حکومت ہند ملک بھر میں صفائی کے نظام کو مشینی بنانے اور صفائی کارکنوں کے تحفظ، وقار اور سماجی تحفظ کو یقینی بنانے کے لیے نیشنل ایکشن فار میکانائزڈ سینی ٹیشن ایکو سسٹم (نمستے) کو ایک اہم فلیگ شپ اسکیم کے طور پر نافذ کر رہی ہے۔

یہ اسکیم سماجی انصاف اور تفویض اختیارات کی وزارت اور رہائش و شہری امور کی وزارت کے اشتراک سے نافذ کی جا رہی ہے۔ اس کا مقصد سیور اور سیپٹک ٹینکوں کی خطرناک دستی صفائی کا خاتمہ کرتے ہوئے مشینی صفائی کو فروغ دینا، صفائی کارکنوں کی مہارتوں میں اضافہ کرنا اور ان کی فلاح و بہبود کے لیے جامع اقدامات کرنا ہے۔

سماجی انصاف و تفویض اختیارات کے مرکزی وزیر جناب ڈاکٹر وریندر کمار نے صفائی کارکنوں کی فلاح و بہبود کے لیے حکومت کے عزم کا اعادہ کرتے ہوئے کہا کہ نمستے اسکیم اس بات کی عکاس ہے کہ حکومت ہر صفائی کارکن کو وقار، تحفظ اور سماجی تحفظ کے ساتھ کام کرنے کا ماحول فراہم کرنے کے لیے پوری طرح پرعزم ہے۔

انہوں نے کہا کہ مشینی صفائی، مہارتوں کی ترقی، صحت کی سہولتوں اور روزگار سے متعلق معاونت کے ذریعے صفائی کے شعبے کو زیادہ محفوظ اور باوقار پیشے میں تبدیل کیا جا رہا ہے، جبکہ حکومت صفائی کے کام کے دوران صفر اموات کے ہدف کے حصول کی سمت بھی مسلسل پیش رفت کر رہی ہے۔

ڈاکٹر وریندر کمار نے کہا کہ حکومت نے صفائی کارکنوں اور ان کے اہل خانہ کی زندگی بہتر بنانے کے لیے ایک جامع حکمت عملی اختیار کی ہے، جس میں جدید ٹیکنالوجی، پیشہ ورانہ تحفظ، صحت کے تحفظ اور خود روزگار و کاروبار کے مواقع کو یکجا کیا گیا ہے۔

انہوں نے زور دے کر کہا کہ یہ اسکیم وزیر اعظم کے "سب کا ساتھ، سب کا وکاس، سب کا وشواس، سب کا پریاس" کے وژن سے ہم آہنگ ہے اور اس بات کو یقینی بناتی ہے کہ عوامی صحت اور صفائی میں اہم کردار ادا کرنے والے کارکنوں کو وہ احترام، تحفظ اور مواقع فراہم کیے جائیں جن کے وہ مستحق ہیں۔

نمستے  (این اے ایم اے ایس ٹی  ) اسکیم کے تحت صفائی کارکنوں کی شناخت، ان کا اندراج اور پروفائلنگ کی جا رہی ہے، جبکہ انہیں ذاتی حفاظتی سامان (پی پی ای)، صحت بیمہ، آیوشمان بھارت اسکیم کا فائدہ، پیشہ ورانہ تحفظ کی تربیت، مہارتوں کی ترقی، خود روزگار کے لیے مالی معاونت اور جدید مشینی صفائی کے آلات تک رسائی سمیت مختلف سہولتیں فراہم کی جا رہی ہیں۔ محفوظ صفائی خدمات کو یقینی بنانے کے لیے ایمرجنسی رسپانس سینی ٹیشن یونٹس (ای آر ایس یوز) کو بھی جدید حفاظتی آلات سے مضبوط بنایا جا رہا ہے۔

اس اسکیم کا مقصد صفائی کے کام کے دوران صفر اموات کو یقینی بنانا، خطرناک فضلے سے براہ راست انسانی رابطے کا خاتمہ کرنا، صفائی کے تمام کام مشینی آلات کے ذریعے انجام دینا، تربیت یافتہ صفائی کارکنوں کی افرادی قوت تیار کرنا اور اپنی مدد آپ گروپوں اور روزگار کے دیگر مواقع کے ذریعے صفائی کارکنوں میں کاروباری صلاحیتوں کو فروغ دینا ہے۔

اسکیم کے تحت اب تک 89 ہزار 915 سیور اور سیپٹک ٹینک کارکنوں اور 2 لاکھ 81 ہزار 117 کچرا چننے والوں کی توثیق کی جا چکی ہے۔ اس کے علاوہ 87 ہزار 37 پی پی ای کٹس سیور اور سیپٹک ٹینک کارکنوں جبکہ 1 لاکھ 84 ہزار 118 پی پی ای کٹس کچرا چننے والوں میں تقسیم کی گئی ہیں۔

اسی طرح 76 ہزار 845 سیور اور سیپٹک ٹینک کارکنوں اور 1 لاکھ 4 ہزار 729 کچرا چننے والوں کو صحتی کارڈ جاری کیے گئے ہیں، جبکہ ملک بھر میں ہنگامی صفائی خدمات کو مزید مؤثر بنانے کے لیے 753 ایمرجنسی رسپانس سینی ٹیشن یونٹس (ای آر ایس یوز) کو جدید حفاظتی آلات سے لیس کیا گیا ہے۔

حکومت ریاستوں، مرکز کے زیر انتظام علاقوں، شہری بلدیاتی اداروں اور متعلقہ عمل درآمد کرنے والی ایجنسیوں کے ساتھ مل کر مشینی صفائی کی خدمات میں توسیع، پیشہ ورانہ تحفظ کے معیارات کو مضبوط بنانے اور صفائی کارکنوں کی سماجی و اقتصادی فلاح و بہبود کو بہتر بنانے کے لیے مسلسل کام کر رہی ہے۔

مسلسل تعاون اور عوامی شراکت داری کے ذریعے نمستے اسکیم ایک صاف ستھرے، محفوظ اور زیادہ جامع ہندوستان کی تعمیر میں اہم کردار ادا کر رہی ہے، جبکہ عوامی صحت کے تحفظ میں نمایاں کردار ادا کرنے والے صفائی کارکنوں کے وقار اور احترام کو بھی یقینی بنا رہی ہے۔

****

ش ح ۔   م  د ۔  م  ص

(U :  153)