গুলাব চান্দ কাতারিয়া জি, কেন্দ্রগী মন্ত্রীমন্দলগী ঐগী মরুপ জে.পি নাদা জি, অশ্বিনি বৈষ্ণব জি, সংসদকী ঐগী মরুপ মনিস তিৱারি জি অমসুং ওদিতোরিয়ম অসিদা তিল্লিবা লেজিসলেচরশিং, মিনিষ্টরশিং অমসুং এম.পিশিং। ঙসি ঐনা শক্নাইরবা মীওই কয়া, মতম কয়াগী মমাংদগী মশক খঙলবা মীওইশিং উবা ফংলে।

ইনাওশিং অমসুং ইচলশিং,

ঙসি অদোমগী মরক্ত তিনবা অসি য়াম্না নুংঙাইবা অমনি।

মরুপশিং,

চান্দিগর শুপ্নগী সহর অমা ওইবা খক নত্তনা, ভারতকী চাউখৎপগী নমুনা অমনি। থৌরাং তৌদুনা চাউখৎপা, হেন্না নুংঙাইবা পুন্সি মহিং অমা লৈবা অমসুং হিংবদা লাইবা সহর অমা ওইনা চান্দিগর মমিং চৎলি। অফবা মেদিকেলগী খুদোংচাবশিং অমসুং মা চান্দিগী থৌজালগীদমক সহর অসি মমিং চৎলি। মরম অদুনা চান্দিগর চাউখৎহনবা হায়বসি এন.দি.এ সরকারগী মরুওইবনি। চহি ১.৫ গী মমাংদা লৈবাক অসিদা ৱায়েল কাংলোনগী মতাংদা অচৌবা অওনবা অমা পুরকখিবা অদু অদোম নিংশিংলমগনি। ঐখোয়না পেনাল কোদ অসি ভারতিয় ন্যায় সনহিতানা মহুৎশীল্লে-চৈরাক পীবদা য়ুম্ফম ওইবা আইনশিংগী মহুত্ত অচুম্বা ৱায়েলদা য়ুম্ফম ওইবা আইনগী ঙাক্লৌনা মহুৎশীল্লে। ভারতিয় ন্যায় সনহিতা চৎনবা হৌখিবা অসি চান্দিগরদগীনি।

মরুপশিং,

চহি খর অসিদা, ইন্তেগ্রেতেদ কমান্দ এন্দ কন্ত্রোল সেন্তর, স্মার্দ ত্রাফিক মেনেজমেন্ত, স্মার্দ পার্কিং অমসুং দিজিতেল গভর্নান্সগুম্বা প্রোজেকশিং পায়খৎতুনা চান্দিগর হায়-তেক ওইহল্লে। মিসন অসিগীদমক লুপা করোর ২,৫০০ হেন্না চাদিং তৌখ্রে। ঙসি মফম অসিদা হকশেল, লাইরিক-লাইশু অমসুং ইনফ্রাষ্ট্রকচরগা মরী লৈনবা অনৌবা প্রোজেক কয়া হৌদোক্লে। থবকশিং অসিগীদমক চান্দিগরগী মীয়ামদা ঐনা হরাওবা ফোঙদোকচরি।

মরুপশিং,

মফম অসিদা লাক্ত্রিঙৈদা, ঐ হরিয়ানাগী জিন্দদা লৈখি অমসুং থৌরম অসিগী মতুংদা ঐ পঞ্জাবকী চাউখৎ-থৌরাংগী থৌরমশিংগীদমক জলান্ধারদা চৎকনি। থৌরম অনি অসিগী মরক্ত, ঙসিগী চান্দিগরগী থৌরম অসি পাংথোক্লি। মরমদি চান্দিগরনা হরিয়ানা, পঞ্জাব, হিমাচল অমসুং অপুনবা লমদম অসিগা শম্নরি। চান্দিগর চাউখৎপনা সহর অসিগী মীয়ামগী পুন্সিদা অওনবশিং পুরকপা খক নত্তনা হরিয়ানা, হিমাচল, পঞ্জাব অমসুং জম্মু অমসুং কাস্মিরগী মীয়ামসু কান্নবা ফংহল্লে। অনা-লাইয়েংগী থবকশিংগী মতাংদা, চান্দিগর লমদম অসিগী মরুওইবা মফম অমনি।

