ময়াম পুম্নমক কমদৌবিরিবগে, নুংঙাইরিকো? গুজরাতকী মীয়াম্না পাম্নবা মুখ্য মন্ত্রী ভুপেন্দ্র ভাই পতেল, কেন্দ্রগী মন্ত্রীমন্দলদা ঐহাক্কী মরুপ অশ্বিনী বৈষ্ণব, থৌনা ফরবা উপ মুখ্য মন্ত্রী হর্শ সঙ্ঘভী, গুজরাত সরকারগী মন্ত্রীশিং, এম.পি.শিং অমসুং এম.এল.এ.শিং, সি.জি. পাৱরগী চেয়রমেন ভেল্লায়ন সুবৈয়াজী, রেনেসাস ইলেক্ত্রোনিক্সকী প্রসিদেন্ত মালিনিজী, সি.জি. সেমিগী চেয়রমেন গিরিশজী, মফম অসিদা লৈরিবা অতোপ্পা ইন্দস্ত্রীগী লুচিংবশিং, নুপীশিং অমসুং নুপাশিং!

ঙসিগী থৌরম অসিনা ভারতনা করিগুম্বা অমা তৌনবা ৱারেপ লৌরবসু, ভারতনা মদু পাংথোকপা ঙম্মি হায়বসিগী খুদম্নি। চহি মঙাগী মমাংদা, ভারতনা লৈবাক অসিবু সেমিকন্দক্তর হব অমা ওইহন্নবা ৱাশক লৌখি। ঐখোয়না দিজাইন ইন ইন্দিয়া, মেক ইন ইন্দিয়াগী মন্ত্রগা লোয়ননা মাংলোমদা চংশিল্লি। অমসুং ঙসিদি, লৈবাক অসিগী অহুমশুবা সেমিকন্দক্তর প্লান্ততা চিপ পেকেজিংগী কম্মর্সিএল প্রদক্সন হৌখ্রে।

মরুপশিং,

২০২৪দা ঐহাক্না প্লান্ত অসিগী উরেপ-উয়ুং তম্বগী খুদোংচাবা ফংখি। ২০২৫গী ওগস্ত থা ফাওবদা, মফম অসিদা চিপ চাংয়েং তৌবগী থবক হৌখ্রে, অমসুং ঙসি, প্লান্ত অসি শঙ্গাখ্রে। উরেপ-উয়ুং তম্বদগী প্রদক্সন ফাওবগী খোঙচৎ অসিসু তশেংনা ইচিল-ইনাও কয়ানা কন্না হোৎনবগী মহৈনি, অমসুং সুববাইয়াজীগুম্বা মীওইশিংনা লুচিংলি। ঐহাক্না থৌরম অসিদা শরুক য়াদ্রিঙৈ মমাংদা প্রোজেক্ত অসিগা মরী লৈনবা মীওই কয়াগা ৱারী শানবগী খুদোংচাবা ফংখি। লোল, ফিজেৎ-চাকচা মখল খুদিংমক্কী মীওইশিং য়াওনা মসিদা অপীকপা ভারত অমা লৈবগুম্না ফাওখি। ঐহাক্না এক্সিবিশন অসিদা চৎলিঙৈদা নহা ওইরিবা নুপা অমসুং নুপীমচা কয়াগা ৱারী শানখি। অমসুং ঐহাক্না চাউথোকচবা পোকচবা য়াবা ৱাফম অমনা মখোয়গী থাজবগী থাক অদুনি। মখোয়না থাজবা থম্বা, তেক্নোলোজীদা থাজবা থম্বা অসিনা ঐঙোন্দা তশেংনা ইথিল পীখি।

