مرکزی وزیر برائے تجارت و صنعت، شری پیوش گوئل نے دوطرفہ تجارت، سرمایہ کاری اور صنعتی تعاون کو مضبوط بنانے کے لیے سینئر کاروباری رہنماؤں اور سرکاری اہلکاروں پر مشتمل ایک اعلیٰ سطحی بھارتی وفد کی قیادت کرتے ہوئے فن لینڈ کے اپنے سرکاری دورے کا آغاز کیا۔ اس دورے کے دوران دو ادارہ جاتی مفاہمت کی یادداشتوں پر دستخط، وزیروں کی سطح پر مذاکرات، اور اہم شعبوں میں بھارتی اور فن لینڈ کی صنعتوں کے درمیان وسیع پیمانے پر روابط دیکھنے میں آئے۔

یہ دورہ مارچ 2026 میں صدر الیگزینڈر اسٹب کے دورۂ بھارت کے دوران ڈیجیٹلائزیشن اور پائیداری میں بھارت-فن لینڈ تعلقات کو 'اسٹریٹجک پارٹنرشپ' (اسٹریٹجک شراکت داری) تک بڑھانے پر مبنی ہے، اور 27 جنوری 2026 کو بھارت-یورپی یونین آزاد تجارتی معاہدے کے طے پانے کے بعد عمل میں آیا ہے۔

دورے کے پہلے دن، جناب پیوش گوئل نے فن لینڈ کے وزیر اقتصادی امور ڈاکٹر ساکاری پوئسٹو کے ساتھ باہمی مذاکرات کیے۔ ان مذاکرات کا محور مالیاتی منڈیوں، جدت طرازی، کاروباری اداروں کی فنانسنگ، اور دوطرفہ تجارت و سرمایہ کاری کو وسعت دینے میں تعاون کو مضبوط بنانا تھا۔

جناب پیوش گوئل نے ہیلسنکی کے 'ہاؤس آف دی اسٹیٹس' میں منعقدہ 'بھارت-فن لینڈ بزنس فورم' سے بھی خطاب کیا۔ اس فورم میں ڈاکٹر ساکاری پوئسٹو اور جناب پیوش گوئل نے کلیدی خطابات کیے، جس کے بعد سی آئی آئی ٹریڈ پالیسی کونسل کے چیئرمین مسٹر نارائن سیتھورمن  اور 'بزنس فن لینڈ' کے ڈائریکٹر جنرل مسٹر لاسی نوپونین نے اپنی بات پیش کی۔

بزنس فورم کے شانہ بہ شانہ، کنفیڈریشن آف انڈین انڈسٹری اور 'بزنس فن لینڈ' کے درمیان، اور سی آئی آئی اور کنفیڈریشن آف فنش انڈسٹریز کے درمیان دو مفاہمت کی یادداشتوں پر دستخط کیے گئے، جن کا مقصد صنعتی تعاون کو فروغ دینے اور دونوں ممالک کے درمیان کاروباری روابط کو مزید آسان بنانے کے لیے نئے ادارہ جاتی طریقہ کار وضع کرنا ہے۔

بھارتی اور فن لینڈ کی کمپنیوں نے ڈیجیٹل اور جدید ترین ٹیکنالوجیز، خلائی شعبے، صاف توانائی، بائیو اکانومی، سرکولر اکانومی (تجدیدی نظامِ معیشت)، انفراسٹرکچر اور ایڈوانسڈ مینوفیکچرنگ (اعلیٰ درجے کی مینوفیکچرنگ) پر محیط شعبہاتی روابط  میں بھی حصہ لیا، جس میں باہمی تعاون، سرمایہ کاری اور ٹیکنالوجی کی شراکت داری کے مواقع تلاش کیے گئے۔

اپنے خطاب میں، جناب پیوش گوئل نے 2030 تک باہمی تجارت کو دوگنا کرنے کے بھارت اور فن لینڈ کے مشترکہ عزم پر روشنی ڈالی اور تجارت، سرمایہ کاری، مینوفیکچرنگ اور جدت طرازی کی شراکت داری کو وسعت دینے کے لیے 'بھارت-یورپی یونین آزاد تجارتی معاہدے' سے پیدا ہونے والے مواقع پر زور دیا۔

اس دن کی مصروفیات کا اختتام ہیلسنکی میں واقع بھارتی سفارت خانے کی جانب سے دیے گئے ایک نیٹ ورکنگ استقبالیے کے ساتھ ہوا، جس نے دونوں ممالک کے کاروباری رہنماؤں، پالیسی سازوں اور اسٹیک ہولڈرز کو ادارہ جاتی اور تجارتی تعلقات کو مزید مضبوط کرنے کا موقع فراہم کیا۔

دورے کے پہلے دن کی یہ مصروفیات بھارت-فن لینڈ کے اقتصادی تعلقات میں بڑھتی ہوئی رفتار کی عکاسی کرتی ہیں اور ایک لچکدار، جدت پسند اور مستقبل کے تقاضوں کے مطابق شراکت داری قائم کرنے کے لیے دونوں ممالک کے عزم کا اعادہ کرتی ہیں۔

**********

(ش ح –م ف)

U.No:48