કેન્દ્રીય વાણિજ્ય અને ઉદ્યોગ મંત્રી, શ્રી પીયૂષ ગોયલે દ્વિપક્ષીય વેપાર, રોકાણ અને ઉદ્યોગ સહયોગને મજબૂત કરવા માટે વરિષ્ઠ વ્યવસાયિક અગ્રણીઓ અને સરકારી અધિકારીઓના બનેલા ઉચ્ચ સ્તરીય ભારતીય પ્રતિનિધિમંડળનું નેતૃત્વ કરીને ફિનલેન્ડની તેમની સત્તાવાર મુલાકાતની શરૂઆત કરી હતી. આ મુલાકાત દરમિયાન સંસ્થાકીય બે સમજૂતી કરારો (MoUs) પર હસ્તાક્ષર કરવામાં આવ્યા, મંત્રી સ્તરની ચર્ચાઓ થઈ અને મુખ્ય ક્ષેત્રોમાં ભારતીય અને ફિનિશ ઉદ્યોગો વચ્ચે વ્યાપક જોડાણો થયા.

આ મુલાકાત માર્ચ 2026 માં રાષ્ટ્રપતિ એલેક્ઝાન્ડર સ્ટબની ભારતની સત્તાવાર મુલાકાત દરમિયાન ડિજિટલાઇઝેશન અને ટકાઉપણુંમાં ભારત-ફિનલેન્ડ સંબંધોને વ્યૂહાત્મક ભાગીદારીમાં પરિવર્તિત કરવા પર આધારિત છે અને 27 જાન્યુઆરી 2026ના રોજ ભારત-યુરોપિયન યુનિયન મુક્ત વેપાર કરારના નિષ્કર્ષને અનુસરે છે.

મુલાકાતના પ્રથમ દિવસે, શ્રી પીયૂષ ગોયલે ફિનલેન્ડના આર્થિક બાબતોના મંત્રી ડૉ. સાકરી પુઈસ્ટો સાથે દ્વિપક્ષીય ચર્ચા કરી હતી. આ ચર્ચા નાણાકીય બજારો, નવપ્રવર્તન (ઇનોવેશન), એન્ટરપ્રાઇઝ ફાઇનાન્સિંગ અને દ્વિપક્ષીય વેપાર તેમજ રોકાણના વિસ્તરણમાં સહયોગ મજબૂત કરવા પર કેન્દ્રિત હતી.

શ્રી પીયૂષ ગોયલે હેલસિંકીમાં હાઉસ ઓફ ધ એસ્ટેટ્સ ખાતે આયોજિત ભારત-ફિનલેન્ડ બિઝનેસ ફોરમને પણ સંબોધન કર્યું હતું. આ ફોરમમાં ડૉ. સાકરી પુઈસ્ટો અને શ્રી પીયૂષ ગોયલ દ્વારા મુખ્ય વક્તવ્ય આપવામાં આવ્યા હતા, ત્યારબાદ સીઆઈઆઈ (CII) ટ્રેડ પોલિસી કાઉન્સિલના ચેરમેન શ્રી નારાયણ સેથુરામોન અને બિઝનેસ ફિનલેન્ડના ડાયરેક્ટર જનરલ શ્રી લાસી નોપોનેન દ્વારા સંબોધન કરવામાં આવ્યા હતા.

બિઝનેસ ફોરમની સાથે સાથે, કોન્ફેડરેશન ઓફ ઇન્ડિયન ઇન્ડસ્ટ્રી (CII) અને બિઝનેસ ફિનલેન્ડ વચ્ચે, તેમજ સીઆઈઆઈ (CII) અને કોન્ફેડરેશન ઓફ ફિનિશ ઇન્ડસ્ટ્રીઝ (EK) વચ્ચે બે સમજૂતી કરારો પર હસ્તાક્ષર કરવામાં આવ્યા હતા, જે બંને દેશો વચ્ચે ઉદ્યોગ સહયોગને પ્રોત્સાહન આપવા અને બહેતર વ્યવસાયિક જોડાણને સરળ બનાવવા માટે નવી સંસ્થાકીય પ્રણાલીઓનું નિર્માણ કરે છે.

ભારતીય અને ફિનિશ કંપનીઓએ ડિજિટલ અને ફ્રન્ટિયર ટેક્નોલોજી, અવકાશ (સ્પેસ), સ્વચ્છ ઊર્જા, બાયોઇકોનોમી, સર્ક્યુલર ઇકોનોમી, ઇન્ફ્રાસ્ટ્રક્ચર અને અદ્યતન ઉત્પાદનને આવરી લેતા ક્ષેત્ર-વિશિષ્ટ વાર્તાલાપમાં પણ ભાગ લીધો હતો, જેમાં સહયોગ, રોકાણ અને ટેકનોલોજી ભાગીદારી માટેની તકો શોધવામાં આવી હતી.

શ્રી પીયૂષ ગોયલે તેમના સંબોધનમાં 2030 સુધીમાં દ્વિપક્ષીય વેપારને બમણો કરવાની ભારત અને ફિનલેન્ડની સહિયારી આકાંક્ષા પર પ્રકાશ પાડ્યો હતો અને વેપાર, રોકાણ, ઉત્પાદન તેમજ ઇનોવેશન ભાગીદારીના વિસ્તરણ માટે ભારત-ઇયુ મુક્ત વેપાર કરાર દ્વારા સર્જાયેલી તકો પર ભાર મૂક્યો હતો.

દિવસની પ્રવૃત્તિઓ હેલસિંકીમાં ભારતીય દૂતાવાસ દ્વારા આયોજિત નેટવર્કિંગ રિસેપ્શન સાથે પૂર્ણ થઈ હતી, જેણે બંને દેશોના વ્યાપારી અગ્રણીઓ, નીતિ નિર્માતાઓ અને હિતધારકોને સંસ્થાકીય અને વ્યાપારી સંબંધોને વધુ મજબૂત કરવાની તક પૂરી પાડી હતી.

મુલાકાતના પ્રથમ દિવસની પ્રવૃત્તિઓ ભારત-ફિનલેન્ડ આર્થિક સંબંધોમાં વધતી ગતિને પ્રતિબિંબિત કરે છે અને સ્થિતિસ્થાપક, નવપ્રવર્તન-સંચાલિત અને ભવિષ્યલક્ષી ભાગીદારીના નિર્માણ માટે બંને દેશોની પ્રતિબદ્ધતાનો પુનરોચ્ચાર કરે છે.

SM/BS/JD