মরুপশিং,

সি.জি. সেমি প্লান্ত অসি ভারত, জাপান অমসুং থাইলেন্দগী ঐখোয়গী ইন্দস্ত্রী পার্তনরশিংগী পুন্না হোৎনমিন্নবগী খুদম অমনি। মসি শুপ্নগী বিজিনেস ভেঞ্চর অমা নত্তে, অদুবু ভারতকী সেমিকন্দক্তরগী খোঙচৎপু খোঙজেল য়াংশিনহনগদবা তেক্নোলোজী, থাজবা অমসুং পার্তনরশিপকী মোদেল অমনি। চহি অনিরোমগী মনুংদা, অদোম্না মসিগী ফেসিলিতী অসি কৈসু ওইরম্বদগী হোৎন্দুনা পাকথোক চাউথোকহনখ্রে। ঙসিদি, ঐখোয়না মসিগী কম্মর্সিএল প্রদক্সন হৌরে। চহি খুদিংগী মফম অসিদা চিপ মিলিয়ন ২০০ পুথোক্কনি হায়না ঐনা খঙলে। লাখ ২০ নত্তে, করোর ২০নি। অমসুং ঐহাক্না খঙলে মদুদি অদোম্না মসিদা লেপকদ্রে। চহিদা চিপ বিল্লিয়ন ৫ পুথোক্নবা নহাক্না পান্দম থম্লি - নোংমদা চিপ মিলিয়ন ১৫ হেন্না পুথোক্লি। অদোম্না মসি অথুবা মতমদা ফংলগনি হায়না ঐনা থাজৈ। সেমিকোন ইন্দিয়া প্রোগ্রামনা খোঙজেল য়াংনা চংশিল্লক্লি হায়বসিগী মখা তাবা খুদম্নি। সি.জি. সেমি তীম পুম্নমক, রাজ্য সরকার অমসুং লৈবাক মীয়াম্বু ঐহাক্না থম্মোয় শেংনা নুংঙাইবা ফোংদোকচরি।

মরুপশিং,

ঙসি ঐহাক্না অখন্নবা নুংঙাইবা অমা ফাওরি। করিগীনো হায়না অদোম্না হংবা য়াই। মরমদি চহি ২০গী মমাংদা ঐহাক্না গুজরাত্তা সেমিকন্দক্তর প্লান্ত অমা লিংখৎনবা থৌরাং তৌখি। গান্ধীনগর অমসুং প্রান্তিজগী মনাক্তা, ঐখোয়না একর ৩৫০-৪০০গী লম খল্লে। ঐখোয়না কম্পনী খরগা ৱারী শানবসু লৈখি। মতম অদুদা ভারত সরকারনা অচৌবা থাজবা কয়া পীখি অমসুং কম্পেনী খরনা খন্ন-নৈনবগীদমক মাংদা লাকখি। অদুবু সরকারনা মদু থবক ওইনা পাংথোকপা ঙমখিদে, অমসুং ৱাফম অসি কান্নবা ফংখিদে। ঙসি, মসি থোক্লিবা অসি উবদা, ঐহাক্কী থম্মোয়দা য়াম্না নুংঙাইবা ফাওই। চহি ২০-২২গী মমাংদা ঐহাক্না শাগৎখিবা মঙলান অদু মংফাওনহনবনি। মতম অদুদা লৈবাক অসিদা অসিগুম্বা হীরমশিং অসিগী মতাংদা কনা অমত্তনা খন্নরমদে। ঐহাক্না মখোয়শিং অসিগী মরমদা ঙাংলকপা মতমদা, মীদিয়ানা ঐহাকপু করেম্নখি। মতম অদুদা মসি থোকখিদে, অদুবু ঙসিদি, মসি থোক্লিবা অসিদা, ঐহাক্না য়াম্না নুংঙাইবা ফাওই। চয়োল খরগী মমাংদা, ঐহাকপু অঙকপা পোকহনবা পাউ অমা লৈখি - অমসুং মেদিয়ানা মসিদা পীগদবা মীৎয়েং অদু পীরমদবদা ঐহাক্না অঙকপা ফাওখি। ভদোদারাদা শাখিবা সি.২৯৫ এয়রক্রাফ অসি ভারত্তা শাখি অমসুং পাইখি। মতম অমদা সাইকলগী ফেক্তরি অমা লাকপা মতমদা অথুম-অহাও পীনদুনা নুংঙাইবা ফোংদোক্নরম্মি। ঙসিদি, ভারতনা এয়রপ্লান শাবগী থবক পায়খৎলি।

