سماجی انصاف و تفویضِ اختیارات کی وزارت پردھان منتری انوسوچت جاتی ابھیودیہ یوجنا (پی ایم-اجے) کے ذریعے درج فہرست ذات (ایس سی) سے تعلق رکھنے والی برادریوں کے سماجی و معاشی بااختیار بنانے کی کوششوں کو مسلسل مضبوط بنا رہی ہے۔ اس اہم اسکیم کا مقصد غربت میں کمی لانا، پائیدار روزگار کے مواقع پیدا کرنا، درج فہرست ذات کی اکثریت والے دیہات میں بنیادی ڈھانچے کو بہتر بنانا اور ٹیکنالوجی سے تقویت یافتہ اور نتائج پر مبنی نفاذ کے ذریعے جامع و ہمہ گیر ترقی کو فروغ دینا ہے۔

وزارت کے ایک سینئر افسر نے بتایا کہ پی ایم-اجے کے تحت آدرش گرام جزو کے ذریعے ملک بھر کے 47,316 گاؤں کا احاطہ کیا جا چکا ہے، جس سے 47 لاکھ 59 ہزار 399 شہری مستفید ہوئے ہیں۔ انہوں نے کہا کہ اب تک 46,782 ترقیاتی کام مکمل کیے جا چکے ہیں، جبکہ 24,133 ولیج ڈیولپمنٹ پلان (وی ڈی پی) تیار کیے گئے ہیں۔

افسر کے مطابق اب تک 16,759 گاؤں کو آدرش گرام قرار دیا جا چکا ہے، جو درج فہرست ذات کی اکثریت والے دیہات میں بنیادی ڈھانچے، بنیادی سہولیات اور معیارِ زندگی میں نمایاں بہتری کی عکاسی کرتا ہے۔

انہوں نے بتایا کہ وزارت نے مالی سال 2026-27 کے لیے 22.50 کروڑ روپے کی مرکزی امداد مختص کی ہے، جس کے تحت تین ہاسٹل منصوبے تعمیر کیے جائیں گے، جن میں دو طالبات کے لیے ہوں گے۔ ان ہاسٹلوں میں 750 طلبہ کے قیام کی گنجائش ہوگی، جو درج فہرست ذات کے نوجوانوں کے لیے تعلیمی مواقع کو وسعت دینے کے حکومت کے عزم کو مزید مضبوط بنائے گا۔

سماجی انصاف و تفویضِ اختیارات کے مرکزی وزیر جناب ڈاکٹر وریندر کمار نے کہا کہ پردھان منتری انوسوچت جاتی ابھیودیہ یوجنا (پی ایم-اجے) ہدف پر مبنی اقدامات کے ذریعے سماجی و معاشی عدم مساوات کو کم کرنے، درج فہرست ذات (ایس سی) سے تعلق رکھنے والے افراد کو بااختیار بنانے اور جامع ترقی کو فروغ دینے میں اہم کردار ادا کر رہی ہے۔ انہوں نے کہا کہ یہ اسکیم مختلف محکموں کے درمیان ہم آہنگی اور عوامی شراکت داری کے ذریعے برادریوں کو بااختیار بنانے اور نچلی سطح کے اداروں کو مضبوط کرنے میں بھی معاون ثابت ہو رہی ہے۔

انہوں نے بتایا کہ پی ایم-اجے کے تین اہم اجزا درج فہرست ذات کی برادریوں کی ہمہ جہت ترقی کو یقینی بنانے کے لیے ترتیب دیے گئے ہیں۔ آدرش گرام جزو کا مقصد درج فہرست ذات کی نمایاں آبادی والے دیہات کی بنیادی ڈھانچے کی ترقی اور عوامی شراکت پر مبنی منصوبہ بندی کے ذریعے ہمہ گیر ترقی کو فروغ دینا ہے۔ گرانٹس اِن ایڈ جزو کے تحت روزگار کے مواقع، ہنرمندی کی تربیت اور آمدنی میں اضافے سے متعلق سرگرمیوں کو فروغ دیا جاتا ہے، جبکہ ہاسٹل جزو کے تحت درج فہرست ذات کے طلبہ کی تعلیمی رسائی بہتر بنانے کے لیے ہاسٹلوں کی تعمیر اور مرمت کے لیے مالی معاونت فراہم کی جاتی ہے۔

وزارت نے پی ایم-اجے پورٹل اور اجے موبائل ایپلی کیشن کے ذریعے ایک مضبوط ڈیجیٹل طرزِ حکمرانی کا نظام اپنایا ہے، جس کے تحت اسکیم کے نفاذ کا پورا عمل آن لائن انجام دیا جا رہا ہے۔ یہ پلیٹ فارم ولیج ڈیولپمنٹ پلان کی تیاری، منصوبوں کی جانچ، فنڈز کی نگرانی، مستفیدین کی مانیٹرنگ اور جیو ٹیگ شدہ رپورٹنگ جیسی سہولیات فراہم کرتا ہے، جس سے ہر مرحلے پر شفافیت اور مؤثر نگرانی کو یقینی بنایا جا رہا ہے۔

وزارت ریاستوں، مرکز کے زیر انتظام علاقوں اور متعلقہ نفاذی ایجنسیوں کے ساتھ قریبی تعاون میں کام کر رہی ہے تاکہ پی ایم-اجے کے تحت تمام منصوبے بروقت مکمل کیے جا سکیں۔ بنیادی ڈھانچے، روزگار، تعلیم اور ڈیجیٹل طرزِ حکمرانی میں مسلسل سرمایہ کاری کے ذریعے یہ اسکیم ایک جامع اور مساوی معاشرے کی تشکیل میں اہم کردار ادا کر رہی ہے، جبکہ درج فہرست ذات کی برادریوں کو ہندوستان کی ترقی کی داستان میں بھرپور شمولیت کے قابل بھی بنا رہی ہے۔

***********

ش ح ۔   م  د ۔  م  ص

(U :  95)