ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು ಇಂಡೋನೇಷ್ಯಾದಲ್ಲಿ, ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಮ್ಯಾನೇಜ್‌ಮೆಂಟ್ ಬೆಂಗಳೂರು (ಐಐಎಂಬಿ) ತನ್ನ ಕ್ಯಾಂಪಸ್ ಅನ್ನು ಸ್ಥಾಪಿಸಲಿದೆ ಎಂದು ಘೋಷಿಸಿದರು. ಈ ಕ್ಯಾಂಪಸ್ ಸಂಪೂರ್ಣ ಆಸಿಯಾನ್ (ASEAN) ಪ್ರದೇಶದ ಯುವಕರಿಗೆ ಅಪಾರ ಪ್ರಯೋಜನವನ್ನು ನೀಡಲಿದೆ ಎಂದು ಪ್ರಧಾನ ಮಂತ್ರಿ ಹೇಳಿದರು. ಪ್ರಧಾನಮಂತ್ರಿಯವರ ಇಂಡೋನೇಷ್ಯಾ ಭೇಟಿಯ ಸಂದರ್ಭದಲ್ಲಿ ಮತ್ತು ಇಂಡೋನೇಷ್ಯಾದ ಅಧ್ಯಕ್ಷ ಪ್ರಬೋವೊ ಸುಬಿಯಾಂತೊ ಅವರೊಂದಿಗಿನ ಜಂಟಿ ಪತ್ರಿಕಾ ಹೇಳಿಕೆಯ ವೇಳೆ ಈ ಘೋಷಣೆಯನ್ನು ಮಾಡಲಾಯಿತು. ಪ್ರಸ್ತಾವಿತ ಕ್ಯಾಂಪಸ್ ಇಂಡೋನೇಷ್ಯಾದ ಮಲಾಂಗ್‌ನಲ್ಲಿರುವ ಸಿಂಗಾಸರಿ ವಿಶೇಷ ಆರ್ಥಿಕ ವಲಯದಲ್ಲಿ (SEZ) ಸ್ಥಾಪನೆಯಾಗಲಿದ್ದು, ಇದು ಭಾರತದ ಉನ್ನತ ಶಿಕ್ಷಣ ವ್ಯವಸ್ಥೆಯನ್ನು ಅಂತಾರಾಷ್ಟ್ರೀಯಗೊಳಿಸುವ ನಿಟ್ಟಿನಲ್ಲಿ ಒಂದು ಐತಿಹಾಸಿಕ ಹೆಜ್ಜೆಯಾಗಿದೆ.

ಈ ಘೋಷಣೆಯು ಭಾರತದ ಪ್ರಮುಖ ಶಿಕ್ಷಣ ಸಂಸ್ಥೆಗಳ ಜಾಗತಿಕ ವಿಸ್ತರಣೆಯಲ್ಲಿ ಮತ್ತೊಂದು ಮಹತ್ವದ ಮೈಲಿಗಲ್ಲನ್ನು ಗುರುತಿಸುತ್ತದೆ. ದುಬೈನಲ್ಲಿ ಐಐಎಂ ಅಹಮದಾಬಾದ್, ಅಬುಧಾಬಿಯಲ್ಲಿ ಐಐಟಿ ದೆಹಲಿ ಮತ್ತು ಜಾಂಜಿಬಾರ್‌ನಲ್ಲಿ ಐಐಟಿ ಮದ್ರಾಸ್‌ನ ಸಾಗರೋತ್ತರ ಕ್ಯಾಂಪಸ್‌ಗಳ ಯಶಸ್ವಿ ಸ್ಥಾಪನೆಯ ನಂತರ, ಇದು ಪ್ರಪಂಚದಾದ್ಯಂತ ಶಿಕ್ಷಣ, ಸಂಶೋಧನೆ ಮತ್ತು ನಾವೀನ್ಯತೆಯಲ್ಲಿ ಉತ್ಕೃಷ್ಟತೆಯನ್ನು ಹೆಚ್ಚಿಸಲು ಬದ್ಧವಾಗಿರುವ ವಿಶ್ವಾಸಾರ್ಹ ಜಾಗತಿಕ ಜ್ಞಾನ ಪಾಲುದಾರನಾಗಿ ಭಾರತದ ಬೆಳೆಯುತ್ತಿರುವ ಸ್ಥಾನಮಾನವನ್ನು ಒತ್ತಿಹೇಳುತ್ತದೆ.

