤੇ ਮਰੀਜ਼ਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਂਦੇ ਹਨ। 

ਨਵੇਂ ਦਿਸ਼ਾ-ਨਿਰਦੇਸ਼ਾਂ ਵਿੱਚ ਅਪੀਲੇਟ ਡਿਸੇਬਿਲਿਟੀ ਅਸੈੱਸਮੈਂਟ ਬੋਰਡ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ, ਜਿਸ ਨਾਲ ਯੋਗ ਉਮੀਦਵਾਰ ਇਨਫੋਰਮੇਸ਼ਨ ਬੁਲੇਟਿਨ ਦੇ ਨਿਯਮਾਂ ਅਨੁਸਾਰ ਸ਼ੁਰੂਆਤੀ ਡਿਸੇਬਿਲਿਟੀ ਅਸੈੱਸਮੈਂਟ ਬੋਰਡ ਦੇ ਮੁਲਾਂਕਣ ਵਿਰੁੱਧ ਅਪੀਲ ਕਰ ਸਕਦੇ ਹਨ।

ਇੱਕ ਹੋਰ ਮਹੱਤਵਪੂਰਨ ਸੁਧਾਰ ਐੱਨਆਰਆਈ ਸ਼੍ਰੇਣੀ ਦੇ ਅਧੀਨ ਦਾਖਲਾ ਪ੍ਰਕਿਰਿਆ ਦਾ ਪੂਰਾ ਡਿਜੀਟਲੀਕਰਣ ਹੈ। ਐੱਨਆਰਆਈ ਉਮੀਦਵਾਰਾਂ ਦੀ ਰਜਿਸਟ੍ਰੇਸ਼ਨ ਹੁਣ ਨਿਰਧਾਰਿਤ ਯੋਗਤਾ ਮਾਪਦੰਡਾਂ ਦੇ ਅਨੁਸਾਰ ਪੂਰੀ ਤਰ੍ਹਾਂ ਔਨਲਾਈਨ ਕਾਊਂਸਲਿੰਗ ਪੋਰਟਲ ਰਾਹੀਂ ਕੀਤੀ ਜਾਵੇਗੀ। ਉਮੀਦਵਾਰ ਸਾਰੇ ਲੋੜੀਂਦੇ ਦਸਤਾਵੇਜ਼ ਔਨਲਾਈਨ ਅਪਲੋਡ ਕਰਨਗੇ, ਜਿਸ ਨਾਲ ਈਮੇਲ ਰਾਹੀਂ ਜਮ੍ਹਾਂ ਕਰਾਉਣ ਦੇ ਪੁਰਾਣੇ ਅਭਿਆਸ ਦਾ ਸਥਾਨ ਲਿਆ ਜਾਵੇਗਾ। ਅਪਲੋਡ ਕੀਤੇ ਗਏ ਦਸਤਾਵੇਜ਼ਾਂ ਦੀ ਤਸਦੀਕ ਮਨੋਨੀਤ ਦਸਤਾਵੇਜ਼ ਤਸਦੀਕ ਅਧਿਕਾਰੀਆਂ ਦੁਆਰਾ ਔਨਲਾਈਨ ਕੀਤੀ ਜਾਵੇਗੀ, ਜਿਸ ਨਾਲ ਇੱਕ ਪਾਰਦਰਸ਼ੀ, ਕੁਸ਼ਲ ਅਤੇ ਸਮਾਂ-ਬੱਧ ਤਸਦੀਕ ਪ੍ਰਕਿਰਿਆ ਨੂੰ ਯਕੀਨੀ ਬਣਾਇਆ ਜਾਵੇਗਾ। MCC ਨੇ 27 ਮਈ, 2026 ਨੂੰ ਜਾਰੀ ਆਪਣੇ ਪਬਲਿਕ ਨੋਟਿਸ ਰਾਹੀਂ ਪਹਿਲਾਂ ਹੀ ਸੂਚਿਤ ਕਰ ਦਿੱਤਾ ਹੈ ਕਿ ਮਾਣਯੋਗ ਸੁਪਰੀਮ ਕੋਰਟ ਦੇ ਨਿਰਦੇਸ਼ਾਂ ਅਨੁਸਾਰ, ਐੱਨਆਰਆਈ ਸ਼੍ਰੇਣੀ ਦੇ ਤਹਿਤ ਅਪਲਾਈ ਕਰਨ ਵਾਲੇ ਉਮੀਦਵਾਰਾਂ ਨੂੰ ਕਾਊਂਸਲਿੰਗ ਪ੍ਰਕਿਰਿਆ ਦੌਰਾਨ ਸਬੂਤ ਅਤੇ ਸਬੰਧਿਤ ਕਾਨੂੰਨੀ ਦਸਤਾਵੇਜ਼ ਜਮ੍ਹਾ ਕਰਨੇ ਪੈਣਗੇ, ਜਿਸ ਤੋਂ ਇਹ ਸਾਬਤ ਹੋ ਸਕੇ ਕਿ ਗਾਰਜ਼ੀਅਨ ਐਂਡ ਵਾਰਡਸ ਐਕਟ, 1890 (Guardians and Wards Act, 1890) ਦੇ ਉਪਬੰਧਾਂ ਦੇ ਤਹਿਤ ਉਮੀਦਵਾਰ ਦਾ ਅਸਲ ਕਾਨੂੰਨੀ ਸਰਪ੍ਰਸਤ ਹੈ।

