ભારતના બ્રિક્સ અધ્યક્ષપદ 2026 હેઠળ મહારાષ્ટ્રના નાગપુર ખાતે ત્રીજી બ્રિક્સ પરિવહન મંત્રીઓની બેઠક સંપન્ન થઈ હતી, જે બ્રિક્સ સભ્ય દેશો વચ્ચે પરિવહન સહયોગને વધુ ગાઢ બનાવવામાં એક મહત્વપૂર્ણ સીમાચિહ્નરૂપ છે. 11મી જુલાઈ 2026 ના રોજ યોજાયેલી મંત્રી સ્તરીય બેઠક પહેલા, 9-10 જુલાઈ 2026 ના રોજ ત્રીજી બ્રિક્સ ટ્રાન્સપોર્ટ વર્કિંગ ગ્રુપ (TWG) ના વરિષ્ઠ અધિકારીઓની બેઠક યોજાઈ હતી, જે દરમિયાન વરિષ્ઠ અધિકારીઓએ મંત્રીઓ દ્વારા સ્વીકૃતિ માટેના એજન્ડાના પરિણામો અને મંત્રી સ્તરીય ઘોષણાપત્રને આખરી ઓપ આપ્યો હતો.

આ બેઠકના અંતે સર્વસંમતિથી મંત્રી સ્તરીય ઘોષણાપત્ર સ્વીકારવામાં આવ્યું હતું, જેણે ઇન્ફ્રાસ્ટ્રક્ચરમાં સર્ક્યુલરિટી, સસ્ટેનેબલ એવિએશન ફ્યુઅલ (SAF - ટકાઉ વિમાન બળતણ), ટ્રાન્સપોર્ટ ડીકાર્બોનાઇઝેશન, અર્બન મોબિલિટી હબ, લોજિસ્ટિક્સ સપ્લાય ચેઇન કોઓપરેશન (લોજિસ્ટિક્સ પુરવઠા શૃંખલા સહયોગ) અને બ્રિક્સ રેલવે રિસર્ચ નેટવર્ક પર સહયોગ માટે સહિયારા વિચારો અને માળખું રજૂ કર્યું હતું.

સંમતિ અને સહભાગી અભિગમ સાથે, પરિવહન મંત્રીઓ અને પ્રતિનિધિમંડળના વડાઓ આ ઘોષણાપત્ર પર તારણ કાઢવામાં સક્ષમ બન્યા હતા, જેણે તમામ અગ્રતા ધરાવતા ક્ષેત્રોમાં સામૂહિક પ્રતિબદ્ધતાને દર્શાવી હતી. આ ચર્ચા-વિચારણામાં પરસ્પર આદર, સમાનતા અને સર્વસંમતિની બ્રિક્સની ભાવના પ્રતિબિંબિત થઈ હતી.

કેન્દ્રીય માર્ગ પરિવહન અને રાજમાર્ગ મંત્રી શ્રી નિતિન ગડકરીએ પ્રતિનિધિમંડળના પ્રત્યેક સભ્યનો તેમના સમર્થન બદલ અને મંત્રી સ્તરીય બેઠકના સફળ પરિણામ સુધી પહોંચવા માટે આભાર માન્યો હતો.

ભારતે તમામ બ્રિક્સ સભ્ય દેશોના રચનાત્મક જોડાણ અને મૂલ્યવાન યોગદાનની પ્રશંસા કરી હતી, જેમના સામૂહિક પ્રયાસોથી આ બેઠક સફળતાપૂર્વક સંપન્ન થઈ શકી હતી. ભારતે આગામી બ્રિક્સ અધ્યક્ષપદ માટે આ પહેલોના સુચારુ સંક્રમણને સુનિશ્ચિત કરવા માટેની પોતાની પ્રતિબદ્ધતા પણ પુનરોચ્ચારિત કરી હતી.

આ બેઠકમાં બ્રિક્સ સભ્ય દેશોના પરિવહન મંત્રીઓ, વરિષ્ઠ અધિકારીઓ અને તકનીકી નિષ્ણાતો એકસાથે આવ્યા હતા. વરિષ્ઠ અધિકારીઓની બેઠક, પરિવહન મંત્રીઓની બેઠક અને દ્વિપક્ષીય જોડાણો ધરાવતા આ ચાર દિવસીય કાર્યક્રમમાં બ્રિક્સ દેશોની સમૃદ્ધ વિવિધતા દર્શાવતી સાંસ્કૃતિક પ્રસ્તુતિઓ પણ રજૂ કરવામાં આવી હતી. તેણે પરસ્પર સમજણને વધુ ઊંડી બનાવવા, લોકો વચ્ચેનો સંપર્ક વધારવા અને સહભાગી પ્રતિનિધિમંડળો વચ્ચે વ્યક્તિગત તેમજ સંસ્થાકીય સંબંધો બંનેને મજબૂત કરવા માટે એક મૂલ્યવાન મંચ પૂરો પાડ્યો હતો.

SM/IJ/JD