ಕೋಲ್ಕತ್ತಾ ಮೆಟ್ರೋದ ಪರ್ಪಲ್ ಲೈನ್‌‌ನಲ್ಲಿ ಟನಲ್ ಬೋರಿಂಗ್ ಮೆಷಿನ್ (TBM) 'ದುರ್ಗಾ'ದ ಯಶಸ್ವಿ ನಿರ್ಗಮನದೊಂದಿಗೆ (Breakthrough) ಕೋಲ್ಕತ್ತಾ ಮೆಟ್ರೋ ಮಹತ್ವದ ಮೈಲಿಗಲ್ಲನ್ನು ಸಾಧಿಸಿದೆ. ಇದು ಜೋಕಾ-ಎಸ್ಪ್ಲನೇಡ್ ಮೆಟ್ರೋ ಕಾರಿಡಾರ್‌ನಲ್ಲಿನ ಖಿದೇರ್‌ಪುರ ಮತ್ತು ವಿಕ್ಟೋರಿಯಾ ನಡುವಿನ ಒಂದು ಭೂಗತ ಸುರಂಗ ನಿರ್ಮಾಣ ಕಾರ್ಯ ಪೂರ್ಣಗೊಂಡಿರುವುದನ್ನು ಸೂಚಿಸುತ್ತದೆ. ಇಂದು ಸಾಧಿಸಲಾದ ಈ ಯಶಸ್ವಿ ನಿರ್ಗಮನವು, ಕೋಲ್ಕತ್ತಾದ ನಗರ ಸಾಮೂಹಿಕ ಸಾರಿಗೆ ಜಾಲವನ್ನು ಬಲಪಡಿಸುವ ಮತ್ತು ನಗರದ ಅತ್ಯಂತ ಪ್ರಮುಖ ಮೆಟ್ರೋ ವಿಸ್ತರಣಾ ಯೋಜನೆಗಳಲ್ಲಿ ಒಂದನ್ನು ಮುನ್ನಡೆಸುವತ್ತ ಇಟ್ಟ ಪ್ರಮುಖ ಹೆಜ್ಜೆಯಾಗಿದೆ.

ಪ್ರಮುಖ ಮುಖ್ಯಾಂಶಗಳು:

• ಟಿಬಿಎಂ (TBM) 'ದುರ್ಗಾ' ವಿಕ್ಟೋರಿಯಾ ಮೆಟ್ರೋ ನಿಲ್ದಾಣದಲ್ಲಿ ಯಶಸ್ವಿಯಾಗಿ ಹೊರಹೊಮ್ಮಿದೆ.

• 10 ಜುಲೈ 2025ರಂದು ಸುರಂಗ ನಿರ್ಮಾಣ ಕಾರ್ಯ ಪ್ರಾರಂಭವಾಗಿದ್ದು, ಇದೀಗ ಖಿದೇರ್‌ಪುರ-ವಿಕ್ಟೋರಿಯಾ ಭೂಗತ ಸುರಂಗದ ಕಾಮಗಾರಿ ಪೂರ್ಣಗೊಂಡಿದೆ.

• ಈ ಸಾಧನೆಯು ಎಂಜಿನಿಯರಿಂಗ್ ಉತ್ಕೃಷ್ಟತೆ, ನಿಖರವಾದ ಯೋಜನೆ ಮತ್ತು ಎಲ್ಲಾ ಪಾಲುದಾರರ ನಡುವಿನ ಸುಗಮ ಸಮನ್ವಯವನ್ನು ಪ್ರತಿಬಿಂಬಿಸುತ್ತದೆ.

• ಮೇಲ್ಮೈ ಸಂಚಾರಕ್ಕೆ ಕನಿಷ್ಠ ಅಡಚಣೆಯೊಂದಿಗೆ, ಉನ್ನತ ಗುಣಮಟ್ಟದ ಸುರಕ್ಷತೆ ಮತ್ತು ಗುಣಮಟ್ಟವನ್ನು ಕಾಯ್ದುಕೊಂಡು ಸುರಂಗ ನಿರ್ಮಾಣ ಕಾರ್ಯವನ್ನು ನಿರ್ವಹಿಸಲಾಗಿದೆ.

• ಜೋಕಾ-ಎಸ್ಪ್ಲನೇಡ್ ಮೆಟ್ರೋ ಕಾರಿಡಾರ್ ನಗರದ ದಕ್ಷಿಣ ಭಾಗಗಳನ್ನು ಅದರ ಕೇಂದ್ರ ವಾಣಿಜ್ಯ ಪ್ರದೇಶದೊಂದಿಗೆ ಜೋಡಿಸುವ ಮೂಲಕ ಕೋಲ್ಕತ್ತಾದಾದ್ಯಂತ ಪೂರ್ವ-ಪಶ್ಚಿಮ ಸಂಪರ್ಕವನ್ನು ಗಮನಾರ್ಹವಾಗಿ ಸುಧಾರಿಸಲಿದೆ.

• ಈ ಕಾರಿಡಾರ್ ವೇಗವಾದ, ಸುರಕ್ಷಿತವಾದ ಮತ್ತು ಹೆಚ್ಚು ಸುಸ್ಥಿರವಾದ ಸಾರ್ವಜನಿಕ ಸಾರಿಗೆಯನ್ನು ಒದಗಿಸುವ ನಿರೀಕ್ಷೆಯಿದೆ, ಇದು ಪ್ರಯಾಣದ ಸಮಯವನ್ನು ಕಡಿಮೆ ಮಾಡುತ್ತದೆ ಮತ್ತು ರಸ್ತೆ ದಟ್ಟಣೆಯನ್ನು ಸುಗಮಗೊಳಿಸುತ್ತದೆ.