মরুপশিং,

ঐ চান্দিগরদা লৈরিঙৈদা, ঐ য়াম্না তোইনা পি.জি.আইদা চৎখি। মরমদি? ঐখোয়গী মরুপশিং নত্ত্রগা মখোয়গী ইমুংশিংগী কনাগুম্ব অমা-জম্মু অমসুং কাস্মরি, পঞ্জাব, হিমাচল নত্ত্রগা হরিয়ানাদগী ওইবা য়াই-মফম অসিদা লাইয়েংবা লাকই অমসুং মখোয়গী অনাবা হংবা চৎপা হায়বসিগী ঐগী মথৌনি। মরম অদুনা লমদম অসি শীনবা থুংনা মীয়াম মশা ফনা লৈনবা পি.জি.আই কয়া য়াম্না মরুওইবগে হায়বা ঐনা খঙলিবনি।

মরুপশিং,

ঙসিদি, পি.জি.আই চান্দিগরদা অৱাংবা থাক্কী অনা-লাইয়েংগী খুদোংচাবশিং হেনগৎলে। এদভান্স ন্যুরোসাইন্সেস সেন্তর, এদভান্স মাদর এন্দা চাইল্দ সেন্তর অমসুং ক্রিতিকেল কিয়ার হোস্পিতাল ব্লোক্না মীওই লাখ কয়াদা হেন্না অফবা অনা-লাইয়েংগী খুদোংচাবা পীগনি। ২০১৫ দা পি.জি.আইগী কনভোকেসন শরুক য়াখিবা অদু ঐ নিংশিংলি। ঐনা ভর্চুএল ওইনা থায়নগী মরুপ কয়া অমুক হন্না উনবদা ঐ হরাওই। হৌখিবা চহি ১০ অসিদা, পি.জি.আই মপুংফানা চাউখৎলে। পি.জি.আই চান্দিগরগী মেনেজমেন্ত, প্রোফেসারশিং অমসুং নহা ওইরিবা দোক্তরশিং ঐনা থাগৎপা ফোঙদোকচরি অমসুং মখোয়দা ঐগী য়াইফ পাউজেল পীজরি।

মরুপশিং,

ঐখোয়গী হকশেলগী ৱা ঙাংবা মতমদা, লু-নানবা অসি কয়া য়াম্না মরুওইবগে হায়বা ঐখোয় খুদিংমক্না খঙলে। মরম অদুনা ঐখোয়গী সরকার শেম্বা মতমদা, ঐখোয়না শ্বাচ্ছ ভারত মিসন হৌদোকখি। তোইলেত করোর কয়া শাখ্রে, লমহাঙদা খোঙহাম্বা ভারত অমা ওইহন্দ্রে, মীয়ামগী মফম কয়া লু-নান্না থম্নবা খোঙজং কয়া পাংথোক্লি অমসুং লু-নানবা অসি ঐখোয়গী পুন্সিগী শরুক অমা ওইহন্নবা থবকশিং পায়খৎপা হৌরে। ঐখোয়গী সহরশিংগী শ্বাচ্ছ ভারত রেঙ্কিংশিং থবক অসিগী শরুক অমনি অমসুং সহরশিংগী মনুংদা চান্দিগরনা থবক ফজনা পাংথোক্লে।

মরুপশিং,

ঐনা চান্দিগরগী থবক্তগী পোথারবা আই.পি.এস ইন্দরজিৎ সিংহ সিধু জি থাগৎপা পাম্মী। মহাক “সুমচিৎ পায়বা লান্মী” হায়না খঙনৈ। চান্দিগরদা লু-নান্না লৈনবা অনৌবা ৱাখল্লোন অমা মহাক্না মিকপ থোকহনখি অমসুং মীয়াম ইথিল পীখি। মসিগীদমক, চহি অসিদা ঐখোয়গী সরকারনা মহাক পদ্ম এৱার্দ পীদুনা ইকায়খুম্নখ্রে।