মরুপশিং,

ময়াম পুম্নমক্না মফম অসিদা খঙ-হৈরবা মীওইশিংনি, অমসুং নহা ওইরিবা ইচিল-ইনাও কয়া অমা মফম অসিদা লৈরিবদু ঐনা উরি। ঐখোয়না মালেমগী ইন্দস্ত্রীগী পুৱারীদা য়েংবীরবদি, করিগুম্বা অমদি ময়েক শেংই: মালেমগী ইন্দস্ত্রীগী শক্তি অসি ফেক্তরী অমা খক্তনা শেমখিদে। ইন্দস্ত্রিএল পাৱরগী য়ুম্ফম অসি ক্লস্তরশিংদা লৈ। অমেরিকাগী সিলিকন ভেলী, তাইৱানগী হসিনচু সাইন্স পার্ক, জপানগী সিলিকন আইলেন্দ, তসুকুবা সাইন্স সিতী - পুম্নমক্না ক্লস্তরশিংগী মরুওইবা উৎলি। ঙসিদি সানন্দনসু মদুগী মাইকৈ অদুদা চংশিল্লি।

মরুপশিং,

থা খরগী মনুংদা, মাইক্রোন, কেন্স, অমসুং সি.জি. সেমিনা মফম অসিদা পোত্থোক পুথোকপা হৌখি। সেমিকন্দক্তর ক্লস্তর অমা ভারত্তা পোক্লক্লি। ঙসিদি, চিপ পেকেজিং অসি মফম অসিদা থোক্লি। অঙনবদা, অখন্নবা কম্পেনীশিং লাক্কনি, কেমিকেলশিং পুথোক্কনি, অনৌবা তেস্তিং লেবোরেতরীশিং শাগনি, ইন্দস্ত্রীশিংদা সর্ভিস পীবা মেছিনশিং থোরক্কনি, দিজাইন সেন্তরশিং হাংদোক্কনি, অমসুং স্তার্তঅপশিং থোরক্কনি। মসি কাস্তরশিংগী মপাঙ্গলনি। ইন্দস্ত্রী অমা খক্তনা ইন্দস্ত্রী চাম্মরোম থোকহল্লি। ইন্দস্ত্রী লাখ কয়াদা থবক পীরি। অমসুং থবক মিলিয়ন কয়ানা লমদম পুম্নমক্কী শেন্মিৎলোনদা অহোংবা পুরক্কনি। অমসুং মসি সানন্দ খক্তদা থোক্লক্তে - সেমিকন্দক্তর ক্লস্তরশিং অসি ভারত শিনবা থুংনা রাজ্য কয়াদা থোরক্লি।

মরুপশিং,

ঙসিদি ভারত্তা সেমিকন্দক্তর সেক্তরগী খুমাং চাউশিল্লকপনা মীপুম খুদিংমকপু পুক্নিং থৌগৎলি। মসি লৈবাক শীনবা থুংনা অমসুং মালেম শীনবা থুংনা খন্ন-নৈনরি। মীওই কয়ানা মসিবু তোখাইনা উনৈ, অদুবু কেস অসি মসি নত্তে। ভারত্তা সেমিকন্দক্তরশিং পাকথোক চাউথোকপা অসি খঙহৌদনা লাকপা নত্তে - মসি হৌখিবা চহি তরা অসিদা মফম অসিদা থোকখিবা ইলেক্ত্রোনিক্স রিভোলুসনগী মথংগী খোঙথাংনি।

