سینٹر فار ٹریڈ اینڈ انویسٹمنٹ لا (سی ٹی آئی ایل)، انڈین انسٹی ٹیوٹ آف فارن ٹریڈ (آئی آئی ایف ٹی) نے کنفیڈریشن آف انڈین انڈسٹری (سی آئی آئی) کے تعاون سے آج نئی دہلی میں 'گوئنگ گلوبل: اے پریکٹیکل گائیڈ فار انڈین ایم ایس ایم ای' نامی گائیڈ بک  کا اجراء کیا۔ سی آئی آئی کے نمائندوں نے اس گائیڈ بک کے بارے میں تفصیلات فراہم کیں۔ اسے ایم ایس ایم ای کی مدد کے لیے ایک ہی جگہ پر تمام عملی معلومات فراہم کرنے والے وسیلے کے طور پر تیار کیا گیا ہے، تاکہ وہ برآمدات کے مواقع کی شناخت کر سکیں، بازار تک رسائی کی ضروریات کو سمجھ سکیں، تجارت سے متعلق آسانی سے دستیاب معلوماتی ذرائع کا فائدہ اٹھا سکیں، بین الاقوامی معیارات اور پائیداری  کی ضروریات پر پورا اتر سکیں اور برآمدات کے لیے خود کو تیار کر سکیں۔

یہ گائیڈ بک ایم ایس ایم ایز کو درپیش عام چیلنجوں کا حل پیش کرتی ہے، جن میں بازار  کی معلومات تک محدود رسائی، غیر ملکی خریداروں کے بارے میں کم معلومات، بین الاقوامی معیارات اور سرٹیفیکیشن پر عمل کرنے میں دشواریاں اور قیمتوں کے مقابلے کو برقرار رکھنا شامل ہے۔ اس میں بازار کے تجزیے کو آسان بنا کر، معیاروں اور سرٹیفیکیشن کی ضروریات کو واضح کر کے، خریداروں کی شناخت میں مدد کر کے اور مارکیٹ ریسرچ  کی لاگت کو کم کرنے والے قابلِ اعتماد اور آسانی سے دستیاب ذرائع کے بارے میں بتا کر ایک عملی روڈ میپ فراہم کیا گیا ہے۔ اس اشاعت کا مقصد ایم ایس ایم ایز کو درست معلومات کے ساتھ کاروباری فیصلے کرنے اور بین الاقوامی تجارت میں زیادہ مؤثر طریقے سے شامل ہونے میں مدد فراہم کرنا ہے۔

گائیڈ بک کے اجراء کے بعد، جناب سمنتا چودھری کی صدارت میں ایک پینل مباحثہ منعقد ہوا، جس میں سی ٹی آئی ایل کے سینئر محقق جناب ردھیش راج ونشی، نیتی اپیریلز کے منیجنگ ڈائریکٹر اور ایف آئی ایس ایم ای کے سابق صدر ڈاکٹر انیمیش سکسینہ، اور ارائنا گروپ کے صدر جناب نلین کوہلی نے شرکت کی۔ اس دوران، ہندوستان کے آزاد تجارتی معاہدوں کے تحت ترجیحی اصولِ ماخذ  اور باہمی تعاون کے نظام کے مؤثر استعمال کے ذریعے ہندوستانی ایم ایس ایم ایز  کو بین الاقوامی بازاروں  تک وسعت دینے کے مواقع پر تفصیلی تبادلہ خیال کیا گیا۔ پینلسٹس نے برآمدات کے لیے بہترین غیر ملکی بازاروں  کی شناخت کرنے، بین الاقوامی معیاروں اور سرٹیفیکیشن کی ضروریات کو سمجھنے، عالمی مانگ کو پورا کرنے کے لیے مصنوعات کی پوزیشننگ اور ان میں تنوع لانے نیز ویلیو ایڈیشن کے ذریعے مقابلے کی صلاحیت میں اضافہ کرنے  کی حکمتِ عملیوں پر بھی بات چیت کی۔

اس پروگرام میں سی ٹی آئی ایل کی ایڈوائزر محترمہ تنوی پروین نے  ٹریڈ ریمیڈیز ایڈوائزری سیل (ٹی آر اے سی) پر ایک پریزنٹیشن بھی پیش کی۔ اس پریزنٹیشن میں تجارتی اصلاحاتی قوانین کے بارے میں بیداری پھیلا کر اور غیر منصفانہ تجارتی طریقوں اور درآمدات میں اچانک اضافے سے متعلق امور  پر رہنمائی فراہم کر کے ملکی صنعت کی مدد کرنے میں ٹی آر اے سی کے رول  پر روشنی ڈالی گئی۔

اس پروگرام میں پالیسی سازوں، صنعت کے نمائندوں، تجارتی ماہرین اور ایم ایس ایم ای کے شعبے سے وابستہ افراد نے ایک پلیٹ فارم پر جمع ہو کر ہندوستان کی بہت چھوٹی، چھوٹی، اور درمیانے درجے کی صنعتوں  (ایم ایس ایم) کی عالمی مسابقتی صلاحیت کو مضبوط بنانے کے لیے عملی حکمتِ عملیوں پر غور و خوض کیا۔

افتتاحی سیشن کا آغاز سینٹر فار ٹریڈ اینڈ انویسٹمنٹ لا  کے سربراہ ڈاکٹر جیمز جے نیڈومپارا کے استقبالیہ خطاب سے ہوا، جس کے بعد سی آئی آئی کے انٹرنیشنل ٹریڈ پالیسی ڈویژن کے پرنسپل ایڈوائزر جناب سمنتا چودھری نے پروگرام کے پس منظر پر روشنی ڈالی۔ اس سیشن میں فیڈریشن آف انڈین مائیکرو اینڈ سمال اینڈ میڈیم انٹرپرائزز ( ایف آئی ایس ایم ای) کے جنرل سکریٹری جناب انل بھاردواج نے بھی اپنے خیالات کا اظہار کیا۔ تجارت  کے محکمے کے ایڈیشنل سکریٹری جناب امیتابھ کمار نے خصوصی خطاب کیا۔

تقریب کا اختتام سوال و جواب کے ایک باہمی سیشن کے ساتھ ہوا، جس نے شرکاء کو برآمدات کی تیاری، معیارات کی تعمیل اور بازار  تک رسائی جیسے عملی پہلوؤں پر پالیسی سازوں اور صنعت کے ماہرین کے ساتھ براہِ راست بات چیت کا موقع فراہم کیا۔ اختتامی خطاب میں جوائنٹ وینچرز، تجارتی نمائشوں میں شرکت، مضبوط ادارہ جاتی تعاون اور عالمی ویلیو چینز میں ان کی شمولیت کو آسان بنانے کے لیے گائیڈ بک میں دیے گئے ذرائع کے مؤثر استعمال کے ذریعے ایم ایس ایم ای کے درمیان اعتماد اور شراکت داری قائم کرنے کی اہمیت پر زور دیا گیا۔

***

ش ح۔س ک۔ ن م

U- 62