মরুপশিং,

লু-নানবা হায়বসি নোংমা খক্তগী থবক নত্তে – মসি পুন্সিগী লম্বী অমনি। ঙসিগী থৌরম অসি লু-নানবগা মরী লৈনবদা ঐ হরাওই। শ্বাচ্ছতা সে শ্বাগৎ থবক্কী মখাদা, লু-নানবগী অখন্নবা খোঙজং অমা পাংথোক্লে। লুচিংবশিং অমসুং মীয়াম অনিমক লু-নানবগী থবকশিং পাংথোকপা সোসিএল মেদিয়াদা ঐ উরে। মসিনা লৈবাক শীনবা থুংনা হরাওহল্লে। থবক অসিগীদমক চান্দিগরগী মীয়াম ঐনা থাগৎপা ফোঙদোকচরি।

মরুপশিং,

লৈবাক অসিদা লায়নাশিং মাংজৌননা ঙাকথোকপদা অসিগুম্বা লু-নানবগী থবকশিংনা য়াম্না মতেং পাংলে।

মরুপশিং,

মালেমগী লৈবাকশিংনা ভারতকী হকশেলগী থবকশিংদা নুঙনাংবা পোকপা মতম অমা লৈরমখি। অচৌবা খুদোংথিবা অমা থোকপা মতমদা, মদু করিগুম্বা ভারত্ত থোক্লবদি করি ওইগনি হায়না মীয়াম্না হংনখি। কোরোনা ভাইরস লাইচৎ মনুংদা, মালেমগী লৈবাকশিংনা ভারতকী মরমদা য়াম্না ৱাখি। অদুবু ঐখোয়গী সরকারনা ভারতকী তৌবা ঙম্বা হেনগৎহনখি অমসুং মালেমগী লৈবাকশিংনা য়েংলিবা মীৎয়েং অহোংবা পুরকখি। লাইচৎ লাকপা মতমদা, ভারত মতেং নিখিবা লৈবাক অমা ওইখিদে – ভারতনা মালেমগী লৈবাকশিংগী মতেং পাংখি। ঙসিদি, লৈবাক অসিগী মীওইশিং অরুবা অনাবশিং লাইয়েংনবা ভারত্ত লাক্লে। ভারত মেদিকেল তুরিজমগী অচৌবা মফম অমা ওইরক্লে।

মরুপশিং,

অওনবা অসি চহি ১২ গী পুকচেল শেংনা হোৎনবা অমসুং থৌশিলগী ফলনি। চহি ১২ গী মমাংদা, অনা-লাইয়েংগী খুদোংচাবশিং ফংদনা ঐখোয়গী মীয়াম হিংহন্দনবা ঐখোয়না ৱাশক লৌখি, মখোয় অহোংবা মমলদা অফবা অনা-লাইয়েংগী ফংহনগদবনি। হৌখিবা চহি ১২ গী মাইপাকপা অসি ৱাশক অদুনা ওইহনবনি। চহি খর অসিদা, ভারতনা য়াংনা মসিগী অনা-লাইয়েংগী ইনফ্রাষ্ট্রকচর ফগৎহল্লে। ২০১৪ দগী, অনৌবা এ.আই.আই.এম.এস ১৫ গী অয়াবা পীখ্রে। ঙসি, লৈবাক অসিগী মফম কয়াদা অনৌবা এ.আই.আই.এম.এসশিং থবক তৌরে। ভারত শীনবা থুংনা অনৌবা মেদিকেল কোলেজ কয়া লিংখৎলে। কেন্সরগুম্না অরুবা অনাবশিং লাইয়েংনবা স্পিসিএলিতি হোস্পিতালশিং মশিং হেনগৎলে। চান্দিগরদসু, হোমি ভাবা কেন্সর হোস্পিতাল শাগৎলে। ২০২২ দা, ঐনা মদু শঙ্গাখি। ঙসিদি, হোস্পিতাল অসিনা অনাবা লিশিং কয়া লাইয়েংলে।

