କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହଙ୍କ ଉପସ୍ଥିତିରେ ନର୍ମଦା ପୁରସ୍କାର ହିତାଧିକାରୀ ରାଜ୍ୟ ମହାରାଷ୍ଟ୍ର, ଗୁଜରାଟ, ରାଜସ୍ଥାନ ଏବଂ ମଧ୍ୟପ୍ରଦେଶ ମଧ୍ୟରେ ବକେୟା ଦେୟ ସମସ୍ୟାର ସମାଧାନ ପାଇଁ ଏକ ଐତିହାସିକ ରାଜିନାମା ସ୍ୱାକ୍ଷରିତ ହୋଇଛି।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଏବଂ କେନ୍ଦ୍ର ଜଳ ଶକ୍ତି ମନ୍ତ୍ରୀ ଶ୍ରୀ ସି. ଆର. ପାଟିଲଙ୍କ ଉପସ୍ଥିତିରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଶ୍ରୀ ଦେବେନ୍ଦ୍ର ଫଡନାଭିସ, ଗୁଜରାଟର ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ, ରାଜସ୍ଥାନର ମୁଖ୍ୟମନ୍ତ୍ରୀ ଶ୍ରୀ ଭଜନ ଲାଲ ଶର୍ମା ଏବଂ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଡକ୍ଟର ମୋହନ ଯାଦବ ଆଜି ନୂଆଦିଲ୍ଲୀରେ ଏହି ରାଜିନାମା ସ୍ୱାକ୍ଷର କରିଛନ୍ତି। ଏହି ବୈଠକରେ କେନ୍ଦ୍ର ସରକାର ଏବଂ ସମସ୍ତ ଚାରୋଟି ରାଜ୍ୟର ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।

ସର୍ଦ୍ଦାର ସରୋବର ପ୍ରକଳ୍ପ ନିର୍ମାଣ ପାଇଁ ବ୍ୟୟ ବଣ୍ଟନ ବ୍ୟବସ୍ଥା ସଂକ୍ରାନ୍ତରେ ମଧ୍ୟପ୍ରଦେଶ, ଗୁଜରାଟ, ରାଜସ୍ଥାନ ଏବଂ ମହାରାଷ୍ଟ୍ର ରାଜ୍ୟଗୁଡ଼ିକ ମଧ୍ୟରେ ଦୀର୍ଘ ଦିନରୁ ଲାଗି ରହିଥିବା ବିବାଦର ସମାଧାନ ଦିଗରେ ଏହି ରାଜିନାମା ଏକ ଐତିହାସିକ ମାଇଲଖୁଣ୍ଟ। ଏହି ରାଜିନାମା ଅନୁଯାୟୀ, ବକେୟା ଦେୟର ଚୂଡ଼ାନ୍ତ ସମାଧାନ ପାଇଁ ହେବାକୁ ଥିବା ଦେୟକୁ ଏକକାଳୀନ ସମାଧାନ ମାଧ୍ୟମରେ ସମାଧାନ କରାଯାଇଛି।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ କହିଛନ୍ତି ଯେ ନର୍ମଦା ପୁରସ୍କାର ଅଧୀନରେ ବକେୟା ଅର୍ଥ ପ୍ରଦାନର ପ୍ରସଙ୍ଗ ମହାରାଷ୍ଟ୍ର, ଗୁଜରାଟ, ରାଜସ୍ଥାନ ଏବଂ ମଧ୍ୟପ୍ରଦେଶ ମଧ୍ୟରେ ଦୀର୍ଘ ଦିନ ଧରି ଅମୀମାଂସିତ ରହିଥିଲା ଏବଂ ଆଜି ଏହାର ସୌହାର୍ଦ୍ଦ୍ୟପୂର୍ଣ୍ଣ ସମାଧାନ ହୋଇଛି।

