سماجی انصاف اور تفویض اختیارات کی وزارت 'نشہ مکت بھارت ابھیان' کے ذریعے منشیات سے مبرا بھارت کی تعمیر کے اپنے عزم کو مسلسل آگے بڑھا رہی ہے۔ یہ ایک فلیگ شپ پہل قدمی ہے جسے 15 اگست 2020 کو 'نیشنل ایکشن پلان فار ڈرگ ڈیمانڈ ریڈکشن' کے تحت شروع کیا گیا تھا۔ یہ ابھیان شعور بیدار کرنے، عوامی شمولیت، علاج، بحالی، بعد از علاج دیکھ بھال اور سماج میں دوبارہ شمولیت کے ذریعے منشیات کے استعمال کو روکنے کی کوشش کرتا ہے، اور ساتھ ہی منشیات کے خلاف ملک گیر تحریک کو فروغ دیتا ہے۔

شروع میں 272 حساس اضلاع میں شروع کی جانے والی یہ مہم اب پورے ملک میں پھیل چکی ہے۔ مسلسل آگاہی اور عوامی متحرک سازی کی سرگرمیوں کے ذریعے، یہ ابھیان 29.32 کروڑ سے زائد افراد تک پہنچ چکا ہے، جن میں 11.20 کروڑ سے زیادہ نوجوان اور 7.92 کروڑ خواتین شامل ہیں۔ اس ابھیان کے تحت ملک بھر کے اسکولوں، کالجوں، یونیورسٹیوں اور دیگر تعلیمی اداروں میں 21 لاکھ سے زائد آگاہی اور حساسیت پیدا کرنے والی سرگرمیاں بھی منعقد کی گئی ہیں، تاکہ منشیات سے پاک طرزِ زندگی کو فروغ دینے کے لیے طلبہ، اساتذہ اور نوجوان رضاکاروں کو شامل کیا جا سکے۔

مرکزی وزیر برائے سماجی انصاف اور تفویضِ اختیارات ڈاکٹر وریندر کمار نے کہا کہ 'نشہ مکت بھارت ابھیان' ملک کی تعمیرِ نو کے سب سے اہم اقدامات میں سے ایک ہے، جس کا محور صحت مند اور نظم و ضبط کے پابند نوجوانوں کو تیار کرنا ہے۔ انہوں نے کہا کہ اس مہم نے نارکوٹکس کنٹرول بیورو، ریاستی حکومتوں، ضلعی انتظامیہ، پولیس، این جی اوز، ہسپتالوں اور تعلیمی اداروں کو کامیابی کے ساتھ ایک پلیٹ فارم پر اکٹھا کیا ہے تاکہ بھارت کو منشیات سے پاک بنانے کے لیے مربوط طریقے سے کام کیا جا سکے۔ انہوں نے مزید اس بات پر زور دیا کہ منشیات کے استعمال کے خلاف جنگ کو بیداری، ہمدردی، اجتماعی ذمہ داری اور عوامی شمولیت کے ذریعے آگے بڑھایا جانا چاہیے۔

مرکزی وزیرِ مملکت برائے سماجی انصاف اور تفویضِ اختیارات جناب رام داس اٹھاولے نے کہا کہ 'نشہ مکت بھارت ابھیان' ایک فلیگ شپ مہم ہے جو منشیات کے استعمال کے مسئلے سے نمٹنے کے لیے شواہد پر مبنی نقطہ نظر کو مضبوط کرتی ہے۔ انہوں نے کہا کہ یہ مہم نوجوانوں کو شامل کرنے کے لیے ایک جدید طریقہ کار اپنائے ہوئے ہے، جبکہ بھارت کو منشیات سے پاک بنانے کے مشترکہ مقصد کے لیے مختلف وزارتوں، ریاستی حکومتوں اور اسٹیک ہولڈرز کی کوششوں کو ایک جگہ یکجا کرتی ہے۔

مرکزی وزیرِ مملکت برائے سماجی انصاف اور تفویضِ اختیارات جناب بی ایل ورما نے کہا کہ 'نشہ مکت بھارت ابھیان' ایک قومی پہل قدمی ہے جس میں نوجوانوں، خواتین اور کمیونٹی کے اراکین کو شامل کیا گیا ہے، اور اس میں اعلیٰ تعلیمی اداروں، یوتھ کلبوں اور خواتین کے گروپوں پر خصوصی توجہ دی گئی ہے۔ انہوں نے کہا کہ ابتدائی روک تھام، بیداری اور عوامی شمولیت کے ذریعے یہ مہم ایک 'جن آندولن' کی شکل اختیار کر چکی ہے، جو ہر شہری کو منشیات کے خاتمے اور ایک صحت مند معاشرے کی تشکیل میں اپنا کردار ادا کرنے کی ترغیب دیتی ہے۔