ಇಂಡೋನೇಷ್ಯಾದಲ್ಲಿನ ಪ್ರಸ್ತಾವಿತ ಕ್ಯಾಂಪಸ್, ಐಐಎಂಬಿಯ ಮೊದಲ ಅಂತಾರಾಷ್ಟ್ರೀಯ ಕ್ಯಾಂಪಸ್ ಆಗಲಿದೆ. ಇದು ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ಬೆಳೆಯುತ್ತಿರುವ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಮತ್ತು ಉತ್ತಮ ಗುಣಮಟ್ಟದ ಕೈಗೆಟುಕುವ ಶಿಕ್ಷಣವನ್ನು ಒದಗಿಸುವ ಜಾಗತಿಕ ಪೂರೈಕೆದಾರನಾಗಿ ಭಾರತದ ಹೊರಹೊಮ್ಮುವಿಕೆಯನ್ನು ಎತ್ತಿ ತೋರಿಸುತ್ತದೆ. ಈ ಉಪಕ್ರಮವು ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ಶೈಕ್ಷಣಿಕ ಸಹಯೋಗ, ಮಾನವ ಸಂಪನ್ಮೂಲ ಅಭಿವೃದ್ಧಿ ಮತ್ತು ಜ್ಞಾನ ಪಾಲುದಾರಿಕೆಯನ್ನು ಬಲಪಡಿಸಲು ಭಾರತ ಮತ್ತು ಇಂಡೋನೇಷ್ಯಾದ ಹಂಚಿಕೆಯ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಈ ಕ್ಯಾಂಪಸ್‌ನ ಸ್ಥಾಪನೆಯು, ರಾಷ್ಟ್ರೀಯ ಶಿಕ್ಷಣ ನೀತಿ (NEP) 2020ರ ದೃಷ್ಟಿಕೋನವನ್ನು ಮುನ್ನಡೆಸುವಲ್ಲಿಯೂ ಮಹತ್ವದ ಮೈಲಿಗಲ್ಲಾಗಿದೆ, ಇದು ಭಾರತದ ಪ್ರಮುಖ ಸಂಸ್ಥೆಗಳು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅಸ್ತಿತ್ವವನ್ನು ಸ್ಥಾಪಿಸಲು ಮತ್ತು ವಿಶ್ವ ದರ್ಜೆಯ ಶಿಕ್ಷಣಕ್ಕೆ ಪ್ರವೇಶವನ್ನು ವಿಸ್ತರಿಸಲು ಉತ್ತೇಜಿಸುತ್ತದೆ.

ಕ್ಯಾಂಪಸ್‌ಗಾಗಿ ವಿನ್ಯಾಸಗೊಳಿಸಲಾದ ಪಠ್ಯಕ್ರಮವು ಉದಯೋನ್ಮುಖ ವ್ಯಾಪಾರ ಕ್ಷೇತ್ರದ ಐದು ಪ್ರಮುಖ ಅಂಶಗಳನ್ನು ಸಂಯೋಜಿಸುವ ಮೂಲಕ ಭವಿಷ್ಯದ ಸಿದ್ಧ ನಾಯಕರನ್ನು ರೂಪಿಸಲಿದೆ. ಅವುಗಳೆಂದರೆ: ಜಾಗತಿಕ ಪೂರೈಕೆ ಸರಪಳಿಗಳು, ಡಿಜಿಟಲ್ ರೂಪಾಂತರ, ಕೃತಕ ಬುದ್ಧಿಮತ್ತೆ (AI), ಹವಾಮಾನ ಮತ್ತು ಸುಸ್ಥಿರತೆ, ಮತ್ತು ಆರೋಗ್ಯ ರಕ್ಷಣಾ ನಿರ್ವಹಣೆ. ಪ್ರತಿಯೊಂದು ಕಾರ್ಯಕ್ರಮವನ್ನು ಉದ್ಯಮದ ಉನ್ನತ ನಾಯಕರು, ಗಮನಾರ್ಹ ಶಿಕ್ಷಣ ತಜ್ಞರು, ಪ್ರಖ್ಯಾತ ಜಾಗತಿಕ ವ್ಯಕ್ತಿಗಳೊಂದಿಗಿನ ಸಂವಾದಗಳ ಮೂಲಕ ಶ್ರೀಮಂತಗೊಳಿಸಲಾಗುತ್ತದೆ.