মরুপশিং,

লৈবাক শীনবা থুংবগী খুঙ্গংশিংদা প্রাইমারি হেল্থকিয়ারগী খুদোংচাবশিংসু ফগৎহল্লে। থাক খুদিংমক্ত হকশেলগী থবকশিং ফগৎহন্নবা, অয়ুস্মান ভারত হেল্থ ইনফ্রাষ্ট্রকচর মিসন হৌদোক্লে। মসিগী মখাদা, লৈবাক শীনবা থুংনা ক্রিতিকেল কিয়ার ব্লোকশিং, ইন্তিগ্রেতেদ পব্লিক হেল্থ লেবশিং অমসুং পব্লিক হেল্থ য়ুনিতিশিং শেমগৎলে। ঙসিদি, সহর, খুঙ্গং অমসুং ত্রাইবেলগী মফমশিংদা অয়ুস্মান অরোগ্যা মন্দির লাখ ১.৭৫ রোম থবক তৌরি। সেন্তরশিং অসিনা হকশেলগী তোঙান তোঙানবা থবক ১২ গা লোয়ননা মরুওইবা অনা-লাইয়েংগী খুদোংচাবশিং পীরি। মীওই করোর কয়া ব্লদ প্রেসর অমসুং দাইয়েবিতিসগুম্বা লাইনাশিং লৈবরা হায়না য়েংথোক্লি।

মরুপশিং,

ঐখোয়গী সরকারনা তেক্নোলোজিগী খুৎথাংদা লাইয়েংবা হেন্না লাইহল্লে। ই-সঞ্জিবানি মিসনগী খুৎথাংদা, তেলিমেদিসনগী থবক হৌদোক্লে। মসিগী মখাদা, তেলিমেদিসিন কন্সলতেন্সন মিল্লিয়ন ৪৮০ হেন্না পাংথোকখ্রে। মনুং হুঞ্জিনবা মফমশিংগী মীওইশিং ফাওবা অচৌবা হোস্পিতালশিংগী দোক্তরশিংগা অনা-লাইয়েংগী ৱারি শানবা ফংলে।

মরুপশিং,

অনা-লাইয়েংগী থবকশিং ফগৎহনবা অসিনা মরম ওইদুনা, ঙসিদি অঙাং পোকপগী চাদা ৯০ হেন্না হোস্পিতালশিংদা পাংথোক্লে। অঙাং পোকপদা মীরোলশিং শিবগী চাং চাদা ৮৬ হন্থরে অমসুং অঙাং শিবগী চাংসু শিংথাবা য়ানা হন্থরে।

মরুপশিং,

লাইয়েংবগা লোয়ননা, মাঙজৌননা ঙাকথোক্নবা অনা-লাইয়েংগী থবকশিংদসু চপ মান্না মীৎয়েং চঙলে। পোসান অভিয়ান, মিসন ইন্দ্রধনুস, য়োগ, ঐচ.পি.ভি তিকা থাবা অমসুং য়ু-ৱিন প্লেতফোর্মগুম্বা থবকশিংনা মীওই করোর কয়াগী পুন্সি অশোই-অঙাম থোকহন্দ্রে।