মরুপশিং,

ঐখোয়না মোবাইল ফোন পুথোকপদগী হৌখি। মতম অমদা ভারতনা মসিগী স্মার্তফোন অয়াম্বদি মশাগী দোমেস্তিক ওইবা মথৌ তাবদগী হেন্না ইম্পোর্ত তৌরম্মি। ঙসিদি ভারত্তা মোবাইল ফোন পুথোকপা অসি মমাংগী মতমগা চাংদম্নবদা শরুক ৩৩ হেনগৎখ্রে। ২০১৪গী মমাংদা, ভারতনা ফোনশিং ইম্পোর্ত তৌখি। অদোম্না ঐহাকপু গুজরাত্তগী দিল্লীদা থারকপদগী, ভারতনা মখোয়শিং থাদোকপা হৌরকখি। ঙসিদি, ভারত অসি মালেমগী অনিশুবা খ্বাইদগী চাউবা মোবাইল মেন্যুফেকচরর অমসুং অনিশুবা খ্বাইদগী চাউবা মোবাইল এক্সপোর্তর ওইরে।

মরুপশিং,

হৌখিবা চহিশিংদা, ঐখোয়না ইলেক্ত্রোনিক মেন্যুফেকচরিং ইকোসিস্তেম মপুং ফানা মপাঙ্গল কনখৎহল্লে। ভারতকী অপুনবা ইলেক্ত্রোনিক্স পুথোকপা অসি ২০১৪গা চাংদম্নবদা চাউরাক্না শরুক তরেৎ হেনগৎলে। ইলেক্ত্রোনিক এক্সপোর্ত অসি চাউরাক্না শরুক ১১ হেনগৎখ্রে।

মরুপশিং,

ঐখোয়গী হোৎনবা অসি ফাইনেল প্রদক্তশিংদা মরোমদোম লেপচবদা লোইবা নত্তে। ঐখোয়না কম্পোনেন্তশিংদা মশা-মরোমদোম লেপচবগী মায়কৈদসু চংশিল্লি। মসিনা মরম ওইদুনা ভারতকী মথংগী খোঙথাং অসি ময়েক শেংলে। ঐখোয়না মোবাইলশিং, ইলেক্ত্রোনিক্স খক্তা নত্তনা ইলেক্ত্রোনিক্স মালেম পুম্বদা পাৱর পীরিবা চিপশিংসু শেমগনি। মসি ঐখোয়গী থৌরাংনি - অহানবদা পোত্থোকশিং, মতুংদা কম্পোনেন্তশিং, অমসুং হৌজিক সেমিকন্দক্তরশিং। ইলেক্ত্রোনিক্স ভেল্যু চেন পুম্নমক ভারত্তা লৈগনি। মসি চাউখৎলবা ভারত অমগী রোদমেপনি। মসি মেক ইন ইন্দিয়াগী মথংগী ফেজনি।