ਸ਼੍ਰੀ ਨੱਡਾ ਨੂੰ ਇਹ ਵੀ ਜਾਣਕਾਰੀ ਦਿੱਤੀ ਕਿ ਨੈਸ਼ਨਲ ਇਨਫੋਰਮੈਟਿਕਸ ਸੈਂਟਰ (NIC) ਦੇ ਤਾਲਮੇਲ ਨਾਲ ਸਾਈਬਰ ਸੁਰੱਖਿਆ ਤਿਆਰੀਆਂ ਦੀ ਇੱਕ ਵਿਆਪਕ ਸਮੀਖਿਆ ਕੀਤੀ ਗਈ ਹੈ। ਦੇਸ਼ ਭਰ ਵਿੱਚ ਕਾਊਂਸਲਿੰਗ ਪ੍ਰਕਿਰਿਆ ਨੂੰ ਇਕਸਾਰ ਲਾਗੂ ਕਰਨ ਨੂੰ ਯਕੀਨੀ ਬਣਾਉਣ ਲਈ ਡਿਸੇਬਿਲਿਟੀ ਅਸੈੱਸਮੈਂਟ ਬੋਰਡਾਂ, ਕਾਲਜ ਨੋਡਲ ਅਫਸਰਾਂ ਅਤੇ ਦਸਤਾਵੇਜ਼ ਤਸਦੀਕ ਅਧਿਕਾਰੀਆਂ ਲਈ ਟ੍ਰੇਨਿੰਗ ਪ੍ਰੋਗਰਾਮ ਆਯੋਜਿਤ ਕੀਤੇ ਗਏ ਹਨ।

ਉਮੀਦਵਾਰਾਂ ਨੂੰ ਬਿਹਤਰ ਸਹਾਇਤਾ ਪ੍ਰਦਾਨ ਕਰਨ ਲਈ, ਇੱਕ 24x7 ਟੋਲ-ਫ੍ਰੀ ਕਾਲ ਸੈਂਟਰ (1800-102-7637) ਸਥਾਪਿਤ ਕੀਤਾ ਗਿਆ ਹੈ। ਕਾਊਂਸਲਿੰਗ ਪ੍ਰਕਿਰਿਆ ਦੌਰਾਨ ਉਮੀਦਵਾਰਾਂ ਦੀ ਸਹਾਇਤਾ ਲਈ ਵੱਖ-ਵੱਖ ਪਲੈਟਫਾਰਮਾਂ ਰਾਹੀਂ ਦੋ-ਭਾਸ਼ਾਈ ਸੂਚਨਾ ਸਮੱਗਰੀ, ਅਕਸਰ ਪੁੱਛੇ ਜਾਂਦੇ ਸਵਾਲ ਅਤੇ ਮਾਰਗਦਰਸ਼ਨ ਵੀਡੀਓ ਵੀ ਉਪਲਬਧ ਕਰਵਾਏ ਜਾ ਰਹੇ ਹਨ। ਉਮੀਦਵਾਰਾਂ ਦੇ ਸਵਾਲਾਂ ਦੇ ਜਲਦੀ ਹੱਲ ਲਈ ਇੱਕ ਸਮਰਪਿਤ ਈਮੇਲ-ਅਧਾਰਿਤ ਸ਼ਿਕਾਇਤ ਨਿਵਾਰਣ ਵਿਧੀ (mcc2026[at]gov[dot]in) ਵੀ ਸਥਾਪਿਤ ਕੀਤੀ ਗਈ ਹੈ।

