প্রধান মন্ত্রীনা ঙসি ৭, লোক কল্য়ান মার্গতা লৈবা মহাক্কী ময়ুমদা ভিক্সিত ভারতকী পান্দমশিং ফংনবগীদমক খুঙ্গং চাওখৎ থৌরাং, লৌউ-শিংউ, খুন্নাইগী য়াইফ-থৌরাং অমসুং এলাইদ সেক্তরশিংগী ফীভম য়েংশিন্নবা সেক্রেতরীশিংগা লোয়ননা অৱাংবা থাক্কী মীফম পাঙথোকখ্রে।

প্রধান মন্ত্রীনা রিফোর্ম পুম্নমক্কী মরুমদা মীয়ামগী য়াইফনবা হায়বা ৱাখল্লোনসি লৈগদবনি হায়না ফোঙদোকখি। মীয়ামগী মথৌ তাবশিংদা য়ুম্ফম ওইরগা পুরকপা রিফোর্মশিংনা তশেংবা খোঙজেল লৈহনগদবনি অমসুং ৱাহন্থোক লৈবা মওংদা অওনবা পুরক্কদবনি হায়না মহাক্না হায়খি। রিফোর্মগী পান্দমদি লৈঙাক্কী থবক তৌবগী মওং মতৌ ফগৎহনবখক্তা নত্তে, ভারতকী চাওখৎপা লৈবাক অমা ওইরক্নবগী লম্বীদা ভারতকী খোঙজেল য়াঙ্খৎহনবনি।

প্রধান মন্ত্রীনা লৈঙাক্কী থৌওংশিং খোঙলৈ থুনা হোংলক্লি হায়রদুনা ইচঙ থৌবা অমসুং হোংলক্লিবা ফীভমগী মথৌ তাবশিংবু মতিক চানা ফংহন্নবগীদমক লৈঙাক্কী থৌওংশিংবু চুশিন্নহনবা অমসুং মপাঙ্গল কনখৎহনবগী মরুওইবা ৱাফমশিং ফোঙদোকখি। মহাক্না তোঙান তোঙানবা মন্ত্রালয় অমসুং দিপার্তমেন্তশিংদা লাক্লিবা মথৌ তাবশিং মপুং ফানা মেপ্পিং তৌনবা ৱাফম হৌদোকখি।

প্রধান মন্ত্রীনা লৈবাক্কী চাওখৎ থৌরাংগী পান্দমশিং ফংহন্নবগীদমক লৈঙাক পুন্না চঙশিনমিন্নবগী মথৌ তাই হায়না ফোঙদোকখি। ভিক্সিত ভারত অমা শেমগৎপগী মঙলান অসি মীয়ামগী ঈহৌ ওইহনগদবনি অমসুং ভারতকী নহাশিংনা মঙলান অসিগী য়ুম্ফম ওইহনগদবনি হায়না মহাক্না মখা তানা ফোঙদোকখি।

 প্রধান মন্ত্রীনা নহাশিংগী মরক্তা থেংনরিবা দ্রগ লান্না শীজিন্নবগী শাথিরবা ৱাফম অসি লাকশিনবগী মরুওইবা ৱাফমশিং ফোঙদোকখি। দিপার্তমেন্তশিংগী মরক্তা লৈরিবা পলশিং নমখায়নবা অমসুং দিপার্তমেন্তশিংগী মরক্তা তেংবাংনবা হেনগৎহন্নবা অমসুং নহাশিংদা য়ুম্ফম ওইবা থৌশিলশিং পুনশিন্নবা ইন্সতিত্যুস্নেল মেকানিজম অমা শেমগৎনবা হোৎনগদবনি হায়না মহাক্না ফোঙদোকখি।

প্রধান মন্ত্রীনা শান্ন-খোৎনবা চাওখৎহন্নবা অপুনবা পরম অমা শীজিন্নবগী মথৌ তাবা ৱাফমশিং মখা তানা ফোঙদোকখি। স্পোর্তস তুরিজম্না মরুওইবা ফোকস এরিয়া অমা ওইরকপগা লোয়ননা, ভারতনা মালেমগী শান্ন-খোৎনবগী মফম অমা ওইনা শেমগৎনবগীদমক মালেমগী থাক্কী অচৌবা শান্ন-খোৎনবগী থৌরমশিং পাঙথোক্নবা মঙলান থমগদবনি হায়না মহাক্না ফোঙদোকখি। মহাক্না শান্ন-খোৎনবগী সেক্তরদা স্তার্ত-অপশিংগী খুত্থাঙদা তেক্নোলোজী য়োকখৎপা অমসুং ইনোভেসন পুরকপগী মরুওইবা ৱাফমশিং ফোঙদোকখি।

প্রধান মন্ত্রীনা লৌমীশিংনা PM KUSUM স্কীমগুম্বা থৌশিলশিং শীজিন্নবনা লৌউ-শিংউগী লমদা অওনবা পুরক্কনি হায়না ফোঙদোকখি। মালেমগী খুদোংচাবশিং অমসুং তুংগী মথৌ তাবশিংগী পরিংদা চৎননবগীদমক স্কিলগী মথৌ তাবশিংগী মালেমগী ওইবা মেপ্পিং অমগী মথৌ তাবা ৱাফমশিং মখা তানা ফোঙদোকখি।

সেক্রেতরীশিংনা মখোয় মখোয়গী লমশিংদা লৈরিবা থৌশিলশিং অমসুং শিংনবশিংগী মতাঙদা মখোয়না থেংনরকপশিং অমসুং মীৎয়েঙশিং পাউদমখি। প্রধান মন্ত্রীনা তুংদা পায়খৎকদবা থবকশিংগী মতাঙদা মহাক্কী ৱাখল্লোন অমসুং মীৎয়েঙশিং থমখি। মীফম অদুদা ভিক্সিত ভারতকী পান্দমশিংগী মায়কৈদা হেন্না মতিং লৈনা থবক পায়খৎপা, হেন্না ফবা মওংদা পুনশিনবা, অমসুং চাওখৎ থৌরাংশিংগী খোঙজেল য়াঙ্খৎহনবদা মীৎয়েঙ থমদুনা সেক্তর পুম্বদা মপুং ফানা অমসুং কান্নবা মওংদা খন্ন-নৈনখি।

মীফম অদুদা কেবিনেত সেক্রেতরী, মরুওইবা মন্ত্রালয়শিংগী সেক্রেতরীশিং লোয়ননা প্রধান মন্ত্রীগী ওফিসতগী মকোক থোংবা ওফিসিএলশিংনা শরুক য়াখি।

***