ಐಐಎಂ ಬೆಂಗಳೂರಿನ ಪ್ರಸ್ತಾವಿತ ಕಾರ್ಯಕ್ರಮಗಳನ್ನು ಎರಡು ಹಂತಗಳಲ್ಲಿ ಜಾರಿಗೆ ತರಲಾಗುವುದು. ಮೊದಲ ಹಂತವು ಹಿರಿಯ ಕಾರ್ಯನಿರ್ವಾಹಕರು, ವ್ಯಾಪಾರ ನಾಯಕರು ಮತ್ತು ಸಾರ್ವಜನಿಕ ವಲಯದ ವೃತ್ತಿಪರರನ್ನು ಗುರಿಯಾಗಿಟ್ಟುಕೊಂಡು ಉನ್ನತ ಗುಣಮಟ್ಟದ ಎಕ್ಸಿಕ್ಯೂಟಿವ್ ಎಜುಕೇಶನ್ ಕಾರ್ಯಕ್ರಮಗಳೊಂದಿಗೆ ಪ್ರಾರಂಭವಾಗಲಿದೆ. ಮೊದಲ ಎರಡು ವರ್ಷಗಳಲ್ಲಿ ಮೊದಲ ಹಂತದ ಯಶಸ್ವಿ ಅನುಷ್ಠಾನದ ನಂತರ, ಎರಡನೇ ಹಂತದಲ್ಲಿ ಪದವಿ ನೀಡುವ ನಿರ್ವಹಣಾ ಕಾರ್ಯಕ್ರಮಗಳನ್ನು ಪರಿಚಯಿಸಲಾಗುತ್ತದೆ. ಈ ಕಾರ್ಯಕ್ರಮವನ್ನು ಐಐಎಂ ಬೆಂಗಳೂರು ಮತ್ತು ಸಿಂಗಾಸರಿ ವಿಶೇಷ ಆರ್ಥಿಕ ವಲಯದ ನಿರ್ವಹಣೆ ಮತ್ತು ಅಭಿವೃದ್ಧಿ ಘಟಕವಾದ ಪಿಟಿ ಇಂಟೆಲಿಜೆನ್ಸಿಯಾ ಗ್ರಾಹತಮಾ (PT IGT) ನಡುವಿನ ತಿಳುವಳಿಕಾ ಒಪ್ಪಂದದ (MoU) ಮೂಲಕ ಜಾರಿಗೆ ತರಲಾಗುವುದು.

ಈ ಕ್ಯಾಂಪಸ್ ಮುಖ್ಯವಾಗಿ ಇಂಡೋನೇಷ್ಯಾದ ಪ್ರಜೆಗಳಿಗೆ ಸೇವೆ ಸಲ್ಲಿಸುವ ಉದ್ದೇಶವನ್ನು ಹೊಂದಿದೆ, ಆದರೆ ನೆರೆಯ ಆಗ್ನೇಯ ಏಷ್ಯಾದ ದೇಶಗಳ ಭಾಗವಹಿಸುವವರನ್ನೂ ಆಕರ್ಷಿಸಲಿದೆ. ಇಂಡೋನೇಷ್ಯಾದಲ್ಲಿನ ಭಾಗವಹಿಸುವವರು ಬೆಂಗಳೂರು ಕ್ಯಾಂಪಸ್‌ಗೆ ಅಲ್ಪಾವಧಿಯ ಶೈಕ್ಷಣಿಕ ಭೇಟಿಗಳನ್ನು ಕೈಗೊಳ್ಳುವ ಅವಕಾಶಗಳನ್ನು ಹೊಂದಿರುತ್ತಾರೆ, ಇದು ಅವರಿಗೆ ಭಾರತದ ನಾವೀನ್ಯತೆ ಪರಿಸರ ವ್ಯವಸ್ಥೆ, ಉದ್ಯಮ ಮತ್ತು ವ್ಯಾಪಾರ ವಾತಾವರಣದ ಪರಿಚಯವನ್ನು ನೀಡುತ್ತದೆ.

ಈ ಉಪಕ್ರಮವು ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ದೀರ್ಘಕಾಲದ ಸಂಬಂಧವನ್ನು ಗಾಢವಾಗಿಸುವ ನಿರೀಕ್ಷೆಯಿದೆ, ಜೊತೆಗೆ ಇಂಡೋನೇಷ್ಯಾವನ್ನು ಗುಣಮಟ್ಟದ ನಿರ್ವಹಣಾ ಶಿಕ್ಷಣಕ್ಕಾಗಿ ಪ್ರಮುಖ ಪ್ರಾದೇಶಿಕ ಕೇಂದ್ರವನ್ನಾಗಿ ಮಾಡಲಿದೆ. ಇದು ಜಾಗತಿಕ ದಕ್ಷಿಣ ರಾಷ್ಟ್ರಗಳನ್ನು ವಿಶ್ವ ದರ್ಜೆಯ ಶಿಕ್ಷಣ, ನಾಯಕತ್ವ ಅಭಿವೃದ್ಧಿ ಮತ್ತು ನಾವೀನ್ಯತೆಗಾಗಿ ಆದ್ಯತೆಯ ತಾಣವನ್ನಾಗಿ ಮಾಡುವ ಭಾರತದ ಬದ್ಧತೆಯನ್ನು ಮತ್ತಷ್ಟು ಬಲಪಡಿಸುತ್ತದೆ.

*****