ಟಿಬಿಎಂ (TBM) 'ದುರ್ಗಾ'ದ ಯಶಸ್ವಿ ಕಾರ್ಯಾಚರಣೆಯು, ಕೋಲ್ಕತ್ತಾ ಮೆಟ್ರೋ ಕಳೆದ 50 ದಿನಗಳಲ್ಲಿ ಸಾಧಿಸಿದ ಸರಣಿ ಪ್ರಮುಖ ಮೈಲಿಗಲ್ಲುಗಳ ಮುಂದುವರಿಕೆಯಾಗಿದೆ.

ಇದಕ್ಕೂ ಮುನ್ನ, ಕವಿ ಸುಭಾಷ್-ಏರ್‌ಪೋರ್ಟ್ (ಆರೆಂಜ್ ಲೈನ್) ಕಾರಿಡಾರ್‌ನಲ್ಲಿನ ಚಿಂಗ್ರಿಘಾಟಾದಲ್ಲಿನ ನಿರ್ಣಾಯಕ 62-ಮೀಟರ್ ವೈಯಾಡಕ್ಟ್ ಅಂತರವನ್ನು ಕೋಲ್ಕತ್ತಾ ಮೆಟ್ರೋ ಯಶಸ್ವಿಯಾಗಿ ಜೋಡಿಸಿತ್ತು. ಇದು ನಿರ್ಮಾಣದ ಪ್ರಮುಖ ಅಡಚಣೆಯನ್ನು ನಿವಾರಿಸಿದ್ದು, ಮಾರ್ಗವನ್ನು ಪೂರ್ಣಗೊಳಿಸುವತ್ತ ವೇಗದ ಪ್ರಗತಿಗೆ ದಾರಿ ಮಾಡಿಕೊಟ್ಟಿದೆ.

ತದನಂತರ, ಕೋಲ್ಕತ್ತಾಗೆ ಭೇಟಿ ನೀಡಿದ ವೇಳೆ, ಕೇಂದ್ರ ರೈಲ್ವೆ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು ಮೆಟ್ರೋ ವಿಸ್ತರಣಾ ಯೋಜನೆಗಳ ಪ್ರಗತಿಯನ್ನು ಪರಿಶೀಲಿಸಿದರು. ಅವರು ಜೈ ಹಿಂದ್ ಬಿಮಾನ್ಬಂದಾರ್‌ನಿಂದ ನೋಪಾರ ನಿಲ್ದಾಣದವರೆಗೆ ಮೆಟ್ರೋದಲ್ಲಿ ಪ್ರಯಾಣಿಸಿದರು, ತಮ್ಮ ಪ್ರಯಾಣದ ಅನುಭವವನ್ನು ತಿಳಿಯಲು ಮತ್ತು ಮೆಟ್ರೋ ಸೇವೆಗಳ ಕುರಿತು ಪ್ರತಿಕ್ರಿಯೆಯನ್ನು ಪಡೆಯಲು ಸಹ ಪ್ರಯಾಣಿಕರೊಂದಿಗೆ ಸಂವಾದ ನಡೆಸಿದರು ಹಾಗೂ ಮೆಟ್ರೋ ಸಿಬ್ಬಂದಿಯನ್ನು ಭೇಟಿಯಾದರು.

ಸಚಿವರು ಚಿಂಗ್ರಿಘಾಟಾ ಯೋಜನೆ ಸ್ಥಳಕ್ಕೂ ಭೇಟಿ ನೀಡಿದರು, ಅಲ್ಲಿ ಅವರು ಇತ್ತೀಚೆಗೆ ಪೂರ್ಣಗೊಂಡ ವೈಯಾಡಕ್ಟ್ ಕಾಮಗಾರಿಯನ್ನು ಪರಿಶೀಲಿಸಿದರು ಮತ್ತು ಕಾಮಗಾರಿಯ ವೇಗವನ್ನು ಶ್ಲಾಘಿಸಿದರು. ಭೇಟಿಯ ಸಂದರ್ಭದಲ್ಲಿ, ಅವರು ಮುಂದಿನ 4-5 ವರ್ಷಗಳಲ್ಲಿ ಸುಮಾರು 60 ಹೊಸ ತಲೆಮಾರಿನ ಮೆಟ್ರೋ ರೈಲುಗಳನ್ನು ಸೇರ್ಪಡೆಗೊಳಿಸುವುದಾಗಿ ಘೋಷಿಸಿದರು. ಅಲ್ಲದೆ, 2014ಕ್ಕೂ ಮೊದಲು ಇದ್ದಂತಹ 28 ಕಿ.ಮೀ.ಗೆ ಹೋಲಿಸಿದರೆ, 2014ರಿಂದ ಕೋಲ್ಕತ್ತಾ ಮತ್ತು ಸುತ್ತಮುತ್ತ 45 ಕಿ.ಮೀ. ಹೊಸ ಮೆಟ್ರೋ ಜಾಲವನ್ನು ಕಾರ್ಯಗತಗೊಳಿಸಲಾಗಿದೆ ಎಂಬುದನ್ನು ಅವರು ಎತ್ತಿ ತೋರಿಸಿದರು.

******