মরুপশিং,

সেমিকন্দক্তর ইকোসিস্তেমগী মথংগী খোঙথাং অসি ক্রিতিকেল মিনরেলশিং অমসুং হায়-তেক পোৎলমশিংদা মশা মরোমদোম লেপচবা ঙম্বা অসিনি। হৌজিক্তা, সুব্বাইয়া জীনা গুজরাতিদা ৱা ঙাংখি অমসুং পাউরৌ অমা শেয়র তৌখি: মার্ক য়ৌদবা অসি ঙাকপীবা য়াই, অদুবু পান্দম থম্বদি য়াদে। মসি ঐহাক্কী মওং-মতৌসু ওইরি - ঐহাক্না অপীকপা পান্দম থমদে, অপীকপা ৱাখল্লোন লৈতে। ঐনা মীতম অমা শাবা তারবদি, ঐনা মসি মালেমদা খ্বাইদগী চাউবা ওইহনগনি। সুববাইয়া জীনা হায়রম্বা অদুগুম্না, থবকশিংনা ৱাহৈদগী হেন্না ৱা ঙাংই। ঙসি ঐখোয়না উরিবা খুমাং চাউশিল্লকপা অসি, ঐখোয়না পাংথোক্লিবা মাইপাকপশিং অসি সপ্লাই চেনবু মপাঙ্গল কনখৎহন্দুনা থম্বা তাই। মসিসু ঐখোয়গী পান্দম্নি। ঙসিদি, ভারতনা মসিগী মাইকৈ অসিদা পাক-শন্না হোৎনরি। ঐখোয়গী পান্দমদি ভারত্তা ইকোসিস্তেম পুম্নমক চাউখৎহনবা হায়বসিনি - চিপ দিজাইন তৌবদগী হৌরগা ফেব্রিকেসন ফাওবা পেকেজিং ফাওবা। ভারতনা চিপশিং শাবতা নত্তনা ভারতকী নহারোলশিংনা মেদ ইন ইন্দিয়া চিপশিংনা পাৱর তৌদুনা এ.আই., রোবোতিক্স, অমসুং নেক্স জেনরেল তেক্নোলোজীদা মথংগী তেক্নোলোজিকেল রিভোলুসন পুথোক্কনি। ঐহাক্না ভারতকী নহারোলশিংদা, মখোয়গী হৈশিংবা অমসুং মখোয়গী শক্তিদা থাজবা থম্লি। ঐহাক্কী মপুং ফাবা থাজবা অসি ঐহাক্কী লৈবাক্কী নহাশিংগী শক্তিদা লৈ।

মরুপশিং,

মসিগী তাঞ্জা অসিদা, ঐহাক্না ঐখোয়গী লৈবাক্কী নহাশিংদা হকথেংননা করিগুম্বা খরা হায়জনীংই। মালেমদা অনৌবা ইন্দস্ত্রিএল রিভোলুসন অমা লাকপা মতমদা, খ্বাইদগী চাউবা খুদোংচাবশিং অসি নহাশিংগীদমক্তা শেম্মী। আই.তি.গী অহোংবা লাকপগা লোয়ননা ভারতকী নহারোল মিলিয়ন কয়ানা মখোয়গী হৈশিংবা উৎনবগী খুদোংচাবা ফংখি। মসিগী মতুংদা স্মার্তফোন অমসুং ইলেক্ত্রোনিক্স পুথোকপগী মতম লাকখি, মসিনা অনৌবা খুদোংচাবা মিলিয়ন কয়া অমা পুথোকখি। সেমিকন্দক্তর রিভোলুসন অমসুং এ.আই. রিভোলুসনগী মতম অসিনা মশীং থীঙমদ্রবা খুদোংচাবশিং পুরক্লি। রিসর্স অমসুং দিজাইনদগী হৌরগা স্তার্তঅপ ইন্নোবেসন অমসুং সপ্লাই চেন মেনেজমেন্ত ফাওবদা খুদোংচাবশিং অসি মফম খুদিংমক্তা লৈ।

মরুপশিং,

অনৌবা স্কিল অমসুং অনৌবা ৱাখল্লোনশিং মথৌ তাই। হৌজিক মরুওইরিবসি অদোমগী অনৌবা ৱাখল্লোন অমা লৈব্রা হায়বসিনি, অদোমদা তমজনবগী অমসুং অনৌবা অমা তৌনবগী পুক্নিং চিংশিনবা লৈব্রা হায়বসিনি। ঙসি ঐহাক্না ঝারখন্দ, বালাঘাত, মধ্য প্রদেশ, কেরলা, ছত্তিসগরগী ইচানুপীশিংগা উনখ্রে। ঐখোয়গী ৱারী শানবগী ৱারোল অসি জয় জোহরদগী হৌখি। ঐনা লমদম অদুদা লৈরম্বা মরম্না, ঐহাক্না মদু ফজনা খঙই। নুপীমচাশিং অসিনা য়াম্না থুনা তম্লকপা অমসুং মখোয়না মফম অদুদা থবক পায়খৎলিবা মওং অসিনা ঐহাকপু ঐহাক্কী লৈবাক্কী নহা ওইরিবা শক্তি অসিদা চাউথোকচবা পোকহল্লি।