ଶ୍ରୀ ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଜଳ ସୁରକ୍ଷାକୁ ସୁଦୃଢ଼ କରିବା ଏବଂ ଜଳ କ୍ଷେତ୍ରରେ ସମବାୟ ସଂଘୀୟ ବ୍ୟବସ୍ଥାକୁ ପ୍ରୋତ୍ସାହନ ଦେବା ଲାଗି ଅନେକ ଐତିହାସିକ ପଦକ୍ଷେପ ଗ୍ରହଣ କରାଯାଇଛି। ସେ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଅନେକ ରାଜ୍ୟରେ ଡବଲ ଇଞ୍ଜିନ୍ ସରକାର ଗଠନ ହେବା ଦ୍ୱାରା ପରସ୍ପରକୁ ବୁଝିବାର କ୍ଷମତା ବୃଦ୍ଧି ପାଇଛି, ରାଜନୈତିକ ମତଭେଦ ହ୍ରାସ ପାଇଛି ଏବଂ ସାରା ଦେଶରେ ଦୀର୍ଘ ଦିନ ଧରି ଲାଗି ରହିଥିବା ଅନେକ ବିବାଦର ସମାଧାନ ତ୍ୱରାନ୍ୱିତ ହୋଇଛି।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଏହି ଗୁରୁତ୍ୱପୂର୍ଣ୍ଣ ଆନ୍ତଃରାଜ୍ୟ ପ୍ରକଳ୍ପ ଉପରେ ବ୍ୟାପକ ସହମତି ସୃଷ୍ଟି କରିବାରେ ମଧ୍ୟପ୍ରଦେଶ, ଗୁଜରାଟ, ରାଜସ୍ଥାନ ଏବଂ ମହାରାଷ୍ଟ୍ର ସରକାରଙ୍କ ଗଠନମୂଳକ ସହଯୋଗକୁ ପ୍ରଶଂସା କରିଥିଲେ। ଶ୍ରୀ ଶାହ କହିଥିଲେ ଯେ ଏହି ପ୍ରକଳ୍ପ ମଧ୍ୟପ୍ରଦେଶ, ଗୁଜରାଟ ଏବଂ ରାଜସ୍ଥାନକୁ ବିଶେଷ ଭାବେ ଲାଭାନ୍ୱିତ କରିଛି। ସେ କହିଥିଲେ ଯେ ଏହି ବନ୍ଧ ସମ୍ପୂର୍ଣ୍ଣ ହେବା ସହିତ ଏହି ରାଜ୍ୟଗୁଡ଼ିକର ପ୍ରତ୍ୟେକ ଭାଗରେ ଜଳ ଏବଂ ବିଦ୍ୟୁତ ପହଞ୍ଚିସାରିଛି। ସେ ଆହୁରି ମଧ୍ୟ କହିଛନ୍ତି ଯେ ରାଜସ୍ଥାନକୁ ମିଳୁଥିବା ଲାଭ ପ୍ରଥମ ନଜରରେ ସାମାନ୍ୟ ଲାଗୁଥାଇପାରେ, କିନ୍ତୁ ନର୍ମଦା ଜଳ ପାଇଥିବା ଅଞ୍ଚଳଗୁଡ଼ିକ ଜମିର ମୂଲ୍ୟ ଏବଂ କୃଷକଙ୍କ ଭାଗ୍ୟ ଉଭୟରେ ପରିବର୍ତ୍ତନ ଦେଖିଛନ୍ତି।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ କହିଛନ୍ତି ଯେ କେନ୍ଦ୍ର ଜଳ ଶକ୍ତି ମନ୍ତ୍ରୀ ଶ୍ରୀ ସି. ଆର. ପାଟିଲଙ୍କ ନେତୃତ୍ୱରେ ସାରା ଦେଶରେ ଜଳ ସମ୍ବନ୍ଧୀୟ ବିବାଦ ଏବଂ ଜଳ ବଣ୍ଟନ ସମ୍ବନ୍ଧୀୟ ସମସ୍ୟାର ସମାଧାନ କରାଯାଉଛି। ସେ କହିଥିଲେ ଯେ ନିକଟରେ ହରିୟାଣା ଏବଂ ରାଜସ୍ଥାନ ମଧ୍ୟରେ ଜଳ ବିବାଦର ସମାଧାନ ହୋଇଛି। ଶ୍ରୀ ଶାହ କହିଥିଲେ ଯେ ତାହା କିଶାଉ ଡ୍ୟାମ୍ ପ୍ରକଳ୍ପର ପ୍ରସଙ୍ଗ ହେଉ, ରାଜସ୍ଥାନ ଏବଂ ହରିୟାଣା ମଧ୍ୟରେ ଜଳ ବିବାଦ ହେଉ, କିମ୍ବା ଆଜିର ରାଜିନାମା ହେଉ, ଏସବୁ ସମବାୟ ସଂଘୀୟ ବ୍ୟବସ୍ଥାର ଉଜ୍ଜ୍ୱଳ ଉଦାହରଣ। ସେ କହିଥିଲେ ଯେ ଗୁଜରାଟ ହେଉ, ମଧ୍ୟପ୍ରଦେଶ ହେଉ, ରାଜସ୍ଥାନ ହେଉ, ହରିୟାଣା ହେଉ, କିମ୍ବା ମହାରାଷ୍ଟ୍ର ହେଉ, ଏହି ଜଳ ଶେଷରେ ଦେଶର ଜନସାଧାରଣ, ବିଶେଷ କରି କୃଷକମାନଙ୍କ ସେବା କରିଥାଏ। ଶ୍ରୀ ଶାହ ଆହୁରି କହିଥିଲେ ଯେ ଦେଶର ଯେକୌଣସି ଭାଗରେ ଏହି ଜଳ ବ୍ୟବହୃତ ହେଉନା କାହିଁକି, ଏହାର ଚୂଡ଼ାନ୍ତ ହିତାଧିକାରୀ ଜଣେ ଭାରତୀୟ ହେବେ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ କହିଛନ୍ତି ଯେ କୌଣସି ବିବାଦ କାରଣରୁ ହେଉଥିବା ଜାତୀୟ କ୍ଷତିକୁ ଧ୍ୟାନରେ ରଖି ଏହାର ସମାଧାନ ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯିବା ଉଚିତ। ସେ କହିଥିଲେ ଯେ ଯଦି କୌଣସି ପଡ଼ୋଶୀ ରାଜ୍ୟ ସମୃଦ୍ଧ ହୁଏ, ତେବେ ସେହି ସମୃଦ୍ଧିର ଲାଭ ନିଜ ରାଜ୍ୟକୁ ମଧ୍ୟ ମିଳିଥାଏ।

HS