وزارت نے این اے پی ڈی ڈی آر کے تحت علاج اور بحالی کی خدمات کو نمایاں طور پر مضبوط کیا ہے، جس سے نشے کے عادی افراد کے لیے قائم 768 مربوط بحالی مراکز، کمیونٹی پر مبنی پیئر کی قیادت میں مداخلتی مراکز، آؤٹ ریچ اینڈ ڈراپ ان مراکز (او ڈی آئی سی) اور ایڈکشن ٹریٹمنٹ سہولیات (اے ٹی ایف) کے ملک گیر نیٹ ورک کے ذریعے 28.29 لاکھ سے زیادہ لوگ مستفید ہو چکے ہیں۔ ان خدمات پر بڑھتے ہوئے اعتماد کی عکاسی علاج کے خواہش مند افراد کی تعداد میں 294 فیصد اضافے سے ہوتی ہے—جو کہ 2020 میں 2.08 لاکھ تھی اور 2025 میں بڑھ کر 8.20 لاکھ سے زیادہ ہو گئی۔

وزارت کی ڈرگ ڈی ایڈکشن ہیلپ لائن - 14446 منشیات کے استعمال سے متاثرہ افراد اور خاندانوں کے لیے مشاورت، معلومات اور حوالہ جاتی خدمات فراہم کرتی ہے۔ ہیلپ لائن کو 4.60 لاکھ سے زیادہ کالیں موصول ہوئی ہیں، جو مدد کے خواہاں افراد کے لیے رابطہ کے پہلے نقطہ کے طور پر کام کرتی ہیں۔ حال ہی میں شروع کی گئی این ایم بی اے ایپ 2.0 نے بیداری کی سرگرمیوں کی ریئل ٹائم رپورٹنگ کو قابل بنا کر اور ریاستوں، اضلاع اور شراکت دار تنظیموں کے لیے متعدد شہری-مرکزی خصوصیات متعارف کروا کر عمل درآمد کو مزید مضبوط کیا ہے۔

ان کوششوں کی تکمیل میں وزارت کا این ایم بی اے عہد اور نشہ  مکتی متر پہل قدمی ہے، جو ہر شہری کو نشہ آور اشیاء کے خلاف قومی تحریک میں فعال طور پر حصہ لینے کی ترغیب دیتا ہے۔ اس عہد کے ذریعے شہری منشیات سے پاک رہنے کا عزم کرتے ہیں، منشیات کے مضر اثرات کے بارے میں آگاہی پھیلاتے ہیں، نشے سے لڑنے والے افراد کی مدد کرتے ہیں اور دوسروں کو صحت مند اور ذمہ دارانہ طرز زندگی اپنانے کی ترغیب دیتے ہیں۔ عہد لینے والے نشہ مکتی مترس کے طور پر بھی رجسٹر ہو سکتے ہیں، رضاکار بن کر ملک بھر میں بیداری پیدا کرنے اور کمیونٹی کو متحرک کرنے میں اپنا تعاون دے سکتے ہیں۔

وزارت تمام شہریوں، تعلیمی اداروں، نوجوانوں کی تنظیموں، سول سوسائٹی کی تنظیموں اور کمیونٹی رہنماؤں سے اپیل کرتی ہے کہ وہ 'نشہ مکت بھارت عہد' لے کر، 'نشہ مکتی متر' کے طور پر رجسٹریشن کروا کر، آگاہی کی سرگرمیاں منعقد کر کے اور نشے کی لت سے نبردازما افراد کو ڈرگ ڈی ایڈکشن ہیلپ لائن 14446 کے ذریعے بروقت مدد حاصل کرنے کی ترغیب دے کر اس ملک گیر تحریک میں سرگرم شراکت دار بنیں۔ سب مل کر، 'پوری حکومت' اور 'پورے معاشرے' کے مربوط نقطہ نظر کے ذریعے، بھارت کو ’’نشہ مکت بھارت، خوشحال بھارت‘‘ بنانے کے وژن کو شرمندۂ تعبیر کر سکتے ہیں۔

**********

 (ش ح –م ف)

U.No:47