মরুপশিং,

তি.বি লৈতবা ভারত ওইহন্নবা ঐখোয়না ৱাশক লৌরে। মসিগীদমক, তি.বি মুক্ত ভারত অভিয়ান পায়খৎলি। মীয়াম শরুক য়াবদগী খঙবা হেনগৎলে, মতম চানা লাইনা খঙদোক্লে অমসুং অনাবশিং লাইয়েংলে। মসিগী ফল ওইনা, তি.বি লাইয়েংবা চাদা ৯০ হেল্লে। ৱার্ল্দ হেল্থ ওর্গনাইজেসনগী হৌখিবা চহিগী রিপোর্ত মতুংইন্না, শুপ্নগী চহি ১০ দা তি.বি নাবা চাদা ২১ হন্থরে। থবকশিং অসিগী খ্বাইদগী কান্নবশিং লায়রবা, মিদল ক্লাস অমসুং ঐখোয়গী ইমাশিং অমসুং ইচলশিংনা ফংলে। মহৌশাদা, নুপীশিংনা ইমুংগী থবক অয়াম্বা পাংথোকই অমসুং অনাবশিং খাংজিন্দুনা থম্মী। অদুবু হকশেলগী অফবা থবকশিংনা মখোয় স্কৃন্নিং তৌরে অমসুং মখোয় লাইয়েংলে অমসুং ঙসিদি, মশিং য়াম্লবা নুপীশিং তি.বি নাদ্রে। ভারত্ত, অনা-লাইয়েংগী থবক মখা তানা খুদোংচাবা অমা ওইদ্রে - মসি মীওই খুদিংমক্কী হক ওইরে।

মরুপশিং,

হকশেলগী লমদা সরকারনা মীৎয়েং চঙবগী কান্নবা ভারতকী নহারোলশিংসু ফংলে। মতম অমদা মখোয়গী মঙফাওনবদা কয়া য়াম্না ৱাবগে হায়বা নহা ওইরিবা দোক্তরশিংনা খঙই। মেদিকেল সিতশিং অমসুং কোলেজশিং মশিং য়ামদবা মরম্না খুদোংচাবশিং তাংনা ফংখি। ফিবম অদু ঐখোয়না হোংহল্লে। ঙসিদি, মেদিকেল কোলেজ মশিং শরুক অনি রোম হেনগৎলে। এম.বি.বি.এস অমসুং পোষ্টগ্রেজুয়েত সিতশিং মশিং হেনগৎলে। হৌজিক, পি.জি.আই চান্দিগর ফাওবা এম.বি.বি.এস কোলেজ অমগী অয়াবা ফংলে। অথুবা মতমদা মিং চনবা হৌরগনি, অসিগুম্বা অফবা মহৈলোয়শঙ অমদা লাইরিক তম্নবা হৈথোই-শিংথোইরবা নহারোলশিংদা খুদোংচাবা পীরে। লৈবাক অসিনা মশিং য়াম্লবা অফবা দোক্তরশিং     ফংলগনি।

মরুপশিং,

চান্দিগর অসি লাইরিক-লাইশু, ইঞ্জিনিয়ারিং, মেদিকেল সাইন্স অমসুং রিছার্সকী অচৌবা মহৈলোয়শঙশিং পুন্না লৈবা সহর অমনি। অসিগুম্বা খুদোংচাবশিং সহর খর খক্তদা লৈরি। লাক্লিবা চহিশিংদা, হায়রিবা মহৈলোয়শঙশিং অসি অনৌবা তেক্নোলোজি, অনা-লাইয়েং, ষ্টার্দঅপশিং অমসুং ইন্নোবেসনগী মরুওইবা মফমশিং ওইরগনি। ঙসি, মরুওইবা লাইরিক-লাইশুগা মরী লৈনবা প্রোজেকশিংনা খোঙচৎ অসিদা অনৌবা ইনোৎ হাপ্লে। পঞ্জাব ইঞ্জিনিয়ারিং কোলেজদা, কুরুক্ষেত্র বোইজ হোষ্টেল অমসুং মেস শঙ্গারে। সেক্তর-৪৬ দা গভর্নমেন্ত কোলেজগী অনৌবা হোষ্টেল অমা থৌরাং তৌরে। রিছার্স স্কোলারস হোষ্টেল অমগী উরেপ-উয়ুংসু তম্লে। ঐখোয়গী থবক্তি রিছার্সকীদমক অফবা লেবশিং অমসুং ওজাশিং ফংহনবনি। থিজিনবগী থবকশিং ফগৎহনবা মতমদা, অনৌবা থবক পায়খৎপা য়াংখৎহনগনি। এ.আই, সেমিকন্দক্তরশিং, এদভান্স মেনুফেকচরিং অমসুং অৱাংবা থাক্কী তেক্নোলোজিশিংগুম্বা হিরমশিংদা ভারত খুমাঙ চাউশিল্লে। মাইকৈ অসিদা চান্দিগরগী মহৈলোয়শঙশিং, ওজাশিং অমসুং নহারোলশিংনা মরুওইবা থৌদাং অমা লৌগনি হায়না ঐনা থাজৈ।