মরুপশিং,

লাক্কদৌরিবা মতম অসিদা, এ.আই.না অদোমগী মমাংদা অনৌবা স্কিল অমসুং এক্সপর্তীসকী মালেম অমা হাংদোক্লগনি। মরম অসিনা ভারতকী নহারোলশিংনা মসিগী খুদোংচাবা অসি মাংহন্দবা তাই। অমসুং ঐনা নহাশিংদা হায়জরি - ৱাখল্লোন অসি অদোমগীনি, মতেং অসি ঐগীনি।

মরুপশিং,

মসিগী ফেসিলিতী, প্রোজেক্ত অসিনা ভারতকী নহারোলশিংনা অনৌবা ওইথোকপা য়াবশিংগা মতৌ করম্না শম্নরিবগে হায়বগী খুদম অমসু ওইরি। ঐনা হায়খিবগুম্না, ঝারখন্দ, ছত্তিসগর, মধ্য প্রদেশ, ত্রাইবেল বেল্ত পুম্নমক্তগী মফম অসিদা থবক তৌরিবা ইচিল-ইনাওশিংনা ঐঙোন্দা ফেক্তরী অদু উৎখি। মখোয়না য়াম্না হরাও তয়াম্না অকুপ্পা মরোল খুদিংমক শন্দোক্না তাকখি। অচম্বা ইমুংশিং, অচম্বা স্কুলশিং, আই.তি.আই. এজুকেসন। ঐখোয়গী লৈবাক অসিদা, করিগুম্বা মীওই অমনা আই.তি.আই.দা চংবা মতমদা মমা মপাশিংনা অতোপ্পা হায়দে, মখোয়না ইকাই ফাওই। অদুবু মতম অসি হোংলক্লে - মসি আই.তি.আই.গী গ্রেজুএৎশিংগী মতমনি। মখোয়গী এজুকেসন অসি আই.তি.আই.দগী ওইরবসু, মখোয়গী মঙলানশিং অসি অখন্নবা অমনি। নুপীমচাশিং অসিগী ইমুং-মনুং কয়ানা পাসপোর্ত অমত্তা ফংখিদ্রি, অমত্তা উখিদ্রি। খরনা দিল্লী নৎত্রগা মুম্বাইদদি চৎখিদ্রি, মপানগী লমদম তোকখ্রগা। অদুম ওইনমক হায়রিবা ইচানুপীশিং অসি মালয়েসিয়াদা ত্রেনিং ফংনবগীদমক চৎখি, মালেমগী খ্বাইদগী অওনবা সেমিকন্দক্তর তেক্নোলোজী তমখি, অমসুং ঙসিদি মখোয় অসি মেদ ইন ইন্দিয়া চিপ মেন্যুফেকচরিং প্রোসেসকী শরুক অমা ওইরে। ঐহাক্না নিংশিংলি মদুদি দিল্লীদা সুববাইয়া জীনা ঐঙোন্দা মতম অমদা ভিদিও অমা উৎখি। মখোয়না উমংদা হিংলম্মি, চারপোইদা মহৈ তম্মি, অমসুং মতুংদা ইমিগ্রেশনগী চেক-ইন তৌনবা এয়রপোর্ততা লেপ্লম্মি, মালয়েসিয়াদা থুংগদবা ফ্লাইৎ তোংনবগীদমক। ঐহাক্না মহাক্কা খুদক্তা ৱারী শানখি মদুদি ঐহাক্না গুজরাত্তা লাকপা মতমদা, ঐহাক্না ইচানুপীশিং অসিবু গবর্নর হাউসতা কৌগনি অমসুং মখোয়গা ৱারী শানগনি। মতমদুদা ঐহাক্না মসি পাংথোকপা ঙমখিদে, অদুবু ঙসি ঐহাক্না মসিগী খুদোংচাবা অসি ফংলে। অদোমবু থাগৎচরি, সুববাইয়া জী। ঐহাক্না ইচানুপীশিং অমসুং মখোয়গী ইমুং-মনুং পুম্নমকপু থাগৎপা ফোংদোকচরি।