ਨੈਸ਼ਨਲ ਟੈਸਟਿੰਗ ਏਜੰਸੀ ਨੇ 16 ਜੁਲਾਈ 2026 ਨੂੰ NEET (UG) 2026 ਦੇ ਨਤੀਜੇ ਐਲਾਨ ਕੀਤੇ। MBBS, BDS ਅਤੇ B.Sc. (ਔਨਰਸ) ਨਰਸਿੰਗ ਵਿੱਚ ਆਲ ਇੰਡੀਆ ਕੋਟੇ ਦੀਆਂ ਸੀਟਾਂ ਲਈ ਕਾਊਂਸਲਿੰਗ ਪ੍ਰਕਿਰਿਆ ਜਲਦੀ ਸ਼ੁਰੂ ਹੋਣ ਦੀ ਉਮੀਦ ਹੈ।

ਉਮੀਦਵਾਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਸੀਟ ਸਵੀਕਾਰ ਕਰਨ, ਅਪਗ੍ਰੇਡੇਸ਼ਨ, ਅਸਤੀਫਾ ਜਾਂ ਦਿਵਯਾਂਗਤਾ ਮੁਲਾਂਕਣ ਸਬੰਧੀ ਕਿਸੇ ਵੀ ਵਿਕਲਪ ਦੀ ਚੋਣ ਕਰਨ ਤੋਂ ਪਹਿਲਾਂ ਇਨਫੋਰਮੇਸ਼ਨ ਬੁਲੇਟਿਨ, ਕਾਊਂਸਲਿੰਗ ਸਕੀਮ ਅਤੇ ਲਾਗੂ ਨਿਯਮਾਂ ਨੂੰ ਧਿਆਨ ਨਾਲ ਪੜ੍ਹੋ। ਉਨ੍ਹਾਂ ਨੂੰ ਇਹ ਵੀ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਨਿਯਮਿਤ ਤੌਰ 'ਤੇ ਅਧਿਕਾਰਤ MCC ਕਾਊਂਸਲਿੰਗ ਪੋਰਟਲ 'ਤੇ ਜਾਣ ਅਤੇ ਦਾਖਲੇ ਦੀ ਪ੍ਰਕਿਰਿਆ ਦੌਰਾਨ ਨੋਟੀਫਾਈ ਕਾਊਂਸਲਿੰਗ ਪ੍ਰੋਗਰਾਮ ਦੀ ਪਾਲਣਾ ਕਰਨ।

ਸਮੀਖਿਆ ਮੀਟਿੰਗ ਵਿੱਚ ਕੇਂਦਰੀ ਸਿਹਤ ਸਕੱਤਰ ਸ਼੍ਰੀਮਤੀ ਡਾ. ਪੁਣਯ ਸਲਿਲਾ ਸ੍ਰੀਵਾਸਤਵ, ਮੈਡੀਕਲ ਸਿੱਖਿਆ ਦੀ ਵਧੀਕ ਸਕੱਤਰ ਸ਼੍ਰੀਮਤੀ ਡਾ. ਵਿਨੋਦ ਕੋਤਵਾਲ, ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਸਿਹਤ ਸੇਵਾਵਾਂ ਦੇ ਡਾਇਰੈਕਟਰ ਜਨਰਲ, ਡਾ. ਲਵਨੀਸ਼ ਜੀ. ਕ੍ਰਿਸ਼ਣਾ, ਰਾਸ਼ਟਰੀ ਸੂਚਨਾ ਵਿਗਿਆਨ ਕੇਂਦਰ ਦੇ ਡਾਇਰੈਕਟਰ ਜਨਰਲ ਸ਼੍ਰੀ ਪ੍ਰਿਅੰਕਾ ਭਾਰਤੀ ਅਤੇ ਹੋਰ ਸੀਨੀਅਰ ਅਧਿਕਾਰੀਆਂ ਨੇ ਸ਼ਿਰਕਤ ਕੀਤੀ।

************

ਐੱਸਆਰ

HFW/HFM Reviews Preparedness for NEET UG Counselling 2026/29July2026/1