মরুপশিং,

লৈবাক অমগী শেন-থুম চাউখৎহনবদা ইনফ্রাষ্ট্রকচর চাউখৎহনবা হায়বসি রোদমেপনি। অহানবা ওইনা, অচুম্বা থৌরাং অমগা লোয়ননা ভারত্ত ইনফ্রাষ্ট্রকচর শেমগৎলে। ঙসি, চান্দিগরদা তোঙান তোঙানবা লম্বী-থোঙগী প্রোজেকশিং হৌদোক্লে। কুরালিদগী আই.সি সিতি ফাওবগী লেন-৬ গী গ্রিনফিল্দ হায়ৱে শঙ্গারে। মসিনা এয়রপোর্ত রোদ চিনবা হন্থহল্লগনি অমসুং মোহালি অমসুং খারারগী মীয়াম চৎথোক-চৎশিন নুংঙাইহল্লগনি। অম্বালা-চান্দিগর গ্রিনফিল্দ হায়ৱেগী পি.আর-৭ স্পুরসু উরেপ-উয়ুং তম্লে। অসিগুম্বা প্রোজেকশিংনা চান্দিগরদা উদ্যোগ অমসুং ললোন-ইতিক চাউখৎহনগনি অমসুং হিংবদা লাইবা হেনগৎহনগনি।

মরুপশিং,

লমদম লমদমগী চৎথোক-চৎশিন্দা মীৎয়েং থমদুনা, ঙসি জলন্ধারদা রেলৱে প্রোজেকশিংসু শঙ্গারে। মসিনা অপুনবা পঞ্জাব অমসুং অপুনবা লমদম অসি কান্নবা পীগনি। মসিগা লোয়ননা, জিন্দগী সোনিপত ফাওবা, লৈবাক অসিগী অহানবা হায়দ্রোজেন ত্রেন চেনবা হৌরে। মসিগী মৈখু থাঙদবা ফ্যুএলগী ত্রেন অসি অচৌবা অহৌবা অমনি। মাইপাকপা অসিগীদমক ময়াম পুম্নমক অমসুং ভারতকী মীয়ামদা ঐনা হরাওবা ফোঙদোকচরি।

মরুপশিং,

বিকসিত ভারত অমগী মাইকৈদা চঙশিল্লিবা খোঙচত্ত, তুংগী তেক্নোলোজিশিং, তুংগী ত্রান্সপোর্তেসন অমসুং তুংগী অনা-লাইয়েংগী থবকশিংগা মীৎয়েং থম্বা অনৌবা ৱাখল্লোন অমগা লোয়ননা ঐখোয় মাঙলোমদা চঙশিনগদবনি। হৌজিক্কী মীরোল খক নত্তনা তুংগী মীরোলশিংসু কান্নবা ফংবা ৱারেপশিং ঐখোয়না লৌগদবনি। মতমগা ইরোইননা চাউখৎলকপা মহৈলোয়শঙশি ঐখোয়না শেমগৎকদবনি। মাইকৈ অসিদা বি.জে.পি-এন.দি.এ সরকার য়াংনা চঙশিল্লি। অনৌবা প্রোজেকশিং অসিগীদমক ঐনা অমুক হন্না চান্দিগর, পঞ্জাব, হরিয়ানা, হিমাচল অমসুং অপুনবা লমদম অসিগী মীয়াম থাগৎপা ফোঙদোকচরি। অদোম থাগৎপা ফোঙদোকচরি। ঐগা লোয়ননা হায়মিন্নসি-

ভারত মাতা কি জয়।

ভারত মাতা কি জয়।

ভারত মাতা কি জয়।

অদোম থাগৎচরি।

***