মরুপশিং,

ঙসিগী থৌরম অসিনা ভারতপু চাউখৎহন্নবা ঐখোয়না কয়াম কন্না হোৎনরিবগে হায়বগী খুদম অমসু ওইরি। চহি অসিগী হৌরকপদা, ঐহাক্না ২০২৬ ফাওবদা সেমিকন্দক্তর ফেসিলিতী মরি হৌরগনি হায়না হায়খি। অমসুং ঙসি ঐগী মিনিস্তরনা হায়খি - মরি নত্তে, মঙা। অমসুং ঐহাক্না নুংঙাইবা ফাওই মদুদি থা তরুক্কী মনুংদা, প্রোজেক্ত অহুমদা প্রদক্সন তৌবা হৌখ্রে। মসিনা উৎলি মদুদি ঙসিগী ভারতনা অচৌবা পান্দমশিং থম্বতা নত্তনা মতম চানা ফংলি। মসি ভারতনা মালেম পুম্বদা, ইনভেস্তর খুদিংমক্তা পীরিবা থাজবনি। ঐখোয়গী পোলিসীশিং অসি লেপ্পা লৈতে, ঐখোয়গী ৱারেপশিং অসি ময়েক শেংই, অমসুং ঐখোয়গী থবকশিং অসি অথুবা মতমদা পাংথোক্লি। ঐহাক্না সি.জি. সেমিগী মেনেজমেন্ত অমসুং অতৈ ইনভেস্তরশিংদা থাজবা পীজরি মদুদি ভারতনা খল্লবা রিফোর্মগী লম্বী, ঐখোয়না চংশিল্লিবা রিফোর্ম এক্সপ্রেস অসি মখা তানা খুমাং চাউশিল্লগনি। ঙসিগী ভারত অসি ইজ ওফ দুইং বিজিনেসতা মপুং ফানা অচেৎপা ৱাফম থম্লি। মসিগী অচেৎপা ৱাফম অসিগা লোইননা ভারত মচা বিল্লিয়ন ১.৪না ২০৪৭ ফাওবদা ভারত অসি চাউখৎপা লৈবাক অমা ওইহল্লগনি। অমসুং ঙসিগী চহি ১৮-২০গী নহাশিং - ঐহাক্না কন্না হোৎনরি মদুদি নখোয় চহি ৪০-৪৫ শুরবা মতমদা, নখোয়গী অঙাংশিং চাউখৎলকপা মতমদা, নখোয়না মখোয়বু চাউখৎলবা ভারত অমদা য়োক্লগনি। মরম অদুনা ঐহাক্না ঐহাক্কী পুন্সি অসি অদোমগী অঙাংশিংগী তুংলমচৎকীদমক কত্থোক্লি।

মরুপশিং,

ঐখোয়না চাউখৎপগী লম্বীদা চংশিল্লি। ঐখোয়না চাউখৎপগী অনৌবা অৱাংবা থাক্তা য়ৌরি। অমসুং মসিগী খোঙচৎ অসিদা সেমিকন্দক্তর সেক্তর অসি অনৌবা থাজবা অমা শেমদুনা অচৌবা শক্তি অমা ওইরক্লি। ঐহাক্না ময়াম পুম্নমক্তা য়াইফ-পাউজেল পীজরি। অৱাংবা পান্দমগা লোয়ননা মাংলোমদা চংশিল্লসি। করিগুম্বা ঐখোয়না মার্ক য়ৌদ্রবদি, ঐখোয়না উবা ফংলগনি, অদুবু ঐখোয়না মাংদা চংশিনবদি ঙমলোই। ময়াম পুম্নমকপু ঐহাক্না নুংঙাইবা ফোংদোকচরি অমসুং থাগৎচরি।

*****